Iehova Ena Heduru Dainai, Emai Hesiai Gaukara Ai Moalelaia

Lagani 1979 ai, tadikaka Mats bona taihu Ann-Catrin be Gilead Sikuli dekenai idia lao. Unai sikuli ai, tadikaka Jack Redford ena hereva ese idia ia hagoadaia, edia asainmen ai idia moale totona. Bona lagani momo lalonai Iran, Mauritius, Myanmar, Tanzania, Uganda, bona Zaire dekenai hesiai gaukara idia karaia. Unai do idia gwauraia hedinarai.

Mats, hereva momokani oi davaria dalana mani oi herevalaia.

Mats: Tanobada Tuari Iharuana lalonai, egu tamana be Poland ai ia noho. Bona unai nega ai Katolik Dubu lalonai koikoi karadia momo ia itaia. To, nega momo ia gwau, “Lau diba tomadiho momokani be ia noho!” Gabeai lau hamomokania tamana ena hereva be momokani. Lau be buka momo lau hoia. Unai buka ta be, Mauri ia Lao Henia Hereva Momokanina. Unai buka ena hereva kwarana ese egu lalona ia veria, unai dainai hanuaboi ta ai buka ena karoa ibounai lau duahia. Bona daba ai, lau diba hereva momokani lau davaria vadaeni!

April 1972 amo, Iehova ena Witnes taudia ese idia halasia pablikeisen momo lau duahia bona egu henanadai momo edia haere lau abia. Lau be Iesu ese ia herevalaia loaloa hoihoi tauna ta bamona. Ia be dava bada pel nadi ta ia davaria neganai, karaharaga ena kohu ibounai ia hoihoilaia bona unai pel nadi ia hoia. Egu palani be doketa ai do lau lao dainai iunivesiti dekenai do lau lao, to unai lau dadaraia badina lau ura Iehova lau hesiai henia. (Mat. 13:45, 46) Lagani 1972, December 10 ai, bapatiso lau abia.

Lagani ta lalonai egu tama sina bona tadina danu be hereva momokani idia abia dae bona bapatiso idia abia. July 1973 ai, ful-taim hesiai gaukara lau matamaia. Kongrigeisen lalonai idia gaukara goada taihu idia noho, idia ta be Ann-Catrin. Ia lau ura henia bona lagani 1975 ai, ai headava bena lagani 4 lalonai Sweden ena taoni hairaina Strömsund ai hesiai gaukara ai karaia.

Ann-Catrin: Stockholm ai egu tamana be iunivesiti ai ia sikuli neganai, hereva momokani ia dibaia. Unai neganai lau be beibi sibona, to hebou bona haroro gaukara dekenai lau ia abia lao. Egu sinana be unai ia ura lasi bona ia ura hamomokania Witnes taudia be koikoi taudia. To ia hamomokania diba lasi, bona ia danu be bapatiso ia abia. Egu mauri lagani be 13 neganai lau bapatiso, bona mauri lagani be 16 neganai painia gaukara lau hamatamaia. Pablisa momo lasi gabuna ladana Umeå dekenai painia gaukara lau karaia murinai, spesel painia ai lau lao.

Lau bona Mats ai headava murinai, ai moale bada badina ma haida ai durua hereva momokani idia dibaia totona. Idia ta be kekeni ladana Maivor be spot gadara ia rakatania bona egu tadina ida painia gaukara idia karaia. Lagani 1984 ai, Gilead Sikuli idia lao bona hari be Ecuador ai misinari gaukara idia karaia noho.

Dahaka ese umui ia durua emui misinari gaukara umui moalelaia totona?

Mats: Ai be nega momo asainmen matamata ai abia. To emai hesiai gaukara ai moalelaia totona ai ia durua gauna be Iesu ena kara namodia ai tohotohoa. Unai kara badana ta be manau. (Kol. 2:6, 7) Hegeregere, tadikaka taihu ai noia lasi emai ura gaudia idia karaia totona, to idia karaia gaudia ena badina ai dibaia toho. Ai ura edia laloa dalana bona edia kastom ai dibaia. Iesu ena kara ai tohotohoa neganai, emai hesiai gaukara ai moalelaia bada.—Sal. 1:2, 3.

Ann-Catrin: Iehova be hanaihanai ai ia naria. (Sal. 84:11) Ia ese tadikaka bona taihu amo ai ia durua noho. Hegeregere, Iran ena siti Tehran ai, kongrigeisen maragina ai, tadikaka bona taihu ese heabidae karana bona kara namodia idia hahedinaraia, Baibel negadia ai idia karaia bamona. Ai ura bada Iran dekenai ai noho, to lagani 1980, July ai, Iehova ena Witnes taudia edia gaukara idia taravatua, bona ai idia hamaoroa hora 48 lalonai unai gabu do ai rakatania. Unai dainai Africa tano Zaire (hari idia gwauraia Congo) dekenai ai idia siaia.

Nega ginigunana lau kamonai Africa dekenai ai idia siaia neganai lau tai. Africa ena gorere bona gaigai sivaraidia lau kamonai dainai lau gari. To, unuseniai nega daudau hesiai gaukara idia karaia headava taudia ese ai idia hamaoroa: “Unai gabu oi do diba lasi! Oi gari lasi, bema oi lao Africa dekenai, unai gabu do oi moalelaia.” Edia hereva be momokani! Tadikaka bona taihu be lalokau idia hahedinaraia. To lagani 6 murinai, iseda gaukara idia taravatua. Unai dainai Zaire do ai rakatania be namo. Unai nega ai lau kiri badina Iehova lau noia, lau gwau: “Mani, Africa dekenai do ai noho.”

Emui hesiai gaukara lalonai dahaka umui moalelaia?

Mats: Ai be gabu idauidau amo idia mai misinari taudia ai tura henia. Danu, emai asainmen haida ai Baibel stadi momo ai karaia dainai ai moale bada. Nega haida, ai ta ta be Baibel stadi 20 ai karaia! Africa ai tadikaka bona taihu ese idia hahedinaraia lalokau bona heabidae karana lau laloaboio diba lasi. Tanzania ena kongrigeisen idauidau lau vadivadi henia neganai, turadia momo be heabidae karana idia hahedinaraia. Ena be idia haida be idia ogogami, to emai motuka be edia ruma badinai ai atoa neganai, ai idia naria namonamo. (2 Kor. 8:3) Ai moalelaia gauna be hanuaboi ai, lau bona Ann-Catrin be ai karaia gaudia ai herevalaia bona Iehova ai tanikiu henia.

Ann-Catrin: Tano idauidau amo idia mai tadikaka ida hebamo karana lau moalelaia. Ai be kastom idauidau bona gado idauidau ai dibaia. Hegeregere Farsi gado, French gado, Luganda gado, bona Swahili gado. Momo ai durua hahediba taudia ai idia lao totona, tura namodia ai davaria bona Iehova ena hesiai gaukara lalonai ai gaukara hebou.—Sef. 3:9.

Emai asainmen ia senisi neganai, unai be hegeregere Iehova be gabu matamata dekenai ai ia hakaua bona havaraia gaudia mai hairaidia momo ia hahedinaraia. Ia ese ai dekenai gau momo ia hadibaia, unai gaudia be ai sibona ese ai dibaia lasi.

Dahaka hekwakwanai umui davaria, bona edena dala ai unai umui hanaia?

Mats: Ia hanaia lagani lalodia ai, gorere haida ai davaria, hegeregere malaria. Bona Ann-Catrin be opereisen haida ia abia. Danu emai tama sina be idia buruka dainai, idia ai laloa momo. To ai moale badina emai tadidia ese heduru idia henia idia naria totona. Mai haheauka, lalokau bona moale ida unai maduna idia huaia. (1 Tim. 5:4) Nega haida ai laloa gabu daudau amo heduru ai henia sibona lasi to emai tama sina badinai ai noho bona idia ai durua be namo.

Ann-Catrin: Lagani 1983 ai, Zaire ai hesiai gaukara ai karaia lalonai, cholera gorere lau davaria. Doketa ese Mats ia hamaoroa, “Hari dina tano ma ta dekenai ia oi abia lao be namo!” Unai dina murinai, peleini ta amo Sweden dekenai ai lao.

Mats: Doketa ia gwau Ann-Catrin be ena gorere amo do ia namo lasi, unai dainai ai tai badina ai laloa emai misinari gaukara do ai rakatania. To, Ann-Catrin be ia namo lou. Bona lagani haida murinai, Zaire dekenai ai giroa lou, bona Lubumbashi ena Swahili kongrigeisen ai bamoa.

Ann-Catrin: Lubumbashi dekenai ai noho neganai lau rogorogo, to madi bogana lalonai emai beibi ia mase. Unai dainai lau lalohisihisi bada. To, unai nega ai Iehova amo harihari gauna ta ai abia. Baibel stadi momo ai hamatamaia. Lagani ta do lasi neganai, kongrigeisen ena pablisa namba be 35 ia bada ia lao 70, bona hebou ena atendens be 40 amo ia lao 220. Nega bada ai gaukaralaia haroro gaukara ai karaia totona, bona Iehova amo ai abia hahenamo idauidau ese lau ia hagoadaia bada. To, nega momo emai beibi maragina ai laloa bona ai herevalaia. Paradaiso ai Iehova ese emai lalohisihisi ibounai do ia haorea negana be mai ura ida ai naria noho.

Mats: Nega ta, Ann-Catrin be ia hesiku bada bona ena goada ia ore. Danu unai nega ai lau be kensa gorere lau davaria bona opereisen badana lau abia. To hari ai ruaosi be ai namo.

Ai itaia Iehova be hahetoho idia davaria taudia ia durua diba. (Sal. 55:22) Hegeregere, lagani 1994 ai, Rwanda ai ia vara ala-ala karana murinai, refiuji kamepa ai emai turadia ai vadivadi henia. Bona ai itaia emai tadikaka edia abidadama ia goada, idia haheauka noho, bona heabidae karana idia hahedinaraia noho. Bona ai laloparara, ai davaria hahetoho be ai sibona ese ai davaria lasi, to emai tadikaka danu be unai hahetoho idia davaria.

Ann-Catrin: Lagani 2007 ai, Uganda ena brens ofesi ena dedikeisen negana ai hekwakwanai ta ia vara. Unai program ia ore murinai, ai be misinari taudia 25 bona Betele taudia ida Nairobi, Kenya dekenai ai giroa lou. Unai nega ai, basi maragina ta ese ai guia motuka ia bampaia. Motuka ia taria tauna bona emai turadia 5 idia mase. Danu taihu ta be gabeai hospital ai ia mase. Unai dainai ai ura bada emai turadia idia toreisi lou neganai, idia do ai itaia lou!—Iobu 14:13-15.

Egu bero idia namo lou. To Mats, lau bona ma haida be unai aksiden dainai lalometau ena gorere ai davaria. Nega momo hanuaboi ai do lau noga bona lau laloa momo, toana be hat-atek do lau abia. Lau gari bada. To Iehova ai guriguri henia loulou bona siri namodia ai laloa loulou karana ese ai ia hagoadaia, unai ai haheaukalaia totona. Doketa ena heduru ai abia danu, unai ese ai ia durua bada. Hari unai gorere ai haheaukalaia diba. Bona Iehova ai noia inai hekwakwanai idia davaria taudia do ia durua idia haheauka totona.

Nega aukadia oi haheaukalaia dalana oi herevalaia neganai, oi gwau Iehova ese “nadua lasi gatoi bamona oi ia huaia.” Emu hereva ena anina be dahaka?

Mats: Unai be Swahili taudia ese idia gwauraia herevana, idia gwau: “Ai be nadua lasi gatoi bamona ai idia huaia.” Tau ta ese gatoi ia dogoatao namonamo, unai amo do ia makohia lasi, unai hegeregerena, Iehova ese emai asainmen ta ta dekenai ai ia durua bona naria namonamo. Ai be gau ta dekenai ai dabu lasi, nega haida ai abia gaudia be momo herea. Danu Hakaua Oreana ena heduru bada dainai Iehova ena heduru bona lalokau ai mamia.

Ann-Catrin: Iehova ese ai ia durua dalana ta do lau herevalaia. Dina ta, ta ese lau ia rini henia bona ia gwau, Sweden ai egu tamana be ia gorere bada. To Mats be hari sibona malaria gorere amo ia namo lou. Bona ai be ai hegeregere lasi peleini ena tiketi ai hoia dainai, ai laloa emai motuka do ai hoihoilaia. Unai nega ai, headava tau bona hahine be emai sivarai idia kamonai murinai ai idia rini henia, bona idia gwau idia ura tiketi ta do idia hoia. Bena gabeai taihu burukana ta ese ai ia rini henia. Bona ai ia hamaoroa ia ese moni haida ia haboua idia dabu taudia ia durua totona, bona ia ura unai moni be ai dekenai ia henia. Ai itaia Iehova ese karaharaga ai ia durua!—Heb. 13:6.

Lagani 50 lalonai umui karaia hesiai gaukara lalonai, dahaka umui dibaia?

Ann-Catrin: Lau dibaia gauna be ‘ai manau bona Iehova ai abidadama henia’ neganai, ai goada. Iehova ita trast henia neganai, ia be ita totona do ia tuari. (Isa. 30:15; 2 Siv. 20:15, 17) Iseda goada ibounai ida Iehova ita hesiai henia neganai, hahenamo momo do ita davaria.

Mats: Lau dibaia gauna badana be gau ibounai lalonai Iehova lau abidadama henia be namo bona ia ese lau do ia durua dalana do lau itaia. (Sal. 37:5) Badina ia gwauhamata hegeregerena, ia ese hanaihanai lau do ia durua. Hari Myanmar ena Betele dekenai ai noho neganai, unai hereva be idia do guguru noho.

Ai ura Iehova hesiai henia gaukara idia ura habadaia matamata taudia be Iehova ese ai dekenai ia hahedinaraia lalokau idia mamia danu. Ai diba Iehova ese idia do ia durua bada edia hesiai gaukara idia moalelaia totona.