Maay

Noo te himlix krup siin, siit Yoohan een “kroos folek”. Anerste wii ti 144.000, ti Piipel saat net wii fiil layt teel fon tiise krup mache. Was wise mer iwer tëne? Een engel saat fer Yoohan: “Tas sin tii woo fon te kroos tripulatsyoon raus khom sin; un tii hon sayn lang tsaych kewext un im pluut fom Lam ways kemacht.” (Apo. 7:14) Noo te kroos tripulatsyoon iwerleepe, tuut tiise “kroos folek” too uf te eyert woone un wunerliche seechen kriin. (Psal. 37:9-11, 27-29; Xpr. 2:21, 22; Apo. 7:16, 17) Ekaal ep tayn hofnung im himel orer too uf te eyert leepe is, khanst tuu tich siin too in tiise wërter woo in Apokalipsis 7 xteen? Es weyer kuut tas mache. Tas wërt een wunerlich tsayt fer ti 2 krupe fon Yeehoowa sayn tiiner sin. Meyer wëre aarich froo sin wayl mer raus kesuucht hon Yeehoowa sayn Raych pay xteen! (Wachthorm 05/22 s. 16 ap. 6-7)

Wëns tuu xon een mool een wichtich ëntxlus mache praychst, sicher host tuu kluucheet im kepeet ferlangt wayl tuu wust tas aleen, kriin mer es net hin kuute ëntxlise mache. (Tya. 1:5) Te kheenich Salomon hot kexrip: “Ti kluucheet is tas haupste.” (Xpr. 4:7) Kewis waar Salomon net am xpreche fon te kluucheet woo fon te mënxe khomt, awer tii woo fon Yeehoowa khomt. Awer khan Yeehoowa sayn kluucheet uns helfe mit te propleeme hayt tsu taach um keen? Yawool! Wii? Een aat is xtutiire un aan wëne ti wërter fon 2 mëner woo aarich kluuch waare. Eyerst, tenk aan Salomon. Ti Piipel saat tas “Kot hot fer Salomon iwermeesich kluucheet un ferxtëntnis kep”. (1 Khe. 4:29) Tsweet, tenk aan Yeesus, ti kluuchst persoon woo xon keleept hot. (Mat. 12:42) Een profetsii hot iwer Yeesus kesaat: “Yeehoowa sayn kayst wërt iwer tëm sin, te kayst fon kluucheet un fon ferxtëntnis.” (Isa. 11:2) (Wachthorm 05/22 s. 20 ap. 1-2)

Nimant is tsu alt fer tsiile xtele un trefe. Kuk mool tas payxpiil fon Beverley, een xwester woo 75 yoore alt waar. Weeche een xlim krankheet, waar es xweyer fer tii se laafe. Awer tii wolt mee mache fer in te kampanya fom Aantenke mit helfe. Soo hot se spetsiifixe tsiile kextelt un tii is aarich froo kep wii se tëne ketrof hot. Tëne sayn aanxtrengung hot anere uf kemuut aach xtram xafe in te preetich aarwayt. Yeehoowa kept fiil weyert fer ti aarwayt fon unser elter priiter, soo kaar wën sayn situatsyoon tëne um halt mee mache. (Psal. 71:17) Xtel tsiile woos tuu trefe khanst. Tuu kwaliteete ëntwikele woo Yeehoowa kefale. Lërn apiliteete woo tich nutslicher lose fer Yeehoowa un sayn Orkanisatsyoon. Suuch aate fer tayn priiter peser helfe. Mit Yeehoowa sayn seechen, soo wii Timoteus, “wërts fer al taytlich tas tuu am foran keen pist”. (1 Tim. 4:15) (Wachthorm 04/22 s. 27 ap. 18-19)

Un wën eene fon tayn khiner saat tas eyer wil net mee Yeehoowa tiine, opwool tuu tich fiil aan kextrengt host? Tuu net rechne tas es tayn xult is. Yeehoowa hot fer ale kaar — too tepay tayn khiner — een fray wile kep, es wil saan, ti apiliteet fer raus suuche ep mer tëm tiine tuun orer net. Kep net uf tayn hofnung tas eyer eene taach retuer khomt. Ferkes tich net fom kexicht fom ferloerne soon. (Luk. 15:11-19, 22-24) Te yunge man hot fiile xlechte tinge kemacht. Awer am ën, is eyer retuer khom. Eltere, teyer hot een wunerliche kexenk kriit: een nay xeneratsyoon fon Yeehoowa sayn tiiner tsiie. (Psal. 78:4-6) Tas is khee laycht flicht. Meyer loope aych weeche ayre xweyer aarwayt fer ayre khiner helfe Yeehoowa liipe un tëm aan heere. Sayt aych sicher tas unser liipliche Fater im himel wërt aarich froo sin. (Ëfe. 6:4) (Wachthorm 05/22 s. 30-31 ap. 16-18)

Wën yeete eene fon uns unser pestes macht, khene mer ti kemaynt helfe friit un eenichkheet hon. Kuk mool tas payxpiil fon te eyerste kriste. Tii hate unerxiitliche apiliteete un flichte. (1 Kor. 12:4, 7-11) Awer tas waar khee uersach fer eene mit te anere xtrayte. Tes weeche, hot Phaul al uf kemuut sayn teel mache “fer Kristus sayn khërper uf paue”. Tee hot fer ti Ëfeser kexrip: “Wën yeete khërper teel sayn aarwayt richtich macht, tas heleft tas te khërper wakst un sich in liip uf paut.” (Ëfe. 4:1-3, 11, 12) Tii woo Phaul aan keheert hon, hon te friit un ti eenichkheet uf kemuut — etwas woo mer hayt in unser kemaynte siin. Say pextimt net tich mit te anere ferklayche. Xtats tas, lërn fon Yeesus sayn payxpiil un xtreng tich aan fer sayn kwaliteete noo mache. Say tich sicher tas ‘Yeehoowa net unkerecht is fer sich fon tayn aarwayt ferkese’. (Hep. 6:10) Eyer wërt froo sin wëns tuu wayter tayn pestes machst fer tëm kefale. (Wachthorm 04/22 s. 14 ap. 15-16)

Meyer sin aarich petanklich tas mer net ti flicht hon fer se ëntxlise ep yemant woo een xweyer sint kemacht hot, Yeehoowa sayn fertsayung fertiint orer net. Awer es kept etwas woo mer ëntxlise mise. Was is tas? In etliche situatsyoone khan een persoon een sint keeche uns mache, awer xpeeter sich ëntxultiche un ferlange tas mer se fertsaye. Awer khan aach pasiire tas ti persoon tas net macht. Noch soo, khene mer raus suuche ti persoon fertsaye un net pees mit tëne plaype. Es is woer tas es khan fiil tsayt un aanxtrengung khoste, hauptseechlich wën ti persoon uns aarich wee kemacht hot. A Sentinela 15^te Septemper fon 1994 saat: “Wën mer yemant fertsaye woo een sint kemacht hot, es wil net saan tas mer ti sint aan nëme. Een krist woo fertsayt, traut tas Yeehoowa tuut tas in een perfekt aat richte. Yeehoowa is te kerecht Richter fom kanse Uniwërsum, un tee tuut kerechtichkheet pringe in te richtich tsayt.” (Wachthorm 06/22 s. 9 ap. 6-7)

Yeehoowa hot ferxproch tas in unser tsayt, teet eyer layt fon unerxiitliche natsyoone, xprooche un xteme samele fer Tëm eenich tiine. Hayt wërt tiise ekstra krup layt wii “tas kroose folek” kekhënt. (Apo. 7:9, 10) Opwool tiise mëner, fraae un khiner fon unerxiitliche lënter sin, sin se ploos een familye woo in friit leept. (Psal. 133:1; Yoo. 10:16) Tii sin imer fërtich fer sayn hofnung fon een peser welt mit ale tii woo heere wole teele. (Mat. 28:19, 20; Apo. 14:6, 7; 22:17) Wëns tuu teel fon tëm kroose folek pist, sicher kepst tuu fiil weyert fer tayn hofnung. Te Taywel wil net hon tas tuu een hofnung fer te futuer host. Tëm sayn opjetiiw is uns klaape mache tas Yeehoowa net sayn ferxpreche in halt. Wën Satanaas unser hofnung fernicht kriit, khene mer oone muut plaype un soo kaar noo lose Yeehoowa tiine. (Wachthorm 06/22 s. 20-21 ap. 2-3)

Unser fest hofnung lost uns in ruu wën mer propleeme mit mache, wayl mer klaape tas peser tsayte khome tuun. Eriner tich: Yeesus hot uns aan kesaat tas mer keyacht weyere. (Yoo. 15:20) Soo triwer noo tenke aan Kot sayn ferxpreche fer te futuer, helft uns tëm wayter fest tiine. Kuk mool wii ti hofnung Yeesus keholef hot troy plaype, opwool eyer wust tas een xroo toot foer tëm waar. Im Phingste Taach fon 33 N.K., hot te aphostel Pheeter iwer ti profetsii fon een Psalm kexproch. Tii pexraypt wii Yeesus sich in ruu un sicher kexpiirt hot: “Ich tuun in hofnung leepe. Wayl tuu lost mich net im Kraap. Tuu lost net weer leaal is, fertërpe. (…) Tuu tuust mich fol frooheet lose in tayn presëns.” (Aph. 2:25-28; Psal. 16:8-11) Yeesus hat een fest hofnung tas Kot tëm uf ruufe teet un tas eyer noch mool ti frooheet kreecht fer tsurik mit sayn Fater im himel sin. (Hep. 12:2, 3) (Wachthorm 10/22 s. 24-25 ap. 4-5)

Een mool, hon 2 aphostele — Tyako un Yoohan — etwas fer sayn mama ferlangt: tii solt fer Yeesus frooe ep eyer khent wichtiche xtele im Raych fer ti 2 kepe. (Mat. 20:20, 21) Was Tyako un Yoohan kemacht hon, hot ketsaycht tas se hoochmuutich waare un tas se wolte wichticher wii ti anere sin. (Xpr. 16:18) Awer tii waare net ti eensiche woo sich xlecht aan kextelt hon in tiise situatsyoon. Mërk ti aanxtelung fon te anere aphostele: “Wii ti anere 10 tas tsum wise kriit hon, sin se pees mit te 2 priiter kep.” (Mat. 20:24) Meyer khene uns iwerleye ti krope wërter woo Tyako, Yoohan un ti anere aphostele sich naner kesaat hon. Was hot Yeesus in tiise situatsyoon kemacht? Tee is net pees kep un hot net kesaat: ‘Ich tuun peser aphostele suuche, mëner woo teemuuticher sin un woo ti anere imer mit liip pehantele.’ Xtats tas, hot Yeesus ketultich mit tëne kexproch, wayl eyer wust tas se wolte tas richtiches mache. (Mat. 20:25-28) Yeesus hot se wayter mit liip pehantelt. (Wachthorm 03/23 s. 28-29 ap. 10-13)

Tuu host xon fiil kemacht. Tuu host ti Piipel flaysich xtutiirt, fiilaycht torich phaar yoore. Tayn xtuutyum hot tich sicher kelos tas ti Piipel Kot sayn Wort is. Awer noch wichticher: tuu host te Autoer fon te Piipel khëne kelërnt un aan kefang tëm liipe. Tayn liip tsu Yeehoowa is soo xtark kep tas tuu host tayn leepe tsu tëm tetikiirt un tich taafe kelos. Tuu host wërklich een kluuch ëntxlus kemacht! Foer tayn taaf, sicher hast tuu propleeme woo xweyer fer tich kelos hon ticht pay Kot plaype. Awer soo lang wiis tuu in kaystlich aat wakst, khome naye proope. Satanaas tuut fersuuche tayn liip tsu Yeehoowa ferxweeche un tich noo lose mache Kot tiine. (Ëfe. 4:14) Los tas net pasiire! Was khan tich helfe troy tsu Kot plaype un tayn ferxpreche fer tëm tiine hale? Tuu must “foran keen” — es wil saan, wayter xtram xafe fer een rayfe krist sin. (Hep. 6:1) (Wachthorm 08/22 s. 2 ap. 1-2)

Yeete eene in te familye hot ti flicht fer etliche sache, woo mit te familye se tuun hon, net aus prayte. Tsum payxpiil: im xtant hot een xwester een kewoonheet woo sayn man een pisye lache macht. Teet eyer fer ti anere too triwer fertseele un soo se ferxeeme? Sicher net! Tee liipt sayn fraa un teet nii was mache woo se wee mache teet. (Ëfe. 5:33) Es is wichtich tas ti eltere sich erinere tas ti yunge wole mit respekt pehantelt wëre. Tii sole net fon te khiner sayn feeler foer te anere fertseele, un soo tëne ferxeeme. (Kol. 3:21) Ti khiner mise aach ferninftichkheet tsayche un net iwer tinge fertseele woo khente anere mitkliiter fon te familye xeeme. Wën yeete eene in te familye sayn teel macht fer net ti familye sayn perseenliche sache aus prayte, tuut ti eenichkheet fon te familye sich ferxtërke. (Wachthorm 09/22 s. 10 ap. 9)

Yeehoowa hot Yoop erinert fon sayn iwermeesich kluucheet un ti liiplich aat wii Eyer sayn kriatuure uf phase tuut. Tee hot iwer fiile wunerliche tiere kexproch. (Yoop 38:1, 2; 39:9, 13, 19, 27; 40:15; 41:1, 2) Yeehoowa hot aach Elyuu penutst, een yunge un troye man, fer Yoop treeste un ferxtërke. Elyuu hot Yoop sicher kelos tas Yeehoowa imer peloont sayn tiiner woo aus hale. Awer Yeehoowa hot aach Elyuu penutst fer etliche liipliche aanreete fer Yoop kepe. Elyuu hot Yoop keholef net tsu fiil aan sich selepst tenke. Wii? Tee hot Yoop erinert tas mer aarich kleen sin, ferklaycht mim Kriatoer fom uniwërsum, Yeehoowa. Kot hot aach een flicht fer Yoop kep: tee mist peete fer ti 3 mëner woo kesint hate. (Yoop 42:8-10) Wii helft uns Yeehoowa hayt wën mer xlime proope mit mache? Yeehoowa xprecht net mit uns soo wii eyer mit Yoop kemacht hot; awer, mer khene Tëm sayn wërter torich ti Piipel heere. (Rom. 15:4) (Wachthorm 08/22 s. 11 ap. 10-11)

In te kemaynt in Roma, es waare yitixe priiter un priiter woo net yitix waare. Wii tas mosayxe Kesets noo kelos hot se kile, praychte ti kriste net mee sayn kesetse iwer etliche ese foliche. (Mar. 7:19) Fon tat aan, hon etliche yitixe kriste sich fray kexpiirt fer ale sorte esmitel ese. Awer anere yitixe kriste hon kemënt tas soo was mache net richtich weyer. Tes weeche is ti kemaynt keteelt kep. Te aphostel Phaul hot aus keleet wii wichtich es waar te friit hale. Soo hot eyer ti priiter keholef ferxteen tas soo sorte xtrayte khente fiil xaate pringe — net ploos fer ti priiter, awer fer ti kans kemaynt. (Rom. 14:19, 20) Tee waar aach wilich fer sayn aychne aanxtelung ënere tas anere net xtolpere teete. (1 Kor. 9:19-22) In te selwich aat hayt, khene unser mënunge anerste sin wii ti priiter sayns. Awer mer tuun te friit hale un ti anere uf muute wën mer net too triwer tsënke. (Wachthorm 08/22 s. 22 ap. 7)

Wën mer wole een tsiil in Yeehoowa sayn tiinst trefe, mise mer uns too traan aan xtrenge. Un tas is aach soo wën mer wole ti kerechtichkheet suuche. Yeehoowa tuut uns mit ketult helfe wayter foran keen, tas mer soo yeete taach een pisye peser wëre. (Psal. 84:5, 7) Mit liip, helft Yeehoowa uns traan tenke tas sayn kesetse foliche is net een last. (1 Yo. 5:3) Kans anerste, tas is een xuts woo mer mise yeete taach hon. Tenk tich traan fon tas ayse west woo te aphostel Phaul pexrip hot. (Ëfe. 6:14-18) Was fer teel hot te soltaat sayn hërts kexitst? Tas prust xilt. In te selwich aat, tas “prust xilt fon kerechtichkheet”, woo petayt was Yeehoowa saat richtich is, xitst unser hërts — es wil saan, ti persoon woo mer inerlich sin. Tes weeche is es soo wichtich tas prust xilt fon kerechtichkheet imer aan hon! (Xpr. 4:23) (Wachthorm 08/22 s. 29 ap. 13-14)

Torich xon tausente yoore, kept Kot sayn Wort kluuche oryentiirunge fer troye mëner un fraae. Wii is tas meechlich? Yeehoowa hot sich sicher kelos tas ti layt kopye fon te hayliche tekste mache teete. Opwool ti layt woo ti kopye kemacht hon imperfekt waare, hon se fiil uf kephast in sayn aarwayt. Tsum payxpiil, een kelërnt persoon hot iwer ti Hepreeyxe Xrifte kexrip: “Meyer sin uns sicher: es kept khee aner friirixe puuch woo soo kenau ap kexrip kep is.” Soo, khene mer klaape tas was mer hayt in te Piipel leese sin ti ketanke fon sayn Autoer: Yeehoowa. Kot kept uns “yeete kuute un perfekte kexenk”. (Tya. 1:17) Ti Piipel is eene fon te peste kexenke woo Yeehoowa uns kep hot. Een kexenk tsaycht fiil iwer ti persoon woo tas kept — wii fiil se uns un unser neetichkheete khënt. Tas selwiche pasiirt mit te Piipel. Wën mer tiise kexenk noo kuke, lërne mer fiil iwer Yeehoowa. Meyer lërne tas eyer uns un unser neetichkheete kuut khënt. (Wachthorm 02/23 s. 2-3 ap. 3-4)

Xtel tich mool foer ti kroos frayt woo mer xpiire tuun wën tas ufxtaye fom toot uf te eyert aan fangt, torich Yeesus sayn Tausent Yoore Rechiirung! Ale tii woo yemant im toot ferloer hon, sin tiise taach hërtslich am waarte. Yeehoowa hot aach tiise selwiche xpiirunge. (Yoop 14:15) ‘Ti kerechte’, woo sayn naame im puuch fom leepe kexrip kriit hon, wëre uf keruuft “fer een ufxtaye fers leepe”. (Aph. 24:15; Yoo. 5:29) Fiilaycht, wëre fiile fon unser keliipte tepay sin pay tëne woo uf keruuft wëre klaych noom Armaxeton. Un noch: ti unkerechte, soo wii tii woo khee richtich xans hate fer iwer Yeehoowa lërne orer tëm tiine foer sayn toot, wëre uf keruuft fer “een ufxtaye fers kericht”. Al tii woo fom toot uf xtaye, mise in kelërnt wëre. (Isa. 26:9; 61:11) Tes weeche, wërt es neetich tas kreest inlërnung prokram woo xon pasiirt is, mache. (Isa. 11:10) (Wachthorm 09/22 s. 20 ap. 1-2)

Yeehoowa hot xon ketsaycht tas eyer ti heechste autoriteet iwer krupe fon rechiirente hot. Tee hot fer ti israeliiter kekhëmpft un se keholef een kroos teel fom Ferxprochne Lant fer sich hoole. (Yos. 11:4-6, 20; 12:1, 7, 24) Yeehoowa hot noo un noo pewayst tas eyer te Ale Heechste is! Een mool, hot te papiloonixe kheenich Napukotonosoor sich keproost weeche sayn kroos kraft, macht un hërlichkheet, xtats teemuutich erkhëne tas Yeehoowa is tee woo ti loop fertiint. Tes weeche, hot Yeehoowa kemacht tas Napukotonosoor ferikt kepe teet. Noo tas eyer peser kep is, hot Napukotonosoor te “Ale Heechste keloopt” un hot erkhënt tas Yeehoowa sayn rechiirung, een eewich rechiirung is. Tee hot aach kesaat: “Es kept nimant woo khan iim tsurik hale.” (Tan. 4:30, 33-35) Te psalmist hot kesaat: “Froo is ti natsyoon woo Yeehoowa wii sayn Kot hot. Tas folek woo eyer wii sayn ërp teel raus kesuucht hot.” (Psal. 33:12) Tas is wërklich een kuut uersach fer troy tsu Kot plaype! (Wachthorm 10/22 s. 16 ap. 13-15)

Ti fiile profetsiie woo sich xon erfiilt hon, ferxtërke unser klaape aan Kot sayn ferxpreche fer te futuer. Meyer xpiire uns soo wii te psalmist woo tsu Yeehoowa kepeet hot: “Ich tuun tayn retung hërtslich waarte, wayl tayn wort is mayn hofnung.” (Psal. 119:81) Torich ti Piipel, hot Yeehoowa, mit liip, uns “een futuer un een hofnung” kep. (Yee. 29:11) Unser hofnung xtaypt sich net aan te mënxe sayn aanxtrengung, awer aan Yeehoowa sayn ferxpreche. Wole mer wayter kuute xtutënte fon te piiplixe profetsiie sin, un soo noch mee aan Kot sayn Wort traue. Ti Piipel helft ti layt woo sayn aanreete noo keen, un tas is een aner uersach warom mer aan te Piipel traue khene. (Psal. 119:66, 138) Tsum payxpiil: pheyerche woo fërtich waare fer sich tiworsiire, sin yets eenich un froo. Sayn khiner sin aach froo wayl se in een kristlich familye sin mit eltere woo se uf phase un liipe. (Ëfe. 5:22-29) (Wachthorm 01/23 s. 5 ap. 12-13)

Tenk aan te ferxpreche fon te Piipel woo sich xon in tayn leepe erfiilt hon. Tsum payxpiil: Yeesus hot ferxproch tas sayn Fater teet tich fersoriche was tuu in tayn leepe praychst. (Mat. 6:32, 33) Yeesus hot aach ti sicherheet kep tas Kot tuut tich hayliche kayst kepe wëns tuu es ferlangst. (Luk. 11:13) Tsiimlich sicher, khanst tuu in anere ferxpreche tenke woo Kot xon in tayn leepe erfiilt hot. Tsum payxpiil: tee ferxprecht tich fertsaye, treeste un tich kepe was neetich is fer ticht pay tëm plaype. (Mat. 6:14; 24:45; 2 Kor. 1:3) Wëns tuu triwer noo tenkst aan was Yeehoowa xon fer tich kemacht hot, ferxtërkst tuu tayn hofnung iwer was eyer fer tich im futuer mache tuut. Yeehoowa erfiilt imer sayn ferxpreche. Es is soo wii te psalmist kexrip hot: ‘Froo is te mënx woo sayn hofnung uf Yeehoowa, sayn Kot, xtelt, tee woo imer troy is.’ (Psal. 146:5, 6) (Wachthorm 10/22 s. 28 ap. 15, 17)

Tuut ti profetsii iwer ti phuer aanpeetung noch mool fest xtele fer uns hayt phase? Kewis. Awer wii? Tsayt 1919 N.K., sin milyoone layt fon Papiloon ti Kroos — woo al ti falxe relichyoone petayt — pefrayt kep. Tii sin tsu een peser plats wii Israël sayn Ferxprochne Lant kenom kep: een kaystlich paratiis. (Isa. 51:3; 66:8) Fon 1919 N.K. aan, leepe ti kesalpte in een kaystlich paratiis. Mit te tsayt, sin ti “anere xeef” — woo ti eyertlich hofnung hon —, aach in tiise kaystlich lant rin khom. Un tii hon Yeehoowa sayn seechen kriit. (Yoo. 10:16; Isa. 25:6; 65:13) Tas kaystlich paratiis eksistiirt uf te kans welt. Soo, hayt, ekaal woo mer woone, khene mer in tëm kaystlich paratiis leepe soo lang wii mer unser pestes mache fer ti woer aanpeetung pay xteen. (Wachthorm 11/22 s. 11-12 ap. 12-15)

Is es xweyer fer tich se ferxteen tas Yeehoowa “fer ti kans eewichkheet” eksistiirt hot? (Isa. 40:28) Tuu pist net aleen. Elyuu hot iwer Kot kesaat: “Meyer khene kaar net ferxteen wii alt eyer is.” (Yoop 36:26) Awer etwas net ferxteen wil net saan tas es net woer is. Tsum payxpiil: opwool mer net kenau ferxteen khene wii tas licht funtsyoniirt, wil tas saan tas es net eksistiirt? Kewis net. Kraat soo, khan sin tas ti mënxe nii ferxteen tuun wii es meechlich is tas Yeehoowa imer eksistiirt hot un fer imer eksistiire tuut. Awer tas wil net saan tas Kot net fer imer leept. Ti woerheet iwer te Kriatoer hëngt net ap aan was mer ferxteen khene orer net. (Rom. 11:33-36) Tee hot eksistiirt eep ales im Uniwërsum eksistiirt hot — wii ti Sun un ti xtërne — yawool, eep eyer te himel “aus kexpant” hot. (Yee. 51:15) (Wachthorm 12/22 s. 2-3 ap. 3-4)

Als mool, wëre mer in kelaat fer ti anere im kepeet representiire. Tsum payxpiil: im xtant, een xwester woo een Piipel xtuutyum fiirt, ferlangt fer ti aner xwester woo se mit helft, tas kepeet mache. Fiilaycht ti xwester woo mit helft khënt net ti xtutëntin soo kuut; tes weeche, teet se liiper tas kepeet am ën fom xtuutyum mache. Soo khan se peser wise was se saan wën se fer ti xtutëntin peet. Een pruuter wërt im xtant in kelaat fer in te preetich aarwayt fersamlung orer in te kemaynt peete. Ti priiter woo tiise priwilëj kriin, sole sich erinere fom opjetiiw fon tiise fersamlung. Tas kepeet sol net penutst wëre fer ti kemaynt aan reete orer fer etwas pekhant mache. In te meyerste fersamlunge, 5 minute sin kepleent kep fer tas liit un kepeet. Tes weeche, te pruuter woo tas kepeet macht, sol net “fiil wërter” penutse, hauptseechlich am aanfang fon te fersamlung. (Mat. 6:7) (Wachthorm 07/22 s. 24 ap. 17-18)

Yeesus hot foer raus kesaat tas, in te letste taache, teete epitemiie “uf een plats noom anere” pasiire. (Luk. 21:11) Warom tas foer raus wise, pringt uns friit? Wën een krankheet aus precht, tas ferxrekt uns net. Meyer wise tas tiise tinge sin am pasiire soo wii Yeesus es kesaat hot. Tes weeche mise mer Yeesus sayn aanreet aan heere, woo eyer kep hot fer tii woo in te tsayt fom ën leepe: “Phast uf tas iir net ëngstlich wërt.” Wën een krankheet aus precht, is es als mool net mee meechlich se mache ales was mer friier kemacht hon. Awer los tas net tayn rutiin xteere fer ti Piipel xtutiire un ti fersamlunge kuke. Ti speryense in unser puplikatsyoone un wiiteos tuun tich helfe aan priiter traan tenke woo troy plaype, opwool se eenliche propleeme mit mache. (Wachthorm 12/22 s. 17 ap. 4, 6)

Es waar kans taytlich tas Yaakop hot sayn soon Yoosef aarich keliipt. (Xee. 37:3, 4) Tes weeche Yaakop sayn elter soone hon fiil nayt fon Yoosef kriit. Wii se een xans hate, hon se Yoosef fer een krup mityaniitixe kexefts mëner ferkhaaft. Tiise kexefts mëner hon Yoosef hunerte kilometer wech kenom, pis am Ejipt. Tat is eyer noch mool ferkhaaft kep, yets fer Potifaar, xëf fon te mëner woo Faraoo kexitst hon. Yoosef sayn leepe hot sich fiks keënert. Eene taach waar eyer te liipe soon fon sayn fater; te aner, een sklaaw im Ejipt! (Xee. 39:1) Als mool mache mer xwiirichkheete mit woo ‘keweenlich sin fer ti mënxe’ — es wil saan, propleeme woo ale mënxe mit mache. (1 Kor. 10:13) Orer im xtant layte mer wayl mer Yeesus sayn tisipele sin. Tsum payxpiil, ti anere khene uns ferxpote, sich keeche uns xtele orer soo kaar uns yachte weeche unser klaape. (2 Tim. 3:12) Ekaal was tuu mit machst, Yeehoowa khan tich helfe. (Wachthorm 01/23 s. 14-15 ap. 3-4)

Manich mool, khene mer tenke tas mer mise mit een pruuter xpreche woo uns pelayticht hot. Awer eyerst, weyers kuut uns selepst frooe: ‘Ferxteen ich ales was pasiirt is?’ (Xpr. 18:13) ‘Is es meechlich tas te pruuter mich net fer kërn pelayticht hot?’ (Ekl. 7:20) ‘Hon ich xon een eenlich feele kemacht?’ (Ekl. 7:21, 22) ‘Wën ich mit te persoon too triwer xpreche, meecht ich te propleem noch xlimer lose?’ Wën mer tsayt hoole fer tiise frooche antworte, fiilaycht fine mer raus tas ti liip khan uns uf muute noo lose se tenke aan was pasiirt is. Yeete eene fon uns khan pewayse tas mer wërklich Yeesus sayn nookeener sin, wën mer woere liip fer unser priiter tsayche, opwool sayn imperfektsyoone. Wën mer tiise liip tsayche, fiilaycht tuun anere erkhëne tas mer ti woer relichyoon sin un aach Yeehoowa aan peete. Wole mer pextimt sin wayter tsayche ti liip woo ti woere kriste itentifitsiirt. (Wachthorm 03/23 s. 31 ap. 18-19)

Ti Piipel helft uns ferxteen tas Kot sayn kreest kwaliteet ti liip is. Wayl Yeehoowa uns liipt, hot eyer uns net iwerlaat mit kleenichkheete woo mer net wise prayche fer tëm tiine. (Yoo. 21:25) Yeehoowa fertseelt aach mit uns in een aat woo uns respekt tsaycht un tas pewayst aach tas eyer uns liipt. In te Piipel, kept eyer uns net een lang list fon reekele fer se kontroliire ales was mer mache. Xtats tas, penutst eyer woere kexichte, wunerliche profetsiie un nutsliche aanreete fer uns helfe kuute ëntxlise mache. Soo tuut Kot sayn Wort uns uf muute tëm liipe un aan heere fom hërts aus. Ti Piipel tsaycht tas Yeehoowa sich mit uns wërklich khimert. Wii soo? Sayn Wort is fol kexichte fon layt woo mer ferxteen khene, wayl se ‘xpiirunge hate kraat soo wii unseres’. (Tya. 5:17) Un tas haupste: wën mer siin wii Yeehoowa um kang is mit layt soo wii meyer, tuun mer taytlich ferxteen tas “Yeehoowa fiil hërtslich liip un parmhërtslichkheet hot”. (Tya. 5:11) (Wachthorm 02/23 s. 6 ap. 13-15)

Tas letste puuch fon te Piipel fangt aan mit te wërter: “Rewelatsyoon fon Yeesus Kristus, woo Kot tëm kep hot, fer se tsayche fer tëm sayn sklaawe ti tinge woo hatich pasiire tuun.” (Apo. 1:1) Tes weeche hon mer interes aan te ewënte woo hayt uf te welt pasiire un wii se piiplixe profetsiie erfiile khene. Un es khan sin tas mer kërn too triwer mit te anere fertseele. Wën mer iwer piiplixe profetsiie fertseele, sole mer net fersuuche se roote was pasiire tuut. Warom net? Wayl mer wole niks saan woo khent ti eenichkheet in te kemaynt fersaue. Tsum payxpiil: im xtant heere mer iwer was etliche fiirer fon te welt mache wole fer een kriich tsum ën nëme un soo friit un sicherheet pringe. Xtats rechne tas sayn wërter ti profetsii fon 1 Thesalooniker 5:3 erfiile, mise mer acht kepe aan te informatsyoone woo Yeehoowa sayn Orkanisatsyoon khërtslich puplitsiirt hot. Wën unser wërter sich aan te puplikatsyoone xtaype, helfe mer ti kemaynt eenich hale “in te aat fer se tenke”. (1 Kor. 1:10; 4:6) (Wachthorm 02/23 s. 16 ap. 4-5)

Warom liipst tuu Yeesus Kristus? Yeesus liipt ti woerheet, ti teemuut un ti kerechtichkheet. Wëns tuu ti woerheet un ti kerechtichkheet liipst, sicher tuust tuu aach Yeesus liipe. Tenk tich traan wii Yeesus ti woerheet un ti kerechtichkheet mit koraaj kexitst hot. (Yoo. 18:37) Awer wii tuut Yeesus uns in lërne teemuutich sin? Torich sayn payxpiil. Tee hot, tsum payxpiil, imer ti kans eer fer sayn Fater kep, net fer sich selepst. (Mar. 10:17, 18; Yoo. 5:19) Wii xpiirst tuu tich wëns tuu siist tas Yeesus soo teemuutich is? Sicher tas muut tich uf tëm liipe un sayn payxpiil noo mache. Warom is Yeesus teemuutich? Wayl eyer sayn Fater — woo teemuutich is — liipt un noo macht. (Psal. 18:35; Hep. 1:3) Yeesus macht Yeehoowa sayn kwaliteete perfekt noo un tas xaft uns tichter pay tëm. (Wachthorm 03/23 s. 3-4 ap. 6-7)

Ti Piipel xprecht iwer 2 krupe layt woo uf keruuft wëre mit te hofnung fer uf te eyert fer imer leepe — ti “kerechte” un ti “unkerechte”. Ti “kerechte” sin tii woo Yeehoowa troy ketiint hon wii se noch am leepe waare; ti “unkerechte”, net. Ti 2 krupe wëre fom toot uf keruuft; awer wil tas saan tas sayn naame im puuch fom leepe sin? Eep “ti kerechte” kextorep sin, waare sayn naame im puuch fom leepe. Awer waare sayn naame fon tiise puuch aus kewixt wii se kextorep sin? Nee, wayl tii sin noch in Yeehoowa sayn ketanke “am leepe”. Yeehoowa “is Kot, net fon te toote, awer fon te lepeentiche, wayl fer tëm, tuun se al leepe”. (Luk. 20:38) Tas wil saan tas, wën ti kerechte uf keruuft wëre fer uf te eyert se leepe, is tëne sayn naame noch im puuch fom leepe, awer am aanfang “mit playxtift”. (Luk. 14:14) (Wachthorm 09/22 s. 16 ap. 9-10)

Yeehoowa wolt hon tas te eyerst mënx sich fraye teet mit Sayn kriatsyoon. Wii Kot Aatam kemacht hot, hot eyer tëm een xeen paratiis kep fer se leepe un aach ti aarwayt fer tas uf phase un kreeser mache. (Xee. 2:8, 9) Tenk mool wii froo meecht Aatam sich kexpiirt hon wii eyer kesiin hot ti soome aus xlaa un ti pluume pliie. Was een kroos priwilëj hat Aatam — te Eetem kaate uf phase! Yeehoowa hot Aatam aach kexikt te naame fer unerxiitliche tiere kepe. (Xee. 2:19, 20) Yeehoowa selepst khent te naame fon yeete tier raus kesuucht hon. Awer tee hot tiise flicht fer Aatam kep. Sicher, foer een naame fer ti tiere kepe, hot Aatam se mit acht peopacht — wii se aus kesiin hon un wii se sich aan kextelt hon. Sicher tas mache hot Aatam fiil kefrayt. Tas hot tëm ketsaycht wii kluuch Yeehoowa is un wii xeen sin ti tinge woo eyer kemacht hot. (Wachthorm 03/23 s. 15 ap. 3)

Ti kroos welt rechiirung fon Kroos Pritaanya un Nort Amërika, woo pexrip is wii ti fiis fon een mechtich kroos xtaatue, is ti letst welt rechiirung fon te piiplix profetsii. (Tan. 2:31-33) Es khomt net een aner welt rechiirung noo tëne. Xtats tas, tuut Kot sayn Raych se im Armaxeton fernichte, mit al ti anere mënxliche rechiirunge. (Apo. 16:13, 14, 16; 19:19, 20) Wii khan tiise profetsii uns helfe? Tanyël sayn profetsii kept uns noch mee pewaysunge tas mer in te tsayt fom ën sin. Mee wii 2.500 yoore tsurik, hot Tanyël profetisiirt tas, noo Papiloon, noch 4 welt rechiirunge teete iwer Kot sayn folek rechiire. Tee hot foer raus kesaat tas ti kroos welt rechiirung fon Kroos Pritaanya un Nort Amërika teet ti letst fon tëne sin. Tas kept uns troost un hofnung tas klaych, tuut Kot sayn Raych al ti mënxliche rechiirunge fernichte un iwer ti kans eyert rechiire. (Wachthorm 07/22 s. 4 ap. 9; s. 5 ap. 11-12)