1te Kheeniche

3 Tan, hot eyer pang kriit un is klaych aus keris fer sayn leepe rete. Tee is tsu Persëpa, in Yutaa, khom un hot sayn helfer tat kelos 4 Klaych tëm noo, is eyer in te tesërt kang un is torich een taach kelaaft. Wii eyer een kinster phutx kefun hot, hot eyer sich unich tëm kesetst un hot ferlangt fer se xtërpe. Tee hot kesaat: “Yets xeks! Yets, oo Yeehoowa, hool mayn leepe wech, wayl ich sin net peser wii mayn foerkhomer.” 5 Tan hot eyer sich unich te kinster phutx keleet un is in kexloof. Pletslich, hot een engel tëm aan kekrif un kesaat: “Xtay uf un es.” 6 Wii eyer kekukt hot, waar pay tëm sayn khop een runtlich proot uf ti waarem xteen un een kruuch mit waser. Tee hot kes, ketrunk un hot sich noch mool keleet. 7 Xpeeter hin, is Yeehoowa sayn engel tas tsweete mool khom, hot tëm aan kekrif un kesaat: “Xtay uf un es, sonst net, tuust tuu net te rees phake.” 9 Too is tee in een hool rin kang un iwer nacht keplip; pletslich hot Yeehoowa tëm kefroot: “Was machst tuu hiir, Eliias?” 10 Tee hot keantwort: “Ich waar kans flaysich tsu Yeehoowa, te Kot fon te militeer, wayl tas folek Israël hot tayn phakt im xtich kelos, hot tayn altar um kexmis un tayn profeete mit een xwaart um keprung, un ich sin te eensiche woo iwrich keplip is un yets wole se aach mayn leepe wech hoole.” 11 Awer Eyer hot kesaat: “Kee raus un xtel tich uf te përich foer Yeehoowa.” Un Yeehoowa waar am torich keen, un een aarich xtark wint is fon te përiche khom un hot ti felse foer Yeehoowa in xtike kemacht, awer Yeehoowa waar net in te wint. Noom wint, hots een eyertxuter kep, awer Yeehoowa waar net in te eyertxuter. 12 Noom eyertxuter, hots een fayer kep, awer Yeehoowa waar net im fayer. Noom fayer, hot ma een ruych un layse xtim keheert. 13 Wii Eliias tiise xtim keheert hot, hot tee sayn kesicht mit te ofitsyaal mantel tsu ketekt, is raus kang un foer te hool xteen keplip. Tan hat een xtim tëm kefroot: Was pist tuu too hiir am mache Eliias? 14 Eyer hot keantwort: “Ich hat mich fer Yeehoowa, te Kot fon te militeer, kans ap kep; awer tas folek Israël hot tayn pakt im xtich kelos, tayne hooche pletse um kexmis un tayne profeete torich ti xwaart um keprung. Ploos ich sin iwrich keplip, un yets wole se mich um pringe.” 15 Yeehoowa hot tëm kesaat: “Kee tsurik, un kee tsum tesërt fon Tamaskus. Wiis tuu tat hin khomst, tuu Hasaël salpe fer te kheenich fon Siirya sin. 16 Un tuu solst Yeuu, Ninsii sayn enkelskhint, salpe fer te kheenich fon Israël sin, un tuu solst Eliseu, Safat sayn soon, fon Apël-Meolaa, salpe fer profeet uf tayn plats sin. 17 Weer fon Hasaël sayn xwaart aus rayst, tuut Yeuu um pringe; un weer fon Yeuu sayn xwaart aus rayst; tuut Eliseu um pringe. 18 Un ich hon noch 7.000 layt in Israël, al woo sich net foer Paal kepikt un tëm net kekhust hon.” 19 Soo, is Eliias fon tat faart kang un hot Eliseu, soon fon Safat, aan ketrof. Tee waar tas lant am tsakere, un es hat 12 xpant xtiire foer tëm kep; Eliseu waar mit te tswelefte xpant xtiire. Tan, is Eliias tsu tëm kang un hot sayn ofitsyaal mantel iwer tëm ketuun. 20 Weeche tas, hot Eliseu ti xtiire kelos, is hinich Eliias kexprung un hot kefroot: “Pite, khan ich noch mayn papa un mayn mama mit een khus ap xite? Nochter, tuun ich tich noo keen.” Tee hot tëm kesaat: “Yaa, khanst keen, ich tuun tich net um hale.” 21 Eliseu is tan tsurik kang, hot sayn tswaay xtiire kehool un hot een opfer kemacht. Mit tëm hols fom pluuch un fom yoch, hot eyer tas flayx kekhocht un hot es fer tas folek kep, un tii hon tas kes. Nochter, is Eliseu Eliias noo kang un hot aan kefang tëm tiine.