Hebogahisi Karana Ia Dibaia

1. Iona ena laolao be edena bamona, bona Nineva ia laloa neganai dahaka hemami ia abia?

IONA dekenai nega ia noho ena laolao ia laloa totona. Ia be kilomita 800 mai kahana bamona do ia raka, unai be hua tamona bamona. Unai laolao ia hamatamaia totona abia hidi do ia karaia, dala kwadogina eiava dala daudauna do ia abia hidi. Dala daudauna be seif, to koura bona ororo momo do ia hanaia. Suria ena tano kaukau do ia raka hagegea, sinavai haida hegeregere Euperate sinavai badana do ia hanaia, bona Suria, Mesopotamia, bona Asuria edia taoni bona hanua idauidau taudia huanai do ia noho. Dina idia hanaia lalonai, ia be Nineva siti kahirakahira do ia ginidae, unai dainai ia lalohekwarahi bada.

2. Edena dala ai Iona ia diba ena asainmen ia hagugurua be namo?

² Iona be inai ia diba: Do ia giroa lou lasi bona ena asainmen ia hagugurua be namo. Karoa 13 ai ita itaia bamona, guna ena asainmen ia rakatania, to Iehova ese mai haheauka ida davara ena lai gubana bona hoa dalanai gwarume badana amo ia hamauria karana amo Iona ia hadibaia. Dina toi murinai, gwarume badana ese kone dekenai Iona ia mumutaia. Unai murinai Iona be manau tauna ai ia lao bona hereva ia badinaia.​—Iona, karoa 1, 2.

3. Iehova ese Iona dekenai edena kara ia hahedinaraia, to dahaka henanadai ia vara?

³ Nega iharuana Iehova ese Iona ia hamaoroa Nineva dekenai do ia lao, peroveta tauna Iona be hereva ia badinaia bona ist kahanai ia lao, unai be laolao daudauna. (Iona 3:1-3 duahia.) To, Iehova ena matahakani ese ia durua ena kara ia haidaua totona, a? Hegeregere, Iehova ese Iona ia hebogahisi henia dainai, davara amo ia hamauria, bona ena gwau-edeede karana dainai ia panisia lasi, to nega iharuana ia dekenai asainmen ia henia. Unai ibounai murinai, Iona be ma haida hebogahisi henia karana ia dibaia, a? Nega momo goevadae lasi taudia ese hebogahisi idia hahedinaraia be auka. Iona amo dahaka do ita dibaia?

Hahemaoro Sivaraina Bona Nineva Taudia ese Idia Karaia Karana

4, 5. Dahaka dainai Iehova ese Nineva ia gwauraia “siti badana,” bona Iehova amo dahaka ita dibaia?

⁴ Iona ese Iehova ena lalohadai Nineva taudia dekenai ia lalopararalaia lasi. Baibel ia gwau: “Nineva be siti bada herea.” (Iona 3:3) Iona bukana ai nega toi Iehova ese Nineva ia gwauraia “siti badana.” (Iona 1:2; 3:2; 4:11) Dahaka dainai Iehova dekenai unai siti be mai anina bada?

⁵ Idaunegai Nineva be siti ginigunana ta, Abata Badana murinai Nimiroda ese ia haginia. Siti ma haida be Nineva siti lalonai idia noho dainai, ta be siti ena kahana ta amo kahana ma ta ia lao totona dina toi do ia raka. (Gen. 10:11; Iona 3:3) Nineva ai dubu hairaidia bona bildin idauidau idia noho bona edia magu be goada. To Iehova Dirava be unai gaudia ia laloa lasi, Ia be siti ai idia noho taunimanima ia laloa bada. Unai negai, Nineva dekenai taunimanima momo herea idia noho. Ena be taunimanima edia kara be dika, to Iehova be idia ia laloa bada. Ia dekenai mauri be mai anina bada bona ia diba taunimanima ta ta idia helalo-kerehai bona kara maorona do idia badinaia.

6. (a) Dahaka dainai Iona be Nineva taudia ia gari henia? (Futnout itaia danu.) (b) Iona ena haroro gaukara amo dahaka ita dibaia?

⁶ Iona be Nineva dekenai ia vareai neganai, unuseniai taunimanima 120,000 mai kahana idia noho, unai dainai Iona ia gari.a Dina ta lalonai ia raka ela bona hutuma idia noho gabuna ia itaia, bena gabu maorona ia abia hidi ia haroro matamaia totona. Edena dala ai unai taudia ia hereva henia? Ia be Asuria gado ia diba, a? Eiava Iehova ese hoa dalanai ia durua, a? Ita diba lasi. Reana Iona be iena Heberu gado ai ia haroro bona ta ese Nineva taudia totona ia hahanaia. Iena haroro herevana be auka lasi dalanai ia gwauraia bona toana be ia dekenai do idia moale lasi badina ia hamaorodia: “Dina 40 murinai Nineva be do ia moru.” (Iona 3:4) Mai goada ida unai hereva ia gwauraia loulou. Ia be ia gari lasi bona abidadama karana ia hahedinaraia, unai bamona kara be hari Keristani taudia ese idia badinaia be namo.

7, 8. (a) Nineva taudia be Iona ena hereva dainai dahaka idia karaia? (b) Nineva ena king be Iona ena hereva dainai dahaka ia karaia?

⁷ Nineva taudia momo be Iona ena hereva idia kamonai. Ia laloa unai taudia ese ia do idia badu henia bona dagedage henia. To, gau namona ta ia vara. Idia be Iona ena hereva idia abia dae. Iena hereva be gabu ibounai dekenai ia lao haraga. Daudau lasi murinai, unai siti taudia ibounai be Iona ese ia perovetalaia dika idia herevalaia noho. (Iona 3:5 duahia.) Taga bona ogogami, goada bona manoka, matamata bona buruka taudia ibounai be idia helalo-kerehai bona idia aniani lasi. Daudau lasi king ese taunimanima idia helalo-kerehai noho sivaraina ia kamonai.

⁸ Iona ena hereva dainai king danu ia helalo-kerehai. King be Dirava ia gari henia dainai, ena terona amo ia toreisi, ena king dabua ia haidaua, bona ena taunimanima ida dabua dikana idia hahedokilaia, bona “lahi ena kahu dekenai ia helai.” King be “iena lohia taudia” ida aniani lasi taravatu ta idia halasia. Taunimanima ibounai ia oda henia puse dabua idia atoa totona bona edia animal dekenai puse dabua do idia atoa danu.b Mai manau ida ia abia dae iena taunimanima be idia kara dika bona idia dagedage. King ia laloa bema iena taunimanima idia helalo-kerehai, Dirava ese idia do ia hebogahisi henia, bena ia gwau: “Reana Dirava . . . ena badu do ia ore bona do ita mase lasi!”​—Iona 3:6-9.

9. Taunimanima haida be Nineva ena sivarai dekenai dahaka idia abia dae lasi, to edena bamona ita diba edia lalohadai be kerere?

⁹ Haida idia gwau, Nineva taudia edia helalo-kerehai karana be karaharaga ia vara lasi. To, Baibel idia diba momo taudia idia gwau unai kara be idaunegai taudia ese idia badinaia karana bona karaharaga edia kara idia haidaua. Badina ma ta danu be ita diba, Iesu Keriso ese gabeai Nineva taudia edia helalo-kerehai sivaraina ia gwauraia. (Mataio 12:41 duahia.) Iesu be unai sivarai ia diba, badina ia be guba dekenai ia noho bona unai nega ai ia vara gaudia ia itaia. (Ioa. 8:57, 58) Namo lasi ita laloa taunimanima do idia helalo-kerehai diba lasi, herevana idia be dagedage bada taudia. Iehova sibona ese ta ena kudouna ai ia noho gauna ia itaia diba.

Dirava Ena Hebogahisi Bona Taunimanima Edia Hahemaoro Karana Ena Idau

10, 11. (a) Nineva taudia idia helalo-kerehai dainai Iehova be dahaka ia karaia? (b) Dahaka dainai ita diba Iehova ena hahemaoro karana be maoro?

¹⁰ Nineva taudia edia helalo-kerehai karana dainai Iehova be dahaka ia karaia? Gabeai Iona ia gwau: “Dirava momokanina ia itaia edia kara dikadia amo idia helalo-kerehai dainai, ena lalona ia haidaua bona idia ia hadikaia lasi.”​—Iona 3:10.

¹¹ Unai ena anina be guna Iehova ese Nineva taudia totona ia karaia hahemaoro be maoro, a? Oibe. Baibel ia gwau Iehova ena kara ibounai be maoromaoro momokani. (Deuteronomi 32:4 duahia.) Iehova ena badu Nineva taudia dekenai be ia ore. Badina ia itaia edia kara idia haidaua bona ia laloa idia ia panisia be anina lasi. Unai nega ai Dirava be hebogahisi ia hahedinaraia.

12, 13. (a) Edena dala ai Iehova ia laloa maoromaoro, ena lalohadai ia haidaua bona hebogahisi ia hahedinaraia? (b) Dahaka dainai Iona ena peroveta herevana be momokani?

¹² Tomadiho gunalaia taudia edia hahediba dalana dainai momo idia laloa Dirava be kara auka bona hebogahisi lasi tauna. To Iehova be laloa maoromaoro tauna, ena lalohadai ia haidaua diba bona hebogahisi ia hahedinaraia. Kara dika taudia ia do panisia lasi neganai, ena hesiai taudia amo idia ia hadibaia guna. Badina ia ura itaia kara dika taudia be Nineva taudia bamona idia helalo-kerehai bona edia kara idia haidaua. (Ese. 33:11) Iehova ese ena peroveta tauna Ieremia ia hamaoroa: “Lau ese bese ta eiava basileia ta lau kokia, veria diho bona hadikaia herevana be egu ura negana ai lau gwauraia diba, bona bema unai bese be ena kara dika ia rakatania, vadaeni lau gwauraia dika be do ia vara lasi, danu egu lalona do lau haidaua bona lau ura mailaia dika do lau havaraia lasi.”​—Ier. 18:7, 8.

¹³ Iona ena peroveta hereva be koikoi, a? Lasi, Nineva taudia be edia kara dika dainai unai peroveta hereva ia gwauraia. To unai hadibaia hereva dainai edia kara idia haidaua. Bema Nineva taudia be unai kara dika idia karaia lou, Dirava ese idia do ia hahemaoro henia diba. Gabeai unai hegeregerena ia vara.​—Sef. 2:13-15.

14. Iehova be Nineva taudia ia hebogahisi henia dainai, Iona be dahaka ia karaia?

¹⁴ Dika ia vara lasi neganai, Iona be edena bamona ia kara? Baibel ia gwau: “Iona be unai gauna dekenai ia moale lasi bona ia badu dikadika.” (Iona 4:1) Iona ia gwauraia guriguri ese ia hahedinaraia toana be Dirava dekenai ia badu! Iona ia gwau ena tano korikorina ai ia noho be namo. Ia gwau ia diba Iehova be Nineva do ia hadikaia lasi, bona unai ekskius ia gaukaralaia Tarasisi dekenai ia heau lao ena badina ia hahedinaraia totona. Bena ia gwau ia mase be namo, ia mauri be dika.​—Iona 4:2, 3 duahia.

15. (a) Dahaka dainai Iona ia lalohisihisi bona ia badu? (b) Iehova ese edena bamona ia kara henia?

¹⁵ Iona be dahaka dainai ia lalohisihisi? Iona ena lalohadai ita diba lasi, to ita diba ia ese Nineva taudia ibounai dekenai Iehova ena hahemaoro ia harorolaia. Bena idia ese ena hereva idia abia dae. Bona dika ta ia vara lasi. Ia laloa ia do idia kirikirilaia eiava ia gari badina do idia gwau ia be peroveta tauna koikoina, a? Ita diba lasi, to ia be taunimanima edia helalo-kerehai eiava Iehova ena hebogahisi karana dainai ia moale lasi. To, toana be ia badu dikadika, sibona dekenai ia hebogahisi, bona ia lalohisihisi badina ena ladana namona ia dika. To, hebogahisi Diravana be Iona dekenai gau namona ia itaia. Iona ena kara dainai Iehova ese ia panisia lasi, to mai hebogahisi ida ia nanadaia: “Oi badu be maoro, a?” (Iona 4:4) Iona be ia haere, a? Baibel ese ia gwauraia lasi.

16. Edena dala ai taunimanima haida be Dirava ida do idia lalotamona lasi, bona Iona ena haheitalai amo dahaka ita dibaia?

¹⁶ Reana ita gwau diba Iona ena kara be kerere, to namona be ita laloatao goevadae lasi taudia be nega haida, Dirava ida idia lalotamona lasi. Haida idia laloa, Iehova ese dika ia koua be namo eiava karaharaga kara dika taudia ia hahemaoro henia be namo, eiava idaunegai inai tanobada ena oromana dikana ia haorea be namo. Iona ena haheitalai ese ita ia hadibaia, bema Iehova Dirava ida ita lalotamona lasi, namona be iseda laloa dalana ita hamaoromaoroa, to Iehova lasi.

Iehova ese Iona Dekenai Hebogahisi Karana Ia Hadibaia

17, 18. (a) Iona be Nineva ia rakatania murinai, dahaka ia karaia? (b) Iehova ese tubutubu gauna ta amo ia karaia hoa karana dainai Iona be dahaka ia karaia?

¹⁷ Peroveta tauna be mai lalohisihisi ida Nineva ia rakatania bona iena ruma dekenai ia lao lasi, to ist kahana dekenai ia lao, unuseniai idia noho ororo haida amo Nineva ia itaia diba. Bena ruma maragina ta ia karaia bona do ia naria. Reana ia ura siti hadikaia karana do ia itaia. Edena dala ai Iehova ese unai kwara auka tauna dekenai hebogahisi karana do ia hadibaia?

¹⁸ Hanuaboi ai, Iehova ese tubutubu gauna ta ia hatubua. Iona ia noga neganai, unai tubutubu gauna ia itaia, ena rau badadia ese dina ena siahu ia koua, ia haginia ruma maragina ia hereaia. Iona be “unai tubutubu gauna dekenai ia moale bada.” Reana ia laloa unai hoa karana be Dirava ena hahenamo bona lalonamo ena toa. To, Iehova ia ura Iona totona gau ma haida ia karaia danu, dina ena siahu amo ia gimaia bona ena badu ia hamaragia sibona lasi. Ia ura Iona ena kudouna do ia hamarerea. Unai dainai hoa karadia ma haida ia karaia. Ia ese biluga ia siaia bona unai tubutubu gauna ia hamasea. Bena ia ese “ist kahana amo lai siahuna” ia siaia bona dina ena siahu dainai Iona be “kahirakahira ia moru.” Iona be ia lalometau lou, bona Dirava ia noia do ia mase totona.​—Iona 4:6-8.

19, 20. Edena dala ai Iehova ese tubutubu gauna ia gaukaralaia Iona ia hadibaia totona?

¹⁹ Iehova ese Iona ia nanadaia lou, tubutubu gauna ia mase dainai ia badu be maoro, a? Iona be ia helalo-kerehai lasi, to sibona ena maoro ia gwauraia, ia gwau: “Io, lau badu be maoro, lau badu dikadika dainai lau ura lau mase.” Unai dala amo Iehova ese Iona dekenai gau ta ia hadibaia.​—Iona 4:9.

²⁰ Dirava ese Iona ia hamaoroa, ia be hanuaboi ta lalonai ia tubu kava tubutubu gauna ena mase dekenai ia hebogahisi, to unai be ia ese ia hadoa lasi bona ia hatubua lasi. Bena Dirava ia gwau: “Lau danu be Nineva siti badana totona do lau hebogahisi lasi, a? Unuseniai, maoro bona kerere edia idau idia diba lasi taunimanima 120,000 mai kahana idia noho, mai edia animal momo danu.”​—Iona 4:10, 11.c

21. (a) Iehova ese Iona dekenai dahaka ia hadibaia? (b) Edena dala ai Iona ena sivarai ese ita ia durua mai momokani ida sibona iseda kara ita sekea totona?

²¹ Iehova ese haheitalai amo ia hadibaia gauna oi lalopararalaia, a? Iona be gau ta ia karaia lasi unai tubutubu gauna ia naria totona. To Nineva taudia totona, Iehova be edia mauri ena Badina bona ia ese idia ia naria, havaraia gaudia ibounai dekenai ia karaia hegeregerena. Dahaka dainai Iona be unai tubutubu gauna maragina ia laloa bada, to taunimanima 120,000 bona edia animal ia laloa bada lasi? Iona be sibona ena namo ia laloa bada, a? Ia be tubutubu gauna dekenai ia hebogahisi badina unai ese dina ena siahu amo ia koua. Ia badu Nineva taudia dekenai badina sibona ena namo ia laloa bada, ia ura lasi ena ladana namona do ia dika. Iona ena sivarai ese ita ia durua mai momokani ida sibona iseda kara ita sekea totona. Ita ibounai be unai bamona lalohadai ita abia danu, ani? Ita moale badina Iehova be mai haheauka ida ita ia hadibaia, unai amo iseda namo sibona ita laloa lasi, to Iehova hegeregerena, hebogahisi bada karana bona ma haida edia namo laloa karana do ita hahedinaraia noho!

22. (a) Hebogahisi karana dekenai Iehova ena aonega sisiba ese edena dala ai Iona ia durua? (b) Unai leseni amo dahaka ita dibaia be namo?

²² Henanadai be inai, Iona be unai leseni ese ia durua, a? Iona bukana be Iehova ese ia henia henanadai amo ia doko. Haida idia gwau, Iona be ia haere lasi. To Iona bukana ese unai ia haerelaia. Hamomokania gaudia ese idia hahedinaraia Iona sibona ese Iona bukana ia torea. Inai peroveta tauna be ena tano dekenai ia giroa lou neganai, inai sivarai ia torea. Ita piksaia diba, unai mauri lagani bada tauna, mai ena aonega bona manau tauna be ena kerere, gwau-edeede karana bona kwara auka karana ena sivarai ia torea bona hebogahisi ia ura lasi hahedinaraia karana ena sivarai ia torea neganai ena kwarana ia hamarerea noho. Unai ese ia hahedinaraia, Iona be Iehova ese ia henia aonega sisiba amo mai anina bada leseni ia dibaia. Iona be hebogahisi karana ia dibaia. Ita danu, a?​—Mataio 5:7 duahia.