Tanobada be Do Ia Ore, A? Apocalypse be Dahaka?
Inai hereva “apocalypse” oi kamonai neganai, dahaka oi laloa? Nega haida reana oi laloa tanobada dekenai dika do ia vara, bona tanobada ai mauri gaudia ibounai do ia ore. Haida be unai lalohadai idia abia dae badina henunai idia noho bamona nius ripoti idia duahia dainai, hegeregere:
“Niuklia tuari ena sivarai—taunimanima idia palanilaia, ia vara kava, eiava herevahereva namonamo karanai be lasi dainai unai ia vara.”—Bulletin of the Atomic Scientists.
“Idia hanaia lagani ten lalonai, lai gubana, uda lahi badadia, tano kaukau (droughts), davara ia miro, siahu bada herea, bona abata badadia idia vara tanobada hegegemadai dekenai.”—National Geographic.
“Africa ai kwadi oreana ese tubutubu gaudia idia hadikaia momokani, lagani momo gunanai amo ia idau.”—The Associated Press.
Apocalypse ese inai tanobada do ia hadikaia, a? Baibel be dahaka ia gwau?
Ita noholaia tanobadana do ia ore, a?
Lasi. Dirava ena Hereva, Baibel, ese ita ia hadibaia inai tanobada be do ia noho hanaihanai. (Hadibaia Tauna 1:4) Dirava be inai tanobada ia karaia dainai do ia hadikaia lasi, to Dirava ese “tanobada idia hadikaia taudia do ia hadikaia ore.”—Apokalupo 11:18.
Tanobada be ia ore ia lao noho, a?
Baibel ia gwau, inai “tanobada” be do ia ore ena anina be Dirava idia dadaraia taudia bona sibodia edia ura idia tahua taudia ia herevalaia. Noa ena negai ia karaia hegeregerena, Dirava be “ia idia badinaia lasi taudia” do ia haorea—2 Petero 2:5; 3:7.
1 Ioane 2:17 ia gwau, “tanobada be ia ore noho bona ena ura danu.” Inai siri ese ia hahedinaraia Dirava be inai tanobada korikorina do ia hadikaia lasi, to kara dika idia karaia noho taudia be do ia hadikaia ore.
Edena negai dokona do ia mai?
Baibel ese ita dekenai nega dokona ena dina korikorina ia gwauraia lasi. (Mataio 24:36) To, ia hahedinaraia nega dokona be ia kahirakahira vadaeni. Baibel be inai gaudia ia perovetalaia:
Hegeregere tuari, hitolo bada, gorere dikadia, bona tano mareremarere goadadia do idia vara “gabu idauidau ai.”—Mataio 24:3, 7, 14; Luka 21:10, 11; Apokalupo 6:1-8.
Taunimanima be mataganigani karana do idia habadaia. Hegeregere, “moni do idia ura henia bada,” “tanikiu karana do idia diba lasi,” bona “sibona do idia biagua lasi.”—2 Timoteo 3:1-5.
Taunimanima momo idia abia dae lagani 1914 amo ema bona hari, tanobada ai idia vara gaudia be idia hegeregere Baibel ena peroveta herevadia amo bona ia hahedinaraia dokona be ia kahirakahira. Diba ma haida abia totona, inai atikol “What Does Bible Chronology Indicate About the Year 1914?” bona “What Is the Sign of ‘the Last Days,’ or ‘End Times’?” oi itaia.
Baibel lalonai “Apocalypse” ena anina be dahaka?
Grik-gado ai inai hereva “apocalypse” idia hahanaia Baibel lalonai ena anina be “koua gauna kehoa” or “koua gauna kokia.” Nega momo inai hereva ese hunia herevadia gwauraia hedinarai karana ia herevalaia. Baibel danu be “Lohiabada Iesu totona hehuni gaudia [eiava, apocalypse],” ia herevalaia, ia gwau, bema Iesu ia hedinarai, mai siahu ida inai tanobada ai kara dika ibounai do ia kokia bona Dirava idia tomadiho henia taudia do ia hanamodia.—2 Tesalonika 1:6, 7; 1 Petero 1:7, 13.
Baibel ena buka dokona ena ladana be A·po·kaʹly·psis, eiava Apokalupo, badina vaira negai do idia vara gaudia ia gwauraia hedinarai. (Apokalupo 1:1) Sivarai namona bona helaro ena sivarai be unai buka ai idia noho. (Apokalupo 1:3) Ia hahedinarai Dirava ese kara gageva ibounai do ia kokia bona inai tanobada be paradaiso ai do ia haloua. Unai negai, taunimanima be hisihisi idauidau, eiava mase do idia davaria lasi.—Apokalupo 21:3, 4.
Oi ura bada inai Baibel ena gwauhamata namodia oi dibaia? Iehova ena Witnes taudia be davana lasi Baibel stadi program idia karaia oi ia durua totona. Bema oi ura, idia oi kontek diba.