Matheus

17 Im eyerste taach fom Fest fom Proot oone Heep, sin ti tisipele ticht pay Yeesus khom, un hon tëm kefroot: “Hër, woo wilst tuu tas meyer tas Oostre ese fërtich mache fer se ese?” 18 Eyer hot kesaat: “Keet tsu tëm xtat, tsu eene man, un saat tëm: ‘Te Leerer saat: “Es is ticht mayn pextimt tsayt; ich tuun tas Oostre mit mayn tisipele in tayn haus fayre.”’” 19 Tan, hon ti tisipele kemacht tëm noo Yeesus sayn instrutsyoone un hon tas Oostre ese fërtich kemacht. 20 Wii es nacht kep is, hot Yeesus mit sayn 12 tisipele sich aan kesetst fer se ese. 21 Wii se am ese waare, hot eyer kesaat: “Ich saan aych kans sicher: Eene fon aych tuut mich hinerkeen.” 22 Tii sin tan aarich traurich kep, un eene noom aner hot aan kefang se frooe: “Hër, sin net ich, kël?” 23 Yeesus hot tan keantwort: “Tee woo mich hinerkeet tungt mit mich tas proot in im selwiche xisel. 24 Es is woer tas te mënxe soon faart keet soo wii ti Xrifte saan, awer ferfluucht is tee woo te mënxe soon hinerkeet! Es weyer peser tas tee net uf ti welt khom weyer.” 25 Yuutas, woo fërtich waar fer tëm hinerkeen, hot kefroot: “Rapii, sin net ich, kël?” Yeesus hot tëm keantwort: “Tuu selepst pist tas am saan.” 26 Wii se wayter kes hon, hot Yeesus een proot kehool un een seechen kexproch; tan, hot eyer es ferproch, fer sayn tisipele kep, un kesaat: “Hoolt un est. Tas petayt mayn khërper.” 27 Aach, hot eyer een khelich kehool, ketankt un hot es fer tii kep un kesaat: “Trinkt too tefun, teyer al, 28 wayl tas petayt mayn ‘pluut fom pakt’, woo aus kexut wërt, woo nutslich fer fiile is, fer ti sinte se fertsaye. 29 Wayl ich saan aych: fon yets am wayter, trinke ich niks mee fon was kemacht is fon traupe, pis te taach khomt woo ich mit aych naye wayn trinke tuun, in mayn Fater sayn Raych.” 30 Tan, hon se loop liiter kesung un sin tsu te Oliiwe Përich kang. 31 Yeesus hot tan tsu tëne kesaat: “In tiise nacht, tuut teyer al xtolpere weeche mich, wayl xteet kexrip: ‘Ich tuun te xeefer wee mache, un te trop xeef tuut aus naner laafe.’ 32 Awer noo ich uf keruuft wëre, keen ich xon foner aych pis Kalileya.” 33 Awer, Pheeter hot tëm keantwort: “Aach wën al ti anere weeche tich xtolpere, tuun ich nii mool xtolpere!” 34 Yeesus hot tëm keantwort: “Mit sicherheet, saan ich tich: Hayt oomt, eep te haan kreet, tuust tuu tray mools saan tas tuu mich net khënst.” 35 Pheeter hot tan kesaat: “Wën ich aach mit tich xtërpe mus, tuun ich nii saan tas ich tich net khëne.” Al ti anere tisipele hon tas selwiche kesaat. 36 Yeesus is tan mit sayn tisipele tsum plats woo Xetsëmani heest, kang. Too hot eyer tëne kesaat: “Setst aych too hin. Ich keen tat hin peete.” 37 Tan is Yeesus kang un hot Pheeter un ti tswaay soone fon Sepeteu mit kenom; tee is tan aarich traurich un ëngstlich kep. 38 Too hot eyer tëne kesaat: “Ich xpiire tas ich xtërpe tuun weeche mayn tiif traurichkheet. Playpt too un playpt wach mit mich.” 39 Un eyer is pisye wayter kang, un hot sayn kesicht pis ufm pootem kepikt un hot kepeet: “Mayn fater, wëns meechlich is, los te khelich wayt wech fon mich. Awer toch, net soo wii ich wil, awer wiis tuu wilst.” 40 Tee is tsurik pay sayn tisipele kang un hot se am xloofe kefun. Tee hot tan fer Pheeter kefroot: “Hot teyer es net hin kriit ploos een xtun mit mich wach plaype? 41 Tuut aych wach hale un tuut wayter peete tas teyer net in fersuuchung falt. Kewis is te kayst wilich, awer tas flayx is xwach.” 42 Tan is eyer een tsweete mool faart kang un kepeet: “Mayn fater, wëns net meechlich is tas ich torich tas keen oone tas trinke, tas tayn wile kemacht wërt.” 43 Wii eyer tsurik khom is, hot eyer sayn tisipele noch mool am xloofe kefun, wayl sayn aue waare xweyer mit xloof. 44 Tes weeche, hot eyer se kelos un is faart kang een trite mool fer se peete, un hot noch mool ti selwiche tinge kesaat. 45 Tee is tan tsurik tsu sayn tisipele kang un hot tëne kesaat: “In soo een momënt sayt teyer am xloofe un am ruue! Ti tsayt is am khome fer te mënxe soon tsu ti sinter ap kep wëre. 46 Xtayt uf, un wole mer keen. Kukt! Tee woo mich hinerkeet is am khome.” 47 In tiise momënt, wii eyer noch am xpreche waar, is Yuutas, eene fon te tswelef, ticht khom, un mit tëm waare fiile layt mit xwaarte un knipele. Tii waare kexikt fon te haupste priister un ti elteste fom folek. 48 Te hinerkeener hat een sinaal mit tëne ap kemacht. Tee hot kesaat: “Fangt te man woo ich een khus kepe, wayl tas is eyer.” 49 Tee is richt tsu Yeesus kang, un tëm kesaat: “Wii keets Rapii?” un hot tëm liiplich kekhust. 50 Yeesus hot tëm kefroot: “Was machst tuu hiir, fraaynt?” Tan sin ti mëner khom, hon Yeesus kefang un tëm fest kehal. 51 Pletslich, eene fon tëne woo mit Yeesus waar, hot sayn xwaart aus ketsoo un hot tas oer fom sklaaw fom hooche priister ap kehakt. 52 Yeesus hot tan fer tëm kesaat: “Tuu tayn xwaart wiiter uf sayn plats, wayl al woo tas xwaart hoole, tuun torich tas xwaart xtërpe.” 53 Orer mënst tuu tas ich net tsu mayn Fater aan hale khan, tas eyer mich in tiise momënt tswelef krupe fon engele xike sol? 54 Awer, wën es soo weyer, wii teete ti Xrifte sich erfiile, woo saan tas ti tinge mise soo ap laafe?” 55 Kraat in tiise xtun, hot Yeesus fer tas folek kesaat: “Sin ich een pantit, tas teyer mit xwaarte un knipele khomt, fer mich fange? Ich waar yeete taach im thempel kesetst fer ti layt in lërne; noch soo, hot teyer mich net kefang. 56 Awer tas ales is pasiirt fer erfiile was ti profeete kexrip hon.” Tan al ti tisipele hon tëm im xtich kelos un sin aus keris. 59 (...) falxe tsaye keeche Yeesus kesuucht, fer tëm um pringe. 63 Awer Yeesus is wayter ruych keplip. Too hot te hooche priister kesaat: “Im naame fom lepeentiche Kot, ich xike tich uns saan, unich juramënt, eps tuu te Kristus pist, Kot sayn Soon!” 64 Yeesus hot keantwort: “Ia, tuu selepst pist tas am saan. Awer ich saan aych: fon yets aan foran, tuut teyer te Mënxe Soon siin aan te recht sayt fon te kraft kesitst un am khome in te wolke im himel.” 67 Tii hon tëm ins kesicht kexpukt un hon tëm ferhau. Anere hon tëm ferxlaa, 68 un saat: “Mach ti profetsii, oo Kristus. Weyer hot tich ferhau?” 69 (...) “Tuu waarst aach mit Yeesus, te kalileer!” 70 (...) “Ich wees net iwer was tuu am xpreche pist.” 72 (...) “Ich khëne te man net!” 75 (...) Tan is eyer naus kang un hot piterlich keprilt.