Baibel be Dirava Ena Hereva Ita Totona

Iehova be ita dekenai harihari gauna namona ta, Baibel ia henia, bona ena buka maragidia ibounai be 66. To reana do oi laloa: ‘Baibel be edeseni amo ia mai? Daika ese ia havaraia?’ Unai henanadai ita haerelaia totona, mani Baibel lalonai Dirava ena hereva ita abia dalana ita herevalaia.

1. Bema Baibel be taunimanima ese idia torea, dahaka dainai ita gwau ia be Dirava amo ia mai?

Baibel be lagani 1,600 lalonai tatau 40 bamona ese idia torea, unai be lagani 1513 B.C.E. ia lao 98 C.E. bamona. Ena be Baibel idia torea taudia edia mauri daladia be idauidau, to Baibel ena hereva ibounai be hegeregere. Edena dala ai unai idia karaia diba? Badina Baibel be Dirava amo ia mai. (1 Tesalonika 2:​13 duahia.) Baibel torea taudia be sibodia edia lalohadai idia torea lasi. To lauma helaga ese idia “ia hasiahua hegeregerena, idia ese Dirava amo idia mai hereva idia gwauraia.”a (2 Petero 1:21) Dirava ese lauma helaga amo taunimanima ia hasiahua o ia hakaua iena lalohadai idia torea totona.​—2 Timoteo 3:16.

2. Daika be Baibel amo namo ia abia diba?

“Bese ibounai bona iduhu ibounai, gado ibounai, bona kopi idauidau taudia ibounai” be Baibel lalonai ia noho sivarai namona amo namo idia davaria diba. (Apokalupo 14:6 duahia.) Dirava ia ura Baibel be gado momo ai do idia hahanaia. Buka ma haida be unai bamona lasi. Hari, kahirakahira taunimanima ibounai be Dirava ena hereva idia duahia diba. Herevana edeseni ai idia noho eiava dahaka gado idia hereva, to Baibel idia duahia diba.

3. Iehova ese edena dala ai Baibel ia gimaia?

Baibel torea totona inai gaudia, hegeregere animal ena kopina bona rei ta ladana, papyrus idia gaukaralaia. To Baibel idia laloa bada tatau ese kopi momo idia karaia namonamo. Herevana siahu taudia idia ura Baibel idia hadikaia, to ma haida be Baibel idia gimaia, ena be idia diba do idia mase. Gau ta ese Iehova do ia koua diba lasi, ita ia hereva henia totona. Baibel ia gwau: “Iseda Dirava ena hereva be ia noho hanaihanai.”​—Isaia 40:8.

DIBA MA HAIDA ABIA

4. Baibel ese ena Havaraia Tauna ia hahedinaraia

VIDIO itaia. Bona 2 Timoteo 3:16 duahia, bena inai henanadai herevalaia.

VIDIO: Daika ese Baibel Ia Havaraia?​—Ena Kahana Ta (2:48)

• Bema taunimanima ese Baibel idia torea, dahaka dainai idia gwauraia Dirava ena Hereva?

• Oi abia dae Dirava ese ena lalohadai be Baibel idia torea taudia dekenai ia henia, a?

5. Baibel idia hadikaia diba lasi

VIDIO: Baibel Idia Laloa Bada​—Ena Kahana Ta (William Tyndale) (6:17)

• Hari oi diba taunimanima be dala idauidau ai Baibel idia gimaia dainai, unai ese emu lalona ia veria Baibel oi duahia totona, a? Dahaka dainai?

Salamo 119:97 duahia, bena inai henanadai herevalaia:

• Dahaka ese taunimanima momo ia durua Baibel idia hahanaia bona hariharilaia, ena be edia mauri idia haboioa diba?

6. Taunimanima ibounai edia buka

Histori lalonai Baibel be idia hahanaia bona hariharilaia momo bukana. Kara 10:34, 35 duahia, bena inai henanadai herevalaia:

• Dahaka dainai Dirava ia ura iena Hereva be gado momo ai idia hahanaia bona hariharilaia?

• Baibel dekenai dahaka oi ura henia?

POINT BADANA

Baibel be Dirava ena Hereva, bona ia ura taunimanima ibounai ese idia abia be namo.

Riviu

• Dirava ese lauma helaga amo tatau haida ia hasiahua Baibel idia torea totona ena anina be dahaka?

• Baibel idia gimaia, hahanaia, bona hariharilaia karana amo dahaka oi moalelaia?

• Dirava be dala ia karaia oi ia hereva henia totona, unai oi diba neganai emu hemami be edena bamona?

REFERENS ITAIA

Maniuskrip gunadia bona hari idia noho Baibel trensleisen edia histori oi duahia.

“Baibel Ita Abia Dalana” (Noga!, November 2007)

Dala badadia toi amo Baibel idia gimaia namonamo ena sivarai oi duahia.

“Baibel​—Ia Boio Lasi Sivaraina” (Gima Kohorona No. 3 2016)

Baibel hahanaia totona edia mauri idia haboioa diba taudia ese idia karaia gaudia edia sivarai oi itaia.

Baibel Idia Laloa Bada (14:26)

Baibel ena kopi momo idia karaia bona idia hahanaia. Edena bamona oi diba momokani Dirava ena hereva idia haidaua lasi?

“Baibel Ena Hereva Idia Haidaua, A?” (Websait atikol)