Bisinesi ai Hepapahuahu Hamaoromaoroa Daladia

Paulo be 1 Korinto 6:1-8 ai tadikaka ta ese ma tadikaka ta be kota dekenai ia abia lao karana ia herevalaia. Unai siri ai ena lalohisihisi ia hahedinaraia, badina Korinto ai idia noho Keristani taudia haida be edia tadikaka idia abia lao “Dirava diba lasi taudia edia kota vairanai.” (Siri 1) Paulo be kota dekenai do idia lao lasi ena badina haida ia gwauraia. Danu ia gwau unai bamona hekwakwanai be kongrigeisen lalonai idia hamaoromaoroa be namo. Unai sisiba ia henia ena badina mani ita tahua, bona ena sisiba lalonai ia gwauraia lasi gaudia ma haida do ita herevalaia danu.

Bema ita bona tadikaka ma ta be bisinesi ita karaia bona hepapahuahu ta ia vara, namona be Iehova ena dala ai iseda hekwakwanai ita hamaoromaoroa. Namo lasi sibona iseda ura dalanai unai ita karaia. (Aonega Herevadia 14:12) Iesu ese ia hahedinaraia hepapahuahu ia bada momokani garina dainai, ita hamaoromaoroa haraga be namo. (Mataio 5:23-26) To madi, Keristani taudia haida be idia badu dikadika bona edia tadikaka be kota dekenai idia abia lao. Paulo ia gwau: “Emui Keristani varavara tauna inai bamona umui kota henia ena anina korikori be inai: Emui Keristani mauri ia moru momokani.” Dahaka dainai? Badina unai ese kongrigeisen ena ladana bona ita tomadiho henia Diravana ena ladana namona ia hadikaia. Unai dainai, namona be Paulo ena henanadai ita laloa: “Haida ese umui idia hadikaia neganai, o emui gau idia henaoa neganai, umui haheauka diba lasi, a?”—Siri 7.

Paulo ia gwau kongrigeisen lalonai hekwakwanai hamaoromaoroa totona Dirava ese dala ta ia hegaegaelaia vadaeni. Elda taudia be Keristani tatau bona Baibel ena hereva momokani idia diba dainai, idia be mai edia aonega. Bona Paulo ia gwau idia be “mauri ena gaudia” dekenai ‘Keristani taudia edia huanai idia vara hepapahuahu gaudia idia hamaoromaoroa diba.’ (Siri 3-5) Iesu ese kerere badadia, hegeregere ladana hadikaia bona henaohenao karadia hamaoromaoroa daladia toi ia gwauraia: (1) Hepapahuahu taudia sibodia ese unai hekwakwanai do idia hamaoromaoroa toho; (2) bema unai dala ginigunana ai idia hamaoromaoroa lasi, witnes ta o rua do idia abia lao; bona (3) bema unai dala iharuana ai idia hamaoromaoroa lasi, kongrigeisen ena elda taudia dekenai do idia abia lao.—Mataio 18:15-17.

Oibe, elda taudia be loea o bisinesi taudia bamona do idia karaia lasi. Idia ese unai tadikaka huanai idia vara hekwakwanai hamaoromaoroa daladia do idia abia hidi lasi. To, idia ura tadikaka idia durua Baibel ena hakaua herevadia idia badinaia bona mai maino ida edia hekwakwanai do idia hamaoromaoroa. Bema hekwakwanai ta be ia auka idia hamaoromaoroa totona, sekit naria tauna idia hereva henia diba o Iehova ena Witnes taudia edia brens opesi idia tore henia diba. To, Paulo ena sisiba lalonai gau haida ia gwauraia lasi. Unai gaudia haida be dahaka?

Nega haida, taunimanima be kota dekenai idia lao badina taravatu hegeregerena ai, idia ura karaia gauna be kota sibona ese ia karaia diba bona maino dalanai edia hekwakwanai idia hamaoromaoroa. Hegeregere, kota sibona ese headava hadokoa pepana ia karaia diba, natuna naria ena maoro ia henia diba, tau ia oda henia diba ia rakatania adavana bona natudia durua monina ia henia totona, bona ta be insurens moni hida ia abia ia makaia totona. Bona bema kampani ta ena moni ia ore bona ia be mai ena abiatorehai oi dekenai, kota dekenai oi lao diba, unai amo kampani ena kohu idia hoihoilaia neganai, emu moni sisina idia henia diba. Bona kota dekenai idia lao ta ena will pepana hamomokania totona. Danu, nega haida ta ese kota dekenai tadikaka ia samania dainai, kota dekenai ia lao unai hekwakwanai hamaoromaoroa totona.a

Bema unai kota karana be mai maino ida idia karaia, idia be Paulo ena sisiba idia dadaraia lasi.b To, Keristani tauna ese do ia laloa bada gauna be, Iehova ena ladana do ia helaga bona kongrigeisen lalonai maino bona lalotamona do ia noho. Keriso ena murinai idia raka taudia edia kara badana be ta ta dekenai lalokau idia hahedinaraia, bona “lalokau be sibona ena gau ia tahua lasi.”—1 Korinto 13:4, 5; Ioane 13:34, 35.