1te Thesalooniker

2 Sicher, teyer selepst wist, priiter, tas unser pesuuch tsu aych waar net oone resultaate. 2 Wayl teyer wist tas, opwool mer in Filipos kelit hon un xlecht pehantelt kep sin, hon mer, mit Kot sayn hilef, koraaj ketsaycht fer ti kuute notisye fon Kot unich fiil opositsyoon fer aych saan. 4 Awer wayl Kot sich mit uns kefalt hot un uns ti kuute notisye fertraut hot, tuun mer tas pekhant mache. Meyer mache tas, net fer ti mënxe kefale, awer Kot, woo unser hërts unersuucht. 5 Wayl teyer wist tas meyer nimant ferxmaychelt hon orer uns falx aan kextelt hon fer etwas se kriin; Kot is tsayer too tefun! 6 Meyer sin aach net ti eere fom mënxe am suuche, nee, net fon aych orer fon te anere, opwool mer khente een ekonomix last fer aych sin, wii aphostele fom Kristus. 7 Im keeche teel, meyer hon aych liiplich pehantelt, soo wii een muter woo tuut sayn aychne nëneche fersoriche un wërme. 8 Soo, weeche unser hërtslich liip tsu aych, waare mer pextimt, net ploos ti kuute notisye fon Kot fer aych pekhant mache, awer aach unser aychne leepe fer aych kepe, wayl mer aych fiil keliipt hon. 9 Kewis, priiter, teyer erinert aych fon unser xweyer aarwayt un aanxtrengung. Wii meyer ti kuute notisye fon Kot fer aych kepreeticht hon, hon mer taach un nacht kexaft tas meyer net een ekonoomix last fer aych weyere. 10 Teyer sayt tsayer un Kot is es aach, wii meyer uns leaal, kerecht un unxultich aan kextelt hon tsu aych woo klaapich sayt. 11 Teyer wist kuut tas meyer yeete eene fon aych uf kemuut, ketreest un aan kereet hon, soo wii eene fater mit sayn khiner macht, 12 tas teyer wayter soo leept in een aanxtëntich aat tsu Kot, woo aych tsu sayn Raych un hërlichkheet ruuft. 13 Tes weeche tuun meyer aach imer Kot tanke, wayl, wii teyer Kot sayn wort kriit hot, woo teyer fon uns keheert hot, hot teyer es aan kenom net wii wërter fon mënxe awer wii es wërklich is, Kot sayn wort, woo aach in aych woo klaapt, wërke tuut. 17 Priiter, wii meyer fer een khorts tsayt fon aych aus naner kemacht waare (perseenlich, net im hërts), hate meyer een kroose wunx fer aych perseenlich siin, soo hon mer uns fiil aan kextrengt fer tas mache. 18 Tes weeche wolte mer aych pesuuche, yaa ich, Phaul, hon es net ploos een mool, awer tswaay mool fersuucht, awer Satanaas hot unser weech tsu kemacht. 19 Wayl, was is unser hofnung, unser frayt orer unser kroon fon frooheet foer unser Hër Yeesus in sayn presens? Sayt net teyer? 20 Yawool, teyer sayt unser hërlichkheet un unser frooheet.