Baibel Gaukaralaia Totona Hagoadadia

ITA ura taunimanima ibounai edia lalona ita veria, Dirava ena Hereva, Baibel, idia laloa totona. Unai buka helagana be ita harorolaia sivaraina ena badina, bona ita ura taunimanima idia diba ita herevalaia gauna be ita sibona eda hereva lasi, to Dirava ena hereva. Taunimanima ese edia abidadama Baibel dekenai idia hagoadaia.

Haroro Gaukara Lalonai. Haroro gaukara totona oi hegaegae neganai, idia ura idia kamonai taudia dekenai do oi duahia siri ta eiava haida oi abia hidi. Ena be Baibel idia herevalaia bukadia be hereva haida sibona amo oi hahedinaraia gwauraia, to nega momo Baibel siri namona ta oi duahia be namo. Baibel ena siahu be bada mamoe bamona taudia do ia hakaua, to iseda hereva be unai bamona lasi. Bema Baibel oi duahia diba lasi, reana ena hereva oi gwauraia diba. Aposetolo taudia edia negai, Baibel ena lokua toretoredia be momo lasi. To, Iesu bona ena aposetolo taudia be Baibel ena hereva idia gwauraia momo. Namona be ita danu ese siri haida ita laloatao toho bona haroro gaukara lalonai ita gaukaralaia, reana nega haida eda hereva amo ita gwauraia sibona.

Bema Baibel oi duahia be hegeregere, namona be oi dogoatao namonamo, oi duahia neganai ruma tauna ese ia itaia totona. Bema ruma tauna be sibona ena Baibel ia itaia noho, reana ia duahia gauna do ia abia dae.

To namona be oi laloatao, Baibel hahanaia taudia haida ese Dirava ena Hereva idia haidaua sisina. Reana idia hahanaia herevadia be Baibel idia torea gado ginigunana ena anina idia hahedinaraia lasi. Hari idia hahanaia Baibel momo ese Dirava ena ladana idia hahedinaraia lasi, gado ginigunana ena anina mase taudia edia noho dekenai idia haidaua, bona Baibel ai ia hedinarai Dirava ena palani tanobada totona idia hunia. Idia haidaua gaudia be ta dekenai oi hahedinaraia totona, reana idia hahanaia Baibel ma haida eiava unai gado ai idia hahanaia Baibel gunadia edia siri badadia oi hahegeregerea. Buka Helaga Herevalaia bukana ai, ita gaukaralaia momo siridia be Baibel idauidau dekenai idia hahanaia daladia idia hahegeregerea. Hereva momokani idia ura henia taudia ibounai ese hereva momokani idia davaria neganai idia moale.

Kongregesen Heboudia Dekenai. Namona be kongregesen heboudia dekenai iboudiai idia hagoadaia Baibel do idia gaukaralaia. Unai ese dala idauidau ai namo ia havaraia. Kamonai taudia ia durua hereva idia lalodia totona. Hereva henia tauna ia gwauraia gaudia be sibona edia matana amo idia itaia. Bona kamonai matamata taudia idia itaia ita abia dae gaudia be Baibel ena hereva.

Siri oi duahia neganai nega momo kamonai taudia be edia Baibel do idia itaia bema unai bamona idia karaia totona idia oi hagoadaia. Dala namona be idia oi noia edia Baibel idia kehoa.

Oi, hereva henia tauna, ese edena siri edia anina oi habadaia do oi abia hidi, bona kamonai taudia oi hagoadaia unai siri do idia itaia. Namona be emu hereva badadia idia hamomokania siridia oi duahia. Bena, nega hegeregerena, emu hereva idia durua siridia ma haida oi duahia.

To momokani, nega momo siri oi gwauraia eiava kamonai taudia oi hamaoroa siri do idia kehoa be reana hegeregere lasi. Bema siri ta oi duahia bona kamonai taudia ese siri ginigunana idia do davaria lasi neganai ma ta oi duahia, nega sisina murinai do idia hesiku bona Baibel do idia kehoa toho lasi. Idia oi itaia. Idia momo ese siri idia davaria neganai, oi duahia.

Oi laloa guna. Siri oi gwauraia bena nega sisina oi hereva noho murinai oi duahia. Unai dala ai kamonai taudia ese siri idia davaria totona oi naria kava negana oi hamaragia. Ena be kamonai taudia ese siri idia davaria totona nega oi henia dainai reana gau momo oi herevalaia diba lasi, to unai kara ese namo bada ia havaraia.