Ti Piipel xprecht iwer fiile fraae woo Yeehoowa keliipt un ketiint hon. Tii waare ‘kemeesich in sayn kewoonheete un in ales troy’. (1 Tim. 3:11) Ti xwestere hayt khene aach in sayn aychne kemaynt payxpiile fine fon fraae woo rayfe kriste sin un woo fiiles in lërne khene. Yung xwester, khënst tuu een fraa in tayn kemaynt woos tuu noo mache khenst? Peopach sayn xeene kwaliteete; tan, tenk wiis tuu tiise selwiche kwaliteete tsayche khanst. Fer Yeesus sayn payxpiil noo mache, mise mer teemuutich sin. Wën een fraa teemuutich is, tuut se een kuut fraayntxaft mit Yeehoowa un mit te anere hale. Tsum payxpiil, een fraa woo Yeehoowa liipt, tuut mit teemuut aan heere ti oryentiirung woo in 1 Korinter 11:3 xteet. Tat, tuut Yeehoowa aus leye fer weem Eyer ti flicht kep hot fer ti kemaynt un ti familye fiire. (w23.12 s. 18-19 ap. 3-5)

Yeehoowa waart tas te man sayn fraa liipt, fersoricht, eene kuute fraaynt fer tëne wërt un tëne helft ticht pay Yeehoowa plaype. Ti apiliteet fer se tenke ëntwikele, respekt fer ti fraae tsayche un yemant sin woo ti anere traue khene, tuun tich helfe kuut foerperayt sin fer ti responsapiliteete wii ferhayrate man un familye xëf uf phase. Noo tas tuu tich kehayrat host, fiilaycht tuust tuu een fater wëre. Was khanst tuu mit Yeehoowa lërne iwer eene kuute fater sin? (Ëfe. 6:4) Yeehoowa hot fer sayn soon, Yeesus, taytlich kesaat tas Eyer tëm keliipt hot un tas Yeesus Tëm kefalt hot. (Mat. 3:17) Wëns tuu een fater wërst, saa ofts fer tayn khiner tas tuu se liipst. Tuu se ofts loope weeche tas kuutes woo se mache. Een fater woo Yeehoowa sayn payxpiil noo macht, helft sayn khiner rayfe priiter un xwestere wëre. Wii khanst tuu tich yets foer perayte fer een fater sin? Tsaych liip fer tayn familye un fer ti priiter in te kemaynt un phas se kuut uf. Tuu solst aach lërne tëne saan tas tuu se fiil liipst un tas se fiil weyert fer tich hon. (Yoo. 15:9) (w23.12 s. 28-29 ap. 17-18)

Es is woer tas mer troye tiiner fon Yeehoowa sin; awer soo wii ti anere layt, sin mer net fray fon xwiirichkheete un krankheete. Meyer khene aach opositsyoon orer yachtung mit mache fon te layt woo Kot sayn folek hase. Yeehoowa pefrayt uns net too tefun, awer tee ferxprecht uns helfe. (Isa. 41:10) Mit tëm sayn hilef, khene mer uns froo hale, kuute ëntxlise mache un troy tsu Tëm plaype, soo kaar wën mer torich ti xlimste proope keen. Yeehoowa ferxprecht uns kepe was ti Piipel nënt wii “Kot sayn friit”. (Fili. 4:6, 7) Tiise friit is ti ruu woo mer xpiire wayl mer een ticht fraayntxaft mit Yeehoowa hon. Tiise friit “keet iwer ales woo ti mënxe ferxteen khene” — es wil saan, is wunerlicher wii mer uns foer xtele khene. Host tuu xon een mool hërtslich tsu Yeehoowa kepeet un tan een unkeweenlich ruu kexpiirt? Wën yaa, tuu host “Kot sayn friit” kexpiirt. (w24.01 s. 20 ap. 2; s. 21 ap. 4)