Soo wii Yeesus, preetich mit muut!

1. Was is te unerxiit tswixich Yeehoowa sayn tiiner un anere woo sich kriste nëne?

YEEHOOWA sayn tiiner hon een xtarke wunx fer ti kuute notisye preetiche un tuun tas mit muut mache. Tas macht se anerste wii ti anere woo sich kriste nëne. (Tit. 2:14) Awer als mool, khan sin tas tuu tich net soo muutich xpiirst. Fiilaycht ferxteest tuu ti xpiirunge fon een flaysiche elteste. Tee saat: “Als mool, hon ich aynfach khee wunx fer se preetiche.”

2. Warom khan es als mool xweyer sin wayter mit muut preetiche?

² Khan sin tas mer rechter anere tinge in Yeehoowa sayn tiinst mache, xtats preetiche. Warom is tas soo? Wayl wën mer Raych Saale paue un hale, umaniteer hilef kepe orer ti anere uf muute, tuun mer ti kuute resultaate klaych siin un tas lost uns froo. Wën mer mit te priiter xafe, khene mer ti liip un te friit xpiire un meyer wise tas se petanklich weeche unser aarwayt sin. Im keeche teel, khan sin tas mer fiile yoore in unser teritooryum kepreeticht hon un weeniche wolte mee iwer ti Piipel lërne. Fiilaycht hon etliche sich soo kaar too tekeeche kextelt. Un soo lang wii tas ën tichter khomt, khene mer mee opositsyoon waarte. (Mat. 10:22) Was khan uns helfe unser muut in te preetich aarwayt hale orer soo kaar ferxtërke?

3. Was lërne mer iwer Yeesus mit te ferklaychung in Lukas 13:6-9?

³ Yeesus sayn payxpiil khan uns in lërne muutich in te preetich sin. Wii tee uf te eyert waar, hot eyer imer flaysich kepreeticht. Un wii ti tsayt rom kang is, is eyer noch flaysicher kep. (Lees Lukas 13:6-9.)a Yeesus hot sayn aarwayt ferklaycht mit te aarwayt fon eene man woo traupe krist uf kephast hot. Im traupe krist, waars een fayche paam un te man hot 3 yoore kexaft tas es friichte kepe teet, awer es is net pasiirt. Kraat soo, hot Yeesus 3 yoore fer ti yuute kepreeticht, awer ti meyerste sin net sayn tisipele kep. Un soo wii te man fon te ferklaychung, hot Yeesus net uf kep. Kraat tas keeche teel: tee hot noch mee kexaft fer tëne helfe ti kuute notisye aan nëme.

4. Was fer 4 lisyoone tuun mer mit Yeesus sayn payxpiil lërne?

⁴ In tiise artikel, tuun mer siin wii Yeesus muutich kepreeticht hot, hauptseechlich in te letste 6 moonate fon sayn preetich. (Kuk ti xtuutyum noote “Depois disso” in Lukas 10:1.) Wën mer Yeesus sayn wërter foliche un tëm noo mache, khene mer uns muutich hale. Wole mer 4 lisyoone lërne fon Yeesus sayn payxpiil: (1) tee hot sich traan kehal aan Yeehoowa sayn wile mache, (2) tee hot acht kep fer ti piiplixe profetsiie, (3) tee hot uf Yeehoowa ketraut fer hilef kriin, un (4) tee hot sich hoflich kehal tas etliche tëm aan heere teete.

KOT SAYN WILE WAAR TAS HAUPSTE FER TËM

5. Wii hot Yeesus ketsaycht tas Kot sayn wile tas haupste fer tëm waar?

⁵ Yeesus hot “ti kuute notisye iwer Kot sayn Raych” flaysich kepreeticht wayl eyer wust tas es waar ti aarwayt woo Kot wolt hon tas eyer mache solt. (Luk. 4:43) Fer Yeesus, preetiche waar tas haupste. Soo kaar in te letste moonate fon sayn leepe, “hot eyer ti layt in kelërnt fon xtat tsu xtat un altee tsu altee”. (Luk. 13:22) Tee hot aach mee tisipele keiipt fer ti kuute notisye preetiche. (Luk. 10:1)

6. Was mënt Yeehoowa iwer ti preetich aarwayt? (Kuk aach tas pilt.)

⁶ Hayt aach, ti kuute notisye preetiche is ti haupst aarwayt woo Yeehoowa un Yeesus wole hon tas mer mache. (Mat. 24:14; 28:19, 20) Ti kanse aarwayte woo mer tsu Yeehoowa mache, sin mit te preetich ferpunt. Tsum payxpiil, meyer paue Raych Saale un xafe in Petël fer ti preetich aarwayt pay xteen. Wën mer umaniteer hilef kepe, wole mer unser priiter helfe mit te neetiche tinge tas se khene noch mool in te fersamlunge keen un preetiche. Wën mer uns traan tenke tas ti preetich aarwayt ti haupst aarwayt is woo Kot wil hon tas mer mache, kriin mer een xtërker wunx fer tas ofts mache. János, een elteste in Unkaar, saat: “Unser haupst insetsung is ti preetich aarwayt. Ich tenke mich traan tas niks khan es ersetse.”

7. Warom wil Yeehoowa hon tas mer wayter preetiche? (1 Timoteus 2:3, 4)

⁷ Meyer khene unser muut in te preetich ferxtërke wën mer ti layt siin soo wii Yeehoowa se siit. Tee wil hon tas soo fiil layt wiis meechlich is, ti kuute notisye heere un ti woerheet aan nëme fer keret wëre. (Lees 1 Timoteus 2:3, 4.)b Too tefoer, tuut eyer uns iipe fer ti kuute notisye peser preetiche. Tsum payxpiil, tas piichelche Liip ti layt — Mach tisipele tuut uns in lërne wii kexpreeche aan fange mit te opjetiiw fer tisipele mache. Aach wën se net yets aan fange Kot tiine, im xtant kriin se ti xans fer tas mache foer tas ën fon te kroos tripulatsyoon. Im futuer, khan sin tas se sich traan tenke was mer tëne kesaat hon un fiilaycht kriin se te wunx fer Yeehoowa tiine. Awer es tuut ploos pasiire wën mer wayter preetiche.

TEE HOT ACHT KEP TSU TE PIIPLIXE PROFETSIIE

8. Was fer piiplixe profetsiie hon Yeesus keholef sayn tsayt kuut penutse?

⁸ Yeesus hot ferxtan wii ti piiplixe profetsiie sich erfiile teete. Tee wust tas sayn preetich aarwayt ploos 3 un halpe yoore lang weyer. (Tan. 9:26, 27) Torich ti profetsiie, wust eyer aach wanee un wii eyer xtërpe teet. (Luk. 18:31-34) Tes weeche hot eyer sayn tsayt in te pest aat penutst. Tee hot muutich kepreeticht fer fërtich pringe ti aarwayt woo tëm iwer kep waar.

9. Wii tuun ti piiplixe profetsiie uns uf muute flaysich preetiche?

⁹ Ti piiplixe profetsiie ferxteen, khan uns uf muute flaysich preetiche. Meyer wise tas tas ën fon tiise welt ticht is. Ti tinge woo hayt pasiire un ti aanxtelung fon te layt tsayche tas ti piiplixe profetsiie fer ti letste taache sich am erfiile sin. Ti Piipel hot aach profetisiirt tas te kheenich fom siit un te kheenich fom nort teete naner khëmpfe “in te tsayt fom ën”. (Tan. 11:40) Meyer ferxteen tas es am xpreche is iwer te khampf fon te welt rechiirung fon Kroos Pritaanya un Nort Amërika keeche Ruslant un ti natsyoone woo tas pay xteen. Meyer ferxteen aach tas, in te profetsii in Tanyël 2:43-45, ti fiis fon te xtaatue representiire ti welt rechiirung fon Kroos Pritaanya un Nort Amërika. Torich unser xtuutyum fon te profetsiie, sin mer uns sicher tas palt — kans klaych — tuut Kot sayn Raych ti mënxliche rechiirunge fernichte. Ti profetsiie tsayche tas tas ën ticht is; soo meyer mise unser tsayt in te pest aat penutse — es is aylich se preetiche!

10. Wii noch khene piiplixe profetsiie uns uf muute wayter preetiche?

¹⁰ Weeche ti piiplixe profetsiie, hon mer aach een pexeet woo mer hërtslich teele wole. Carrie, een xwester woo in te Tominikaanix Repuuplik tiint, saat: “Yeehoowa sayn xeen ferxpreche fon een peser futuer, tuun mich uf muute fer ti anere preetiche. Wën ich siin was ti layt hayt mit mache, mërke ich tas tiise ferxpreche sin net ploos fer mich, awer fer tëne aach.” Ti piiplixe profetsiie tsayche tas Yeehoowa uns am helfe is in tiise aarwayt. Un tas tuut uns uf muute wayter preetiche. Leila, woo in Unkaar leept, saat: “Ti profetsii in Isayas 11:6-9 tsaycht tas, mit Yeehoowa sayn hilef, khan kwalkee persoon sich ënere. Tas helft mich se preetiche soo kaar fer ti layt woo ich tenke net heere wole.” Un Christopher, een pruuter fon Sampya, saat: “Markus 13:10 hot foer raus kesaat tas ti kuute notisye teete weltwayt kepreeticht wëre. Es is een eer fer mich een teel in tiise erfiilung hon.” Was fer piiplixe profetsiie tuun tich uf muute wayter preetiche?

TEE HOT UF YEEHOOWA KETRAUT FER HILEF KRIIN

11. Warom must Yeesus uf Yeehoowa traue fer hilef kriin fer wayter mit muut preetiche? (Lukas 12:49, 53)

¹¹ Yeesus hot ketraut tas Yeehoowa tëm helfe teet wayter mit muut preetiche. Yeesus hot respekt in te preetich ketsaycht, awer tee wust tas etliche pees weyere un fiile sich too tekeeche xtele teete. (Lees Lukas 12:49,c 53.d) Weeche Yeesus sayn preetich aarwayt, hon ti relichyeese fiirer noo un noo fersuucht tëm um pringe. (Yoo. 8:59; 10:31, 39) Awer Yeesus hot wayter kepreeticht, wayl eyer wust tas Kot mit tëm waar. Tee hot kesaat: “Ich sin net aleen, awer te Fater woo mich kexikt hot is mit mich. (…) Tee hot mich net aleen kelos, wayl ich mache imer was tëm kefalt.” (Yoo. 8:16, 29)

12. Wii hot Yeesus sayn tisipele foer perayt fer wayter preetiche soo kaar wën se yachtung mit mache teete?

¹² Yeesus hot sayn tisipele erinert tas se khonte uf Yeehoowa traue fer hilef kriin. Tee hot se imer sicher kelos tas Yeehoowa se helfe teet, soo kaar foer ti yachtung. (Mat. 10:18-20; Luk. 12:11, 12) Wayl Yeesus wust tas fiile sich keeche ti kuute notisye xtele teete, hot eyer fer sayn tisipele kesaat tas se solte sich uf phase. (Mat. 10:16; Luk. 10:3) Tee hot se oryentiirt tas wën yemant net heere wolt, solte se net fersuuche tëm tswinge ti woerheet aan nëme. (Luk. 10:10, 11) Un tee hot kesaat tas se solte aus rayse wën se keyacht weyere. (Mat. 10:23) Opwool Yeesus flaysich waar un uf Yeehoowa ketraut hot, hot eyer sich net umsonst in kefoer kextelt. (Yoo. 11:53, 54)

13. Warom khene mer uns sicher sin tas Yeehoowa uns helfe tuut?

¹³ Fiile xtele sich keeche unser aarwayt hayt. Soo meyer mise Kot sayn hilef hon fer wayter muutich preetiche. (Apo. 12:17) Warom khanst tuu tich sicher sin tas Yeehoowa tich helfe tuut? Weeche Yeesus sayn kepeet in Yoohan 17. Tee hot fer Yeehoowa ferlangt ti aphostele uf phase. Meecht Yeehoowa tas keantwort hon? Yawool. Aphostele sayn Kexicht tsaycht wii Yeehoowa ti aphostele keholef hot mit muut preetiche, opwool ti yachtung. In sayn kepeet, hot Yeesus aach ferlangt tas Yeehoowa uf phase solt tii woo ti preetich aarwayt fon te aphostele aan nëme teete… un tuu pist too tepay! Yeehoowa hot net noo kelos Yeesus sayn kepeet antworte. Soo wii Yeehoowa ti aphostele keholef hot, tuut eyer tich aach helfe. (Yoo. 17:11, 15, 20)

14. Warom khene mer uns sicher sin tas mer khene wayter mit muut preetiche in xweyere tsayte? (Kuk aach tas pilt.)

¹⁴ Soo lang wii tas ën tichter khomt, khan sin tas es xweyer wërt ti kuute notisye preetiche, awer meyer tuun sicher ti neetich hilef kriin. (Luk. 21:12-15) Soo wii Yeesus un sayn tisipele, tsënke mer net mit te layt un meyer lose ti layt ëntxlise uns heere orer net. Soo kaar in lënter woo unser aarwayt krënse hot, tuun ti priiter es hin kriin wayter ti kuute notisye preetiche. Tii traue uf Yeehoowa, net uf sayn aychne kraft. Soo wii Yeehoowa kraft kep hot fer ti eyerste kriste, tuut eyer uns kraft kepe tas “ti preetich aarwayt komplët kemacht kept”, soo wii Yeehoowa wil. (2 Tim. 4:17) Say tich sicher: wëns tuu uf Yeehoowa traust, tuust tuu es hin kriin mit muut wayter preetiche.

TEE HOT SICH HOFLICH KEHAL

15. Was tsaycht tas Yeesus sich hoflich kehal hot in te preetich aarwayt?

¹⁵ Yeesus hot sich hoflich kehal tas etliche ti kuute notisye aan heere teete. Tas hot tëm keholef sich muutich hale. Tsum payxpiil, am ën fom yoerkang 30 N.K., hot Yeesus kesiin tas fiile wilich waare fer ti preetich aarwayt aan nëme. Tee hot se ferklaycht mit een wayse plantaaj, fërtich fer ti ërntung. (Yoo. 4:35) Unkefeer een yoer xpeeter, hot eyer fer sayn tisipele kesaat: “Ti ërntung is wërklich kroos.” (Mat. 9:37, 38) Un xpeeter hot eyer noch mool kesaat: “Ti ërntung is kroos (…) Tuut fer te Hër fon te ërntung aan hale tas eyer aarwayter fer Sayn ërntung xikt.” (Luk. 10:2) Yeesus hot sich hoflich kehal tas ti layt ti kuute notisye aan heere teete un tee hot sich kefrayt wën se tas kemacht hon. (Luk. 10:21)

16. Wii hon Yeesus sayn ferklaychunge ketsaycht tas eyer hoflich iwer ti preetich waar? (Lukas 13:18-21) (Kuk aach tas pilt.)

¹⁶ Yeesus hot sayn tisipele in kelërnt sich hoflich iwer ti preetich hale. Tas teet se helfe mit muut preetiche. Kuk mool, tsum payxpiil, 2 fon sayn ferklaychunge. (Lees Lukas 13:18-21.)e Yeesus hot ti kuute notisye fom Raych ferklaycht mit een kleen soome, tas sënef khërneche, woo een kroose paam wërt. Too temit wolt eyer in lërne tas tas pexeet fom Raych teet sich ferprayte un niks khent tëm um hale. Tee hot aach tas pexeet fom Raych ferklaycht mit sauertaych. Tee wolt tsayche tas tiise pexeet weyer kepreeticht uf te kans welt un tas ti layt teete ënerunge too teweeche mache woo, am aanfang, fiilaycht net soo taytlich weyere. Soo hot Yeesus sayn tisipele keholef se siin tas sayn preetich aarwayt teet fiile layt helfe.

17. Was fer uersache hon mer fer hoflich iwer ti preetich sin?

¹⁷ Wën mer tenke aan te resultaate uf te kans welt, es tuut uns uf muute wayter preetiche. Yeetes yoer, tuun milyoone layt tsum Aantenke keen un ti Piipel mit uns xtutiire. Fiile tausente tuun sich taafe lose un aan fange mit uns in te preetich xafe. Wii fiil layt meechte unser pexeet noch aan nëme? Meyer wise net. Awer meyer wise tas Yeehoowa een kroos folek am samele is, woo ti kroos tripulatsyoon iwerleepe tuut. (Apo. 7:9, 14) Yeehoowa, te Hër fon te ërntung, is sich sicher tas fiile ti kuute notisye noch aan nëme tuun. Soo meyer mise wayter preetiche.

18. Was wole mer hon tas ti layt iwer uns mërke?

¹⁸ Yeesus sayn woere tisipele hon imer ti kuute notisye flaysich kepreeticht. Tsum payxpiil, ti aphostele waare soo muutich tas ti layt “kemërkt [hon] tas se mit Yeesus kewees waare”. (Aph. 4:13) Wii ti layt unser muut in te preetich aarwayt peopachte, meyer hofe tas se aach mërke tas mer Yeesus noo mache.