Matamata Taudia E—Iehova Hesiai Henia Urana Umui Hagoadaia
“Oi be eregabe neganai, ia ese oi ia karaia Dirava do oi laloa.”—HAD. 12:1.
1. Israela ai, matamata taudia be dahaka boiboi herevana idia abia?
LAGANI 3,500 mai kahana gunanai, Iehova ena peroveta tauna Mose ese Israela ena helaga taudia bona tatau badadia ia hagania: “Taunimanima ibounai do umui haboua, tau bona hahine, memero bona kekeni . . . Vadaeni do idia kamonai, edia lalona be do idia kehoa, bona Lohiabada emui Dirava do idia gari henia. Bona inai Taravatu ena hereva ibounai do idia badinaia, bona edia kara do idia karaia.” (Deu. 31:12) Oi itaia, Mose be tatau, hahine, memero bona kekeni ia boiria tomadiho totona idia haboua, ani? Oibe, Mose ese matamata taudia danu ia boiria Iehova ena hereva idia kamonai bona badinaia totona.
2. Aposetolo edia negai, Iehova ese edena dala ai matamata taudia ia laloa bada?
2 Aposetolo edia negai, Iehova be iena taunimanima huanai idia noho matamata taudia ia laloa bada danu. Hegeregere, Ia ese Paulo ia hasiahua dainai, kongrigeisen haida edia revareva ia siaia neganai, sisiba haida be matamata taudia totona ia torea. (Efeso 6:1; Kolose 3:20 duahia.) Unai sisiba idia badinaia matamata taudia be edia lalokau guba Tamana idia abia dae bona hahenamo idia abia.
3. Hari, edena dala ai matamata taudia ese idia hahedinaraia idia ura Dirava idia hesiai henia?
3 Hari, Iehova be matamata taudia ia boiria Ia idia tomadiho henia totona, a? Oibe! Dirava ena taunimanima idia moale badina idia itaia tanobada hegegemadai Dirava idia hesiai henia matamata taudia momo be inai sisiba idia badinaia: “Umui ta ta dekenai durua henia daladia do umui laloa noho. Unai bamona lalokau dekena amo kara namodia do umui karaia. Iseda guriguri hebou kara do umui hadokoa lasi, haida ese idia hadokoa bamona. To umui ta ta emui Keristani varavara taudia edia lalona do umui hagoadaia, oibe, inai kara do umui habadaia be namo. Badina be Lohiabada ena Dina be kahirakahira do ia ginidae.” (Heb. 10:24, 25) Danu, natudia momo be edia tama sina ida Dirava ena Basileia ena sivarai namona idia harorolaia. (Mat. 24:14) Ma danu, lagani ta ta ai Iehova idia lalokau henia matamata taudia tausen momo be bapatiso idia abia, bona Keriso ena hahediba taudia ese idia abia hahenamo idauidau idia moalelaia.—Mat. 16:24; Mar. 10:29, 30.
Boiboi Abia Dae—Hari
4. Edena negai matamata taudia ese Dirava ena boiboi herevana idia abia dae bena Ia idia hesiai henia?
4 Hadibaia Tauna 12:1 ia gwau: “Oi be eregabe neganai, ia ese oi ia karaia Dirava do oi laloa.” Matamata taudia e, edena negai unai boiboi herevana oi abia dae be namo, unai amo Iehova oi tomadiho henia bona hesiai henia diba? Baibel be mauri lagani ta ia gwauraia lasi. Unai dainai, oi naria lasi, bona oi gwau lasi oi do maragi dainai oi hegeregere lasi Iehova oi kamonai henia bona hesiai henia totona. Herevana emu mauri lagani be hida, to ai ura hari unai boiboi herevana oi badinaia be gau badana.
5. Edena dala ai tama sina ese edia natudia idia durua diba hereva momokani lalonai idia goada totona?
5 Umui momo be emui tama sina—eiava tama sibona o sina sibona—ese idia durua hereva momokani lalonai umui goada totona. Unai dainai, umui be Baibel negadiai ia noho tauna, Timoteo bamona. Timoteo ia maragi neganai, ena sinana Eunike bona iena tubuna hahinena Loi be ia dekenai Toretore Helagadia idia hadibaia. (2 Tim. 3:14, 15) Reana oi danu be emu tama sina ida Baibel umui stadilaia, umui guriguri, hebou badadia o maragidia dekenai umui lao, bona haroro gaukara umui karaia. Momokani, emu tama sina ese oi dekenai Dirava ena dala idia hadibaia, badina unai maduna badana be Iehova amo idia abia. Emu tama sina edia lalokau bona laloa bada karana oi moalelaia, a?—Aon. 23:22.
6. (a) Salamo 110:3 (NW ) ena hereva hegeregerena, dahaka tomadiho dalana be Iehova ese ia moalelaia? (b) Hari stadi lalonai, dahaka do ita herevalaia?
6 Umui tubu daekau lalonai, Iehova ia ura Timoteo umui tohotohoa, anina be “Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Bema unai bamona umui karaia, vadaeni emui tama sina edia ura dainai lasi, to oi ura Dirava ena ura oi karaia dainai, kongrigeisen ena gaukara idauidau do oi karaia. Bema mai emui ura ida Iehova umui hesiai henia, Iehova do ia moale. (Sal. 110:3, NW ) To edena bamona oi hahedinaraia diba oi ura Iehova kamonai henia bona ena dala badinaia urana oi hagoadaia? Dala badadia toi mani ita itaia. Gaudia be inai: Stadi, guriguri, bona iseda kara. Namona be dala ta ta ita herevalaia.
Iehova Diba Namonamo
7. Edena dala ai Iesu be haheitalai namona ia hahedinaraia bona daidia ese idia durua?
7 Dala namba 1: Dina ta ta ai Baibel umui duahia neganai, umui hahedinaraia umui ura Iehova hesiai henia urana umui hagoadaia. Dina ta ta ai Dirava ena Hereva umui duahia karana amo, Dirava bona Baibel ena hereva namodia umui dibaia namonamo diba. (Mat. 5:3, NW ) Iesu be haheitalai namona ia hahedinaraia. Nega ta ai, iena mauri lagani be 12 neganai, ena tama sina ese ia be “Dubu Helaga lalonai idia davaria, hadibaia taudia edia huanai ia helai, edia hereva ia kamonai, bona ia henanadaia danu, idia dekenai.” (Luka 2:44-46) Iesu ia maragi neganai, Dirava ena Hereva ia ura henia bona ia lalopararalaia namonamo. Daidia ese ia idia durua? Ita gwau diba, ena sinana Maria bona ena tamana Iosepa be Dirava ena hesiai taudia dainai, ia idia durua. Idia ese Dirava ena hereva be Iesu ia beibi negana amo idia hadibaia.—Mat. 1:18-20; Luka 2:41, 51.
8. (a) Edena negai tama sina ese edia natudia idia hadibaia goada, hereva momokani idia ura henia totona? (b) Ekspiriens ta amo oi hahedinaraia dahaka dainai natuna ia beibi neganai hadibaia be namo.
8 Hari inai negai, Dirava idia gari henia tama sina momo idia diba, namona be edia natudia idia maragi negana amo idia hadibaia goada, Baibel ena hereva momokani idia ura henia totona. (Deu. 6:6-9) Taihu ta ladana, Rubi be unai bamona ia karaia; natuna ginigunana, Joseph ia vara neganai, maoromaoro ia hadibaia matamaia. Dina ta ta ai, Lauegu Baibel Sivarai Bukana be ena natuna dekenai ia duahia. Joseph ia bada ia lao neganai, Rubi ese ia durua Baibel siridia ia laloatao totona. Joseph be namo ia davaria, a? Joseph be hereva karana ia dibaia murinai, Baibel ena sivarai momo be sibona ena hereva amo ia herevalaia diba. Iena mauri lagani be 5 neganai, Tiokratik Haroro Sikuli dekenai ena tok ginigunana ia henia.
9. Dahaka dainai Baibel duahia karana bona oi duahia gaudia oi laloa dobu be mai anina bada?
9 Hereva momokani lalonai umui goada totona, namona be umui maragi negana amo ela bona umui bada lalonai, dina ta ta ai Baibel umui duahia. (Sal. 71:17) Dahaka dainai Baibel duahia karana ese umui do ia durua umui goada totona? Iesu ese ena Tamana dekenai ia gwauraia guriguri mani oi itaia: “Mauri hanaihanai be inai: Idia ese oi Dirava momokani tamona do idia diba.” (Ioa. 17:3) Oibe, Iehova oi diba namonamo neganai, Ia do oi lalokau henia. (Heb. 11:27) Unai dainai, Baibel ena kahana ta ta oi duahia negadia ta ta oi gaukaralaia, Iehova oi dibaia namonamo totona. Oi sibona oi nanadaia: ‘Inai kahana ese Iehova be edena bamona ia herevalaia? Inai kahana ese Dirava ena lalokau bona laloa bada karana be edena bamona ia herevalaia?’ Nega oi atoa unai bamona henanadai oi laloa dobu neganai, unai ese oi do ia durua Iehova ena laloa dalana, hemami, bona ia ura oi karaia gauna oi dibaia totona. (Aonega Herevadia 2:1-5 duahia.) Timoteo bamona, Baibel amo oi dibaia gaudia do “oi abidadama henia” bona do oi ura mai emu kudouna ibounai ida Iehova oi tomadiho henia.—2 Tim. 3:14.
Edena Dala ai Guriguri ese Umui Ia Durua Iehova Umui Lalokau Henia Totona?
10, 11. Edena dala ai guriguri karana ese umui ia durua Dirava hesiai henia urana umui hagoadaia totona?
10 Dala namba 2: Guriguri ese umui ia durua diba emui kudouna ibounai ida Iehova hesiai henia urana umui hagoadaia totona. Salamo 65:2 (BHğ) ia gwau: “Guriguri kamonai henia Diravana e, taunimanima iboudiai be oi dekenai do idia mai.” Dirava ena gwauhamata besena, Israela taudia unai, edia nega lalonai, idau bese taudia danu be Iehova ena dubu helaga idia mai Ia idia guriguri henia totona. (1 Kin. 8:41, 42) Dirava be taunimanima ibounai ia laloa bada. Baibel ia gwauhamata, Iehova be ena taravatu idia badinaia taudia edia guriguri ia kamonai henia. (Aon. 15:8) Oibe, umui matamata taudia be Dirava dekenai idia mai “taunimanima iboudiai” huanai umui noho danu.
11 Umui diba, ta umui tura henia neganai, herevahereva namonamo karana be mai anina bada. Reana nega momo umui ura emui lalohadai, laloa bada gaudia, bona hemami be emui turana dekenai umui gwauraia. Unai hegeregerena, mai emui kudouna ibounai ida umui guriguri neganai, emui Havaraia Tauna ida umui herevahereva. (Fili. 4:6, 7) Iehova umui hereva henia, emui lalokau tamana o sinana o turana namona ta umui hereva henia bamona. Momokani, guriguri dalana ese Iehova laloa dalana ia hahedinaraia. Hegeregere, umui itaia Iehova tura henia karana ia goada ia lao neganai, emui guriguri karana ia namo ia lao.
12. (a) Dahaka dainai guriguri lalonai hereva sibona umui gwauraia karana be ia hegeregere lasi? (b) Dahaka ese umui do ia durua umui laloparara Iehova be umui kahirakahira ia noho?
12 Namona be umui laloatao: Emui guriguri neganai emui hemami umui herevalaia danu be gau badana. Hegeregere, Ia umui hamaoroa ia umui lalokau henia, matauraia bona ia dekenai umui tabekau momokani. Iehova ese emui guriguri ia haerelaia dalana amo umui laloparara Dirava be “ia dekenai idia boiboi taudia dekenai ia noho.” (Sal. 145:18) Oibe, Iehova be oi kahirakahira do ia noho, oi do ia hagoadaia Diabolo oi tuari henia, bona oi do ia durua emu mauri lalonai abia hidi maorona oi karaia totona.—Iamesi 4:7, 8 duahia.
13. (a) Edena dala ai Dirava tura henia karana ese taihu ta ia durua? (b) Edena dala ai Dirava tura henia karana ese oi ia durua laloani herevadia oi dadaraia totona?
13 Cherie ese Iehova tura henia karana amo goada ia abia dalana mani umui itaia. Haisikuli ai, ia be maka namodia ia abia bona spot gadara ai ia kwalimu momo dainai, nega momo kwalimu ahuna ia abia. Sikuli ia haorea neganai, skolasip ia abia sikuli badadia dekenai ia lao ena diba ia habadaia totona. Ia gwau: “Unai be hahetoho negana, badina spot gadara hadibaia taudia bona stiuden taudia ma haida ese lau idia doria unai skolasip lau abia dae totona.” To Cherie ia diba bema unai skolasip ia abia dae, unai ese ena nega bada do ia henia sikuli gaudia ia stadilaia bona spot gadara ia hegaegaelaia totona, to nega do ia hegeregere lasi Iehova ia hesiai henia totona. Cherie be dahaka ia karaia? Ia gwau, “Iehova lau guriguri henia murinai, skolasip lau dadaraia bona regula painia gaukara lau karaia matamaia.” Ema bona hari lagani 5 idia ore vadaeni, to painia gaukara ia karaia noho. Ia gwau: “Lau lalohisihisi lasi. Lauegu abia hidi dainai Iehova ia moale. Momokani, bema Dirava ena Basileia umui tahua guna, vadaeni ia ese gau ibounai danu umui dekenai dohore ia henia.”—Mat. 6:33.
Kara Namodia ese Idia Hahedinaraia Oi “Laloa Goevagoeva”
14. Dahaka dainai Iehova vairanai kara namodia umui karaia be gau badana?
14 Dala namba 3: Emu kara amo oi hahedinaraia diba oi be mai emu kudouna ibounai ida Iehova oi hesiai henia. Iehova be kara maoromaoro idia karaia noho matamata taudia ia hanamoa. (Salamo 24:3-5 duahia.) Mero maragi Samuela ia ura lasi Hahelaga Tauna Badana Eli ena natudia edia matabodaga karana ia tohotohoa. Ma haida be Samuela ena kara namodia idia itaia diba. Baibel ia gwau: “Samuela ia tubu namonamo, bona ia bada lao noho dinadia lalonai, Lohiabada bona taunimanima ese Samuela idia ura henia.”—1 Sam. 2:26.
15. Kara namodia umui karaia ena badina haida be dahaka?
15 Inai tanobada ai taunimanima be sibodia idia laloa bada, idia hekokoroku, tama sina idia kamonai henia lasi, tanikiu karana idia hahedinaraia lasi, ma haida idia badinaia lasi, dagedage, heagi, bona moale karadia idia ura henia bada, to Dirava idia lalokau henia lasi—unai bamona gaudia be Paulo ese ia gwauraia. (2 Tim. 3:1-5, NW ) Unai dainai, inai tanobada dikana ai kara namodia umui hahedinaraia be ia auka diba. To, dina ta ta ai kara maorona umui karaia bona kara dikadia umui dadaraia neganai, umui hamomokania umui be Iehova ena kahanai umui gini bona ena lohia siahuna umui abia isi. (Iobu 2:3, 4) Danu, umui moale badina umui diba umui be Iehova ena boiboi umui abia dae, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aon. 27:11) Ma danu umui diba Iehova be umui ia lalonamo henia dainai, unai ese umui ia durua Dirava hesiai henia urana umui hagoadaia totona.
16. Edena dala ai taihu ta ese Iehova ia hamoalea?
16 Taihu ta ladana, Carol ia maragi neganai, ia be sikuli ai Baibel ena taravatu ia badinaia, bona ma haida be ena kara namodia idia itaia. Dahaka ia vara? Iena lalomamina be Baibel amo ia hadibaia dainai, ia ura lasi holide neganai idia karaia moale karadia o bese abia isi karadia ia durua. Madi unai bamona ia karaia dainai, iena klas turadia ese ia idia kirikirilaia. Nega haida, ia be Baibel amo ia dibaia taravatudia be ma haida dekenai ia gwauraia hedinarai. Lagani momo murinai, Carol be ena klas turana ta amo kadi ta ia abia, ia gwau: “Nega momo lau ura revareva lau torea bona oi lau tanikiu henia. Oi maragi neganai, oi be Keristani kara namodia oi goadalaia bona mai gari lasi ida holide karadia oi dadaraia; unai lau itaia. Unai be nega ginigunana Iehova ena Witnes taudia edia kara lau dibaia.” Carol ena haheitalai ese ena turana ena lalona ia veria dainai, gabeai Baibel stadi ia abia dae. Ena kadi amo Carol ia hadibaia, ia be lagani 40 gunanai bapatiso ia abia bona Witnes hahine ta ai ia lao! Carol bamona, hari inai negai, Baibel ena hereva idia badinaia noho matamata taudia be mai gari lasi ida kudou-maoro taudia idia durua Iehova idia dibaia totona.
Matamata Taudia be Iehova Idia Hanamoa
17, 18. (a) Emu kongrigeisen ai idia noho matamata taudia be edena bamona oi lalodia? (b) Vaira neganai, Dirava idia badinaia matamata taudia dekenai dahaka do ia vara?
17 Ita ibounai—tanobada hegegemadai Iehova ena orea taudia—ita moale badina matamata taudia tausen momo be tomadiho momokanina idia durua! Idia be dina ta ta ai Baibel duahia karana, guriguri karana, bona Dirava ena ura karadia idia karaia amo Iehova tomadiho henia urana idia hagoadaia. Unai matamata taudia edia haheitalai namona be edia tama sina bona Iehova ena taunimanima edia lalona ia hagoadaia.—Aon. 23:24, 25.
18 Vaira neganai, Dirava idia badinaia matamata taudia be do idia roho mauri taudia ida Dirava ena tanobada matamatana do idia noholaia. (Apok. 7:9, 14) Unuseniai, hahenamo idauidau do idia abia, Iehova ena kara namodia do idia moalelaia, bona Dirava ena ladana do idia hanamoa ela bona hanaihanai.—Sal. 148:12, 13.
Anina Oi Gwauraia Diba, A?
• Edena dala ai matamata taudia ese hari tomadiho momokani idia durua diba?
• Baibel duahia karana amo namo oi abia totona, dahaka dainai laloa dobu karana be mai anina bada?
• Edena dala ai guriguri karana ese oi ia durua Iehova kahirakahira oi noho totona?
• Keristani kara namodia ese dahaka idia havaraia diba?
[Picture on page 5]
Dina ta ta ai Baibel oi duahia, a?