Eda Haroro Gaukara Ita Karaia Namonamo Dalana—Bisinesi Teritori Ai

Dahaka Dainai mai Anina Bada: Taunimanima momo be hora momo idia moni gaukara dainai, idia dekenai Basileia sivaraina ita harorolaia dalana namona ta be, edia gaukara gabunai idia ita tahua. Bisinesi teritori ai ita haroro be mai ena namo, badina momo be ruma dekenai ita davaria lasi, bona nega momo gaukara taudia be kastoma idia matauraia. Bisinesi teritori ai anina namona ita havaraia totona, namona be pablisa edia dabua, toana bona kara amo hemataurai idia hahedinaraia. (2 Kor. 6:3) Unai dainai, haroro naria tauna ese do ia abia hidi nega hida bona daidia be bisinesi teritori ai idia haroro diba.

Karaia Dalana:

Hamatamaia hereva kwadogina ta hegaegaelaia. Bema gaukara tauna ena nega bada ita abia, reana do ia auka nega ma ta ai ia ita hereva henia totona.
Nega maorona abia hidi, hegeregere ofesi o stoa idia kehoa negana be nega namona badina kastoma be momo lasi.
Oi henanadai bema ia hegeregere bosi oi hereva henia. Ia oi hanamoa bona hemataurai dalanai oi hereva. Reana oi gwau: “Ai be gaukara gabudia dekenai taunimanima ta ta ai hereva henia, badina edia ruma dekenai ai davaridia lasi.” Emu haroro herevana oi hakwadogia, pepapepa ta, magasin haida eiava pablikeisen ma ta oi henia diba. Ita ura lasi idia laloa ita be kohu hoihoilaia taudia, unai dainai kontribusen ita herevalaia lasi, to bema ia henanadai eda haroro gaukara durua totona moni be edeseni amo ita abia, vadaeni ita herevalaia diba.
Bema bosi ia kamonai namonamo, ia oi noia bema hegeregere nega kwadogi lalonai iena gaukara taudia oi haroro henia diba. Bisinesi gabudia ma haida dekenai, reana oi henanadai bema ia hegeregere gaukara taudia edia laga-ani gabunai magasin o buka haida oi atoa diba.
Gau ibounai itaia namonamo. Hegeregere, bema gaukara tauna be kastoma ta ia hereva henia o gaukara ma ta ia karaia, oi naria ela bona ia ore bena oi hereva henia diba.

Hari Hua Oi Tohoa Gauna be Inai:

Bema oi idia abia hidi bisinesi teritori ai do oi haroro, emui ruma bese ena tomadiho negana ai hamatamaia hereva kwadogina ta oi tohoa.