XTUUTYUM ARTIKEL 5
LIIT 108 Kot sayn leaale liip
Was fer seechen kriin mer weeche Kot sayn liip?
“Yeesus Kristus is tsu te welt khom fer sintiche layt rete.” (1 TIMOTEUS 1:15)
WAS TUUN MER SIIN?
Wii mer nutse fom fray khaaf opfer kriin khene un wii mer petanklichkheet tsu Kot too teweeche tsayche khene.
1. Was khene mer mache fer Yeehoowa froo lose?
XTEL tich mool foer tas tuu een kexenk kepst fer yemant woos tuu liipst. Tiise kexenk is xeen un aach nutslich. Awer wole mer saan tas ti persoon tas kexenk in een xrank xtelt un nii mool too triwer tenkt. Sicher weyerst tuu traurich too temit. Im keeche teel, wën ti persoon tas kexenk penutse teet un tich tanke teet, sicher weyerst tuu froo. Was hot tiise payxpiil se tuun mit tëm kexenk woo Yeehoowa uns kep hot? Weeche liip, hot Kot sayn Soon kep fer weeche uns xtërpe. Sicher wërt Yeehoowa aarich froo wën mer petanklichkheet tsayche weeche sayn kexenk un liip. (Yoo. 3:16; Rom. 5:7, 8)
2. Was tuun mer in tiise artikel siin?
2 Soo lang wii ti yoore rom keen, khan unser petanklichkheet tsum fray khaaf opfer sich ferxweeche. Es weyer wii wën mer Yeehoowa sayn kexenk in een xrank xtele teete: meyer sin froo too teweeche, awer meyer lose tëm tsu im xrank. Meyer wole net hon tas soo was mit uns pasiirt! Tes weeche mise mer ofts tenke iwer ales was Yeehoowa un Yeesus fer uns kemacht hon. Tiise artikel helft uns tas mache. Meyer siin wii mer nutse fom fray khaaf opfer yets un im futuer kriin khene. Un meyer siin was mer mache khene fer se tsayche tas mer petanklich fer Yeehoowa sayn liip sin, hauptseechlich in te woche foer un noom Aantenke.
WII KRIIN MER YETS NUTSE?
3. Was is een aat wii mer khene xon yets nutse fom fray khaaf opfer kriin?
3 Xon yets, kriin mer nutse fon Yeesus sayn fray khaaf opfer. Tsum payxpiil, weeche tas fray khaaf opfer, Yeehoowa fertsayt unser sinte. Tee praycht uns net fertsaye, awer tee wil tas mache. Te psalmist hot sayn petanklichkheet weeche Yeehoowa sayn fertsayung ketsaycht mit te wërter: “Tuu, oo Yeehoowa, pist kuut un imer fërtich fer se fertsaye.” (Psal. 86:5; 103:3, 10-13)
4. Tsu weem hot Yeehoowa tas fray khaaf opfer fersoricht? (Lukas 5:32; 1 Timoteus 1:15)
4 Etliche fon uns khene fiilaycht tenke tas se Yeehoowa sayn fertsayung net fertiine. In woerheet, nimant fon uns hot tiise recht. Te aphostel Phaul hot kesaat tas eyer net fertiint hot “wii aphostel keruuft wëre” wayl eyer “Kot sayn kemaynt keyacht” hat. Awer tee hot noch kesaat: “Weeche Kot sayn unfertiint kuutheet, sin ich was ich sin.” (1 Kor. 15:9, 10) Wën mer uns peroye fon unser sinte, tuut Yeehoowa uns fertsaye. Tee macht tas, net wayl mer es fertiine, awer wayl eyer uns liipt. Wëns tuu tich traurich xpiirst wayls tuu tenkst tas tuu Yeehoowa sayn fertsayung net fertiinst, tenk tich traan tas eyer tas fray khaaf opfer fersoricht hot, net fer perfekte mënxe, awer fer sintiche mënxe woo sich peroye. (Lees Lukas 5:32;a 1 Timoteus 1:15.b)
5. Mus Yeehoowa uns fertsaye? Lee tas aus.
5 Nimant sol tenke tas eyer Yeehoowa sayn parmhërtslichkheet fertiint wayl eyer Kot xon fiile yoore tiint. Es is woer tas Yeehoowa mërkt ales was mer fer tëm mache. (Hep. 6:10) Awer tee hot tas fray khaaf opfer wii een kexenk fersoricht, net wii een loon fer uns petsaale weeche unser tiinst tsu tëm. Tes weeche, weyers ferkheert se saan tas, ploos wayl mer xon fiile tinge in Yeehoowa sayn tiinst kemacht hon, fertiine mer sayn fertsayung. Es weyer tas selwiche wii saan tas mer prayche net tas fray khaaf opfer. (Kuk aach Kalater 2:21.)
6. Warom hot Phaul xtram fer Yeehoowa kexaft?
6 Phaul wust tas, ekaal wii fiil eyer fer Yeehoowa xafe teet, teet eyer sayn fertsayung nii fertiine. Soo, warom hot eyer soo fiil kexaft? Fer se tsayche tas eyer petanklich waar weeche Yeehoowa sayn kuutheet un parmhërtslichkheet. (Ëfe. 3:7) Soo wii Phaul, tuun mer wayter flaysich fer Yeehoowa xafe, net fer sayn parmhërtslichkheet fertiine, awer fer petanklichkheet too teweeche tsayche.
7. In was fer aner aat khene mer nutse fom fray khaaf opfer yets kriin? (Romaaner 5:1; Tyako 2:23)
7 Een aner aat wii mer khene nutse fom fray khaaf opfer yets kriin, is tas meyer khene een ticht fraayntxaft mit Yeehoowa hon.c Wii mer im letste artikel kesiin hon, hate mer net een fraayntxaft mit Yeehoowa wii mer uf te welt khom sin. Awer weeche tas fray khaaf opfer, khene mer “friit mit Kot” hon un soo tichter pay tëm khome. (Lees Romaaner 5:1;d Tyako 2:23.e)
8. Warom sole mer petanklich tsu Yeehoowa sin wayl mer tsu tëm peete khene?
8 Tsu Yeehoowa peete is een ekstra tings woo mer mache khene wayl mer een ticht fraayntxaft mit tëm hon. Yeehoowa heert net ploos ti kepeete woo in te fersamlunge kemacht sin, awer aach wën yeete eene fon uns aleen peet. Tas kepeet khan unser hërts peruyche un uns friit kepe. Awer tas is net te eensiche nutse woo mer kriin: tas kepeet khan unser fraayntxaft mit Yeehoowa ferxtërke. (Psal. 65:2; Tya. 4:8; 1 Yo. 5:14) Wii Yeesus uf te eyert waar, hot eyer imer kepeet. Tee wust tas Yeehoowa tëm kehoricht hot un tas ti kepeete sayn fraayntxaft mit Yeehoowa xtark hale teete. (Luk. 5:16) Meyer sin aarich petanklich tas, weeche tas fray khaaf opfer, khene mer Yeehoowa sayn fraaynte sin un soo kaar mit tëm fertseele torich tas kepeet!
WII KRIIN MER NUTSE IM FUTUER?
9. Wii tuut tas fray khaaf opfer nutse fer Yeehoowa sayn troye tiiner im futuer pringe?
9 Wii tuun Yeehoowa sayn troye tiiner nutse fom fray khaaf opfer im futuer kriin? Yeehoowa tuut se eewiche leepe xenke. Wayl ti layt imer kextorep sin, fiile tenke tas fer imer leepe unmeechlich is. Awer fom aanfang aan, waar Yeehoowa sayn tsiil tas ti mënxe fer imer leepe teete. Wën Aatam net kesint hët, nimant teet tenke tas es tsu kuut weyer fer woer sin. Es is woer tas es net laycht is uns foer xtele fer imer leepe, awer meyer khene too traan klaape. Es is soo wayl mer wise tas, fer tas meechlich mache, hot Yeehoowa xon tas tayerste prays petsaalt: tas leepe fon sayn liipe Soon. (Rom. 8:32)
10. Was tuun ti kesalpte un ti anere xeef hërtslich waarte?
10 Opwool mer tas eewiche leepe im futuer kriin, Yeehoowa wil hon tas mer xon yets too triwer tenke. Ti kesalpte tuun hërtslich waarte een wunerlich leepe im himel kriin, wii se mit Yeesus iwer ti eyert rechiire. (Apo. 20:6) Ti anere xeef tuun mit kans hërts waarte eewiche leepe ufm Paratiis too uf te eyert kriin, mit khee phayn orer traurichkheet. (Apo. 21:3, 4) Wëns tuu fon te anere xeef pist, meecht tayn peloonung kleener sin wii ti kesalpte sayns? Sicher net! Yeehoowa hot ti mënxe kemacht fer uf te eyert leepe. Soo khene mer uns sicher sin tas fer imer uf te eyert leepe, tuut uns mechtich froo lose.
11-12. Was fer sin etliche seechen im Paratiis woo mer waarte khene? (Kuk aach ti pilter.)
11 Xtel tich mool foer wii tayn leepe ufm Paratiis too uf te eyert wërt. Tuu tuust tich nii mool ketanke mache mit krankheet orer toot. (Isa. 25:8; 33:24) Yeehoowa kept tich ale kuute tinge woos tuu wilst. Was teest tuu kërn lërne? Iwer ti tiere? Een musik instrumënt xpiile? Se moole? Im Paratiis wëre layt neetich woo wise wii hayser pleene un paue. Es wëre aach layt neetich fer im plantaaj xafe, ese khooche, feramente paue un kaate plantse un uf phase. (Isa. 35:1; 65:21) Wëns tuu fer imer leepst, tuust tuu kenuuch tsayt hon fer tiise un fiil anere apiliteete lërne.
12 Meyer kriin aach fiil frooheet wën mer tsurik tsum leepe wilkhome tii woo kextorep sin. (Aph. 24:15) Xtel tich mool aach foer wii froo tuust tuu tich xpiire wiis tuu mee iwer Yeehoowa lërnst torich ti tinge woo eyer kemacht hot. (Psal. 104:24; Isa. 11:9) Un noch peser: tuu tuust nii sinte! Tes weeche, khanst tuu Yeehoowa tiine un es wërt nii neetich fertsayung ferlange. Teest tuu tas ales um truke fer ploos “torich een khorts tsayt [tich] in sint fraye”? (Hep. 11:25) Kewis net! Tas wunerliche leepe woo mer kriin, wërt fiil peser wii was ti welt uns hayt aan piite khan. Ferkes tich net: tas Paratiis wërt net imer een hofnung sin woo sich im futuer erfiilt. Es khomt ti tsayt wën mer yeete taach im Paratiis leepe tuun. Tas ales is meechlich wayl Yeehoowa uns soo fiil keliipt hot tas eyer tas fray khaaf opfer fersoricht hot.
Was fer seechen tuust tuu hauptseechlich waarte im Paratiis kriin? (Kuk ti apsetse 11-12.)
TSAYCH TAS TUU PETANKLICH FER YEEHOOWA SAYN LIIP PIST
13. Wii khene mer tsayche tas mer petanklich weeche Yeehoowa sayn liip sin? (2 Korinter 6:1)
13 Wii khene mer petanklichkheet fer Yeehoowa tsayche wayl eyer tas fray khaaf opfer fersoricht hot? Meyer mise Yeehoowa sayn aarwayt im eyerste plats xtele. (Mat. 6:33) Yeesus is kextorep “tas tii woo leepe, net mee fer sich selepst leepe, awer fer tee woo fer tëne kextorep is un noch mool uf keruuft kep is”. (2 Kor. 5:15) Yeehoowa hot uns fiil kuutheet ketsaycht un uns fertsayt. Wën mer unser pestes in sayn tiinst mache, tsayche mer tas mer ferxteen wii fiil eyer fer uns kemacht hot un tas mer petanklich too teweeche sin. (Lees 2 Korinter 6:1.)f
14. Wii tsayche mer tas mer uf Yeehoowa sayn oryentiirunge traue?
14 Meyer khene aach petanklichkheet weeche Yeehoowa sayn liip tsayche wën mer uf Sayn oryentiirunge traue. Wii mache mer tas? Torich unser ëntxlise. Tsum payxpiil, fiilaycht pist tuu am tenke eps tuu wërklich praychst een hooch xuul mache, orer eps tuu solst een spetsiifix aarwayt aan nëme. Tenk iwer was Yeehoowa wil hon tas tuu mache tuust. (1 Kor. 10:31; 2 Kor. 5:7) Wën mer ëntxlise mache woo mit Yeehoowa sayn oryentiirunge xtime, was wunerliches pasiirt — unser fraayntxaft mit Yeehoowa, unser klaape un unser hofnung wëre noch xtërker. (Rom. 5:3-5; Tya. 2:21, 22)
15. Wii khene mer unser petanklichkheet tsayche in te woche foer un noo tëm Aantenke?
15 Es kept noch een aner aat wii mer tsayche khene wii fiil weyert meyer kepe fer Yeehoowa sayn liip. Meyer sole ti woche foer un noo tëm Aantenke penutse fer se tsayche wii petanklich meyer weeche tas fray khaaf opfer sin. Meyer sole im Aantenke sin un anere in laate fer aach khome. (1 Tim. 2:4) Tuu aus leye fer tëne woos tuu in laatst was im Aantenke pasiirt. Es weyer kuut tëne tsayche ti wiiteos Fer was in Yeesus kextorep? un Tuu aan Yeesus sayn toot aan tenke. Ti elteste sole ti inatiiwe in laate. Xtel tich mool foer ti frooheet woos im himel un uf te eyert kept wën etliche fon Yeehoowa sayn ferloerne xeef tsurik khome! (Luk. 15:4-7) Im Aantenke, wole mer al pekriise, awer hauptseechlich tii woo nay sin orer woo een lang tsayt net mee tsu een fersamlung khome. Meyer wole hon tas se sich tehëm xpiire. (Rom. 12:13)
16. Warom weyers kuut se tenke ep mer khene mee fer Yeehoowa mache in te tsayt fom Aantenke?
16 Khanst tuu mee fer Yeehoowa mache in te woche foer un noo tëm Aantenke? Tas is een kuut aat fer petanklichkheet tsayche fer ales was Yeehoowa un Yeesus fer tich kemacht hon. Woo eftas tuu preetiche keest, woo peser tuust tuu Yeehoowa sayn unerxtitsung xpiire un soo, tuust tuu noch mee uf tëm traue. (1 Kor. 3:9) Mach aach yeete taach ti Piipel leesung fer tas Aantenke, woo xteet im puuch Tuu yeete taach ti Piipel unersuuche orer im Xtuutyum heftche fer ti mitewoch fersamlung. Tuu khanst soo kaar tiise piiplixe wersikele penutse fer een perseenlich xtuutyum mache.
17. Was tuut Yeehoowa kefale? (Kuk aach te khaste “Wii khene mer petanklichkheet weeche Yeehoowa sayn liip tsayche?”.)
17 Im xtant, weeche tayn situatsyoon, khanst tuu net mee fer Yeehoowa mache. Awer eriner tich tas Yeehoowa ferklaycht net was tuu machst mit was ti anere mache; tee kept weyert fer ti liip woos tuu fer tëm host. Tee frayt sich wën tee siit tas tuu petanklichkheet tsaychst weeche Sayn weyertlich kexenk — tas fray khaaf opfer. (1 Sam. 16:7; Mar. 12:41-44)
18. Warom sin mer petanklich tsu Yeehoowa un Yeesus?
18 Ploos weeche tas fray khaaf opfer khene mer fertsayung fon unser sinte kriin, een fraayntxaft mit Yeehoowa paue un ti hofnung hon fer eewiche leepe im futuer kriin. Ti liip hot Yeehoowa uf kemuut tiise wunerliche seechen fer uns kepe. Wole mer imer unser petanklichkheet weeche tiise liip tsayche. (1 Yo. 4:19) Wole mer aach unser petanklichkheet tsu Yeesus tsayche, woo uns soo fiil keliipt hot tas eyer fer uns kextorep is. (Yoo. 15:13)
LIIT 154 Eewiche liip
a (Lukas 5:32) Ich sin net khom fer ti kerechte ruufe, awer ti sintiche, tas se sich peroye.”
b (1 Timoteus 1:15) Ma khan aan tiise wërter traue un tii fertiine kans aan kenom wëre: Yeesus Kristus is tsu te welt khom fer sintiche layt rete. Tswixich tëne, sin ich te xlimste.
c Yeehoowa hot fertsayt tii woo tëm aan kepeet hon, xon foer Yeesus tas fray khaaf opfer fersoriche. Kot hot tas kemacht wayl eyer sich sicher waar tas sayn Soon troy pis sayn toot plaype teet. Soo, fer Yeehoowa, es waar wii wën tas fray khaaf opfer xon petsaalt weyer een lang tsayt foer Yeesus sayn toot. (Rom. 3:25)
d (Romaaner 5:1) Soo, yets woo mer kerecht aus kexproch kep sin weeche te klaape, wole mer uns fraye weeche te friit mit Kot torich unser Hër Yeesus Kristus.
e (Tyako 2:23) Soo tas teel fon te Xrifte hot sich erfiilt, woo saat: “Apraham hot aan Yeehoowa keklaapt, un soo is eyer kerecht aan kesiin kep”, un tes weeche is eyer Yeehoowa sayn fraaynt kenënt kep.
f (2 Korinter 6:1) Wii Kot sayn mit aarwayter, meyer muute aych ërnstlich uf net Kot sayn unfertiint kuutheet aan nëme un tan ferkese warom mer se kriit hon.