XTUUTYUM ARTIKEL 30
LIIT 97 Unser leepe hëngt fon Kot sayn Wort ap
Lërn imer was nayes mit te eyerste inlërnunge fon te Piipel
“Ich [wil] aych imer tiise tinge erinere, opwool teyer tas wist un fest sayt in tëm klaape woo in aych kept.” (2 PHEETER 1:12)
WAS TUUN MER SIIN?
Wii ti eyerste piiplixe inlërnunge tich noch hayt helfe khene.
1. Wii hon ti eyerste inlërnunge fon te Piipel tich petrof?
TI EYERSTE tinge woo mer fon te Piipel kelërnt hon, hon unser leepe keënert. Tsum payxpiil, wii mer kelërnt hon tas Kot sayn naame Yeehoowa is, hon mer te eyerste xrit kep fer tëm sayn fraaynte sin. (Isa. 42:8) Wii mer kelërnt hon was mit te toote pasiirt, hon mer noo kelos uns frooe ep unser keliipte woo xon kextorep sin, am layte waare. (Ekl. 9:10) Un wii mer kelërnt hon iwer Kot sayn ferxpreche iwer een paratiis too uf te eyert, hon mer noo kelos ëngstlich iwer te futuer wëre. Meyer hon ti sicherheet kriit tas meyer khonte fer imer leepe, net ploos 70 orer 80 yoore. (Psal. 37:29; 90:10)
2. Wii tsaycht 2 Pheeter 1:12, 13 tas soo kaar tii woo xon een lang tsayt in te woerheet sin, khene nutse fon te eyerste piiplixe inlërnunge kriin?
2 Meyer sole imer weyert kepe fer ti eyerste piiplixe inlërnunge. Tenk aan te kriste tsu weem Pheeter sayn tsweete priif kexrip hot; tii waare ‘fest im klaape’. (Lees 2 Pheeter 1:12, 13.)a Awer xlechte layt sin in te kemaynt foer khom un tii wolte ti priiter fon te woerheet ap lenke. (2 Phe. 2:1-3) Pheeter wolt sayn priiter un xwestere ferxtërke tas se khonte sich too tekeeche xitse. Soo hot eyer se erinert fon etliche inlërnunge woo se xon friier kelërnt hate. Tas teet se helfe troy tsu Yeehoowa plaype.
3. Warom sole ti kriste wayter triwer noo tenke iwer ti eyerste piiplixe inlërnunge? Mach een ferklaychung.
3 Meyer khene wayter nutse fon te eyerste inlërnunge fon te Piipel kriin soo kaar wën mer Yeehoowa xon een lang tsayt tiine. Wole mer een ferklaychung siin. Een mama, woo kuut khoocht, un sayn meetche khene een sup in richte mit te selwiche inkretyente. Awer kewis, wayl ti mama xon fiil speryens hot, hot se kelërnt wii tiise inkretyente in unerxiitliche aate penutse un, soo, noch mee kexmak tsiie. Kraat soo, ferklaycht mit een Piipel xtutënt, khene tii woo xon een lang tsayt in te woerheet sin unerxiitliche lisyoone fon een piiplix inlërnung “tsiie”. Meyer hon ti eyerste inlërnunge fon te Piipel xon aan kewënt wii mer uns ketaaft hon, awer tsiimlich sicher unser situatsyoon un was mer fer Yeehoowa mache, sin anerste hayt. Soo, wën mer triwer noo tenke iwer ti eyerste piiplixe inlërnunge, khene mer naye lisyoone fine woo in unser leepe phase. Wole mer siin was mer lërne khene mit 3 fon te eyerste piiplixe inlërnunge.
YEEHOOWA IS TE KRIATOER
4. Meyer wise tas Kot unser Kriatoer is. Wii hot tas uns petrof?
4 Meyer wise tas een Kriatoer woo fiil kluucheet un macht hot, hot ti eyert un ales too truf kemacht. Ti Piipel saat tas es waar “Kot woo ales kemacht hot”. (Hep. 3:4) Awer meyer khene noch fiil anere lisyoone mit tiise woerheet lërne. Tsum payxpiil, wayl Yeehoowa uns kemacht hot, wees eyer ales iwer uns. Tee khimert sich mit uns un wees was peser fer uns is. Yawool, tiise keweenlich woerheet wise — tas Kot ales kemacht hot — hot uns tiif petrof un ketsaycht tas unser leepe een tswek hot.
5. Was khan uns helfe teemuut ëntwikele? (Isayas 45:9-12)
5 Wise tas Yeehoowa te Kriatoer is, khan uns noch een aner lisyoon in lërne: meyer mise teemuutich sin. Tsum payxpiil, torich een tsayt hot Yoop etliche ferkheerte mënunge iwer Kot kesaat. Tee hot ploos aan sich ketenkt un wolt pewayse tas eyer recht hat. Awer Yeehoowa hot tëm erinert tas Eyer te Ale Mechtiche Kriatoer is. (Yoop 38:1-4) Tas hot Yoop erinert tas ales was Yeehoowa macht, imer richtich is. Fiile yoore xpeeter, hot te profeet Isayas etwas kexrip woo too temit xtimt. Tee hot kesaat tas ti mënxe sole nii tenke tas se kluucher wii te Kriatoer sin. (Lees Isayas 45:9-12.)b
6. Wanee weyer tas hauptseechlich kuut aan te kluucheet un kraft fon unser Kriatoer triwer noo tenke? (Kuk aach ti pilter.)
6 Wën yemant xon een lang tsayt Yeehoowa tiint, khan eyer aan fange tsu fiil aan sayn aychne mënunge traue, xtats oryentiirunge pay Yeehoowa un sayn Wort suuche. (Yoop 37:23, 24) Wën soo was pasiirt, es weyer kuut tas eyer triwer noo tenke teet aan te mechtich kluucheet un kraft fom Kriatoer. (Isa. 40:22; 55:8, 9) Tas tuut tëm helfe teemuutich sin un erkhëne tas Yeehoowa sayn ketanke heecher wii tëm sayns sin.
Was khan uns helfe uns erinere tas unser mënung net peser wii Yeehoowa sayns is? (Kuk te apsats 6.)g
7. Was hot Rahela keholef een ënerung in te Orkanisatsyoon aan nëme?
7 Rahela, woo in Sloweenya leept, hot es xweyer kefun een ënerung in te Orkanisatsyoon aan nëme. Tii erkhënt: “Als mool waars net laycht fer mich aan nëme ti ënerunge in te Orkanisatsyoon. Tsum payxpiil, ich hon tas 2023 | Relatooryum 8 fon te Rechiirente Khërperxaft kekukt, woo kexproch hot iwer ti priiter sayn paart wakse lose. Awer noch soo, hon ich mich ferxrok tas eyerste mool woo ich kesiin hon een pruuter mit paart een reet hale. Soo ich hon Yeehoowa sayn hilef in kepeet ferlangt tas ich mich aan phase khont mit tiise ënerung.” Rahela hot erkhënt tas wayl Yeehoowa te Kriatoer is, wees eyer imer ti pest aat fer sayn Orkanisatsyoon lenke. Soo, wën mer es aach xweyer fine een nay ferxtëntnis orer oryentiirung aan nëme, was khan uns helfe? Meyer khene mit teemuut triwer noo tenke iwer ti mechtich kroos kluucheet un kraft fon unser Kriatoer. (Rom. 11:33-36)
WAROM KOT TI XWIIRICHKHEET PASIIRE LOST
8. Was fer nutse kriin mer wayl mer wise warom lost Kot ti xwiirichkheete pasiire?
8 Fiile layt wise net warom lost Kot ti xwiirichkheete pasiire. Tes weeche sin etliche pees mit Kot kep orer rechne se tas Eyer kaar net eksistiirt. (Xpr. 19:3) Im keeche teel, host tuu kelërnt tas ti xwiirichkheete khome fon te sint un te imperfektsyoon woo mer keërpt hon, net fon Yeehoowa. Tuu host aach kelërnt warom es kuut is tas Yeehoowa ketultich is un noch net tas ën fon te xwiirichkheete keprung hot. Milyoone layt hon ti xans kriit fer tëm khëne lërne un siin wii eyer ti xwiirichkheete fer imer tsum ën pringe tuut. (2 Phe. 3:9, 15) Meyer kriin fiil nutse wayl mer tas wise! Tiise woerheete treeste uns un xafe uns tichter pay Kot.
9. Wanee mise mer uns traan tenke ti uersache warom Yeehoowa ti xwiirichkheete pasiire lost?
9 Soo lang wii mer waarte Yeehoowa ti xwiirichkheete tsum ën pringe, mise mer ketultich sin. Awer wën meyer orer een keliipte xwiirichkheete, unkerechtichkheete, orer trauer mit mache, fiilaycht frooe mer uns: ‘Warom tuut Yeehoowa soo lang waarte fer tas ën pringe?’ (Hap. 1:2, 3) Wën mer uns soo xpiire, es weyer kuut uns traan tenke ti uersache warom Yeehoowa ti xwiirichkheete pasiire lost.c (Psal. 34:19) Meyer khene aach triwer noo tenke aan Yeehoowa sayn ferxpreche: ti xwiirichkheete fer imer tsum ën pringe.
10. Was helft Anne mim toot fon sayn mama um keen?
10 Wise warom Kot ti xwiirichkheete pasiire lost, khan uns helfe ti proope aus hale. Anne, woo in te insel fon Mayotte leept, saat: “Phaar yoore tsurik, is mayn mama kextorep un ich sin mechtich traurich kep. Awer ich tenke mich imer traan: Yeehoowa hot net ti xult fon te xwiirichkheete; kraat tas keeche teel, tee wil tas tsum ën pringe un unser keliipte fom toot uf ruufe. Too triwer noo tenke peruycht mayn hërts.”
11. Wën mer tenke iwer warom Yeehoowa tas ën noch net keprung hot, wii tuut tas uns uf muute wayter preetiche?
11 Wayl mer wise warom Kot ti xwiirichkheete pasiire lost, kriin mer aach te wunx fer wayter preetiche. Te aphostel Pheeter hot aus keleet tas eene fon te uersache warom Yeehoowa noch net tas ën keprung hot, is wayl eyer hon wil tas ti layt sich peroye un keret wëre. Weeche sayn ketult, is Yeehoowa noch een xans fer ti layt in tayn teritooryum am kepe fer aan fange tëm tiine. Awer Pheeter hot aach aus keleet wii mer unser teel mache khene: “Phast uf was fer sort layt teyer solt sin. Teyer solt aych haylich aan xtele un aktsyoone fon aanpeetung tsu Kot pratikiire.” (2 Phe. 3:11) Tepay in tiise “aktsyoone fon aanpeetung tsu Kot” is ti preetich aarwayt. Soo wii Yeehoowa, liipe mer ti layt un meyer wole hon tas se fer imer in te nay welt leepe. Es is wërklich een eer Kot sayn mitaarwayter sin un soo fiil layt wiis meechlich is helfe iwer tëm lërne eep tas ën khomt! (1 Kor. 3:9)
MEYER LEEPE IN TE “LETSTE TAACHE”
12. Wën mer siin was ti Piipel iwer ti “letste taache” saat, was fer sicherheet kriin mer?
12 Ti Piipel tuut kenau pexraype wii ti layt sich aan xtele teete in te “letste taache”. (2 Tim. 3:1-5) Meyer mise aynfach peopachte ti aanxtelung fon te layt, woo yeete taach xlimer wërt, fer se siin tas tiise profetsii sich am erfiile is. Tas lost uns noch sicher tas mer uf te Piipel traue khene. (2 Tim. 3:13-15)
13. Wii khan ti kexicht woo Yeesus fertseelt hot in Lukas 12:15-21 uns helfe?
13 Wayl mer wise tas mer in te letste taache leepe, tuun mer uns traan hale aan was wërklich important is. Meyer khene een lisyoon too triwer lërne mit een kexicht woo Yeesus fertseelt hot in Lukas 12:15-21.d (Lees.) Warom is te rayche man “unferninftich” kenënt kep? Es waar net wayl eyer raych waar, awer wayl eyer sich net traan kehal hot aan tëm haupste. Tee hot “xatse fer sich selepst [kesamelt], awer [waar] net raych foer Kot sayn aue”. Warom waar tas net kluuch kewees? Kot hot fer te man kesaat: “Hayt oomt tuust tuu xtërpe.” Tiise kexicht khan uns hayt helfe, wayl tas ën fon tiise welt is yeete taach tichter. Tes weeche khene mer uns frooe: ‘Tuun mayn tsiile tsayche tas ich mich aan tëm haupste traan hale? Was fer sorte tsiile tuun ich mayn khiner uf muute se xtele? Tuun ich mayn kraft, tsayt un tinge penutse fer hauptseechlich xatse fer mich samele orer fer xatse im himel samele?’
14. Wii tuut Miki sayn speryens tsayche tas mer uns net ferkese sole tas mer in te letste taache sin?
14 Wën mer triwer noo tenke iwer ti pewaysunge tas mer in te letste taache am leepe sin, es khan uns helfe unser leepe in te pest aat penutse. Tas is mit te xwester Miki pasiirt. Tii saat: “Wii ich fërtich mit te xuul waar, wolt ich tsu te uniwersiteet keen fer xpeeter een aarwayt hon woo mich lose teet ti tiere unersuuche. Awer ich wolt aach een pyoneerin sin un mich wanere tsu een plats woo ti neetichkheet kreeser is. Rayfe fraaynte fon te kemaynt hon mich uf kemuut se tenke ep es wërklich meechlich fer mich weyer tiise sort aarwayt suuche un aach mayn kaystliche tsiile erayche. Tii hon mich erinert tas tiise welt klaych tsum ën khomt un aach tas, in te nay welt, tuun ich ti eewichkheet hon fer ti tiere unersuuche. Soo hon ich ëntxlist een khorts un praktix khurs mache. Tas hot mich keholef mich fersoriche wii ich een pyoneerin waar un xpeeter mich tsu Ekwatoer wanere, woo ti neetichkheet kreeser is.” Miki un sayn man tuun hayt in te sirkuyt aarwayt in Ekwatoer tiine.
15. Wii tuut Tyako sayn payxpiil tsayche tas mer sole net fon te layt uf kepe? (Kuk aach ti pilter.)
15 Wayl mer wise tas mer in te letste taache leepe, erkhëne mer tas unser preetich aarwayt aylich is. Awer meyer sole net oone muut wëre wën ti layt, am aanfang, kheen interes aan te kuute notisye hon. Ti layt khene sich ënere. Tenk mool iwer tas payxpiil fon Yeesus sayn xtif pruuter, Tyako. Tee hot kesiin Yeesus kroos wakse, profetsiie iwer te Mesias erfiile un te peste leerer uf te eyert wëre. Awer noch soo, es waar ploos noo Yeesus sayn ufxtaye fom toot tas Tyako een tisipel kep is, un tee waar flaysich kewees.e (Yoo. 7:5; Kal. 2:9) Soo, kep net uf fon tayn parente orer layt in tayn teritooryum woo noch net interes in te woerheet ketsaycht hon. Khan sin tas was tuu hayt tëne saast, tuut ploos resultaate im futuer pringe, fiilaycht noom aanfang fon te kroos tripulatsyoon.f
Was khan uns helfe net uf kepe fon unser parente woo Yeehoowa noch net tiine? (Kuk te apsats 15.)h
KEP IMER WEYERT FER TI EYERSTE INLËRNUNGE FON TE PIIPEL
16. Was fer nutse host tuu xon kriit fon te keweenliche woerheete fon te Piipel? (Kuk aach te khaste “Penuts ti piiplixe woerheete fer ti anere helfe”.)
16 Een teel fon te kaystlich esmitel woo mer fon te Orkanisatsyoon kriin, is kepleent kep fer layt woo kans weenich iwer ti Piipel wise. Tsum payxpiil, ti puuplix reet in te fersamlung am ën fon te woch, etliche artikele un wiiteos im jw.org un ti puuplix piichelcher sin hauptseechlich kepleent fer tii woo net Yeehoowa sayn Tsayer sin. Noch soo kriin mer nutse fon te keweenliche woerheete woo tat foer khome. Tii ferxtërke unser liip tsu Yeehoowa un unser klaape aan te Piipel. Tii tuun uns aach helfe peser leerer wëre. (Psal. 19:7)
17. In was fer situatsyoone khene mer triwer noo tenke iwer ti eyerste inlërnunge fon te Piipel?
17 Wii Yeehoowa sayn Tsayer, wëre mer aarich froo wën mer een nay ferxtëntnis fon een piiplix woerheet kriin. Awer meyer sin aach petanklich fer ti eyerste inlërnunge fon te Piipel, woo uns tsu te woerheet ketsoo hon. Wii mer kelërnt hon, tiise woerheete khene uns noch hayt helfe. Tsum payxpiil, was sole mer mache wën mer een oryentiirung fon te Orkanisatsyoon kriin awer meyer tenke tas unser mënung peser is? Mit teemuut, mise mer uns erinere tas Yeehoowa, unser kluuch un mechtiche Kriatoer, is ti Orkanisatsyoon am fiire. Wii sole mer uns aan xtele wën meyer orer een keliipte een xwiirichkheet mit macht? Meyer khene ketultich sin un triwer noo tenke aan warom lost Yeehoowa ti xwiirichkheete pasiire. Un was sole mer uns erinere wën mer ëntxlise mise wii unser tsayt un tinge penutse? Meyer leepe in te letste taache un tas ën is ticht. Soo wole mer imer lose tas ti eyerste inlërnunge fon te Piipel uns wayter ferxtërke, uf muute un kluuch mache.
LIIT 95 Tas licht xaynt imer heler
a (2 Pheeter 1:12, 13) Tes weeche, wil ich aych imer tiise tinge erinere, opwool teyer tas wist un fest sayt in tëm klaape woo in aych kept. 13 Awer, soo lang wii ich in tiise parak sin, mëne ich tas es richtich is aych too traan erinere un soo wach mache
b (Isayas 45:9-12) Xaat fon tëm woo mit sayn Kriatoer tsënkt, opwool eyer ploos een xtik leet is tswixich anere xtike leet ufm pootem. Sol te leet fer sayn Mustere saan: “Was machst tuu?” Orer sol tayn aarwayt saan: “Mayn mustere hot khee hant”? 10 Xaat fon tëm woo fer een fater saat: “Was pringst tuu uf te welt?” Un fer een fraa: “Was pringst tuu uf te welt?” 11 Soo saat Yeehoowa, te Hayliche fon Israël, tee woo tëm kemacht hot: “Tuut teyer in frooch xtele was ich kesaat hon noch pasiire tuut? Orer mich kepoote kepe iwer mayn khiner un ti aarwayte fon mayn hant? 12 Ich hon ti eyert un te mënx uf tëne kemacht. Ich hon te himel mit mayn hant aus kexpant, un ich kepe kepoote fer sayn kanse militeer.”
c Kuk te artikel “Por que todo o sofrimento acabará em breve?” in A Sentinela 15te Maay fon 2007, sayte 21-25.
d (Lukas 12:15-21) Tan hot eyer tsu tëne kesaat: “Halt ayre aue uf un halt aych wech fon pekiirich sin iwer kwalkee materyaalix tings, wayl, soo kaar wën yemant fiil hot, khomt sayn leepe net fon te tinge woo eyer hot.” 16 Tan, hot eyer tëne een ilustratsyoon fertseelt: “Tas lant fon een rayche man hot een kuut ërntung kep. 17 Tes weeche, hot eyer aan kefang se pleene: ‘Was khan ich mache yets woo ich kheen mee plats hon fer mayn ërntung uf raume?’ 18 Tee hot tan kesaat: ‘Ich mache es soo: ich tuun mayn xope ap rayse un kreeser paue, un tat tuun ich mayn kans ërntung un mayn kanse kuute tinge uf raume. 19 Tan tuun ich fer mich selepst saan: “Tuu host fiile kuute tinge kesamelt fer fiile yoore. Ruu, es, trink un fray tich.”’ 20 Awer Kot hot tëm kesaat: ‘Tuu unferninftiche man, hayt oomt tuust tuu xtërpe. Weer kriit tan ti tinge woos tuu kesamelt host?’ 21 Tas is was pasiirt mit tëm man woo xatse fer sich selepst samelt, awer is net raych foer Kot sayn aue.”
e Kuk ti lisyoon 8 fom piichelche Liip ti layt — Mach tisipele.
f Kuk te artikel “Wii tuut Yeehoowa ti layt im futuer richte?” in Te Wachthorm Maay fon 2024, sayte 8-13.
g PILT AUSLEYUNG: Een elteste kept een itee, awer ti anere elteste xtime net too temit. Xpeeter, kukt eyer ti xtërne in te nacht un tenkt triwer noo wii kluuch un mechtich te Kriatoer is. Tee ferxteet tas Kot sayn mënung heecher wii tëm sayns is.
h PILT AUSLEYUNG: Torich sayn perseenlich xtuutyum, tuut een xwester pewaysunge siin tas mer in te letste taache leepe. Tas tuut se uf muute sayn xwester aan ruufe un fer tëne preetiche.