Aphostele sayn Kexicht

15 Etliche mëner sin fon Yuteea khom un hon aan kefang ti priiter in lërne: “Wën teyer net pexnit wërt, tëm noo Mooses sayn kewoonheet, khent teyer net keret wëre.” 2 Awer, noo fiil tiskusyoon tswixich Phaul un Parnapë mit tëne, hon se ëntxlist tas Phaul un Parnapë un phaar anere teete tsu Yeruusalem keen fer tiise tinge mit te aphostele un elteste unersuuche. 3 Noo ti kemaynt mit tëne een xtik fom weech kelaaft is, sin tiise mëner wayter torich Fenisya un Samaria kereest. Tii waare in kleenichkheete am fertseele wii ti layt fon te natsyoone rom kang sin un hon een kroos frayt fer ti kanse priiter keprung. 6 Ti aphostele un ti elteste hon sich fersamelt fer iwer tiise sache xpreche. 7 Noo een lang tsayt too triwer xpreche, is Pheter uf kextii un hot tëne kesaat: “Priiter, teyer weest kenau tas, fom aanfang aan, hot Kot mich tswixich aych raus kesuucht tas ti layt fon te natsyoone khente fon mayn munt tas wort fon te kuute notisye heere un klaape. 12 Wii se tas keheert hon, is te kanse krup ruych keplip un hon aan kefang tsu horiche was Phaul un Parnapë fertseelt hon iwich ti fiile tsayche un wunere woo Kot torich tëne kemacht hot unich ti natsyoone. 13 Noo tëm tii noo kelos hon tsu xpreche, hot Tyako kesaat: “Mëner un priiter, horicht was ich saan. 14 Simeoon hot es taytlich pekhant kemacht wii Kot, tas eyerste mool, acht tsu te natsyoone kep hot, fer een folek fer Sayn naame raus hoole. 15 Too temit xtime ti wërter fon te profeete, wiis kexrip is: 16 ‘Noo tas khome ich tsurik un xtele ich Tawi sayn parak uf, woo kefalt is; ich paue ti ruiine noch mool uf un tuun tas wiiter xtele, 17 soo tas te rest fon te mënxe flaysich Yeehoowa suuche sol, tsusamer mit layt fon ale natsyoone, layt woo mit mayn naame kenënt sin, saat Yeehoowa, tee woo tiise tinge mache tuut, 18 woo pekhant sin fon friier aan.’ 20 awer fer tii xraype tas se sich fon kontaminiirte tinge fer ti keeter, fon seksuaal imoraliteet, fon was ap kextrost is woer un fom pluut wech hale. 22 Too hon ti aphostele un ti elteste, mit te kans kemaynt, ëntxlist fer unich tëne raus kesuuchtne mëner, mit Phaul un Parnapë, fer Antyokya xike; hon se Yuutas kexikt, woo Parsapas kenënt waar, un Silas, mëner woo ti foerhant hate tswixich ti priiter. 23 Tii hon tiise priif kexrip un torich tëne kexikt: “Ti aphostele un ti elteste, ayre priiter, xike kriise tsu ti priiter woo sin fon te natsyoone, woo in Antyokya, Siirya un Silisya sin. 24 Meyer hon keheert xpreche tas etliche unich uns faart kang sin un hon fiil propleeme fer aych keprung mit was se kesaat hon, un hon fersuucht aych konfuus lose; awer meyer hate tëne khee een instrutsyoon kep. 25 Tes weeche hon mer mitsamer ëntxlist, mëner raus suuche un tii tsu aych xike mit unser liipe priiter Parnapë un Phaul, 26 woo iire leepe ap kep hon fer te naame fon unser Hër Yeesus Kristus. 27 Soo hon mer aach Yuutas un Silas mit kexikt, tas tii khene aych tas selwiches saan. 28 Wayl meyer un te hayliche kayst hon es kuut kefun khee aner last uf aych tuun, heechstens tiise neetiche tinge: 29 teyer solt wayter niks aan nëme woo fer ti itole keopfert kep is, khee pluut, niks woo ap kextros kep is un aach khee seksuaal imoraaliteet. Wën teyer aych too tefun wech halt, wërt es aych kuut keen. Halt aych munte!” 30 Un soo, noo se faart keen khonte, sin ti mëner runer pis Antyokya kang; tii hon te kans krup kesamelt un tëne te priif kep. 31 Wii se te priif kelees hon, hon se sich mit te uf muutiche wërter kefrayt. 32 Un wayl Yuutas un Silas aach profeete waare, hon se ti priiter mit fiile reete uf kemuut un se ferxtërkt. 36 Phaar taache xpeeter, hot Phaul tsu Parnapë kesaat: “Wole mer yets tsurik keen un ti priiter in ale xtëte woo mer Yeehoowa sayn wort kepreeticht hon pesuuche, fer se siin wii se traan sin.” 37 Parnapë waar pextimt fer Yoohan mit nëme, woo Markus kenënt waar. 38 Awer Phaul hot net kuut kefun tëm mit nëme, wayl tee is fon tëne in Panfiilya wech kang, un is net mit tëne tsu te aarwayt kang. 39 Soo, hon se een xtrayteray kehat un sin aus naner kang. Tan, hot Parnapë Markus mit kenom un is in een xif tsu Xipre kereest. 41 Tee is torich Siirya un Siliisya kang, un hot ti kemaynte ferxtërekt.