Imana Gaukaralaia Bona Vairana Ena Toana

BESE haida dekenai taunimanima idia hereva neganai edia imana idia gaukaralaia momo, to ma haida be unai bamona lasi. To, ita gwau diba taunimanima ibounai be idia hereva neganai, dala ta ai edia vairana ena toana ia idau bona edia imana idia gaukaralaia. Unai be momokani ta ida idia hereva neganai bona taunimanima idia hereva henia neganai.

Iesu bona ena hahediba taudia ginigunadia ese edia imana idia gaukaralaia. Nega ta, ta ese Iesu ia hadibaia ena sinana bona tadidia ese idia ura ia idia hereva henia. Iesu ia gwau: “Lauegu sinana bona lauegu tadina be daika?” Bena Baibel be ma ia gwau: “Iena diba tahua taudia dekenai imana ia duduia, ia gwau, ‘Lauegu sinana bona lauegu tadina be inai.’” (Mat. 12:​48, 49) Kara 12:17 bona 13:​16, bona siri ma haida, ese idia hahedinaraia aposetolo Petero bona Paulo idia hereva neganai edia imana idia gaukaralaia.

Lalohadai bona hemami be gado regena sibona amo lasi, to imana gaukaralaia dalana bona vairana ena toana amo ita hahedinaraia danu. Bema hereva henia tauna ese unai ia karaia namonamo lasi, reana toana be ia herevalaia gauna ia laloa bada lasi. To unai ia karaia namonamo neganai, ena hereva ese anina bada do ia havaraia. Telefon dekenai oi hereva neganai danu, bema imana bona vairana ena toana oi gaukaralaia, emu gado regena ese oi herevalaia gauna ena anina bona emu hemami unai gauna dekenai ia hahedinaraia namonamo. Unai dainai, herevana hereva oi henia eiava oi duahiduahi, herevana kamonai taudia ese oi idia itaia eiava sibona edia Baibel idia itaia, to imana oi gaukaralaia bona emu vairana ena toana be mai anina bada.

Namo lasi emu imana gaukaralaia dalana bona vairana ena toana be ta ese oi dekenai ia hadibaia bamona. Oi ese kiri dalana eiava badu dalana oi stadilaia lasi. Unai hegeregerena, namona be emu imana gaukaralaia dalana ese emu lalona ena hemami ia hahedinaraia. Emu hemami hegeregerena emu imana oi gaukaralaia be namo herea.

Imana gaukaralaia ena badina be rua: toana hahedinaraia totona bona mamina habadaia totona. Toana hahedinaraia totona oi gaukaralaia neganai, gau ta ena bada bona ena gabu eiava kara ta oi hahedinaraia. Sikuli dekenai imana gaukaralaia kahana oi hanamoa toho neganai, nega tamona eiava rua sibona oi karaia lasi. Emu hereva ibounai lalonai oiemu kara bamona imana oi gaukaralaia maoro. Bema unai be mai ena hekwarahi, reana kahana ta oi duduia, gau ta ena daudau, ena bada, ia noho gabuna, eiava gau haida edia padana idia hahedinaraia herevadia oi tahua be namo. To, nega momo emu hereva sibona oi laloa bada be hegeregere, ma haida edia lalohadai oi laloa lasi, to dina ta ta ai oi karaia hegeregerena oi hereva bona kara. Ta be ena kara toana ia lalo-hekwarahilaia lasi neganai, imana ia gaukaralaia be auka lasi.

Mamina habadaia totona imana oi gaukaralaia neganai, hemami bona abidadama oi hahedinaraia. Lalohadai idauidau oi hahedinaraia, oi hamauria, bona edia anina oi habadaia. Mamina habadaia totona imana oi gaukaralaia be mai anina bada. To oi naria namonamo! Badina be imana be karaharaga dala tamona ai oi gaukaralaia matamaia diba. Bema dala tamona ai oi gaukaralaia loulou, taunimanima be unai do idia raraia bona unai ese emu hereva ia hanamoa lasi. Bema sikuli naria tauna ia hahedinaraia unai be oiemu hekwakwanai, namona be nega sisina toana hahedinaraia totona sibona emu imana oi gaukaralaia. Gabeai, mamina habadaia totona imana oi gaukaralaia matamaia lou.

Mamina habadaia totona imana oi gaukaralaia ena bada bona karaia dalana namona oi laloa neganai, oi hereva henia taudia edia hemami oi laloa. Bema kamonai taudia dekenai emu imana oi duduia reana do idia moale lasi. Bese haida lalodiai, bema tau ta ese dala idaudia ai ena imana ia gaukaralaia, hegeregere hoa toana hahedinaraia totona imana amo uduna ia koua, unai idia gwauraia hahine ena kara. Gabu haida ai, hahine ese ena imana ia gaukaralaia momo karana be hemataurai lasi karana. Unai dainai unai gabudia ai, taihu ese edia vairana ena toana idia gaukaralaia namonamo. Bona bema haida sibona idia noho neganai imana oi gaukaralaia badabada, gabu ibounai dekenai unai be kiri gauna.

Hereva henia karana do oi manadalaia neganai, mamina habadaia totona emu imana oi gaukaralaia karana ese sibona emu hemami korikorina, emu abidadama bona ura momokanina, do ia hahedinaraia. Unai ese emu hereva ena anina idia habadaia.

Emu Vairana Ena Toana. Emu vairana ena toana ese emu hemami korikorina ia hahedinaraia, emu tauanina ena kahana ma ta be unai bamona lasi. Emu matana, emu uduna ena toana, bona emu kwarana ia noho dalana, idia ibounai, be mai anina bada. Ena be hereva ta oi gwauraia lasi, to emu vairana ena toana ese ura lasi, lalo-dika, daradara, hoa, bona moale ia hahedinaraia diba. Oi hereva bona emu vairana ena toana ese unai hemami ia hahedinaraia neganai, taunimanima ese oi herevalaia gauna idia itaia bona mamia. Havaraia Tauna ese masolo momo herea​—⁠idia ibounai be 30 idia hanaia​—⁠be emu vairana dekenai ia atoa. Oi kiri neganai idia kahirakahira 15 bamona idia gaukara.

Herevana oi be platfom amo oi hereva eiava haroro gaukara oi karaia, oi ese taunimanima dekenai sivarai namona, edia kudouna ia hamoalea diba sivaraina, oi harorolaia. Kiri ena toana ese unai ia hamomokania. To, bema emu vairana ese hemami ta ia hahedinaraia lasi, reana emu ura momokanina idia daradaralaia.

To unai sibona lasi, emu kiri ese ma haida dekenai ia hahedinaraia idia oi lalo-namo henia. Bona hari inai negai unai be gau badana, badina taunimanima ese idia diba lasi taudia idia gari henia. Oi kiri dainai taunimanima edia hemami ia namo bona oi herevalaia gauna idia kamonai namonamo.