Markus

3 Un, wii eyer in Petanya waar, am ese in tëm haus fon Simon, woo lëpra hat, is een fraa khom mit een kleene alapaster kruuch woo een eel mit kuute keroch trin hat, phuer nartus, kans tayer. Tii hot tas kruuch uf keproch un aan kefang tas eel ufm Yeesus sayn khop xite. 4 Weeche tas, welche sin pees kep, un hon sich naner kesaat: “Fer was waar tiise eel mit kuute keroch wech kexmis? 5 Tiise eel mit kuute keroch khent fer 300 tenaarye ferkhaaft wëre, un tas kelt khent fer ti aarme kep wëre!” Un tii sin aarich pees mit tëne kep. 6 Awer Yeesus hot kesaat: “Lost tii im ruu. Warom wolt teyer tëne sayn leepe xweyer lose? Tii hot mich etwas aarich kuut kemacht. 7 Wayl teyer tuut imer ti aarme pay aych hon, un teyer khan tëne helfe wanee teyer wolt; awer teyer tuut mich net imer hon. 8 Tii hot kemacht was se khont. Xon foer heyer, hot se eel mit kuute keroch iwer mayn khërper kexut, weeche mayn pekreepnis. 9 Ich tuun fer aych wërklich saan: uf te kans welt, in yeete plats woo ti kuute notisye kepreeticht wëre, was tiise fraa kemacht hot wërt aach fertseelt, un soo wërt se erinert.” 12 Im eyerste taach fom Fëst fom Proot oone Heep, wii se keweent waare tas Oostre opfer opfere, hon sayn tisipele iim kefroot: “Hër, woo wilst tuu tas mer tas Oostre ese in richte sole?” 13 Tan, hot tee tswaay fon sayn tisipele kexikt tas mache: “Keet in ti xtat rin, un een man woo een let kruuch mit waser traat, tuut aych trefe. Keet tëm noo, 14 un tat woo eyer rin keet, saat fer te hër fom haus: ‘Te Leerer saat: “Woo is tas pesuuch xtup tsimer, woo ich tas Oostre ese mit mayn tisipele ese khan?”’ 15 Un eyer tuut aych een kroos xtup tsimer im tsweete xtok fom haus tsayche, woo mopiliirt un fërtich is. Tuut tat tas tings fer uns in richte.” 16 Tan sin ti tisipele in te xtat rin kang un hon ales soo kefun wii tee tëne kesaat hat, un hon tas Oostre ese in kericht. 17 Wiis nacht kep is, is Yeesus mit te Tswelef tat aan khom. 18 Un, wii se sich aan te tix am sitse waare un kes hon, hot Yeesus kesaat: “Ich saan aych ti woerheet: Eene fon aych, woo mit mich est, tuut mich hinerkeen.” 19 Tii hon aan kefang sich aarich traurich xpiire, un eene noom aner hot tëm kefroot: “Hër, sin net ich, kël?” 20 Eyer hot tëne keantwort: “Tas is eene fon te Tswelef, tee woo sayn hant mit mich in te xisel tuut. 21 Wayl te Mënxe Soon tuut faart keen, soo wiis iwer tëm kexrip xteet. Awer ferfluucht is tee woo te Mënxe Soon hinerkeet! Es weyer peser fer tiise man tas tee net uf ti welt khom weyer.” 22 Wii se wayter kes hon, hot Yeesus een proot kehool un een seechen aus kexproch; tan, hot eyer es ferproch, hot tas fer tëne kep, un kesaat: “Hoolt es; tas petayt mayn khërper.” 23 Un eyer hot een khelich kehool, hot ketankt un hot es fer tii kep un al hon fon tëm ketrunk. 24 Un tee hot tëne kesaat: “Tas petayt mayn ‘pluut fom pakt’, woo aus kexut wërt fer nutse fer fiile pringe. 25 Ich saan aych ti woerheet: Fon yets aan, tuun ich sicher net trinke fon was fon traupe kriist kemacht is pis te taach woo ich naye wayn mit aych trinke tuun, in Kot sayn Raych.” 26 Tsum xlus, hon se loop liiter kesung un sin tsum Oliiwe Përich kang. 27 Un Yeesus hot tëne kesaat: “Teyer al tuut xtolpere, wayl es xteet kexrip: ‘Ich tuun te xeefer wee mache, un te trop xeef wërt aus naner kextraut.’ 28 Awer noo ich fom toot uf keruuft wëre, keen ich foer aych pis Kalileya.” 29 Awer Pheeter hot tëm kesaat: “Aach wën al ti anere xtolpere, tuun ich net xtolpere!” 30 Tes weeche, hot Yeesus tëm keantwort: “Ich saan tich ti woerheet: Hayt, yaa, noch in tiise nacht, eep te haan tswaay mool kreet, tuust tuu mich tray mools ap saan.” 31 Awer Pheeter hot wayter kesaat: “Aach wën ich mit tich xtërpe mus, tuun ich tich nii ap saan.” Un al ti anere hon aan kefang tas selwiche saan. 32 Tan sin se tsu tas plats khom woo Xetsëmani heest, un eyer hot fer sayn tisipele kesaat: “Setst aych too hin in te tsayt woo ich peete.” 33 Tan hot eyer Pheeter, Tyako un Yoohan mit kenom, un tee hot aan kefang tiif traurich un aarich ëngstlich kepe. 34 Tee hot tëne kesaat: “Ich sin soo tiif traurich tas ich neekst am xtërpe sin. Playpt too un halt aych wachsam.” 35 Un wii eyer pisye wayter kang is, hot eyer sich ufm pootem kepikt un hot aan kefang se peete tas, wëns meechlich weyer, solt ti xlime xtun net khome. 36 Un tee hot kesaat: “Abba, Fater, fer tich ales is meechlich; hool tiise khelich fon mich wech. Toch, net soo wii ich wil, awer soo wiis tuu wilst.” 37 Tee is tsurik kang un hot se am xloofe kefun, un hot fer Pheeter kesaat: “Simon, pist tuu am xloofe? Hast tuu net kraft fer ploos een xtun wach plaype? 38 Halt aych wachsam un peet noo un noo, tas teyer net in fersuuchung falt. Kewis, te kayst is wilich, awer tas flayx is xwach.” 39 Tee is noch mool wayter kang fer se peete un hot tas selwiche ferlangt. 40 Un wii eyer wiiter tsurik khom is, hot eyer tii am xloofe kefun, wayl tëne sayn aue xweyer weeche te xloof waare. Tes weeche, wuste se net was se tëm antworte solte. 41 Tee is tan tas trite mool tsurik khom un hot tëne kesaat: “In soo een momënt sayt teyer am xloofe un am ruue! Es is xon kenuuch! Ti tsayt is khom! Kukt! Te Mënxe Soon wërt yets tsu ti sinter sayn hënt ap kep. 42 Xtayt uf, wole mer faart keen. Kukt! Tee woo mich hinerkeet, is am khome.” 43 In tëm momënt, wii eyer noch am xpreche waar, is Yuutas, eene fon te Tswelef, khom, un mit tëm waare fiile layt mit xwaarte un knipele. Tii sin fon te haupste priister, ti xrayper un ti elteste kexikt kep. 44 Te hinerkeener hat een sinaal mit tëne ap kemacht un hot kesaat: “Tee woo ich een khus kepe, is te man; fangt tëm un nëmt tëm mit te wachter faart.” 45 Tan, is tee richt tsu Yeesus kang un hot tëm kesaat: “Rapii!” un hot tëm liiplich kekhust. 46 Tan, hon se tëm fest kehal un kefang. 47 Awer eene woo tat waar, hot te xwaart raus ketsoo un hot een sklaaw fom hooche priister atakiirt un tëm sayn oer ap kexlaa. 48 Tan hot Yeesus tëne kesaat: “Sayt teyer khom fer mich mit xwaarte un knipele fange, wii wën ich een pantit weyer? 49 Ich waar yeete taach mit aych im thempel fer ti layt in lërne; toch, teyer hat mich net kefang. Awer tas is soo tas ti Xrifte sich erfiile khene.” 50 Un tii al hon tëm im xtich kelos un sin ap kehaut. 51 Awer een yunge man, woo ploos een layn tuuch iwer sayn nakich khërper hat, hot aan kefang tëm ticht noo keen, un tii hon fersuucht tëm fange, 52 awer eyer hot tas layn tuuch fale kelos un is nakich aus keris. 53 Yeesus is tan tsu te hooche priister kenom kep; un ti kanse hooche priister, ti elteste un ti xrayper hon sich fersamelt. 54 Awer Pheeter is tëm fon wayt noo kang pis tsum hoof fom hooche priister; un tee hot pay ti knechte kesetst fer sich foer tas fayer uf wërme. 55 Ti haupste priister un te kanse Sinëtryum waare am fersuuche tsaye keeche Yeesus fine, fer tëm um pringe, awer tii hon khee eene kefun. 56 In woerheet, hon fiile falxe tsaye keeche tëm kep, awer tëne sayn tsaye hon net eene mit te aner kextimt. 57 Un aach, sin etliche uf kextii un hon falxe tsaye keeche tëm kep, am saan: 58 “Meyer hon tëm keheert saan: ‘Ich tuun tiise thempel, woo torich mënxliche hënt kepaut kep is, um xmayse, un in tray taache, tuun ich een aner paue, woo net torich mënxliche hënt kepaut wërt.’” 59 Awer soo kaar in tiise phunkt, hot tëne sayn tsaye net kextimt. 60 Tan, hot te hooche priister sich in te mite fon tëne uf kextelt un hot Yeesus kefroot: “Tuust tuu khee antwort kepe? Was saast tuu iwer te tsaye fon tiise mëner keeche tich?” 61 Awer eyer is wayter ruych keplip un hot khee antwort kep. Te hooche priister hot tëm wayter kefroot: “Pist tuu te Kristus, te Soon fom Keseechente?” 62 Yeesus hot tan keantwort: “Ich sin tee; un teyer tuut te Mënxe Soon siin uf te recht sayt fon macht am sitse un mit te wolke fom himel am khome.” 63 Weeche tas, hot te hooche priister sayn tsaych feris un kesaat: “Fer was prauche mer noch tsayer? 64 Teyer hot tiise ferfluuchung keeche Kot keheert. Was is ayer ëntxlus?” Al hon ëntxlos tas eyer te toot fertiint hot. 65 Un etliche hon aan kefang tëm aan xpuke, tëm sayn kesicht teke, tëm ferklope un tëm saan: “Mach een profetsii!” Un, noo ti wachter fom kericht tëm ferklopt hon, hon se tëm faart kenom. 66 Tan, wii Pheeter uner im hoof waar, is een tiinerin fom hooche priister khom. 67 Wii se Pheeter kesiin hot sich uf wërme, hot se tëm aan kekukt un kesaat: “Tuu waarst aach mit tëm Nasareener, tiise Yeesus.” 68 Awer tee hot tas ap kesaat, am saan: “Ich khëne tee net un ich wees net iwer was tuu am xpreche pist.” Tan, is eyer raus kang tsum inkang fom hoof. 69 Ti tiinerin hot tëm tat kesiin un hot wiiter aan kefang se saan fer tii woo tat waare: “Tee is eene fon tëne.” 70 Tee hot tas noch mool ap kesaat. Un, pisye xpeeter, tii woo tat waare hon wiiter aan kefang fer Pheeter saan: “Sicher pist tuu eene fon tëne, wayl tuu een kalileer pist.” 71 Awer tee hot aan kefang sich selepst ferfluuche un ërnst ferxpreche: “Ich khëne tiise man net fon weem teyer am xpreche sayt!” 72 Im selwich momënt, hot een haan tas tsweete mool kekreet, un Pheeter hot sich erinert was Yeesus tëm kesaat hat: “Eep te haan tswaay mool kreet, tuust tuu mich tray mool ap saan.” Un, tiif traurich, hot eyer aan kefang se prile.