Iehova Ena Witnes Taudia Huanai Hahine be Hadibaia Gaukara Idia Karaia, A?

Oibe, tanobada ibounai lalonai Iehova ena Witnes taudia huanai hahine milioni momo be hadibaia gaukara idia karaia. Unai hahine hutuma be Dirava ena Basileia sivarai namona idia harorolaia. Salamo 68:11 ia gwau: “Lohiabada ese iena oda ia gwauraia, vadaeni taunimanima [“hahine,” NW] momo ese, unai hereva idia gwauraia hedinarai.”

To, Iehova ena Witnes taudia huanai hahine ese idia karaia hadibaia gaukara be dubu haida edia haroro hahinedia edia amo ia idau. Edena dala ai?

Kerisendom dubu o dubu ma haida edia haroro hahinedia be edia dubu lalonai dagi idia abia bona edia dubu taudia sibona idia haroro henidia. To, Iehova ena Witnes taudia huanai hahine be pablik ai, ruma-ta-ruma-ta o gabu ma haida ai idia davaria taudia idia haroro henidia.

Danu, Iehova ena Witnes taudia edia kongrigeisen lalonai hahine ese idia karaia gaukara be dubu ma haida edia haroro hahinedia edia amo ia idau. Hegeregere, Kerisendom dubu bona dubu ma haida ai haroro hahinedia be edia dubu taudia idia gunalaia bona idia hadibadia. To, Iehova ena Witnes taudia edia kongrigeisen lalonai hahine be hadibaia gaukara idia karaia lasi, bema bapatiso tatau idia noho. Kongrigeisen lalonai hadibaia gaukarana be tatau sibona ese idia karaia.​—1 Timoteo 3:2; Iamesi 3:1.

Baibel ia gwau tatau sibona ese kongrigeisen naria maduna idia abia. Aposetolo Paulo ese Tito dekenai ia siaia revarevana ese unai ia hahedinaraia, ia gwau: “Kerete dekenai oi lau rakatania unai amo . . . taoni ta ta ai tau badadia do oi abia hidi.” Ma ia gwau, namona be ia abia hidi tauna be “haida ese idia samania tauna lasi, ia be hahine tamona ena adavana.” (Tito 1:5, 6) Paulo ese Timoteo dekenai ia siaia revarevana ai unai bamona hereva ia gwauraia danu. Ia gwau: “Bema [tau] ta ia ura naria tauna ena maduna ia abia, ia be gaukara namona ia ura henia unai. Unai dainai namona be naria tauna be kerere ta lasi, ia be hahine tamona ena adavana, . . . ia hegeregere ia hadibaia totona.”​—1 Timoteo 3:1, 2.

Dahaka dainai kongrigeisen naria gaukarana be tatau sibona ese idia karaia? Paulo ia gwau: “Lau ese hahine dekenai maoro lau henia lasi ia hadibaia totona, eiava tau ta do ia biagua, to do ia hereva lasi be namo. Badina Dirava ese Adamu ia havaraia guna bena gabeai Heva ia havaraia.” (1 Timoteo 2:12, 13) Dirava ese tau ia havaraia guna gabeai hahine ia havaraia, unai ese ia hahedinaraia Dirava ese hadibaia bona naria gaukarana ena maduna be tatau dekenai ia henia.

Iehova ena hesiai taudia be edia Gunalaia Tauna, Iesu Keriso, idia tohotohoa. Hahediba tauna Luka ese Iesu ena haroro gaukara be inai bamona ia herevalaia: “Iesu be taoni ta ta bona hanua ta ta dekenai ia lao, Dirava ena Basileia ena sivarai namona ia harorolaia.” Gabeai, Iesu ese ena murinai idia raka taudia ia siaia “hanua ta ta dekenai idia lao, sivarai namona idia harorolaia” totona.​—Luka 8:1; 9:2-6.

Hari inai negai, Iehova ena hesiai taudia, tatau bona hahine danu, be Iesu ena hereva idia badinaia, ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”​—Mataio 24:14.