Yoohan
3 Es waar een fariseer kewees woo Nikotemus keheest hot. Tee waar een fiirer fon te yuute. 2 Tee is oomts pay Yeesus khom un hot tëm kesaat: “Rapii, meyer wise tas tuu een leerer pist woo Kot kexikt hot, wayl oone Kot, khan nimant mache ti wunere woos tuu machst.” 3 Yeesus hot keantwort: “Ich lose tich sicher: nimant khan Kot sayn Raych siin, heechstens wën eyer noch mool kepoer wërt.” 4 Nikotemus hot tëm kefroot: “Wii khan yemant kepoer wëre wën eyer xon alt is? Tee khan net tsurik tsum layp fon sayn muter keen un noch mool kepoer wëre, kël?” 5 Too hot Yeesus keantwort: “Ich lose tich sicher: wën yemant net fom waser un fom kayst kepoer wërt, khan eyer net in Kot sayn Raych rin keen. 6 Was fom mënx kepoer wërt, is mënx. Un was fom kayst kepoer wërt, is kayst. 7 Ferwuner tich net wayl ich tich kesaat hon: ‘Teyer mist noch mool kepoer wëre.’ 8 Te wint ploost woo eyer wil un opwool tuu tëm heere khanst, weest tuu net fon woo tee heyer khomt orer woo tee hin keet. Tas is aach soo mit tëm mënx woo fom kayst kepoer is.” 9 Tan hot Nikotemus tëm kefroot: “Wii is soo was meechlich?” 10 Yeesus hot keantwort: “Tuu pist een leerer fon Israël un noch soo weest tuu tas net? 11 Ich lose tich sicher: meyer xpreche iwer was mer wise un meyer kepe tsaye iwer was mer kesiin hon, awer teyer tuut unser tsaye net aan nëme. 12 Ich hon aych iwer tinge fon te eyert fertseelt un teyer hot net keklaapt. Soo, wii khent teyer aan mich klaape wën ich aych iwer tinge fom himel fertseele? 13 Un noch, khee mënx is tsum himel kang, ploos tee woo fom himel runer khom is: te Mënxe Soon. 14 Un soo wii Mooses ti xlang im tesërt uf kehoopt hot, mus te Mënxe Soon aach uf kehoopt wëre, 15 soo tas yeete eene woo aan tëm klaapt, eewiche leepe kriit. 16 “Wayl Kot ti welt soo fiil keliipt hot, hot eyer sayn eensiche kepoerne Soon kep, tas yeete eene woo aan tëm klaapt net fernicht wërt, awer eewiche leepe kriit. 17 Wayl Kot hot net sayn Soon tsu te welt kexikt fer ti welt richte, awer tas ti welt torich tëm keret weyer. 18 Weer aan tëm klaapt, wërt net kericht. Weer net klaapt, is xon kericht kep, wayl eyer net am naame fon Kot sayn eensiche Soon keklaapt hot. 19 Ti mënxe wëre too teweeche kericht: tas licht is tsu te welt khom, awer ti mënxe, weeche sayn xlechte aktsyoone, hate liiper ti tunkelheet wii tas licht. 20 Weer tas xlechtes pratikiirt, hast tas licht un keet net ticht paym licht, tas sayn aktsyoone net pekhant wëre. 21 Awer weer tas richtiches macht, khomt ticht paym licht, tas es taytlich kesiin wërt tas sayn aktsyoone mit Kot sayn wile xtime.” 22 Noo heyer, sin Yeesus un sayn tisipele in Yuteea rin kang, in te kolonii. Yeesus is een tsayt tat mit tëne keplip un hot ti mënxe ketaaft. 23 Awer Yoohan waar aach in Enon am taafe, ticht fon Salim, wayl es fiil waser tat waar un ti layt sin pay tëm kang un hon sich taafe kelos. 24 In tiise tsayt, waar Yoohan noch net inkexpërt. 25 Yoohan sayn tisipele hon mit een yuute ketsënkt iwer ti raynheet. 26 Tii sin pay Yoohan khom un hon kesaat: “Rapii, te man woo pay tich waar in te aner sayt fom Yortan flus, iwer weem tuu tsaye kep host, tuut yets ti layt taafe un al keen pay tëm.” 27 Too hot Yoohan keantwort: “Een mënx khan niks kriin, heechstens wën eyer tas fom himel kriit. 28 Teyer selepst sayt tsayer tas ich kesaat hon: ‘Ich sin net te Kristus, awer ich sin foer tëm kexikt kep.’ 29 Weer ti praut hot, is te prautikam. Awer te prautikam sayn fraaynt, woo pay tëm is, wërt mechtich froo wën eyer ti xtim fom prautikam horicht. Kraat soo, sin ich yets fol frooheet. 30 Tee tuut wayter kreeser wëre, awer ich tuun wayter kleener wëre.” 31 Tee woo fon oowe khomt, is heecher wii al ti anere. Tee woo fon te eyert khomt, is fon te eyert un xprecht iwer eyertlixe sache. Tee woo fom himel khomt, is heecher wii al ti anere. 32 Tee xprecht iwer was eyer kesiin un keheert hot, awer nimant tuut sayn tsaye aan nëme. 33 Tee woo sayn tsaye aan nëmt, pewayst tas Kot woer is. 34 Wayl tee woo fon Kot kexikt is, tuut Kot sayn wërter saan, wayl Kot tuut sayn kayst krooshërtslich kepe. 35 Te Fater liipt te Soon un hot ales in sayn hënt ap kep. 36 Weer aan tëm Soon klaapt, hot eewiche leepe; weer te Soon unfolicht, tuut tas leepe net siin, awer Kot sayn wuut playpt iwer tëm.