Edena Negai Kwarana Idia Koua Bona Dahaka Dainai?

Keristani hahine be edena negai ena kwarana do ia koua bona dahaka dainai unai bamona ia karaia be namo? Mani Paulo ena hereva ita laloa. Ia ese hakaua herevadia haida ia henia, unai amo Dirava ia hamoalea abia hidi ita karaia diba. (1 Korinto 11:3-16) Paulo ese ia gwauraia gaudia toi do ita laloa: (1) Hahine be edena gaukara idauidau ai ena kwarana do ia koua, (2) edena gabu ai kwarana do ia koua, bona (3) ia karaia ena badina.

Gaukara idauidau. Paulo be gau rua ia herevalaia: Guriguri bona peroveta gaukarana. (Siri 4, 5) Oibe, guriguri be Iehova hereva henia dalana. Hari inai negai, peroveta gaukara anina be Keristani tauna ta ese ia karaia Baibel hadibaia gaukara idauidau. Paulo ena hereva ena anina be, hahine be nega ibounai ia guriguri o Baibel ena hereva momokani ia hadibaia neganai, ena kwarana do ia koua, a? Lasi. To, edena gabu ai ia guriguri o hadibaia gaukara ia karaia ese do ia hahedinaraia taihu be ena kwarana do ia koua o lasi.

Edena gabu ai. Paulo be gabu rua ia herevalaia—ruma bese bona kongrigeisen lalonai. Ia gwau: “Hahine edia kwarana be edia tau, . . . hahine ta bema mai kwara gauna lasi ese Dirava ia guriguri henia, o Dirava ena hereva ia harorolaia neganai, ia be iena kwarana, iena adavana ia hahemaraia.” (Siri 3, 5) Iehova ia gwau ruma bese lalonai hahine ena kwarana be ena adavana. Bema hahine be ena tau ia matauraia lasi bona Iehova ese tau dekenai ia henia maduna be hahine ese ia huaia, ia be ena adavana ia hahemaraia unai. Hegeregere, bema ena tau ia noho to hahine be Baibel stadi ta ia karaia, iena tau ena kwara dagina ia matauraia dainai, iena kwarana do ia koua. Herevana, iena tau be ia bapatiso eiava lasi, to hahine ese unai bamona do ia karaia badina tau be ruma bese ena kwarana.a Danu, bema ia be ena bapatiso vadaeni natuna mero vairanai ia guriguri o ma ta ia stadi henia neganai, ena kwarana ia koua be namo. Unai ia karaia badina Keristani kongrigeisen lalonai idia bapatiso tadikaka be kwara dagina ena siahu idia abia.

Paulo be kongrigeisen ia herevalaia neganai, ia gwau: “Bema tau ta ese inai hereva totona ia ura hepapahuahu neganai, lauegu haere be inai: Ai be inai kara sibona ai karaia, Dirava ena ekalesia orea ibounai ese danu idau kara idia karaia lasi.” (Siri 16) Keristani kongrigeisen lalonai, kwara dagina be bapatiso tadikaka dekenai idia henia. (1 Timoteo 2:11-14; Heberu 13:17) Dirava ese tatau sibona ia abia hidi elda bona hesiai taudia edia maduna idia huaia bona iena orea taudia idia naria totona. (Kara 20:28) To, nega haida bapatiso tadikaka idia noho lasi neganai, taihu ese tadikaka edia maduna ta ia huaia diba. Hegeregere, haroro gaukara ena hebou idia karaia diba badina bapatiso tadikaka ta be ia noho lasi. Eiava, taihu be bapatiso tadikaka ta ida palani ia karaia Baibel stadi ta idia karaia hebou neganai, taihu ese ena kwarana do ia koua. Unai be Keristani kongrigeisen ena gaukara ta dainai namona be taihu be ena kwarana ia koua, unai amo ia hahedinaraia ia be tatau ese idia karaia gaukara ia karaia.

To, tomadiho ena gaukara haida lalonai taihu be kwarana do ia koua lasi. Hegeregere, hebou ai haere ia henia, haroro gaukara ai ena adavana o tadikaka ta ia bamoa, o ena bapatiso lasi natudia ia stadi henia o idia guriguri hebou neganai, kwarana do ia koua lasi. Oibe, bema taihu ia daradara bona ia diba lasi dahaka do ia karaia, diba ma haida ia tahua be namo.b Bema ia daradara bona ena lalomamina dekenai ia laloa kwarana ia koua be namo, unai ia karaia be kerere lasi, laulau ese ia hahedinaraia bamona.

Ena badina. Siri 10 ai, Keristani hahine ese unai maduna ia hagugurua be namo ena badina rua ia noho: “Inai anina be hahine be tau henunai ia noho, bona inai be toa ta, aneru do idia itaia totona.” Badina ginigunana be, inai hereva “toa ta” ena anina do ita laloa. Unai hereva ena anina be dahaka? Hahine be ena kwarana ia koua neganai, ia hahedinaraia ia be Iehova ese bapatiso tadikaka dekenai ia henia siahu ia matauraia. Unai dala amo ia hahedinaraia ia be Iehova Dirava ia badinaia bona ia lalokau henia. Badina iharuana be inai hereva “aneru do idia itaia totona” ese ia hahedinaraia. Hahine ese kwarana ia koua dainai, edena dala ai aneru goadadia dekenai haheitalai namona ia hahedinaraia?

Aneru idia ura itaia Iehova ena orea taudia ibounai guba bona tanobada dekenai be Dirava ena siahu idia matauraia. Goevadae lasi taudia edia haheitalai ese aneru ia durudia danu. Badina idia danu be Iehova ena dala idia matauraia be namo—guna negadiai aneru haida be unai idia karaia lasi. (Iuda 6) Hari inai negai, reana aneru idia itaia kongrigeisen lalonai Keristani hahine ta ena diba ese bapatiso tadikaka ta ena diba ia hanaia; to, taihu be mai moale ida tadikaka ena kwara dagina henunai ia noho. Nega haida, unai hahine be horoa Keristani taihu ta bona gabeai Keriso ida do ia lohia hebou. Unai horoa taihu ese do ia abia gaukarana be aneru edia gaukara do ia hanaia, bona ia be Keriso ida guba ai do ia lohia. Ia be haheitalai namona aneru taudia dekenai! Oibe, aneru milioni momo vairanai taihu ibounai be mai manau ida Dirava idia badinaia bona hemataurai karana idia hahedinaraia be hahenamo badana ta!