Oiemu Ladana Oi Gimaia

RUMA hairaidia ia palanilaia tauna be palani karaia tauna namona ena ladana ia abia. Sikuli dekenai ena gaukara dekenai ia kwalimu kekeni matamata idia gwauraia diba momo stiuden ta. Gau ta ia karaia lasi tauna danu ese ladana ia abia, ia idia gwauraia lahedo tauna. Baibel ese ladana namona ena namo ia hahedinaraia, ia gwau: “Ladana namona ena namo ese kohu bada ena namo ia hereaia, ladana namona ese siliva bona golo ia hereaia.”​​—⁠Aonega Herevadia 22:​1, An American Translation.

Nega sisina daudau lalonai ta ese ia karaia kara maragidia momo amo ladana namona ia abia diba. To kavakava karana tamona ese ladana namona ia hadikaia diba. Hegeregere, matabodaga karana tamona ese taunimanima vairanai ta ena ladana ia hadikaia diba. Baibel ena Aonega Herevadia bukana ena karoa 6 lalonai, idaunegai Israela ena King Solomona ese iseda ladana bona iseda hetura karana Iehova Dirava ida idia hadikaia diba lalohadai bona kara ia sisibalaia. Idia haida be ita karaia kava gwauhamata, lahedo, koikoi, bona matabodaga karadia​—⁠Iehova ese ia inai henia kara badadia unai. Unai sisiba ita badinaia neganai, heduru ita abia iseda ladana namona ita gimaia totona.

Oi Karaia Kava Gwauhamata amo Sibona Oi Ruhaia

Aonega Herevadia ena karoa 6 ena siri ginigunadia idia gwau: “Egu natuna tau e, oi ese oi gwauhamata vadaeni, tau ta ena abiatorehai davana do oi karaia, a? Oi ese oi hereva kava dainai, gwauhamata ta oi gwauraia, bona inai gwauhamata be oi dekenai tarapu ta, oiemu uduna ena hereva ese, hekwakwanai gauna oi dekenai ia havaraia, a? Inai bamona oi karaia neganai, oi be unai tau ena siahu henunai. To inai tarapu dekena amo, do oi heau mauri dalana be inai: Unai tau dekenai do oi lao haraga, bona do oi noia, oiemu gwauhamata dekena amo oi do ia ruhaia.”​—⁠Aonega Herevadia 6:​1-3.

Unai aonega herevana ena sisiba be taunimanima ma haida edia bisinesi karadia lalonai ita vareai lasi, bona ita diba lasi taudia edia bisinesi karadia lalonai ita vareai lasi momokani. Oibe, Israela taudia ese ‘bese tamona tauna, ia ogogami bona iena aniani abia dalana be lasi tauna, idia ubua’ be namo. (Levitiko 25:​35-38) To idia ura dikadika gau matamata idia karaia Israela taudia haida be bisinesi karadia idaudia lalonai idia vareai bona heduru moni idia abia totona, taunimanima ma haida edia lalona idia veria idia ese “gwauhamata” idia karaia, unai amo unai abiatorehai dekenai idia be mai edia maduna. Hari danu unai bamona karadia idia vara diba. Hegeregere, reana moni idia heniatorehai bisinesi idia ura tau ma ta ese abiatorehai tauna ida pepa do ia sainia bema idia laloa reana unai tauna do ia hegeregere lasi. Unai bamona gwauhamata, ma haida totona, ita karaia haraga be aonega karana lasi! Reana moni dalanai do ita hekwarahi, reana banika bona heniatorehai taudia ma haida vairanai iseda ladana do ia hadikaia!

Edena bamona bema ita ese kara ta ita karaia badina guna ita laloa unai be aonega karana to ita laloa namonamo neganai ita itaia ia be kavakava karana? Ita abia sisiba be ita manau bona ‘unai tau dekenai do ita lao haraga, bona do ita noia’​—⁠mai goada ida. Namona be ita karaia diba gaudia ibounai ita karaia unai gauna ita hamaoromaoroa totona. Buka ta ia gwau: “Oi hekwarahi goada ela bona emu inai tauna ida unai gauna umui hamaoromaoroa, oi gwauhamatalaia gauna ese oi eiava oiemu ruma bese taudia do ia hadikaia lasi totona.” Bona unai oi karaia haraga be namo, badina king tauna be ma ia gwau: “Do oi mahuta lasi, bona do oi hekure diho lasi. Unai tarapu dekena amo do oi roho mauri, manu ta o dia ta ese labana tauna, dekena amo ia roho mauri bamona.” (Aonega Herevadia 6:​4, 5) Namona be oi karaia diba neganai, aonega lasi gwauhamatana amo ruhaia dalana oi tahua, oi ia tarapua be namo lasi.

Dimairi Bamona Oi Gaukara Goada

Solomona ia gwau: “Lahedo taudia ese, dimairi edia kara bamona do idia karaia be namo.” Dimairi maragina ena kara amo edena aonega ita abia diba? King ia haere: “Dimairi be mai edia king lasi, mai edia lohia ta lasi, bona mai edia biaguna lasi. To medu lasi neganai edia aniani idia haboua, bona medu ena nega totona idia hegaegae noho.”​—⁠Aonega Herevadia 6:​6-8.

Dimairi edia gaukara dalana namona ita hoalaia diba, bona idia gaukara hebou namonamo. Idia laloa diba lasi, to vaira negana totona aniani idia haboua. Idia be ‘mai edia king ta, lohia ta, eiava biaguna ta lasi.’ Momokani, dimairi edia kwini ia noho, to iena gaukara tamona be gatoi ia havaraia bona ia be unai dimairi oreana ena sinana. Idia ia biagua lasi. Ena be biaguna ta ese ia oda henidia lasi bona gunalaia tauna ta ese edia gaukara ia tahua lasi, dimairi be mai hesiku lasi ida edia gaukara idia karaia noho.

Dimairi bamona, namona be ita danu ita gaukara goada, ani? Ita gaukara goada bona iseda gaukara ita hanamoa toho be namo, herevana ta ese iseda gaukara ia tahua eiava lasi. Oibe, sikuli dekenai, moni gaukara gabuna dekenai, bona lauma gaudia ita karaia lalonai, namona be ita gaukara goada. Dimairi ese iena gaukara goada karana amo namo ia abia hegeregerena, Dirava ia ura ita ese “iseda gaukara ena anina do ita moalelaia.” (Hadibaia Tauna 3:​13, 22; 5:18) Gaukara goada ena davana namodia be iseda lalona ia goeva bona iseda gaukara ita moalelaia.​—⁠Hadibaia Tauna 5:12.

Solomona ese edia haere ia naria lasi henanadai rua ia henia, lahedo tauna be ena lahedo karana amo ia hanogaia totona, ia gwau: “Lahedo tauna e, oi hekure kava ela bona edena negai? Edena negai mahuta dekena amo do oi noga?” King ese ena hereva ia hevasehalaia, ma ia gwau: “Oi gwau, ‘Lau be laga-ani totona, nega sisina sibona do lau hekure. Lauegu imana do lau lokua, do lau laga-ani sisina.’ To oi mahuta neganai, ogogami ese oi dekenai do ia ginidae, dadidadi tauna bamona.” (Aonega Herevadia 6:​9-11) Lahedo tauna ia hekure neganai, ogogami be raskol tauna bamona, ia do ia davaria haraga, bona dabu be tuari tauna bamona do ia mai. Lahedo tauna ena uma gabu be karaharaga ava bona ava ginigini ese do idia hahonua. (Aonega Herevadia 24:​30, 31) Karaharaga ena bisinesi ese moni ia haboioa. Gaukara biaguna be nega daudau lalonai lahedo tauna dekenai do ia haheauka, a? Bona lahedo dainai stadi karana ia karaia lasi stiuden tauna ia laloa diba sikuli dekenai do ia kwalimu, a?

Oi Koikoi Lasi

Solomona ese taunimanima vairanai ta ena ladana ia hadikaia bona Dirava ida ena hetura karana ia hadikaia karana ma ta ia herevalaia, ia gwau: “Kara kava taudia, kara dika taudia, be idia raka lao, hereva koikoi idia gwauraia loaloa noho. Edia matana dekena amo toa idia karaia noho. Edia aena bona edia imadia kwakikwakidia, dekena amo danu toa idia karaia noho. Edia laloa koikoi dekena amo, kara dika karaia daladia danu idia tahua noho, bona kerere, mai heai danu idia havaraia noho.”​—⁠Aonega Herevadia 6:​12-14.

Unai hereva ese koikoi tauna ia hahedinaraia. Nega momo koikoi tauna ese ena koikoi karana ia hunia toho. Edena dala ai? “Hereva koikoi” amo sibona lasi to ena tauanina ena toana amo danu. Diba bada tauna ta ia gwau: “Ta ese imana gaukaralaia daladia, gado regena ena toana, bona vairana ena toana idauidau be koikoi totona ia gaukaralaia diba; vairana ena toana namo ia hahedinaraia to ia ese lalohadai dikana bona lalo-tamona lasi laumana ia hunia.” Unai bamona tau dikana ese kara dikadia ia palanilaia noho bona heiriheiri ia havaraia hanaihanai. Ia dekenai dahaka do ia vara?

Israela ena king ia haere: “Unai dainai dika bada ese, idia dekenai do ia vara haraga, bona do ia hadikadia ore, ta do ia mauri lasi.” (Aonega Herevadia 6:15) Koikoi tauna ena kara idia hahedinaraia neganai, maoromaoro ena ladana ia hadikaia. Daika ese do ia abidadama henia lou? Dika bada do ia davaria, badina “koikoi taudia ibounai” be mase hanaihanai taudia huanai idia noho. (Apokalupo 21:⁠8) Namona be “nega ibounai kara maoromaoro” ita karaia.​—⁠Heberu 13:18.

Iehova Ia Inai Henia Gaudia Oi Inai Henia

Dika inai henia karana​—⁠unai be iseda ladana idia hadikaia karadia amo ita ia koua gauna badana! Dika inai henia karana ita habadaia be namo, ani? To, dahaka ita inai henia be namo? Solomona ia gwau: “[“Iehova ese ia inai henia gaudia 6; oibe,” “NW”] Lohiabada ia ura lasi gaudia 7 be inai: Hekokoroku ena toana. Uduna mai ena koikoi. Kerere lasi taudia alaia karana. Kara dika karaia totona laloa idia karaia taudia. Kara dika karaia totona idia haraga momo taudia. Uitnesi koikoi tauna. Iena turana edia huanai, kerere ia havaraia tauna.”​—⁠Aonega Herevadia 6:​16-19.

Unai aonega herevana ia gwauraia karadia 7 be gau badadia bona idia lalonai be kara dika idauidau ibounai idia noho. “Hekokoroku toana” bona “kara dika karaia totona laloa” karana be iseda lalona dekenai ita karaia kara dikadia. “Uduna mai ena koikoi” bona “uitnesi koikoi” karana be hereva amo ita karaia kara dikadia. “Kerere lasi taudia alaia karana” bona “kara dika karaia totona idia haraga momo” karana be iseda kara amo ita karaia kara dikadia. Bona Iehova ese ia inai henia bada tauna be idia noho hebou namonamo taudia huanai heiriheiri havaraia karana ia moalelaia tauna. Unai gaudia edia momo be 6 amo idia bada daekau 7 dekenai ese ia hahedinaraia unai lista ese unai bamona kara iboudiai ia hahedinaraia lasi, badina taunimanima ese idia karaia kara dikadia edia namba ia bada daekau hanaihanai.

Momokani, Dirava ese ia inai henia gaudia dekenai inai henia karana ita habadaia be gau badana. Hegeregere, “hekokoroku toana” eiava hekokoroku idia hahedinaraia karadia ibounai ita dadaraia be namo. Bona udu mauri karana dikana ita dadaraia be gau badana, badina ia ese “turana edia huanai, kerere ia havaraia” haraga. Reana ita kamonai sivarai dikana, mai badina lasi maumau herevana, eiava koikoi herevana ita gwauraia loaloa be “kerere lasi taudia alaia karana” lasi, to ia amo ma ta ena ladana namona ita hadikaia diba.

“Edia Hairai Do Oi Ura Henia Lasi”

Solomona ese ena sisiba ena kahana ma ta ia hamatamaia neganai, ia gwau: “Egu natuna tau e, oiemu tamana ena oda hereva do oi kamonai henia, bona oiemu sinana ena hadibaia hereva, be do oi rakatania lasi. Nega ibounai edia hereva do oi dogoatao noho. Oiemu kudouna dekenai do oi kwatudia.” Badina be dahaka? “Oi raka loaloa neganai, inai edia hereva ese oi do idia hakaua. Do oi hekure neganai, edia sisiba ese oi do idia naria. Oi noga neganai, idia ese oi dekenai do idia hereva henia.”​—⁠Aonega Herevadia 6:​20-22.

Tama sina ese Baibel ena hadibaia herevadia hegeregerena ita idia hadibaia dainai, momokani unai ese matabodaga karadia amo ita ia gimaia diba, a? Oibe. Ita ia hamaoroa: “Badina edia oda be lamepa bamona, bona edia hadibaia hereva be diari, bona edia matakani be mauri dalana. Io, oiemu tamana bona sinana edia sisiba herevadia ese, hahine dikana dekena amo oi do idia hamauria, bona ariara hahine edia hereva koikoi dekena amo danu.” (Aonega Herevadia 6:​23, 24) Dirava ena Hereva ena sisiba ita laloatao noho bona ‘eda raka ena hakaua lamepa bamona bona eda dala hadiaria noho diari bamona’ ita gaukaralaia noho neganai, ita do ia durua hahine dikana, eiava tau dikana, ena boiboi herevadia ita dadaraia totona.​—⁠Salamo 119:105.

Aonega king ia gwau: “Unai bamona hahine edia hairai do oi ura henia lasi, bona do oi naria namonamo, edia matadia dekena amo oi do idia koia garina.” Dahaka dainai? “Badina be ariara hahine dainai, tau ta be ogogami tauna do ia lao, bona heudahanai hahine dainai, tau ta ese iena mauri do ia haboioa.”​—⁠Aonega Herevadia 6:​25, 26.

Solomona ia gwau heudahanai hahine be ariara hahine hegeregerena, a? Reana. Eiava reana ia ese ariara hahine ida matabodaga karana amo idia vara gaudia bona tau ma ta ena adavana ida heudahanai karana amo idia vara gaudia ia hahegeregerea. Ariara hahine ida matabodaga karadia ia karaia tauna be “ogogami tauna” ai do ia lao. Reana hisihisi bona ena tauanina ia hadikaia momokani pokese goreredia, AIDS danu, ia abia diba. To, ma ta ena adavana ida heudahanai ia karaia tauna be Taravatu henunai dika bada do ia davaria haraga. Heudahanai hahine ida ia mahuta hebou tauna ese ena “mauri do ia haboioa” diba. Buka ta ia gwau: “Lebulebu karadia dainai ena mauri hakwadogia karana . . . sibona ia gwauraia lasi. Unai kara dika tauna ena panisi be mase.” (Levitiko 20:10; Deuteronomi 22:22) To, herevana unai bamona hahine be mai hairai bada, to ita ura henia lasi be namo.

‘Lahi Ena Gida be Emu Kemena Dekenai Oi Abia Loaloa Lasi’

Solomona ese heudahanai karana ena dika ia hahedinaraia goevagoeva totona, ma ia henanadai: “Tau ta ese lahi ena gida, be iena kemena dekenai do ia abia loaloa, a? Iena dabua do idia gabua lasi, a? Tau ta ese lahi ena gida, edia latanai do ia raka, a? Iena aena do idia gabua lasi, a?” Unai haheitalai ena anina ia gwauraia totona, ia gwau: “Tau ma ta ena adavana ia sihari henia tauna, danu be unai bamona. Ia ese unai hahine ia abia dainai, iena kerere davana do ia davaria momokani.” (Aonega Herevadia 6:​27-29) Unai bamona kara dika tauna ese panisi do ia abia momokani.

Ita ia hadibaia, ia gwau: “Hitolo dainai tau ta ese aniani ia henaoa neganai, taunimanima ese unai tau idia gwauraia dika momokani lasi.” To, “idia davaria neganai, unai henaoa tauna ese ia henaoa gauna, ena davana nega 7 do ia henia lou. Iena ruma ena kohu ibounai do ia henia haorea.” (Aonega Herevadia 6:​30, 31) Idaunegai Israela dekenai, henaohenao tauna ese ia henaoa gaudia edia davana do ia henia, herevana unai dainai ena kohu ibounai ia haboioa.a Unai dainai heudahanai tauna ese ena panisi ia abia momokani be namo, ia karaia karana be mai badina namona lasi!

Solomona ia gwau: “Ia heudahanai noho tauna be mai ena aonega lasi.” Aonega lasi tauna ia laloa namonamo lasi, badina ia ese “sibona ena mauri ia hadikaia ore noho.” (Aonega Herevadia 6:32) Reana toana be ia be ladana namo tauna, to unai bamona tauna ena lalona ia dika momokani.

Heudahanai tauna ia davaria gaudia be unai sibona lasi. “Bero bona hemarai do ia davaria, bona iena hemarai be do ia noho hanaihanai, doko lasi. Badina be mama ese, tau ta ena lalona ia habadua momokani, bona ia ese davana do ia henia neganai, ia be do ia bogahisihisi henia diba lasi. Moni davana do ia abia dae lasi, bona harihari gaudia momo dekena amo, iena badu do oi hakerua diba lasi.”​—⁠Aonega Herevadia 6:​33-35.

Henaohenao tauna ese ia henaoa gaudia edia davana ia henia diba, to heudahanai tauna ese ena kara ena davana ia henia diba lasi. Ia badu adavana dekenai edena davana do ia henia? Kara dika tauna ena noinoi herevadia ese hebogahisi idia havaraia lasi. Heudahanai tauna ese ena kara dika ia hanamoa lou diba lasi. Hemarai bona dika be sibona ena ladana dekenai do idia noho. Danu, ia ese ena mauri davalaia gauna ia henia diba lasi eiava moni amo ruhaia dalana do ia hoia diba lasi.

Heudahanai bona iseda ladana namona bona Dirava ena ladana idia hadikaia karadia bona lalohadai ma haida amo ita gini siri momokani be aonega dalana! Unai dainai, namona be ita naria namonamo gwauhamata ita karaia kava garina. Namona be gaukara goada karana bona koikoi lasi karana ese iseda ladana idia hahairaia. Bona Iehova ese ia inai henia gaudia ita inai henia toho lalonai, namona be ia bona taunimanima vairanai iseda ladana do ia namo.

[Footnote]

[Picture on page 25]

Ma ta ena abiatorehai pepana sainia karana dekenai oi naria namonamo

[Picture on page 26]

Dimairi bamona do oi gaukara goada

[Picture on page 27]

Ta ia hahisia udu mauri karana oi dadaraia