XTUUTYUM ARTIKEL 41
LIIT 13 Yeesus Kristus, unser payxpiil
Lisyoone fon Yeesus sayn letste 40 taache uf te eyert
“Tii hon tëm torich 40 taache kesiin un tee hot iwer Kot sayn Raych kexproch.” (APHOSTELE SAYN KEXICHT 1:3)
WAS TUUN MER SIIN?
Wii mer noo mache khene tas payxpiil woo Yeesus kelos hot torich sayn letste 40 taache too uf te eyert.
1-2. Was is mit tswaay fon Yeesus sayn tisipele pasiirt wii se tsu Emauus am reese waare?
ES IS 16te Nisan fon 33 N.K. Yeesus sayn tisipele sin aarich traurich un tii hon fiil pang. Tswaay fon tëne reese fon Yeruusalem pis Emauus, een kleen xtat unkefeer 11 kilometer fon Yeruusalem ap. Tiise mëner sin oone muut, wayl Yeesus, te man woo se noo kang sin, is kraat um keprung kep. Sayn hofnung tas te Mesias was wunerliches fer ti yuute mache teet, is xiif kang. Awer tan, pasiirt was unkeweenliches in sayn rees.
2 Een frëmte man khomt ticht pay tëne un fangt aan mit tëne laafe. Ti tisipele saan tëm ti xlime tinge woo mit Yeesus pasiirt sin. Tan tuut te man aan fange se xpreche iwer tinge woo se nii ferkese teete. Tee penutst ti Xrifte un sayn profetsiie fer tëne aus leye warom te Mesias must layte un xtërpe. Wën ti tray mëner pis Emauus hin khome, tuut te frëmte saan weer tee wërklich is: Yeesus, woo fom toot uf kextii is! Xtel tich mool foer wii froo ti tisipele waare wii se tsum wise kriit hon tas te Mesias am leepe waar! (Luk. 24:13-35)
3-4. (a) Wii hot Yeesus sayn tisipele keholef un was fer waar te resultaat? (Aphostele sayn Kexicht 1:3) (b) Was tuun mer in tiise artikel siin?
3 Torich sayn letste 40 taache uf te eyert, is Yeesus fiil mool fer sayn tisipele tsum foer xayn khom. (Lees Aphostele sayn Kexicht 1:3.)a Torich tiise tsayt, hot eyer sayn tisipele, woo traurich un mit pang waare, uf kemuut. Tes weeche, sin se froo kep un hon koraaj kriit fer ti kuute notisye iwer Kot sayn Raych preetiche un in lërne.b
4 Meyer khene nutse kriin wën mer xtutiire was Yeesus in tëne tsayt kemacht hot. In tiise artikel, tuun mer siin wii Yeesus sayn tsayt penutst hot (1) fer sayn tisipele uf muute, (2) fer tëne helfe ti Xrifte peser ferxteen un (3) fer tëne iipe fer mee responsapiliteete uf phase. In yeete situatsyoon, tuun mer siin wii mer Yeesus sayn payxpiil noo mache khene.
TUU TI ANERE UF MUUTE
5. Warom praychte Yeesus sayn tisipele uf kemuut wëre?
5 Yeesus sayn tisipele praychte uf kemuut wëre. Warom? Etliche hon hayser, familye un kexefte kelos fer mit Yeesus plaype. (Mat. 19:27) Anere waare xlecht pehantelt wayl se tëm sayn tisipele kep sin. (Yoo. 9:22) Tii waare wilich fer tiise ënerunge in sayn leepe mache un aach layte wayl se keklaapt hon tas Yeesus te ferxprochne Mesias waar. (Mat. 16:16) Awer wii Yeesus um keprung kep is, sin se aarich traurich un oone muut kep, wayl tii wuste net was pasiire teet.
6. Was hot Yeesus kemacht noo eyer fom toot uf kextii is?
6 Yeesus hot ferxtan tas es normaal fer sayn tisipele weyer traurich kepe wii eyer kextorep is. Tee wust aach tas es wolt net saan tas se een xwache klaape hëte. Soo, im selwich taach woo eyer fom toot uf kextii is, hot eyer aan kefang sayn fraaynte uf muute. Tsum payxpiil, tee is fer Maria Mataleena tsum foer xayn khom wii se foer tëm sayn kraap am prile waar. (Yoo. 20:11, 16) Tee is aach tsum foer xayn khom fer ti tswaay tisipele woo tsu Emauus am reese waare un fer te aphostel Pheeter. (Luk. 24:34) Was khene mer mit Yeesus sayn payxpiil lërne? Wole mer kuke was pasiirt is tas eyerste mool woo eyer tsum foer xayn khom is.
7. Tëm noo Yoohan 20:11-16, was hot Yeesus kesiin Maria mache un was hot eyer fer tëne kemacht? (Kuk aach tas pilt.)
7 Lees Yoohan 20:11-16.c Moynt frii, am 16te Nisan, sin etliche troye fraae tsum kraap kang woo Yeesus sayn khërper keleet waar. (Luk. 24:1, 10) Eene fon tëne, waar Maria Mataleena. Wii Maria tsum kraap khom is, waar Yeesus sayn khërper net tat kewees. Soo, is se mit Pheeter un Yoohan xpreche kang. Ti tswaay mëner sin tsum kraap kexprung un Maria is tëne noo kang. Ti mëner hon kesiin tas Yeesus sayn khërper net im kraap waar un sin tsurik kang. Awer Maria is tat keplip un tii waar ekaal am prile. Opwool tii tas net wust, waar Yeesus tat kewees. Tee hot kesiin tas se weeche tëm am prile waar un tee wolt se treeste. Soo is eyer fer Maria tsum foer xayn khom un tan hot was keweenliches kemacht woo tëne fiil uf kemuut hot. Tee hot mit Maria kexproch un hot se een wichtich flicht kep: fer sayn priiter saan tas eyer fom toot uf kextii is. (Yoo. 20:17, 18)
Fer Yeesus noo mache, mërk was ti priiter mit mache un was tuu mache khanst fer tëne treeste (Kuk te apsats 7.)
8. Wii khene mer Yeesus noo mache?
8 Wii khene mer Yeesus noo mache? Meyer mache Yeesus noo wën mer unser priiter un xwestere uf muute wayter Yeehoowa tiine. Soo wii Yeesus, mise mer mërke ti xwiirichkheete woo ti anere mit mache, fersuuche ferxteen wii se sich xpiire un tëne treeste. Kuk mool ti speryens fon een xwester woo Jocelyn heest. Sayn xwester is in een xlim unfal kextorep. “Torich phaar moonate — saat se —, waar ich mechtich traurich.” Eene pruuter un sayn fraa hon kemërkt was Jocelyn kelit hot. Soo hon se Jocelyn tsu sayn haus in kelaat, tëne mitlaytich kehoricht un tëne sicher kelos tas Yeehoowa fiil weyert tëne kep hot. Jocelyn saat noch: “Ich hon kexpiirt wii wën ich mich am fersaufe weyer in een unruych un tunkel meer. Awer tan hot Yeehoowa tiise pruuter un sayn fraa penutst fer mich rete. Tii hon mich keholef te wunx noch mool kriin fer wayter Yeehoowa tiine.” Meyer khene aach ti anere uf muute wën mer se lose iwer sayn xpiirunge fertseele un wën mer se mit acht horiche. Soo khene mer se treeste un helfe wayter Kot tiine. (Rom. 12:15)
HELF TI ANERE KOT SAYN WORT FERXTEEN
9. Was hon Yeesus sayn tisipele net ferxtan un wii hot Yeesus se keholef?
9 Yeesus sayn tisipele hon aan Kot sayn Wort keklaapt un tii hon sayn pestes kemacht fer Yeehoowa aan heere. (Yoo. 17:6) Awer tii khonte net ferxteen warom Yeesus wii een kriminoos um keprung kep is. Yeesus wust tas se tiise tswayfele hate, net weeche een xlechte hërts, awer wayl se tas net richtich ferxtan hon. (Luk. 9:44, 45; Yoo. 20:9) Soo hot eyer se keholef ti Xrifte peser ferxteen. Kuk mool wii eyer tas kemacht hot wii eyer mit te tswaay tisipele kexproch hot woo tsu Emauus am keen waare.
10. Wii hot Yeesus sayn tisipele keholef se ferxteen tas eyer wërklich te Mesias waar? (Lukas 24:18-27)
10 Lees Lukas 24:18-27.d Mërk mool tas Yeesus net klaych kesaat hot weer tee wërklich waar. Xtats tas, hot eyer frooche kemacht. Warom? Fiilaycht wolt eyer hon tas se aus leye teete wii se sich kexpiirt hon. Un tii hon tas wërklich kemacht. Tii hon tëm kesaat tas sayn hofnung waar tas Yeesus Israël fon te romaaner pefraye teet. Yeesus hot se ketultich kehoricht un tan ti Xrifte penutst fer ti mëner helfe se ferxteen tas fiile piiplixe profetsiie erfiilt waare.e Xpeeter im taach, hot Yeesus anere tisipele ketrof un tee hot se aach ti piiplixe profetsiie aus keleet. (Luk. 24:33-48) Was khene mer mit tiise kexicht lërne?
11-12. (a) Was lërne mer mit te aat wii Yeesus piiplixe woerheete in kelërnt hot? (Kuk aach ti pilter.) (b) Wii hot Nortey sayn leerer tëm keholef?
11 Wii khene mer Yeesus noo mache? Fer se aan fange, wën mer ti xtutënte am in lërne sin, mise mer frooche mit kexik mache fer se siin was se wërklich xpiire tuun. (Xpr. 20:5) Tan khene mer se tsayche wii se khene piiplixe wersikele fine woo se helfe khene in sayn situatsyoon. Meyer mise uf phase fer net saan was se mache sole. Xtats tas, torich frooche, sole mer tëne uf muute se tenke iwer was se leese un wii se tas aan wëne khene. Kuk mool ti speryens fon een pruuter in Kana woo Nortey heest.
12 Wii Nortey 16 yoore alt waar, hot eyer aan kefang ti Piipel xtutiire. Awer sayn familye hot sich klaych keeche tëm kextelt. Was hot tëm keholef wayter ti Piipel xtutiire? Sayn Piipel leerer hat xon mit tëm fertseelt iwer Matheus kapitel 10 un hot tëm ketsaycht tas ti woere kriste keyacht weyere. Nortey saat: “Tes weeche, wii ti yachtung aan kefang hot, waar ich mich sicher tas ich ti woerheet kefun hat.” Sayn leerer hot tëm aach Matheus 10:16 ketsaycht un tëm aus keleet tas mer mise uf phase mit situatsyoone woo khente tsu tsënkeray nëme un aach respekt tsayche wën mer iwer relichyoon tehëm xpreche. Noo sayn taaf, wolt Nortey een pyoneer wëre, awer sayn papa wolt hon tas eyer tsu te uniwersiteet keengt. Te leerer hot Nortey net kesaat was eyer mache solt; xtats tas, hot eyer tëm frooche kemacht fer tëm helfe iwer piiplixe funtamente tenke un te richtich ëntxlus mache. Was fer waar te resultaat? Nortey hot aan kefang wii pyoneer tiine. Tes weeche, hot sayn papa tëm fon sayn haus faart kexikt. Wii xpiirt sich Nortey too triwer? “Ich hon sicher te richtich ëntxlus kemacht” — saat eyer. Wën mer ti anere uf muute aan te Piipel triwer noo tenke, tuun mer se helfe sayn klaape ferxtërke un wayter Yeehoowa tiine. (Ëfe. 3:16-19)
Fer Yeesus noo mache, helf ti anere ti Piipel ferxteen (Kuk te apsats 11.)i
HELF TI PRIITER “KEXENKE” FER TI KEMAYNT WËRE
13. Was hot Yeesus kemacht fer sich sicher lose tas ti aarwayt fon sayn Fater wayter uf kephast weyer? (Ëfeser 4:8)
13 Wii Yeesus uf te eyert waar, hot eyer kemacht kraat was sayn Fater tëm ferlangt hat. (Yoo. 17:4) Awer Yeesus hot net ketenkt: ‘Wëns tuu wilst tas etwas kuut ap laaft, must tuu selepst tas mache.’ Torich ti 3 un halpe yoore woo Yeesus too uf te eyert kepreeticht hot, hot eyer aach ti anere keiipt. Yeesus hot uf sayn tisipele ketraut. Eep eyer tsurik tsum himel kang is, hot eyer tëne ti flicht kep fer ti kuute notisye preetiche un in lërne un aach Yeehoowa sayn weyertliche tiiner uf phase. Etliche fon te tisipele woo ti aarwayt kefiirt hon, waare fiilaycht noch net mool 30 yoore alt. (Lees Ëfeser 4:8.)f Tiise mëner hon mit Yeesus xtram kexaft un waare leaal tsu tëm. Awer eep eyer tsurik tsum himel kang is, hot eyer se noch mee keiipt tas se khente “kexenke” fer ti kemaynt wëre. Wii hot eyer tas kemacht? (Kuk ti xtuutyum noote in Ëfeser 4:8.)
14. Was hot Yeesus sayn tisipele in kelërnt torich sayn letste 40 taache uf te eyert? (Kuk aach tas pilt.)
14 Yeesus hot eerliche awer liipliche aanreete fer sayn tisipele kep. Tsum payxpiil, tee hot kemërkt tas etliche fon sayn tisipele net wërklich keklaapt hon tas eyer kextorep un uf kextii is; tes weeche hot eyer se too triwer aan kereet. (Luk. 24:25-27; Yoo. 20:27) Tee hot aach tëne kesaat tas se sich traan hale solte aan Yeehoowa sayn folek uf phase, xtats aan kelt fertiine. (Yoo. 21:15) Tee hot se aach erinert tas se solte net sayn aarwayt tsu Yeehoowa ferklayche mit was ti anere mache khonte. (Yoo. 21:20-22) Tee hot etliche ferkheerte itee woo se iwer tas Raych hate, korikiirt un hot se keholef sich traan hale aan te kuute notisye preetiche. (Aph. 1:6-8) Was khene ti elteste mit Yeesus lërne?
Fer Yeesus noo mache, iip anere priiter fer mee flichte uf phase (Kuk te apsats 14.)
15-16. (a) Wii khene ti elteste Yeesus noo mache? (b) Was fer nutse hot Patrick fon een aanreet kriit?
15 Wii khene ti elteste Yeesus noo mache? Tii mise ti priiter, soo kaar tii woo yung sin, iipe un helfe tas se khene mee flichte uf phase.g Ti elteste ferlange net perfektsyoon fon tëne woo se iipe. Ti elteste sole ti yunge priiter liiplich aan reete, wayl soo khene se lërne teemuutich, troy un wilich sin fer ti anere helfe. (1 Tim. 3:1; 2 Tim. 2:2; 1 Phe. 5:5)
16 Een pruuter, woo Patrick heest, hot fiil nutse fon een aanreet kriit. Wii eyer yinger waar, waar eyer keweent krope tinge fer ti anere saan un mache, soo kaar fer ti xwestere. Een elteste hot Patrick sayn xwacheet kemërkt un hot tëm taytliche awer liipliche aanreete kep. “Wii kuut tas eyer es kemacht hot! — saat Patrick. — Ich sin als mool oone muut kep wii ich kesiin hon anere priiter priwilëje kriin woo ich fer mich wolt. Awer te elteste sayn aanreet hot mich keholef teemuutich sin un mich traan hale aan te anere tiine, xtats aan priwilëje kriin.” Tes weeche, is Patrick wii een elteste in kesetst kep wii eyer 23 yoore alt waar. (Xpr. 27:9)
17. Wii hot Yeesus ketsaycht tas eyer uf sayn tisipele ketraut hot?
17 Yeesus hot fer sayn tisipele ti flicht kep, net ploos fer se preetiche, awer aach fer in lërne. (Kuk ti xtuutyum noote “ensinando-as” in Matheus 28:20.) Fiilaycht hon se als mool ketenkt tas se tas net kemacht kreechte. Awer Yeesus waar sich soo sicher tas se es hin kreechte, tas eyer kesaat hot: “Soo wii te Fater mich kexikt hot, soo tuun ich aych xike.” (Yoo. 20:21)
18. Wii khene ti elteste Yeesus noo mache?
18 Wii khene ti elteste Yeesus noo mache? Kluuche elteste iipe ti anere wën se tëne flichte kepe. (Fili. 2:19-22) Tsum payxpiil, ti elteste khene ti yunge ferlange fer se helfe te Raych Saal sauwer mache un in te ray lose. Ti elteste khene flichte fer ti priiter kepe, tëne tsayche wii tas mache un tan traue tas se ti aarwayt fërtich pringe tuun. Een nay elteste, woo Matthew heest, is petanklich tas elteste mit fiil speryens tëm keiipt hon fer ti flichte in te kemaynt uf phase un tan uf tëm ketraut hon fer tas kemacht kriin. “Wën ich feeler kemacht hon — saat eyer —, hon se mich keholef se siin wii ich mit tiise feeler lërne khent un mich ferpesere khent.”h
19. Was sole mer pextimt sin se mache?
19 Yeesus hot sayn letste 40 taache uf te eyert penutst fer ti anere uf muute, in lërne un iipe. Wole mer pextimt sin sayn payxpiil ticht noo mache. (1 Phe. 2:21) Tee tuut uns helfe tas mache wayl eyer selepst ferxproch hot: “Ich sin mit aych ti kans tsayt, pis tsum ën fom sisteem.” (Mat. 28:20)
LIIT 15 Loope mer Kot sayn Soon!
a (Aphostele sayn Kexicht 1:3) Noo eyer kelit hot, hot eyer torich fiile sichere pewaysunge ketsaycht tas eyer am leepe waar. Tii hon tëm torich 40 taache kesiin un tee hot iwer Kot sayn Raych kexproch.
b Ti Ewankeelye un anere piiplixe piicher tsayche tas Yeesus is fiil mool fer sayn tisipele tsum foer xayn khom noo sayn ufxtaye. Tsum payxpiil: fer Maria Mataleena (Yoo. 20:11-18); fer anere fraae (Mat. 28:8-10; Luk. 24:8-11); fer 2 tisipele (Luk. 24:13-15); fer Pheeter (Luk. 24:34); fer ti aphostele, wën Tomë net tat waar (Yoo. 20:19-24); fer ti aphostele, wën Tomë tepay waar (Yoo. 20:26); fer 7 tisipele (Yoo. 21:1, 2); fer mee wii 500 tisipele (Mat. 28:16; 1 Kor. 15:6); fer sayn pruuter Tyako (1 Kor. 15:7); fer al ti aphostele (Aph. 1:4); un fer ti aphostele wën se ticht fon Petaanya waare. (Luk. 24:50-52) Khan sin tas eyer tas anere mool kemacht hot, awer ti Piipel xprecht net too triwer. (Yoo. 21:25)
c (Yoohan 20:11-16) Awer Maria is traus xteen keplip un waar am prile neewich tëm kraap. Unich treene, hot se sich foer kepikt fer im kraap rin kuke. 12 Tii hot 2 engele kesiin woo ways aan ketsoo waare. Tii waare kesitst ufm plats woo Yeesus sayn khërper eente keleet waar — eene ufm plats fer te khop un te aner ufm plats fer ti fiis. 13 Tii hon se kefroot: “Fraa, warom pist tuu am prile?” Too hot se keantwort: “Yemant hot mayn Hër wech kenom un ich wees net woo se tëm hin keleet hon.” 14 Noo se tas kesaat hot, hot se sich rom ketreet un hot Yeesus tat xteen kesiin, awer tii hot net kemërkt tas es Yeesus waar. 15 Yeesus hot se kefroot: “Fraa, warom pist tuu am prile? Weer pist tuu am suuche?” Wayl se ketenkt hot tas es te kaate man weyer, hot se tëm kesaat: “Wëns tuu tëm wech kenom host, saa mich woos tuu tëm hin keleet host un ich tuun tëm faart nëme.” 16 Yeesus hot tan kesaat: “Maria!” Tii hot sich rom ketreet un in hepreeyx kesaat: “Rapooni!” (woo “leerer” petayt).
d (Lukas 24:18-27) Eene fon tëne, woo Klëopas keheest hot, hot tëm keantwort: “Pist tuu een frëmte woo aleen in Yeruusalem leept? Wii soo weest tuu net was fer tinge tat in te letste taache pasiirt sin?” 19 Tee hot se kefroot: “Was fer tinge?” Tii hon keantwort: “Ti tinge woo se tuun hon mit Yeesus, te Nasareener. Tee hot foer Kot un ti kanse layt ketsaycht tas eyer een xtarke profeet is in aktsyoone un wërter. 20 Unser haupste priister un fiirer hon tëm ap kep fer mim toot kextrooft wëre un hon tëm uf een kweel phoste aan kenaachelt. 21 Awer meyer hon kehoft tas eyer ti pefrayung fer Israël pringe teet. Tas is xon yets te trite taach tsayt tas ales pasiirt is. 22 Un etliche fraae tswixich uns hon uns ferxrok kelos. Tii sin frii tsum kraap kang 23 un hon net tëm sayn khërper kefun. Too sin se tsurik khom un hon fertseelt tas se engele kesiin hon woo kesaat hon tas eyer am leepe is. 24 Tan sin etliche tswixich uns tsum kraap kang un es waar kraat soo wii ti fraae kesaat hate. Awer tii hon Yeesus net kesiin.” 25 Soo hot eyer tëne kesaat: “Teyer hot wërklich khee ferxtëntnis! Teyer sayt soo lamsam fer se klaape aan ales was ti profeete saan! 26 Waar tas net neetich tas Kristus soo fiil layte mist fer in sayn hërlichkheet rin khome?” 27 Tan, fon Mooses un ale Profeete aan, hot eyer aus keleet was iwer tëm kesaat waar in te kanse Xrifte.
e Fer een list fon profetsiie iwer te Mesias siin, kuk te artikel “Meechte ti piiplixe profetsiie pewayse tas Yeesus te Mesias waar?” im site jw.org.
f (Ëfeser 4:8) Wayl ti Xrifte saan: “Wii eyer in te heech ruf kang is, hot eyer kefangne mit sich kenom. Eyer hot mëner wii kexenke kep.”
g Als mool, mëner woo kwalifitsiirt sin, khene wii sirkuyt superintentente in kesetst wëre wii se 25 pis 30 yoore alt sin. Awer tii mise eyerst speryens wii elteste kriin.
h Fer mee wise iwer wiis tuu een yunge pruuter helfe khanst fërtich sin fer mee flichte uf phase, kuk noch mool A Sentinela Akust fon 2018, sayte 11-12, apsetse 15-17; un aach A Sentinela 15te April fon 2015, sayte 3-13.
i PILT AUSLEYUNG: Een pruuter helft een Piipel xtutënt se tenke iwer was ti Piipel saat un ferxteen wii Kot kefale.