Satana Bona Ena Kara Hadarerea
“Dirava ena ura do umui karaia. Satani do umui tuari henia, vadaeni umui dekena amo do ia heau boio.”—IAKOBO 4:7.
1. Hari inai negai, ‘kara dika tauna ena imana’ ena siahu dainai taunimanima be dahaka idia karaia?
MAI momokani danu Iobu ia gwau: “Tanobada be kara dika tauna ena imana dekenai ia lao.” (Iobu 9:24, NW) Taunimanima edia histori ibounai lalonai hari inai nega be mai anina bada. Dahaka dainai? Badina hari be Satana mai ena demoni ida ese inai tanobada idia biagua ena ‘nega dokona.’ Unai dainai Satana ena siahu amo, ‘kara dika taudia bona koikoi taudia ese edia dika idia habadaia. Tau haida idia koia, bona ma tau haida ese idia danu idia koia.’ (2 Timoteo 3:1, 13) Danu, dagedage, hahemaoro koikoi, hisihisi, raskol, moni hekwarahina, gorere, buruka, bona lalo-metau karadia—unai bona kara ma haida dainai ita lalohisihisi bada.
2. Hari inai negai, Satana ese ita ia dagedage henia neganai, edena bamona ita haheauka diba?
2 Inai tauna badana, Satana Diabolo, ese taunimanima ia dagedage henidia bona Dirava tomadiho henia taudia momokanidia dekenai unai kara ia habadaia. Ia ura idia abidadama noho diba taudia iboudiai be Dirava do idia dadaraia bona ia bona ena demoni anerudia danu do idia dika hebou. To, ita idia hadibaia, bema ita abidadama noho, Diabolo be ita dekena amo do ia heau boio. Iesu hegeregerena, hisihisi ese Dirava ‘kamonai henia dalana’ ita ia hadibaia, bona Iena hebogahisi karana dainai mauri hanaihanai do ita abia diba.—Heberu 5:7, 8; Iakobo 4:7; 1 Petero 5:8-10.
3, 4. (a) Paulo ese dahaka hetoho ia davaria? (b) Paulo be Keristen elda tauna ta dainai dahaka ia laloa bada?
3 Aposetolo Paulo danu be dala idauidau amo hetoho ia davaria. Ia be Keriso ena haroro tauna ena gwaumaoro ia herevalaia neganai, ia toretore ia gwau: “Lau ese idia lau hereaia noho. Lau hereva kava noho, a? Lau hekwarahi bada, idia be sisina, dibura rumai nega momo lau idia koua, lau idia kwadia nega momo bona nega momo kahirakahira lau mase. Nega 5 Iuda taudia ese kwadi 39 dekenai lau idia kwadia. Nega toi au dekenai lau idia dadabaia. Nega ta nadi dekenai lau idia hodoa. Nega toi lagatoi be davara dekenai ia dika, vadaeni davara lalonai kahirakahira lau boio. Hanuaboi ta bona dina ta davara dekenai lau hure. Lauegu laolao be momo, sinavai abata edia lalonai kahirakahira lau mase. Henaoa taudia ese lau idia hadikaia. Lauegu bese taudia ese lau idia hadikaia. Idau bese taudia danu lau idia hadikaia. Hanua lalonai lau be dika bona taunimanima idia noho lasi gabudia dekenai lau be dika. Gadobada dekenai lau dika. Bona varavara koikoi taudia ese lau idia hadikaia. Gaukara bada bona hekwarahi bada lau karaia vadaeni. Nega momo lau be mahuta dala lasi. Nega momo lau hitolo bona ranu mase, bona aniani ania lasi taravatu lau karaia. Nega momo keru ena mamina lau abia momokani, bona lauegu dabua be hegeregere lasi.
4 “Inai tauanina gaudia sibona lasi, to lauegu lalona danu dina ibounai ia hekwarahi, ekalesia orea ibounai lau naria dainai. Bema idia ta ia manoka neganai lau danu iena manoka mamina lau abia. Bema idia ta idia hakaua kerere neganai, lauegu lalona ia hekwarahi mai siahu bada.” (2 Korinto 11:23-29) Vadaeni, tauanina gaudia dekenai dagedage bona hetoho ia davaria neganai, Paulo be ia abidadama noho, bona ia be Keristen elda tauna ta dainai, ia ura dikadika kongregesen lalonai idia manoka tadikaka bona taihu ia hagoadadia, ia durudia idia abidadama noho totona. Hari inai nega lalonai, iena kara be haheitalai namona Keristen elda taudia idia tohotohoa totona!
Dagedage Neganai Idia Abidadama Noho
5 Iseda abidadama ia hadikaia totona Satana ese dahaka gaudia ia gaukaralaidia? Atai dekenai ai torea hegeregerena, Satana ese ia gaukaralaia gau dikana ta be dagedage karana, to ita haheaukalaidia diba. Efeso 6:10, 11 ese ita ia hadibaia, ia gwau: “Lohiabada ena siahu dekena amo do umui siahu, bona Lohiabada ena goada dekena amo do umui goada. Dirava ese ia henia tuari dabua ibounai do umui atoa, vadaeni do umui goada, Satani ena koikoi karadia do umui koua.”
6. Dahaka ese ia hahedinaraia Iehova ena Witness taudia idia “kwalimu momokani”?
6 Hari inai nega dokona lalonai, nega momo Iehova ena Witness taudia be hetoho idauidau idia haheaukalaidia. Unai dainai, Paulo bamona ita hereva diba: “Inai gaudia ita laloa lasi. Badina be Keriso ese ita ia lalokau henia, bona ia dainai do ita kwalimu momokani.” (Roma 8:37) Unai ia hamomokania gauna be inai: Lagani 1933 ia lao 1945 lalonai, Nazi gavamani ia siahu neganai, Germany, Austria, Poland, bona Yugoslavia edia dibura kamepa dekenai Iehova ena Witness taudia idia koudia, bona lagani 1945 ia lao 1989 ai, Eastern Europe dekenai, Komiunis gavamani ese ia dagedage henidia, bona vanegai, Africa bona Latin America ena kahana haida dekenai idia dagedage henidia, to idia abidadama noho.
7. Ethiopia amo, mai edia abidadama bada taudia edia haheitalai namodia haida be dahaka?
7 Lagani 1974 ia lao 1991 ai, Ethiopia dekenai Iehova ena Witness taudia edia abidadama karana be mai ena hebogahisi haheitalai namona. Politikol karana ia abia dae tauna ta be dibura rumana lalonai idia atoa taudia ia naridia bona unuseniai tadikaka ta dekenai ia gwau: “Bema leona be edia koua gabuna amo ai ruhadia be dika bada do idia havaraia lasi, to umui ai ruhaia lou neganai dika bada do umui havaraia!” Unai dagedage taudia be Iehova ena hesiai taudia idia hahisia bada, bona lagani haida murinai, apil kota ena oda dainai Witness taudia haida idia hamasedia. Tadikaka ta ena mase tauanina idia atoa hanua taudia do idia raraia totona, idia ura haida do idia hagaridia. Tadikaka ma haida be unai kota ena hereva idia apil henia, bona kota ma ta ese ia ruhadia, bona idia ‘kwalimu’ abidadama taudia haida be lagani 1994 ai, Addis Ababa lalonai, “Dirava Ena Hahediba” Distrik Hebouhebou ena program dekenai hereva idia henia.a—Ioane 16:33; 1 Korinto 4:9 itaia danu.
8. Satana be dahaka ia karaia “bese idauna haorea” karana ia habadaia toho totona?
8 Satana be unai dagedage bada karana amo tadikaka edia abidadama ia hadikaia diba lasi. Vadaeni, ia gaukaralaia koikoi kara ma haida be dahaka? Apokalupo 12:12 ese inai nega dokona ia gwauraia, ia gwau: “Tanobada bona davara, madi o, nega dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Dirava badinaia taudia edia abidadama be dagedage karana amo ia hadikaia diba lasi, bona ia badu dikadika dainai bese ibounai ia haorea toho, ia ura unai kara amo Iehova ena taunimanima do ia haoredia danu. Unai kara idia gwauraia bese idauna haorea karana bona guna ladana idia gwauraia Yugoslavia dekenai idia karaia; Liberia, Burundi, bona Rwanda dekenai bese idauna ta idia haorea toho danu.
9. Dahaka dainai Satana ena kara dika karadia amo nega momo ia kwalimu lasi? Haheitalai haida oi gwauraia.
9 To, nega momo, Satana ena kara dika be sibona dekenai ia giroa, badina Satana ia havaraia dagedage karadia ese lalo-parara taudia ia hadibadia edia helaro tamona be Dirava ena Basileia dekenai, Iehova ena Witness taudia ese idia harorolaia goadagoada Basileiana unai. (Mataio 12:21) Oibe, kamonai taudia momo be Basileia dekenai idia mai noho! Hegeregere, hekwakwanai bada gabudia Bosnia bona Herzegovina dekenai, March 26, 1994 ai, Iesu ena mase laloatao totona, Memorial hebouna dekenai idia mai taudia edia namba be 1,307, lagani gunana ena namba be 291 amo ia hanaia. Hebou taudia edia namba inai gabu dekenai ia daekau: Sarajevo dekenai (414), Zenica dekenai (223), Tuzla dekenai (339), Banja Luka dekenai (255), bona taoni ma haida dekenai. Kahirakahira ia noho Croatia tanona dekenai idia hebou taudia edia namba be nega ginigunana ia bada daekau 8,326. Ena be edia tano dekenai tuari bona dagedage be bada, to unai ese Iehova ena Witness taudia unai tano idauidau ai ia koudia lasi; idia ese ‘Lohiabada ena mase gwauraia hedinarai ela bona do ia giroa mai’ haheganina idia badinaia noho.—1 Korinto 11:26.
Hekwakwanai Bada Tanona Rwanda Ai
10 Lagani 1993 dekenai, Rwanda lalonai, Basileia pablisa taudia be 2,080, bona “Dirava Ena Hahediba” Distrik Hebouhebou dekenai idia lao taudia edia namba be 4,075, bona 230 be bapatiso idia abia. Unai namba amo, 142 be maoromaoro heduru pioneer gaukara karaia totona aplikeisen idia atoa. Lagani 1994 ai, idia karaia Baibel stadi edia namba be ia bada daekau 7,655 dekenai—ia hahedinaraia Satana be unai ia ura henia lasi momokani! Ena be unai tano taudia momo herea idia gwau idia be Keristen taudia, to unai tano ena bese idaudia rua idia ala-ala heheni karana ia matamaia. Vatican ena L’Osservatore Romano niuspepa ia gwau: “Inai be bese idauna hamasea ore karana badana, bona madi Katolik taudia ese unai kara idia karaia danu.” Unai tuari lalonai idia mase tatau, hahine, bona natudia edia namba be 500,000 bamona, bona milion rua bamona be ruma lasi eiava idia heau mauri ma gabu ta dekenai. Iehova ena Witness taudia be edia dagedage lasi Keristen karana idia badinaia noho, bona idia goada karaia idia noho hebou totona. Iseda tadikaka bona taihu handred haida idia hamasedia. Kongregesen ta dekenai, Basileia pablisa taudia be 65, idia dekena amo tadikaka 13 idia hamasedia, to August 1994 ia abia neganai, idia hebou taudia edia namba be 170. Idau tanodia amo heduru gaudia idia siaia, to Witness taudia ese idia siaia heduru gaudia be idia ginidae guna. Idia roho mauri taudia totona ita guriguri goadagoada.—Roma 12:12; 2 Tesalonika 3:1, 2; Heberu 10:23-25.
10, 11. (a) Rwanda ai, sibodia idia gwauraia Keristen tanona dekenai, dahaka ia vara? (b) Mai edia abidadama misinari taudia edia hereva be dahaka?
11 Unai dika bada negana lalonai, Rwanda dekenai idia noho misinari taudia toi idia roho mauri. Idia toretore, idia gwau: “Ai diba tanobada hegegemadai iseda tadikaka ese unai dika eiava unai dika ia hanaia karadia idia davaria, bona ai diba unai dika karadia be inai tanobada dikana ena nega dokona ena toana. To, ta ese unai dika ena mamina ia abia neganai, ia diba unai be idia vara momokani bona ia diba mauri be gau badana. Baibel ena siri haida edia anina be hari ai laloa momo, bona gau gunadia do ita lalodia lou lasi negana be mai moale danu ai naria noho. To unai nega ai do naria noho lalonai, ai ura Iehova ena hesiai gaukara dekenai ai gaukara goadagoada noho.”
Idia Abidadama Noho Memero Kekeni
12 Iesu ese ia hahedinaraia hereva momokani dainai edia ruma bese taudia ese idia dadaraidia taudia be “nega 100” amo edia hahenamo do ia habadaia. (Mareko 10:29, 30) Unai be ia momokani Entellia dekenai, ia be lagani 10 kekenina ta not Africa ai, bona Dirava ena ladana—Iehova—ia kamonai henia neganai, ia ura henia bada. Iehova ena Witness taudia ida ia stadi bona hebou ia lao henia bona ia giroa lao totona, miniti 90 ia raka; unai ia karaia ena be ena ruma bese taudia ese idia dagedage henia bona nega momo ruma dekenai ia giroa lao neganai idia koua dainai ruma dekenai ia vareai diba lasi. Ena lagani be 13 neganai, ruma-ta-ruma-ta haroro gaukara ia karaia hamatamaia, bona ena ruma bese taudia ese ia idia dagedage henia karana idia habadaia. Dina ta ai ena varavara taudia ese ena ima bona aena idia kwatudia bona hora 7 lalodiai idia rakatania dina siahuna dekenai, nega ta ta ai ranu mai mirona be ia latanai idia negea. Idia kwadia dikadika, ena matana ta idia hadikaia, bona murinai edia ruma amo idia lulua. To, hospital dekenai moni gaukara ia davaria bona gabeai sisita ta ai ia lao. Ena lagani be 20 neganai, bapatiso ia abia bona karaharaga ena ladana ia atoa heduru painia gaukara do ia karaia totona. Ena abidadama karana dainai, ena ruma bese taudia ese edia ruma dekenai idia abia dae lou, bona idia 9 dekenai Baibel stadi idia karaia.
12, 13. (a) Mai ena abidadama kekenina ta ese dahaka ia karaia? (b) Hari inai negai, iseda memero kekeni ese hagoadaia hereva be edeseniai do idia davaria diba?
13 Salamo 116 ese Entellia ia hagoadaia, Salamo 116 siri 1-4 ese ia hagoadaia bada, unai siridia be nega momo ia duahia, idia gwau: “Iehova lau lalokau henia, badina ia ese egu gadona bona egu noinoi ia kamonai henidia. Badina ena taiana amo lau ia kamonai henia, unai dainai lau ese ia do lau boiboi henia. Mase kwanauna ese lau idia guia bona mase gabuna ena hisihisi ese lau idia davaria vadaeni. Lalohisihisi bona daradoko danu ese lau idia botaia. Bena Iehova ena ladana dekenai lau boiboi, lau gwau: ‘Iehova e, oi lau noinoi henia, lau do oi hamauria!’ ” Iehova ese unai bamona guriguri herevadia ia haere henidia!
14. Poland Witness taudia be edena bamona idia hahedinaraia edia abidadama be bada?
14 Iesu ena nega lalonai hegeregerena, Satana be nega momo edia tomadiho idia goadalaia taudia ia gaukaralaidia dagedage karana ia habadaia totona—to taunimanima edia abidadama ia hadikaia diba lasi. Haheitalai namona momokani be iseda tadikaka Poland dekenai, 1994 Yearbook of Jehovah’s Witnesses ese edia sivarai ia gwauraia. Memero kekeni danu ese edia abidadama karana idia hahedinaraia. Lagani 1946 dekenai, lagani 15 kekenina ta dekenai idia gwau: “Katolik taudia bamona emu imana amo korosi toana oi karaia. Bema oi karaia lasi oi do ai pidia!” To ia abidadama noho, bena idia veria lao au momo idia tubu hebou gabunai, idia hahisia bada herea, bena idia pidia mase.—Mataio 4:9, 10 itaia.
Satana Ena Koikoi Kara Ma Haida
15 Satana ena ura dikana be “tanobada ia lohiaia bema lasi ia hadikaia”! Hisihisi idia havaraia gaudia momo ia gaukaralaidia. Vadaeni, aposetolo Paulo ese inai sisiba ia henia be ita hoalaia lasi, ia gwau: “Iseda tuari be taunimanima danu lasi. Iseda tuari be lauma dikadia danu, guba dekenai idia noho. Ma danu inai tanobada ia gunalaia lauma dika badana, mai ena siahu taudia, bona tanobada ena dibura lohiadia be ita ese ita tuari henidia noho. Unai dainai Dirava ese ia henia tuari dabua ibounai umui atoa. Vadaeni nega dikana ia ginidae neganai do umui tuari mai goada danu. Bona do umui tuari noho ela bona tuari ena dokona, do umui gini noho mai kwalimu danu.” (Efeso 6:12, 13) Kohu momo ura henia, moale kara dikadia bona koikoi hereva, Satana ena miusik, sikuli dekenai bamodia tohotohodia, drag ania, bona inuinu kekero—unai kara iboudiai ese iseda mauri idia hadikaia diba. Unai dainai, aposetolo tauna ia sisiba, ia gwau: “Nega ibounai abidadama, emui kesi bamona do umui abia loaloa. Abidadama dekena amo Satani ena diba bona peva mai lahi danu do umui habodoa diba.”—Efeso 6:16.
15, 16. (a) Satana ena ura dikana be dahaka, bona edena bamona ita dadaraia diba? (b) Dahaka dainai ita gwau iseda memero kekeni idia hekwakwanai ena badina ta be lasi?
16 Hari inai negai, unai ita karaia be gau badana, badina Satana ese miusik dikana amo tanobada ia hahonua. Nega haida unai amo Satana idia tomadiho henia. Ripoti ta San Diego County (U.S.A.) ena pulisi opesi amo, ia gwau: “Iniseniai miusik hebouna idia karaia bona ben ese miusik idia gadaralaia neganai memero kekeni 15,000 idia boiboilaia herevana be ‘Natas’—unai be Satan ena ladana ena leta idia duahia giroa.” Taunimanima idia gwau Satana tomadiho henia karana be tano dekenai ia noho gurina bamona, bona memero kekeni haida “idia lalo-hekwarahi bada, idia badu, bona edia turana be lasi dainai,” unai guri lalonai idia moru. Keristen kongregesen lalonai, umui memero kekeni e, umui hekwakwanai ena badina ta be lasi! Lauma dalanai Iehova ese umui dekenai dabua ia henia, bona unai amo Satana ena diba be umui do idia gwadaia diba lasi.—Salamo 16:8, 9.
17. Lalo-metau karana be edena bamona ita hanaia diba?
17 Satana ena diba mai lahi danu ia siaia gaudia edia gaukara be iseda lalona ena goada idia hadikaia. Mauri ena hekwarahi, hegeregere gorere eiava lalo-metau karadia amo, ita ia inai henia tauna ese haida edia lalona ia ania bona do idia laloa gau ta idia karaia namonamo diba lasi. Reana ta do ia lalohisihisi badina Dirava ena hesiai gaukara dekenai hora momo lalonai ia gaukara diba lasi, eiava kongregesen ena hebou haida ia reaia dainai. Mai edia lalokau elda taudia bona mai edia hebogahisi tadikaka bona taihu ma haida ese unai taudia idia durudia diba edia lalo-hisihisi idia hanaia totona. Laloaboio lasi, Iehova ese ena abidadama taudia ia lalokau henidia. (1 Ioane 4:16, 19) Salamo 55:22 ia gwau: “Emu maduna be Iehova dekenai oi atoa, ia ese oi do ia abia isi; ia ese kara maoromaoro taudia do ia naridia, do idia mareremarere lasi.”
18. Satana ena kara idauidau dainai haida be edena bamona idia hekwarahi?
18 Vanegai, Satana ena koikoi “karadia” ma haida idia hedinarai. Tano haida lalodiai, tau bona hahine badadia momo ese lalohadai ta idia abia, idia laloa idia maragi neganai Satana tomadiho henia oreadia ese idia hadikadia. Unai lalohadai be edena gabu amo idia mai? Ena be unai kara idia stadilaia bada, to tanobada ena aonega taudia edia lalohadai unai kara ena badina dekenai be idauidau. Haida idia gwau guna unai kara ia vara dainai gabeai idia laloatao, to ma haida idia gwau unai lalohadai idia abia kava—reana durua namonamo lasi taudia edia hereva dainai—bona haida idia gwau maragi neganai lalo-hekwarahi badana ta idia davaria dainai unai lalohadai idia davaria.
19. (a) Iobu ese dahaka lalohadai ia abia dainai ia hekwarahi? (b) Elda taudia be edena bamona Elihu ena haheitalai namona idia tohotohoa diba?
19 Namona be inai oi laloa, Satana be Elifasa bona Sofara dekena amo Dirava ena hesiai tauna Iobu ia hereva henia, bona unai “lalohadai” dainai ia hekwarahi. (Iobu 4:13-18; 20:2, 3) Unai dainai Iobu be ia “badu,” bona ena ‘kavakava hereva ta’ amo ena lalohadai dekenai ia idia “hagaria” gaudia ia gwauraidia. (Iobu 6:2-4; 30:15, 16) Elihu be regerege lasi dekenai Iobu ena hereva ia kamonai henia, bona mai ena ura danu ia durua idia vara gaudia dekenai Iehova ena lalohadai do ia abia totona. Unai hegeregerena, hari inai negai, mai edia lalo-parara elda taudia ese idia hahedinaraia idia ura lalohisihisi taudia idia durudia, idia dekenai “metau” ma haida idia henidia lasi. To, Elihu bamona, mai edia haheauka danu edia hereva idia kamonai henia bona Dirava ena Hereva, edia lalona ia hamainoa dehorona idia gaukaralaia. (Iobu 33:1-3, 7; Iakobo 5:13-15) Vadaeni, Iobu hegeregerena, bema ta ia lalo-hekwarahi bada, ia dekenai ia vara gauna dainai eiava ia laloa unai gau ia vara dainai, eiava ‘nihi amo . . . eiava matahanai amo hahegari’ gaudia ia itaia dainai, kongregesen lalonai Baibel ena lalo-maino herevadia do ia davaria diba.—Iobu 7:14; Iakobo 4:7.
20. Idia lalo-hekwarahi Keristen taudia be edena bamona heduru idia abia diba lauma dalanai idia goada noho totona?
20 Hari inai nega lalonai, Keristen taudia idia diba Satana be dala idauidau amo lalohadai dikadia taunimanima edia kwarana dekenai ia atoa. Kongregesen lalonai bema haida be unai bamona lalohadai idia davaria dainai idia lalo-hisihisi, namona be idia lalo-parara Satana ese unai hahegari gaudia be edia kwarana dekenai ia atoa badina ia ura edia goada lauma dalanai ia hadikaia. Unai taudia be mai edia haheauka bona mai edia lalo-parara taudia ese Baibel dekena amo idia durudia be gau badana. Bema unai taudia ese Iehova idia guriguri henia bona lauma dalanai elda taudia edia heduru hereva idia badinaia, unai lalohisihisi taudia ese taunimanima edia siahu ia hanaia siahuna do idia abia. (Isaia 32:2; 2 Korinto 4:7, 8) Unai neganai mai edia haheauka danu idia abidadama noho diba bona idia davaria lalohadai dikadia idia koua diba dainai kongregesen ena maino idia hadikaia lasi. (Iakobo 3:17, 18) Oibe, idia ese Diabolo do idia dadaraia diba, edia kara be Iesu ena hegeregerena, ia gwau: “Satani e, idau gabu dekenai oi lao”!—Mataio 4:10; Iakobo 4:7.
21. Satana ena hehuni karadia ita diba totona, Baibel be edena bamona ita ia sisiba henia?
21 Ita diba vadaeni dala idauidau amo Satana ia ura iseda lalohadai ia hadikaia, unai dainai aposetolo Paulo be 2 Korinto 11:3 dekenai inai sisiba ia gwauraia: “Gaigai ese Heva ia koia hegeregerena lauegu gari be laloa idauidau ese umui do idia hakaua kerere, vadaeni Keriso dekena amo do umui siri.” Hari inai negai, Dirava dekena amo idia daudau taudia iboudiai edia kara idia dika, unai dainai ita diba unai be Noa ena nega lalonai hegeregerena, aneru natudia be “taunimanima badadia badadia” bona idia dika bona mai edia dagedage ida taunimanima idia hadikadia. (Genese 6:4, 12, 13; Luka 17:26) Vadaeni, ena badu hahedinaraia totona Satana ese koikoi bona hehuni karadia ia gaukaralaidia, bona Dirava ena taunimanima dekenai ia badu momokani.—1 Petero 5:8; Apokalupo 12:17.
22. Satana ena siahu ita dekenai ia ore neganai, dahaka hahenamo do ita davaria diba?
22 Baibel buka Iobu ena karoa ginigabedia dekenai Satana idia herevalaia lasi. Iena samani koikoi herevana, taunimanima be Dirava idia abidadama henia noho diba lasi herevana unai, be Iobu ena abidadama karana ese ia hakoikoia. Unai hegeregerena, daudau lasi bena mai edia abidadama “hutuma bada herea” taudia be ‘hisihisi bada hereana amo do idia roho mauri’ neganai, Satana be guri dobu masemasena lalonai do idia negea. Mai edia abidadama tatau bona hahine, abidadama tauna Iobu danu, be unai “hutuma bada herea” taudia ida paradaiso ena hahenamo do idia moalelaidia, unai hahenamo be Iobu ese ia davaria hahenamona do idia hanaia momokani!—Apokalupo 7:9-17; 20:1-3, 11-13; Iobu 14:13.
[Footnotes]
a Lagani 1992 Yearbook of Jehovah’s Witnesses, rau 177 itaia.
Riviu Henanadaidia
◻ Abidadama karana dekenai Iobu, Iesu, bona Paulo edia haheitalai namodia be dahaka?
◻ Idia abidadama noho taudia be edena bamona Satana idia dadaraia?
◻ Memero kekeni be edena bamona Satana ena koikoi karadia idia dadaraia diba?
◻ Dahaka ita karaia Satana ena kara idauidau ita haheaukalaidia totona?
5. Dahaka ita karaia dagedage ita haheaukalaia totona?
[Picture on page 7]
Ethiopia dekenai, Meswat bona Yoalan edia tamana idia hamasea, to ena kara idia tohotohoa bona hari ful-taim dekenai Iehova idia hesiai henia
[Picture on page 7]
Entellia, mai ena abidadama not Africa kekenina