Eeksotus
3 Mooses is een xeefer kep un hot uf kephast ti xeef fon sayn xwiicher fater Jëtro, priister fon Mityan. Wii eyer am fiire waar ti xeef tsum oëst fom tesërt, is tee tsu Horëp khom, te përich fon te woere Kot. 2 Tan hot te engel fon Yeehoowa sich tëm ketsaycht in een fayer flam in te mite fon een taarn phutx. Mooses hot kekukt, un te taarn phutx waar aan prëne, awer is net ferprënt. 3 Tan hot Mooses kesaat: “Ich keen mool tichter un tuun mich tas wunerlich tings kenau pekuke un raus kriin warom te taarn phutx net ferprënt.” 4 Wii Yeehoowa kesiin hot tas tee kuke kang is, hot Kot tsu tëm keruuf aus te taarn phutx un saat: “Mooses! Mooses!” Tee hot keantwort: “Hiir sin ich.” 5 Tan hot Kot kesaat: “Khom net tichter. Tsii ti xuu aus, wayl tas plats woos tuu xteest is hayliche krunt.” 6 Un tee hot noch kesaat: “Ich sin te Kot fon tayn fater, te Kot fon Apraham, te Kot fon Isak un Kot fon Yaakop.” Tan hot Mooses sayn kesicht tsu ketekt, wayl tee hat angst fer te woere Kot aan kuke. 7 Un Yeehoowa hot noch kesaat: “Sicher hon ich kesiin mayn folek sayn eelent woo in Ejipt is, un hon se keheert sich pexweere weeche tëne woo se tswinge fer xafe; un ich wees kenau wii se layte. 8 Ich wëre ruune khome fer se fray mache fon ejipter sayn hënt, un se tsu een kuut un kroos lant nëme, een lant woo es raychlich milich un honich kept, tas lant fon te kanaaniiter, ti hitiiter, ti amoriiter, ti perisiiter, ti hewiiter un ti jepuseer. 9 Yets hon ich keheert wii ti israeliiter sich pexweere un aach kesiin wii krop ti ejipter se uner trike. 10 Khom, ich xike tich tsum Faraoo, un tuu wërst mayn folek, ti israeliiter, aus te Ejipt raus fiire. 13 Awer Mooses hot fer te woere Kot kesaat: “Wole mer saan tas ich tsu ti israeliiter keen un tëne saan: ‘Te Kot fon ayre foerkhomer hot mich tsu aych kexikt’, un tii frooe mich: ‘Wii is tëm sayn naame?’ Was sol ich tëne saan?” 14 Kot hot tan fer Mooses kesaat: “Ich Wëre Was Ich Wëre Wil.” Un eyer hot noch kesaat: “Tas is was tuu solst fer ti israeliiter saan: ‘“Ich Wëre” hot mich tsu aych kexikt.’” 15 Tan hot Kot noch mool fer Mooses kesaat: “Tuu solst tas too ti israeliiter saan: ‘Yeehoowa, te Kot fon ayer foer fatere, te Kot fon Apraham, te Kot fon Isak un te Kot fon Yaakop, hot mich tsu aych kexikt.’ Tas is mayn naame fer imer, un soo sol ich fon xeneratsyoon tsu xeneratsyoon erinert wëre.