Yeehoowa helft tich unkewaartne propleeme aus hale

1. Fon was sin mer uns sicher?

WII Kot sayn folek, wise mer tas Yeehoowa uns liipt un tas eyer wil tas peste leepe fer uns hon. (Rom. 8:35-39) Meyer sin uns aach sicher tas ti piiplixe aanreete uns imer helfe tuun, wën mer se aan wëne. (Isa. 48:17, 18) Awer wii sole mer uns aan xtele wën propleeme woo mer net waarte uns petrefe?

2. (a) Was fer proope khene mer mit mache? (b) Wën mer soo sorte proope mit mache, was khene mer uns im xtant frooe?

² Al Yeehoowa sayn tiiner mise mit propleeme um keen. Tsum payxpiil: yemant fon unser familye khan uns traurich lose. Orer khan sin tas mer een xlim krankheet kriin woo lost uns net soo fiil in Yeehoowa sayn aarwayt mache. Meyer khene aach ti xlime resultaate fon een natuer unklik mit mache. Orer khan sin tas mer keyacht sin weeche unser klaape. Wën mer tiise proope mit mache, khene mer uns frooe: ‘Warom pasiirt tas mit mich? Hon ich was ferkheertes kemacht? Meecht Yeehoowa noo kelos hon mich seechne?’ Wëns tuu tich xon soo kexpiirt host, playp net oone muut. Fiile fon Yeehoowa sayn troye tiiner hon was eenliches kexpiirt. (Psal. 22:1, 2; Hap. 1:2, 3)

3. Was khene mer lërne fom Psalm 34:19?

³ Lees Psalm 34:19.b Mërk mool 2 wichtiche phunkte in tiise psalm: (1) kerechte layt mache propleeme mit un (2) Yeehoowa pefrayt uns fon unser propleeme. Wii tuut Yeehoowa uns pefraye? Een tings woo Kot macht, is uns helfe een richtich mënung iwer tas leepe in tiise welt hon. Yeehoowa ferxprecht tas mer froo wëre wën mer tëm tiine. Awer Tee karantiirt net tas unser leepe fray fon propleeme wërt. (Isa. 66:14) Kot wil hon tas mer uns aan tëm futuer traan hale — ti tsayt wën mer een froo leepe kriin, tas sort leepe woo Yeehoowa fer uns winxt. (2 Kor. 4:16-18) Pis tat hin, tuut eyer uns helfe tëm yeete taach tiine. (Yaa. 3:22-24)

4. Was tuun mer in tiise artikel lërne?

⁴ Wole mer yets siin was mer lërne khene mit te payxpiile fon Yeehoowa sayn troye tiiner fon te piiplixe tsayte un hayt tsu taach. Soo wii mer noch siin tuun, khene mer unkewaartne propleeme mit mache, awer wën mer uf Yeehoowa traue, tuut eyer uns imer uf phase. (Psal. 55:22) Soo lang wii mer tiise payxpiile noo kuke, froo tich: ‘Wii hët ich mich aan kextelt in soo een sort situatsyoon? Wii khene tiise payxpiile mayn fertraung uf Yeehoowa ferxtërke? Was fer lisyoone khan ich in mayn aychne leepe aan wëne?’

PAYXPIILE FON TE PIIPLIXE TSAYTE

5. Was fer propleeme hot Yaakop mit kemacht weeche Lapaan? (Kuk tas pilt am aanfang fom piichelche.)

⁵ Yeehoowa sayn tiiner in te piiplixe tsayte hon propleeme, woo se net kewaart hon, mit kemacht. Kuk mool was mit Yaakop pasiirt is. Sayn fater hot tëm kexikt sich hayrate mit eene fon te tochtere fon Lapaan, een parent woo Yeehoowa aan kepeet hot. Yaakop sayn fater hot tëm sicher kelos tas Yeehoowa tëm fiil seechne teet. (Xee. 28:1-4) Tes weeche hot Yaakop tas richtiches kemacht. Tee is fom lant Kanaan faart kang un is tsu Lapaan sayn haus kerees. Tiise man hat 2 tochtere: Lëya un Rakël. Yaakop hot aan kefang Lapaan sayn yingste meetche, Rakël, fiil liipe. Un tee hot aan kenom 7 yoore fer Lapaan xafe foer sich mit Rakël hayrate. (Xee. 29:18) Awer tas is net kraat soo pasiirt. Lapaan hot Yaakop hiner kang tas eyer sich mit sayn elste meetche, Lëya, hayrate teet. Lapaan hot erlaupt tas Yaakop sich mit Rakël hayrate teet een woch xpeeter, awer ploos wën eyer noch 7 yoore fer tëm xafe teet. (Xee. 29:25-27) Lapaan waar aach unkerecht wën eyer kexefte mit Yaakop kemacht hot. Torich 20 yoore waar Lapaan unkerecht mit Yaakop! (Xee. 31:41, 42)

6. Was fer anere propleeme hot Yaakop mit kemacht?

⁶ Yaakop hot aach anere propleeme mit kemacht. Tee hat een kroos familye, awer sayn soone hon net imer in friit keleept. Tii hon soo kaar sayn aychne pruuter, Yoosef, wii sklaaw ferkhaaft. Een aner mool, hon tswaay fon Yaakop sayn soone — Simeoon un Lewi — uneer fer ti familye un Yeehoowa sayn naame keprung. Un noch: Yaakop sayn liipe fraa, Rakël, is kextorep wii se sayn tsweete soon kriit hot. Un weeche een kroos hungernoot, must Yaakop, woo xon alt waar, sich tsum Ejipt wanere. (Xee. 34:30; 35:16-19; 37:28; 45:9-11, 28)

7. Wii hot Yeehoowa Yaakop ketsaycht tas eyer Tëm kefalt hot?

⁷ Opwool tiise propleeme al, hot Yaakop nii sayn klaape aan Yeehoowa un sayn ferxpreche ferloer. Un Yeehoowa hot Yaakop ketsaycht tas eyer Tëm kefalt hot. Tsum payxpiil, opwool Lapaan Yaakop unkerecht pehantelt hot, hot Yeehoowa Yaakop in materyaalix aat keseechent. Un kewis is Yaakop aarich petanklich tsu Yeehoowa kep wii eyer Yoosef noch mool kesiin hot — te soon woo eyer ketenkt hot fiile yoore tsurik kextorep is. Weeche sayn ticht fraayntxaft mit Yeehoowa, khont Yaakop sayn propleeme aus hale. (Xee. 30:43; 32:9, 10; 46:28-30) Wën mer aach een ticht fraayntxaft mit Yeehoowa hale, khene mer ti unkewaartne propleeme woo mer mit mache aus hale.

8. Was wolt te kheenich Tawi mache?

⁸ Te kheenich Tawi khont net mache ales was eyer wolt in Yeehoowa sayn aarwayt. Tee hat, tsum payxpiil, een xtark wunx fer een thempel fer sayn Kot paue. Un tee hot mim profeet Natan too triwer kexproch. “Mach ales was in tayn hërts is — hot Natan keantwort —, wayl te woere Kot is mit tich.” (1 Kro. 17:1, 2) Tiise wërter wëre wool Tawi fiil uf kemuut hon. Im xtant hot eyer klaych aan kefang pleen fer tiise kroos proyëkt mache.

9. Wii hot Tawi sich aan kextelt wii eyer trauriche notisye kriit hot?

⁹ Awer klaych is Yeehoowa sayn profeet retuer khom mit trauriche notisye. “In te selwich nacht”, hot Yeehoowa fer Natan kesaat tas Tawi net te thempel paue teet; xtats tas, eene fon sayn soone teet tas mache. (1 Kro. 17:3, 4, 11, 12) Wii hot Tawi sich aan kextelt wii eyer tiise pexeet kriit hot? Tee hot sayn tsiil keënert. Tee hot sich konsentriirt aan tas kelt un ti materyaale samele woo sayn soon Salomon fer ti paueray preycht. (1 Kro. 29:1-5)

10. Wii hot Yeehoowa Tawi keseechent?

¹⁰ Klaych tëm noo wii Yeehoowa fer Tawi kesaat hot tas eyer net te thempel paue teet, hot Eyer een pakt mit tëm kemacht. Kot hot fer Tawi ferxproch tas eene fon sayn nookhomer teet fer imer rechiire. (2 Sam. 7:16) In te nay welt, torich ti Tausent Yoore Rechiirung, wërt Tawi aarich froo sin wën eyer tsum wise kriit tas te Kheenich Yeesus eene fon sayn nookhomer is. Was lërne mer mit tiise kexicht? Soo kaar wën mer net mache khene ales was mer wole fer Yeehoowa, khan unser Kot uns anere kuute tinge kepe, woo mer nii kewaart hon.

11. Wii waare ti eyerste kriste keseechent, opwool tas Raych net khom is wën se kewaart hon? (Aphostele sayn Kexicht 6:7)

¹¹ Ti eyerste kriste hon etliche unkewaartne propleeme mit kemacht. Tsum payxpiil: tii wolte wërklich fiil tas tas Raych khome teet, awer tii wuste net wanee tas pasiire teet. (Aph. 1:6, 7) Soo, was hon se kemacht? Tii hon wayter kepreeticht. Wii ti kuute notisye sich ferprayt hon, khonte se taytlich siin tas Yeehoowa sayn aanxtrengung am seechne waar. (Lees Aphostele sayn Kexicht 6:7.)c

12. Was hon ti eyerste kriste kemacht wii een hungernoot pasiirt is?

¹² Een mool, hot een xroo hungernoot “ti kans eyert” — too tepay ti eyerste kriste — petrof. (Aph. 11:28) Iwerlee tich wii fiil hon se too teweeche kelit. Sicher hon ti familye xëfe sich kefroot: ‘Wii tuun ich mayn familye fersoriche?’ Un ti yunge woo wolte mee in te preetich aarwayt mache, im xtant hon sich kefroot: ‘Sol ich waarte pis te hungernoot rom keet?’ Ekaal ti situatsyoon, ti kriste hon sich aan kephast. Tii hon wayter kepreeticht uf yeete aat wii se khonte un hon froo aus keteelt was se hate mit sayn priiter in Yuteea. (Aph. 11:29, 30)

13. Was fer seechen hon ti kriste torich ti hungernoot kriit?

¹³ Was fer seechen hon ti kriste torich ti hungernoot kriit? Tii woo ese kriit hon, hon kesiin tas Yeehoowa se keholef hot. (Mat. 6:31-33) Kewis hon se sich tichter kexpiirt fon sayn priiter un xwestere woo tëne keholef hon. Un tii woo kontripuytsyoone kemacht hon orer in te umaniteer hilef kexaft hon, hon sicher ti frooheet kexpiirt woo fon kepe khomt. (Aph. 20:35) Yeehoowa hot se al keseechent wayl se sich mit unkewaartne situatsyoone aan kephast hon.

14. Was is mit Parnapë un te aphostel Phaul pasiirt un was waare ti resultaate? (Aphostele sayn Kexicht 14:21, 22)

¹⁴ Ti eyerste kriste waare ofts keyacht, als mool wën se tas net kewaart hon. Kuk mool was mit Parnapë un te aphostel Phaul pasiirt is wii se in Listra kepreeticht hon. Am aanfang, hon ti layt se wilkhom un keheert. Awer xpeeter hon ti keechner “ti layt keeche Phaul [un Parnapë] kextelt”; etliche hon soo kaar Phaul mit xteen ferxmist un tëm kelos fer se xtërpe. (Aph. 14:19) Awer Phaul un Parnapë hon wayter uf anere pletse kepreeticht. Was fer waare ti resultaate? Tii hon “een kroos numer tisipele” kemacht un sayn wërter un payxpiil hon aach sayn priiter un xwestere ferxtërkt. (Lees Aphostele sayn Kexicht 14:21, 22.)d Fiile hon nutse kriit wayl Phaul un Parnapë net noo kelos hon se preetiche, opwool se keyacht waare. Meyer wëre aach keseechent wën mer net uf kepe ti aarwayt woo Yeehoowa uns kep hot.

PAYXPIILE FON UNSER TAACHE

15. Was host tuu mim payxpiil fom pruuter Macmillan kelërnt?

¹⁵ In te yoore foer 1914, hot Kot sayn folek kewaart tas etliche tinge pasiire teete. Kuk mool, tsum payxpiil, was mim pruuter Alexander H. Macmillan pasiirt is. Soo wii fiile priiter fon tëm sayn tsayt, hot eyer ketenkt tas, klaych, keengt eyer tsum himel. In een reet, woo eyer kemacht hot in septemper fon 1914, hot eyer kesaat: “Tii too is, tsiimlich sicher, mayn letst puuplix reet.” Kewis waar tas net tëm sayn letst reet. Xpeeter hot te pruuter Macmillan kexrip: “Khan sin tas etliche fon uns waare tsu fiks fer se tenke tas mer klaych tsum himel keengte.” Tee hot noch kesaat: “Was mer mache miste, waar fiil se tuun hon im Hër sayn aarwayt.” Un tee hot kraat tas kemacht. Te pruuter Macmillan waar flaysich in Yeehoowa sayn aarwayt. Tee hat te priwilëj fer fiile priiter, woo in te katee waare weeche sayn neutraliteet, uf muute. Un tee is imer in te fersamlunge kang, soo kaar wën eyer xon alt waar. Was fer nutse hot te pruuter Macmillan kriit wayl eyer fiil se tuun hat in Yeehoowa sayn aarwayt, soo lang wii eyer sayn peloonung kewaart hot? Klaych foer sayn toot in 1966, hot eyer kexrip: “Mayn klaape is nii xwach kep.” Tas is een xeen payxpiil woo mer noo mache sole, hauptseechlich wën mer xwiirichkheete lënger wii mer kewaart hon, mit mache. (Hep. 13:7)

16. Was fer unkewaartne propleem hon te pruuter Herbert un sayn fraa mit kemacht? (Tyako 4:14)

¹⁶ Fiile fon Yeehoowa sayn tiiner tuun unkewaartne kesuntheet propleeme mit mache. Kuk mool, tsum payxpiil, te pruuter Herbert Jenningse sayn leepes kexicht. Tee un sayn fraa hate aarich kërn sayn aarwayt wii misyoneere in Kana. Awer mit te tsayt hot eyer tsum wise kriit tas eyer een xlim mentaal krankheet hat. Te pruuter Herbert hot Tyako 4:14f penutst fer sayn situatsyoon aus leye — sayn krankheet waar “een ‘moye’ woo eyer net kewaart hot”. (Lees.) Tee hot kexrip: “Meyer miste ti situatsyoon siin wii se wërklich waar. Tes weeche hon mer pleen kemacht fer Kana un unser tichte fraaynte lose un tsurik tsu Kanata keen [fer een tratament kriin].” Opwool ti xwiirichkheete woo se mit kemacht hon, hot Yeehoowa Herbert un sayn fraa keholef tëm wayter troy tiine.

17. Wii hot te pruuter Herbert sayn payxpiil anere priiter keholef?

¹⁷ Ti eerliche wërter fom pruuter Herbert in sayn leepes kexicht hon anere fiil keholef. Een xwester hot kexrip: “Khee aner artikel hot mich soo tiif petrof. (…) Leese iwer wii te pruuter Herbert must sayn insetsung lose fer sayn kesuntheet uf phase, hot mich keholef mayn situatsyoon in te richtich aat siin.” Een pruuter hot aach kexrip: “Ich waar een elteste torich 10 yoore. Awer tan must ich mayn priwilëj lose weeche een mentaal krankheet. Ich hon kexpiirt tas ich unutslich waar. Tas hot mich soo tiifsinich kelos, tas ich khont net mee ti leepes kexichte leese. (…) Awer te pruuter Herbert sayn persewerans hot mich fiil uf kemuut.” Tas erinert uns tas, wën mer unkewaartne propleeme aus hale, khene mer ti anere uf muute. Soo kaar wën tas leepe anerste is wii was mer kewaart hon, khene mer noch een payxpiil fon klaape un persewerans sin. (1 Phe. 5:9)

18. Was lërnst tuu mim payxpiil fon een witfraa in Nikeerya, woo in te pilter foer kextelt is?

¹⁸ Unklike soo wii ti pantemii fon coronavirus tuun fiile fon Yeehoowa sayn tiiner petrefe. Een witfraa in Nikeerya, tsum payxpiil, hot kans weenich kelt un ese kehat. Een moynt hot sayn meetche tëne kefroot was se ese teete noo sayn letste rays tesye koche. Ti mama hot kesaat tas se khee mee ese orer kelt hate, awer tii solte ti witfraa fon Sarefaa noo mache: sayn letste ese in richte un kans uf Yeehoowa traue. (1 Khe. 17:8-16) Eep se aan kefang hon sich ketanke mache mit was se mitaachs ese teete, hon se een khaste fol ese fon te priiter kriit. Te khaste hat kenuuch ese fer mee wii 2 woche! Ti xwester hot kesaat tas se net kemërkt hot mit wii fiil acht waar Yeehoowa am heere wii se mit sayn meetche kexproch hot. Yawool, wën mer uf Yeehoowa traue, ti unkewaartne propleeme woo mer im leepe mit mache, khene uns in woerheet tichter pay tëm xafe. (1 Phe. 5:6, 7)

19. Was fer sort yachtung tuut te pruuter Aleksey aus hale?

¹⁹ In te letste yoore, tuun fiile priiter un xwestere yachtung mit mache woo se fiilaycht net kewaart hon. Kuk mool tas payxpiil fom pruuter Aleksey Yershov, woo in Ruslant leept. Wii eyer sich taafe kelos hot in 1994, waar Kot sayn folek fray in tiise lant. Awer xpeeter hot ti situatsyoon in Ruslant sich keënert. In 2020, hon ti autoriteete Aleksey sayn haus in keproch un uner suucht; un tii hon fiile fon sayn tinge wech kehool. Phaar moonate xpeeter, hot ti rechiirung een prosës keeche tëm uf kemacht. Ti akusatsyoon hot sich uf etliche krawatsyoone kextaypt. Awer tas xlimste waar tas tiise krawatsyoone kemacht waare fon een persoon woo, torich mee wii een yoer, sich aan kextelt hot wii wën se ti Piipel lërne wolt. Was een kroos xlechtichkheet!

20. Wii hot te pruuter Aleksey sayn fraayntxaft mit Yeehoowa ferxtërkt?

²⁰ Hot ti yachtung fom pruuter Aleksey was kuutes keprung? Ia. Tëm sayn fraayntxaft mit Yeehoowa is xtërker kep. Tee saat: “Ich un mayn fraa tuun eftas mitsamer peete. Ich mërke tas ich khent net tiise situatsyoon aus hale oone Yeehoowa sayn hilef. (…) Tas perseenlich xtuutyum helft mich keeche ti traurichkheet khëmpfe. Ich tenke triwer noo aan te payxpiile fon troye tiiner fon te friirixe tsayte. Es kept fiile kexichte in te Piipel woo tsayche wii wichtich es is in ruu plaype un uf Yeehoowa traue.”

21. Was hon mer in tiise artikel kelërnt?

²¹ Was hon mer in tiise artikel kelërnt? Als mool khene mer unkewaartne propleeme in tiise welt mit mache. Noch soo, tuut Yeehoowa imer sayn tiiner helfe wën se uf tëm traue. Soo wii unser haupste tekst saat, “fiile sin ti xwiirichkheete fon tëm kerechte, awer Yeehoowa macht tëm fray fon tii al”. (Psal. 34:19) Wole mer uns wayter traan hale, net aan unser xwiirichkheete, awer aan te kraft woo Kot uns kept. Tan khene mer soo wii te aphostel Phaul saan: “Fer ales sin ich xtark torich tee woo meer kraft kept.” (Fili. 4:13)