Matheus
18 In tiise xtun, sin ti tisipele neewich Yeesus khom, un hon tëm kefroot: “Tan, weer is te kreeste im Raych fom himel?” 2 Tan, tee hot een khintche keruuft un hots in ti mite fon tëne ketuun 3 un hot kesaat: Ich saan aych ti woerheet: Ploos wën teyer een halpe wolte kept un wii khinerche wërt, khent teyer in te himlixe Raych khome. 6 “Awer weer eene fon te kleene woo aan mich klaapt, xtolpere macht, es wëyer pëser fer tëm een miil xteen, woo te eesel rom treet, am hals hënge un tas ëyer ins tiife meer unerkeen solt.” 10 Phast uf fer khee eene fon tiise kleene niter xtele, wayl ich saans aych tas tëne sayn ëngele im himel imer siin tas kesicht fon mayn fater, woo im himel is. 12 Was mënt teyer? Wën eene man hot 100 xeef un eene fon tëne ferliirt sich, tuut eyer net ti anere 99 uf te përiche lose, un tas woo hot sich ferliirt, suuche keen? 13 Un wën tee tas fint, tuun ich wërklich fer aych saan, tuut eyer sich mee weeche tëm fraye wii weeche ti anere 99 woo sich net ferloer hon. 14 In te selwich aat, mayn Fater, woo im himel is, wil net hon tas soo kaar eene fon tiise kleene ferliirt sich. 15 “Un noch, wën tayn pruuter een sint macht, kee mit tëm aleen fertseele un tsaych tëm tas eyer een feeler kemacht hot. Wën eyer tich heere tuut, host tuu tayn pruuter tsurik kriit. 16 Awer wën eyer tich net heere tuut, nëm eene orer tswaay persoone mit, tas, torich ti wërter fon tswaay orer tray tsayer, te kans sache fest kextelt wërt. 17 Wën eyer tëne net heere tuut, xprech tsu te kemaynt. Un wën eyer soo kaar ti kemaynt net heere tuut, tan sii tëm aan wii yemant fon te natsyoone un wii eene man woo xtayer ferlangt. 18 “Ich lose aych sicher: ales was teyer uf te eyert piint, wërt xon im himel ferpunt; un ales was teyer uf te eyert loos macht, wërt xon im himel loos kemacht. 21 Pheeter is ticht pay tëm khom un hot kefroot: “Hër, wii oft mus ich mayn pruuter fertsaye wën eyer keeche mich sinte tuut? Pis 7 mool?” 22 Too, hot Yeesus keantwort: “Ich saan tich: net pis 7 mool, awer pis 77 mool. 23 ”Weeche tas khan te himel raych ferklaycht wëre mit een kheenich woo wolt een aprechnung mache mit sayn sklaawe. 24 Wii eyer mit te aprechnung aan kefang hot, hon se eene man keprung woo tëm 10.000 talënte xultich waar. 25 Awer wayl eyer net tas kelt hat fer ti xulte petsaale, hot sayn hër kexikt tas tee, sayn fraa, sayn khiner un ales was eyer hat solt ferkhaaft wëre fer ti xulte petsaale. 26 Too hot te sklaaw sich niiter kepikt, sich foer tëm kekniit un saat: ’Say ketultich mit mich un ich tuun tich ales tsurik petsaale.’ 27 Un wayl eyer tëm ketauert hot, hot te hër fom sklaaw tëm keen kelos un sayn xulte fertsayt. 28 Awer te sklaaw is raus kang un hot eene anere sklaaw petrof, woo tëm 100 tenaaryum xultich waar. Eyer hot te anere sklaaw fest kehal un aan kefang tëm ap xtroose un saat: “Petsaal was tuu mich xultich pist.” 29 Tan hot te anere sklaaw sich niiter kepikt un aan kehal: ’Say ketultich mit mich un ich tuun tich ales tsurik petsaale.’ 30 Awer tee wolt net heere. Xtats tas, hot eyer tëm in te katee kexmis, pis eyer sayn xulte petsaale teet. 31 Wii ti anere sklaawe es kesiin hon, sin se aarich traurich kep un sin pis sayn hër kang un hon tas ales tëm fertseelt. 32 Soo, hot tëm sayn hër tee keruuft un kesaat: ’Xlëchte sklaaw, wiis tuu fer mich aan kehal host, hon ich tayn xulte fertsayt. 33 Solst tuu net aach parmhërtslich sin mit te anere sklaaw, soo wii ich mit tich waar?’ 34 Soo, hot sayn hër wuutich ti katee wachter kexikt tëm in xpërte, pis eyer al sayn xulte petsaale teet. 35 Kraat soo tuut mayn Fater im himel aych pehantele, wën teyer net ayre priiter fom hërts aus fertsaye tuut.”