STADI 14

Point Badadia Hahedinaraia Namonamo

Heberu 8:1

POINT BADANA: Kamonai taudia oi durua emu tok idia kamonai bona badinaia, bona point ta ta ese oi gwauraia gauna eiava sinado ena badina ia hahedinaraia be namo.

KARAIA DALANA:

Namona be emu tok be mai ena badina. Tok oi hegaegaelaia neganai, namona be oi laloa bema oi henia tok ese kamonai taudia dekenai gau ta do ia hadibaia, gau ta idia abia dae, eiava idia do ia hagoadaia, bena unai hegeregerena tok oi henia. Namona be point ta ta ese oi henia tok ena badina ia hahedinaraia.

Sibona oi nanadaia: Kamonai taudia ese do lau herevalaia topik ai, dahaka henanadai do idia laloa? Bema haere idia kamonai murinai, dahaka henanadai ma haida do idia henia? Bena emu tok ena point ta ta oi herevalaia namonamo, unai amo kamonai taudia ese unai tok do idia badinaia, do idia lalopararalaia bona unai hereva do idia abiadae.
Emu tok ena sinado gwauraia loulou. Emu tok ibounai lalonai emu sinado oi gwauraia loulou, eiava hereva edia anina ma haida oi gwauraia diba.
Emu hereva ena point badadia oi hahedinaraia namonamo. Emu sinado idia herevalaia point badadia sibona oi abia hidi unai amo idia henia taim oi badinaia diba. Namona be point badadia momo oi abia hidi lasi, to point ta ta oi hahedinaraia namonamo neganai, oi laga-ani sisina, bena point ma ta oi gwauraia.

Emu tok oi hamatamaia neganai, reana point badadia oi herevalaia, unai amo kamonai taudia do idia badinaia eiava tok ena dokonai unai point badadia oi gwauraia loulou unai amo kamonai taudia do idia laloatao.