Headava Lasi To Noho Hebou Karana Dekenai Baibel be Dahaka Ia Gwau?

Baibel ena haere

Baibel ia gwau Dirava ia ura taunimanima ese “matabodaga karadia [idia] dadaraia.” (1 Tesalonika 4:3) Baibel ai inai hereva “matabodaga karadia” ese heudahanai, tatau ese tatau o hahine ese hahine idia sihari henia karana, bona idia headava lasi tau bona hahine idia mahuta hebou karana ia herevalaia danu.

• Dahaka dainai Dirava ia ura tau bona hahine idia headava guna bema idia ura noho hebou?

• Headava lasi to noho hebou sibona be edena bamona?

• Edena dala ai headava idia hagoadaia diba?

Dahaka dainai Dirava ia ura tau bona hahine idia headava guna bema idia ura noho hebou?

• Headava be Dirava amo. Ia ese tau bona hahine ginigunana ia hatamonaia neganai, headava ia hamatamaia. (Genese 2:22-24) Tau bona hahine idia headava lasi, to idia noho hebou sibona be iena ura lasi.

• Dirava ia diba dahaka be namo taunimanima totona. Ia ese headava ia karaia, unai amo tau bona hahine do idia noho hebou hanaihanai, bona unai ese ruma bese ia durua bona gimaia diba. Mani inai haheitalai oi laloa. Ruma kohu ta hanamoa dalana be ena buka o manual ese ia hahedinaraia, unai hegeregerena Dirava ena sisiba ese iseda ruma bese maurina ia hanamoa diba. Dirava ena taravatu idia badinaia taudia be hanaihanai namo idia davaria.​—⁠Isaia 48:17, 18.

  

• Headava lasi bona idia mahuta hebou karana be mai ena dika. Hegeregere, ta ia rogorogo kava diba, mahuta hebou karana ese ia havaraia gorere idauidau ia abia diba, bona ia lalometau diba.

• Dirava ese tau bona hahine dekenai maoro ia henia mahuta hebou karana amo natudia idia havaraia totona. Dirava dekenai mauri be helaga, bona natudia havaraia karana be harihari gauna hereadaena. Bona Dirava ia ura unai harihari gauna ita matauraia, anina be headava ita matauraia.​—⁠Heberu 13:4.

Headava lasi to noho hebou sibona be edena bamona?

Headava idia moalelaia totona, idia headava lasi to nega sisina lalona idia noho hebou sibona be hegeregere lasi. Tau bona hahine edia hetura karana do ia goada bema idia noho namonamo bona idia gaukara hebou edia hekwakwanai idia hamaoromaoroa totona.a Headava ese do ia durudia idia noho namonamo totona.​—⁠Mataio 19:6.

Edena dala ai headava idia hagoadaia diba?

Headava goevadaena ta ia noho lasi. To headava ia goada diba bema Baibel ena sisiba idia badinaia. Hegeregere:

• Emu adavana ena namo oi atoa guna.​—⁠1 Korinto 7:3-5; Filipi 2:3, 4.

• Ta ta umui lalokau henia bona matauraia.​—⁠Efeso 5:25, 33.

• Emu hereva oi biagua namonamo.​—⁠Aonega Herevadia 12:18.

• Oi manau bona dika gwauatao haraga.​—⁠Kolose 3:13, 14.