2te Timoteus

1 Phaul, aphostel fon Yeesus Kristus* torich Kot sayn wile, woo mim ferxprëche fom leepe xtimt, woo torich Yeesus Kristus* khomt, 2 fer Timoteo mayn keliipte khint: Tas tuu unfertiint kuutheet, parmhërtslichkheet un friit fon Kot, te Fater, un fon Yeesus Kristus*, unser Hër host. 3 Ich sin petanklich tsu Kot — fer weem ich mit een sauwer kewise hayliche tiinst mache, soo wii mayn foerkhomer kemacht hon, — un ich tuun mich nii fon tich ferkese wën ich taach un nacht in mayn kepeete aan hale. 4 Wën ich aan tayne treene tënke, winxe ich tich siin tas ich khan mich fol fon frooheet mache. 5 Wayl ich erinere mich fon tayne eerlich klaape, woo eyerst in tayn wowo Loyt un in tayn mama Eunise waar, un ich sin mich sicher tas tiise klaape aach in tich is. 6 Weeche tiise uersach wil ich tich erinere tas tuu uf hëtse tuust wii een fayer, tas kexënk fon Kot woos tuu kriit host wii ich mayn hënt uf tich ketuun hon. 7 Wayl Kot hot net uns een kayst oone koraaj kep, awer een kayst fon kraft, fon liip un fon kuute ferxtant. 8 Soo, tuu tich net xeeme tas tuu tsayer fon unser Hër pist, un aach net fon mich, woo weeche tëm, sin ich prisioneer, awer trau aan Kot sayn macht, mach ti xwiirichkheete mit un hal aus weeche ti kuute oter. 9 Ëyer hot un kerët un uns aan keruuft mit een haylich aanruuf, nët weeche unsere aarwayte, awer weeche tëm sayn propoos un sayn unfertiint kuutheet. Tii is fer uns këp torich Yeesus Kristus* eep ti friirixe tsayte, 10 awer yets is kans taytlich këp, in te tsayt woo unser Rëter, Yeesus Kristus* tsum foer xayn khom is. Tee hot te toot fermacht un, torich ti kuute oter hot es taytlich kelos iwer tas leepe woo nët fekeet 11 Fon tiise kuute oter sin ich preeticher, aphostel un leerer in kesëtst këp. 12 Es is weeche tas, tas ich aach tiise tinge layte tuun, awer ich tuun mich nët xeeme. Wayl ich khëne Tee aan wëm ich klaape, un sin ich sicher tas ëyer khan wëch tuun was ich fer tëm ap këp hon, fer tee uf se phase, pis tee taach. 13 Hal tich aan tëm muste fon nutsliche wërter woos tuu fon mich keheert host, mit tëm klaape un ti liip woo ti eenichkheet mit Yeesus Kristus pringt. 14 Torich te hayliche kayst woo in uns woont, xits te xats woo tich fertraut waar. 15 Tuu weest tas al fon te prowins fon Asya hon sich fon mich ap kelënkt, tepay sin Fikëlus un Hermoxenes. 16 Ich ferlange tas te Hër parmhërtslichkheet fer Onesiforus sayn familye xenkt, wayl eyer hot mich ofts uf kemuut, un hot sich net kexeemt wayl ich inkexpërt waar. 17 Kraat anerste: wii eyer in Roma waar, hot eyer mich flaysich kesuucht pis eyer mich kefun hot. 18 Ich ferlange tas te Hër Yeehoowa tëm parmhërtslichkheet in tëm taach tsaycht. Un tuu weest kans kenau wii fiil tinge eyer hot fer mich in Ëfeso kemacht.