XTUUTYUM ARTIKEL 26
LIIT 123 Meyer heere Yeehoowa un sayn Orkanisatsyoon aan
Say teemuutich wëns tuu etliche tinge net ferxteest
“Es is unmeechlich fer uns te Ale Mechtiche se ferxteen.” (YOOP 37:23)
WAS TUUN MER SIIN?
Meyer wise net ales was pasiire tuut. Awer meyer khene ti propleeme aus hale wën mer uns traan hale aan was mer wise un kans uf Yeehoowa traue.
1. Mit was fer apiliteet hot Yeehoowa uns kemacht un warom?
YEEHOOWA hot uns kemacht mit te apiliteet fer se tenke, naye tinge lërne, un wise wii aan wëne was mer lërne. Warom hot Kot uns soo kemacht? Tee wil hon tas mer “Kot sayn khëntnis fine” un tas mer Tëm mit unser ferxtant tiine. (Xpr. 2:1-5; Rom. 12:1)
2. (a) Was mise mer iwer uns selepst ferxteen? (Yoop 37:23, 24) (Kuk aach tas pilt.) (b) Warom is es kuut ferxteen tas mer prayche net ales wise?
2 Opwool Yeehoowa uns kemacht hot mit te apiliteet fer haufe tinge lërne, es kept fiiles woo mer aynfach net wise. (Lees Yoop 37:23, 24.)a Tenk mool aan Yoop sayn payxpiil. Tee hot ferxtan tas eyer net ales wust wii Yeehoowa tëm haufe frooche kemacht hot. Tiise kexpreech hot Yoop keholef se ferxteen tas eyer must teemuutich sin un sayn ketanke ënere. (Yoop 42:3-6) Es is aach kuut fer uns se ferxteen tas mer net ales wise. Wën mer uns too traan tenke, tas helft uns teemuutich sin un traue tas Yeehoowa uns imer saat was mer wërklich prayche fer kuute ëntxlise mache. (Xpr. 2:6)
Soo wii mit Yoop pasiirt is, es khan uns nutse pringe erkhëne was mer net wise (Kuk te apsats 2.)
3. Was tuun mer in tiise artikel siin?
3 In tiise artikel tuun mer siin etliche tinge woo mer net wise un warom tas khan als mool xweyer fer uns sin. Meyer tuun aach lërne warom es kuut is etliche tinge net wise. Was mer lërne, tuut uns helfe traue tas Yeehoowa, “woo ales perfekt ferxteet”, saat uns was mer wërklich wise prayche. (Yoop 37:16)
MEYER WISE NET WANEE TAS ËN KHOME TUUT
4. Tëm noo Matheus 24:36, was is een tings woo mer net wise?
4 Lees Matheus 24:36.b Meyer wise net wanee tas ën khome tuut. Noch net mool Yeesus wust “te taach un ti xtun” wii eyer uf te eyert waar.c Xpeeter hot eyer fer sayn aphostele aus keleet tas Yeehoowa, te Kroose Tsaytmayster, tuut ti tsayte fon etliche ewënte “unich sayn aychne autoriteet” hale. (Aph. 1:6, 7) Yeehoowa hot xon ëntxlist wanee tas ën khome tuut, awer meyer wise net kenau wanee tas pasiire tuut.
5. Meyer wise net wanee tas ën khome tuut. Wii khan tas uns petrefe?
5 Meyer wise net wii lang mise mer noch waarte pis tas ën khomt. Tas khan uns oone ketult orer oone muut lose, hauptseechlich wën mer xon een lang tsayt am waarte sin. Es khan aach xweyer lose wayter aus hale wën unser parente orer anere uns ferxpote. (2 Phe. 3:3, 4) Fiilaycht tenke mer: ‘Wën ich te taach fom ën wise teet, weyer es laychter ketulticher sin un net oone muut wëre wën ti anere mich ferxpote.’
6. Warom is es kuut tas mer net wise wanee tas ën khome tuut?
6 Wayl Yeehoowa uns net te taach fom ën saat, kriin mer ti xans fer se tsayche tas mer tëm tiine weeche liip un wayl mer uf tëm traue. Meyer wole Yeehoowa fer imer tiine, net ploos pis tas ën. Xtats tsu fiil tenke iwer wanee “Yeehoowa sayn taach” khomt, es weyer peser fer uns se tenke iwer was pasiire tuut noo Yeehoowa sayn taach. Tas tuut uns helfe uns tichter pay Yeehoowa xafe, uf tëm traue un tëm kefale. (2 Phe. 3:11, 12)
7. Was wise mer?
7 Es is wichtich se tenke aan was mer wise — tas ti letste taache aan kefang hon in 1914. Yeehoowa tuut tas taytlich lose torich ti piiplixe profetsiie. Tee hot uns aach kesaat fiile tinge woo pasiire teete noo tiise yoer. Tes weeche, sin mer uns sicher tas “Yeehoowa sayn kroose taach is ticht”. (Sof. 1:14) Meyer wise aach was fer aarwayt wil Yeehoowa hon tas mer mache: ti “kuute notisye fom Raych” preetiche fer soo fiil layt wiis meechlich is. (Mat. 24:14) Tas is xon kemacht in unkefeer 240 lënter un in mee wii 1.000 xprooche. Meyer prayche net “te taach un ti xtun wise” fer flaysich in tiise aarwayt sin.
MEYER WISE NET WII YEEHOOWA TI TINGE MACHT
8. Was petayte ti wërter “ti aarwayt fom woere Kot”? (Eklesyastes 11:5)
8 Meyer tuun net imer “ti aarwayt fom woere Kot” khëne. (Lees Eklesyastes 11:5.)d Tiise wërter hon se tuun mit was Yeehoowa macht orer pasiire lost fer sayn wile erfiile. Meyer wise net kenau warom Yeehoowa etwas pasiire lost orer wii eyer uns helfe tuut. (Psal. 37:5) Ti Piipel ferklaycht ti aarwayte fom woere Kot net wise, mit net wise wii een nëneche in sayn mama wakst. Noch net mool hayt, wise ti syentiste kenau wii tas pasiirt. Kraat soo, wise mer net kenau wii Yeehoowa ti tinge macht.
9. Was fer kefoore khene mer mit mache wayl mer net wise was Yeehoowa fer uns mache tuut?
9 Wayl mer net wise was Yeehoowa mache tuut fer uns helfe, khene mer uns tsurik hale etliche ëntxlise mache. Fiilaycht hon mer pang fer etliche tinge uf kepe fer mee fer Yeehoowa mache orer uns wanere tsu pletse woo mee puplikatoore prayche. Orer khan sin tas mer tenke tas Yeehoowa net froo mit uns is wën mer fersuuche mee in sayn tiinst mache, awer tuun net unser tsiile erayche. Orer fiilaycht xafe mer fiil in te preetich aarwayt, awer hon mer khee Piipel xtuutyum. Orer tuun mer xtram xafe in een ekstra proyëkt fon te Orkanisatsyoon, awer es kept fiile xwiirichkheete. Weeche tas ales, khene mer xpiire tas Yeehoowa uns net am helfe is.
10. Was fer wichtiche kwaliteete khene mer ëntwikele wayl mer net kenau wise was Yeehoowa mache tuut?
10 Wayl mer net kenau wise was Yeehoowa fer uns mache tuut, khene mer wichtiche kwaliteete ëntwikele, soo wii ti teemuut. Tas helft uns ferxteen tas Yeehoowa imer wees was peser is. (Isa. 55:8, 9) Meyer lërne aach kans traue tas Yeehoowa ales uf phase tuut. Wën mer kuute resultaate in te preetich orer in een proyëkt fon te Orkanisatsyoon hon, kepe mer ti eer tsu Yeehoowa. (Psal. 127:1; 1 Kor. 3:7) Un wën etwas net pasiirt soo wii mer kewaart hon, mise mer uns erinere tas Yeehoowa ales wees. (Isa. 26:12) Meyer mache was meyer khene un traue tas Yeehoowa uns imer helfe tuut. Meyer sin uns sicher tas Eyer uns lenke tuut, soo kaar wën eyer tas net in een wunerlich aat macht, soo wii eyer als mool friier kemacht hot. (Aph. 16:6-10)
11. Was fer wichtiche tinge wise mer?
11 Meyer wise tas Yeehoowa imer liiplich, kerecht un kluuch is. Meyer wise aach tas Yeehoowa fiil weyert kept fer was mer fer tëm un fer unser priiter mache. Un meyer wise tas Yeehoowa imer peloont tii woo leaal tsu tëm sin. (Hep. 11:6)
MEYER WISE NET WAS IM FUTUER PASIIRT
12. Tëm noo Tyako 4:13, 14, was wise mer net?
12 Lees Tyako 4:13, 14.e Meyer wise net was mit uns im futuer pasiire tuut. “Tinge woo mer net waarte” orer woo mer khee kontrol hon, khene foer khome. (Ekl. 9:11) Tes weeche, khene mer net wise ep unser pleen kuut ap laafe tuun orer soo kaar ep mer am leepe wëre fer tëne erfiile.
13. Meyer wise net ales was im futuer pasiire tuut. Wii khan tas uns petrefe?
13 Es khan xweyer fer uns sin aus hale, wayl mer net kenau wise was im futuer pasiire tuut. Wii soo? Wën mer tsu ëngstlich too triwer plaype, khente mer unser frooheet ferliire. Unser leepe khan sich uf een mool ënere orer unklike khene pasiire. Tas khan uns traurich un unruych lose. Un wën mer etwas waarte un tas sich net erfiilt, khene mer oone muut wëre. (Xpr. 13:12)
14. Aan was hëngt unser frooheet ap? (Kuk aach ti pilter.)
14 Wën mer xwiirichkheete layte, hon mer ti xans fer se pewayse tas, ekaal was pasiirt, tiine mer Yeehoowa weeche liip un net wayl mer wole etwas fon tëm kriin. Ti Piipel tsaycht tas mer sole net waarte tas Yeehoowa uns fon yeete xlechte tings xitse tuut. Tii tsaycht aach tas eyer net foer raus saat was in unser leepe pasiirt. Yeehoowa wees tas mer khene froo sin soo kaar wën mer net wise ales was noch foer khomt. In woerheet, unser frooheet hëngt ap aan Yeehoowa sayn lenkung suuche un tëm foliche. (Yee. 10:23) Wën mer Yeehoowa sayn hilef suuche fer ëntxlise mache, wëre mer net tsu ëngstlich iwer was pasiire khan. Es weyer wii wën mer saan teete: “Wën Yeehoowa wil, tuun mer leepe un tas too orer tas tat mache.” (Tya. 4:15)
Yeehoowa sayn oryentiirunge suuche un foliche, tuut uns xitse (Kuk ti apsetse 14-15.)g
15. Was wise mer iwer te futuer?
15 Meyer wise net was im futuer pasiire tuut. Awer meyer wise tas Yeehoowa ferxproch hot uns eewiche leepe kepe — im himel orer uf te eyert. Meyer wise tas eyer net liie khan un tas niks tëm um hale khan al sayn ferxpreche erfiile. (Tit. 1:2) Ploos Kot khan “tas ën foer raus saan, un xon lang heyer ti tinge woo noch net kemacht kep sin”. Ales was Yeehoowa friier ferxproch hot, hot sich wërklich erfiilt un ales was eyer fer te futuer ferxprecht, tuut sich aach erfiile. (Isa. 46:10) Meyer sin uns sicher tas niks khan Yeehoowa um hale uns liipe. (Rom. 8:35-39) Tee tuut uns ti neetich kluucheet, troost un kraft kepe fer aus hale ekaal was in unser leepe pasiire khan. Meyer khene uns sicher sin tas Yeehoowa uns helfe un seechne tuut. (Yee. 17:7, 8)
MEYER KHENE NET KANS FERXTEEN WII KUUT YEEHOOWA UNS KHËNT
16. Was wees Yeehoowa iwer uns un wii xpiirst tuu tich too teweeche? (Psalm 139:1-6)
16 Lees Psalm 139:1-6.f Unser Kriatoer wees ales iwer uns. Tee wees was hinich unser ketanke un xpiirunge is. Tee wees was mer saan un was mer in unser hërts hon. Tee wees aach ales was mer mache un warom mer tas mache. Te kheenich Tawi hot kesaat tas Yeehoowa imer fërtich is fer uns helfe. Wii xpiirst tuu tich wëns tuu tenkst tas te Ale Mechtiche un Ale Heechste Kot, woo ales kemacht hot, sich soo fiil mit tich khimert? Tawi hot kesaat: “Tiise khëntnis, kriin ich net hin se ferxteen; es is tsu hooch fer mich es erayche.” (Psal. 139:6)
17. Warom khan es xweyer fer uns sin se klaape tas Yeehoowa uns kuut khënt?
17 Fiilaycht weeche ti tinge woo in unser familye pasiirt sin, unser kultuer orer was mer keklaapt hon eep mer ti woerheet kelërnt hon, is es xweyer fer uns Yeehoowa siin wii een liipliche Fater woo sich mit uns khimert. Orer khan sin tas mer tenke tas ti feeler woo mer friier kemacht hon, soo xlim sin tas Yeehoowa teet nii winxe uns khëne lërne un tas eyer wayt wech fon uns is. Soo kaar Tawi hot sich als mool eenlich kexpiirt. (Psal. 38:18, 21) Orer khan sin tas yemant woo fersuucht kroose ënerunge mache fer se leepe soo wii Yeehoowa kefalt, tenkt: ‘Wën Kot mich wërklich ferxteet, warom tuut eyer waarte tas ich im xtich lose kewoonheete woo soo natiirlich fer mich sin?’
18. Warom is es kuut se erkhëne tas Yeehoowa uns peser wii uns selepst khënt? (Kuk aach ti pilter.)
18 Meyer mise erkhëne tas Yeehoowa uns peser wii uns selepst khënt un tas eyer tas kuutes siit woo meyer net siin khene. Es is woer tas eyer aach unser xwacheete siit. Awer tee khënt ti persoon woo mer wole sin un tee liipt uns. (Rom. 7:15) Wën mer too traan tenke, es kept uns ti kraft fer tëm wayter froo un troy tiine.
Yeehoowa helft uns unser klaape ferxtërke aan tëm wunerlich leepe woo eyer ferxprecht. Soo helft eyer uns ti propleeme hayt aus hale (Kuk ti apsetse 18-19.)h
19. Was wise mer iwer Yeehoowa?
19 Meyer wise tas Yeehoowa liip is. Meyer hon khee tswayfel too triwer. (1 Yo. 4:8) Meyer wise tas ales was eyer uns saat orer net saat is weeche sayn liip tsu uns un wayl eyer hon wil tas mer froo wëre. Meyer wise tas Yeehoowa hon wil tas mer fer imer leepe. Fer tas meechlich lose, hot eyer uns tas fray khaaf opfer fersoricht. Weeche Yeesus sayn toot, khene mer uns sicher sin tas, opwool unser feeler, khene mer Yeehoowa kefale. (Rom. 7:24, 25) Meyer wise tas “Kot kreeser wii unser hërts is un tuut ales wise”. (1 Yo. 3:19, 20) Yeehoowa khënt ales iwer uns un eyer traut tas mer mache khene ales was eyer ferlangt.
20. Was tuut uns helfe net tsu ëngstlich wëre iwer was mer net wise?
20 Yeehoowa saat uns ales was mer wise prayche. Soo meyer mise uns net ketanke mache mit was mer net wise. Xtats tas, khene mer uns traan hale aan was wërklich wichtich is. Soo khene mer tsayche tas mer teemuutich sin un kans uf Yeehoowa traue, “woo een perfekt khëntnis hot”. (Yoop 36:4) Hayt wise mer net ales. Awer meyer waarte ti tsayt wën mer fer imer naye tinge lërne tuun — fon un iwer unser Kroose Kot. (Ekl. 3:11)
LIIT 104 Hayliche kayst — een kexenk fon Kot
a (Yoop 37:23, 24) Es is unmeechlich fer uns te Ale Mechtiche se ferxteen; sayn macht is aarich kroos un eyer keet nii keeche sayn kerechtichkheet un sayn kroose recht. 24 Tes weeche, sole ti layt tëm tiif respektiire. Wayl eyer kefalt sich net mit tëne woo tenke tas se kluuch sin.”
b (Matheus 24:36) “Un nimant wees te taach un ti xtun, noch net mool ti engele im himel orer te Soon; ploos te Fater wees es.
c Yeesus wërt te fiirer sin im kriich keeche Satanaas sayn xlecht welt. Soo, es siit aus tas hayt, wees eyer te taach fon te Armaxeton un aach te taach fer “sayn kewinung fërtich mache”. (Apo. 6:2; 19:11-16)
d (Eklesyastes 11:5) Tuu weest net wii te kayst in krayft in te knoche fon een khint woo im muterlayp fon een xwanger fraa is; kraat soo, khënst tuu net ti aarwayt fom woere Kot, woo ales macht.
e (Tyako 4:13, 14) Yets, heert mool, teyer woo saat: “Hayt orer moye, tuun mer fer tiise xtat reese, een yoer tat plaype, kexefte mache un kelt kriin”, 14 opwool teyer wist net wii ayre leepe moye wërt. Wayl teyer soo wii een neewel sayt, woo torich een khorts tsayt tsum foer xayn khomt un tan ferxwint.
f (Psalm 139:1-6) Oo Yeehoowa, tuu siist mich inwënich un tuu khënst mich. 2 Tuu weest wën ich mich setse un wën ich uf xtaye. Fon wayt, weest tuu was mayn ketanke sin. 3 Tuu peopachst mich wën ich laafe un wën ich mich hin leye; tuu khënst kenau ale mayne weeche. 4 Soo kaar eep een wort in mayn tsung is, tuust tuu, oo Yeehoowa, es xon khëne. 5 Tuu pist um mich rom, hiner un foer mich; un halst tayn hant iwer mich. 6 Tiise khëntnis, kriin ich net hin se ferxteen; es is tsu hooch fer mich es erayche.
g PILT AUSLEYUNG: Een fater un sayn puup tuun een emerxëns thax in richte; soo, khan ti familye fërtich sin wën een emerxëns pasiirt.
h PILT AUSLEYUNG: Een pruuter woo propleeme am mit mache is, xtelt sich foer im futuer, wën eyer froo in te nay welt wërt.