Tayn hofnung tuut sich erfiile

1. Warom khene mer saan tas Apraham sayn hofnung een fest funtament hat?

YEEHOOWA hot fer sayn fraaynt Apraham ferxproch tas eyer teet een soon kriin un tas al ti natsyoone fon te eyert teete een seechen torich tiise soon kriin. (Xee. 15:5; 22:18) Awer wii Apraham 100 yoore alt waar un sayn fraa, 90, hate se noch khee khint. (Xee. 21:1-7) Noch soo, ti Piipel saat: “[Apraham hot] sich uf te hofnung kextitst un hat klaape tas eyer fater fon fiile natsyoone kepe teet, tëm noo was kesaat kep is.” (Rom. 4:18) Wayl Apraham een xtarke klaape aan Kot hat, waar eyer sich sicher tas Tëm sayn ferxpreche sich erfiile teet. Un was Apraham kehoft hot, hot sich erfiilt: tee is fater fon Isak kep, te soon woo eyer soo lang tsayt kewaart hot. Warom waar Apraham sich sicher tas Yeehoowa sayn ferxpreche erfiile teet?

2. Warom waar Apraham sich sicher tas Yeehoowa sayn ferxpreche sich erfiile teet?

² Wayl Apraham een ticht fraayntxaft mit Yeehoowa hat, waar eyer “sich sicher tas was Kot ferxproch hat”, sich erfiile teet. (Rom. 4:21) Yeehoowa hot sich mit Apraham kefal un hot tëm kerecht aus kexproch weeche sayn klaape. (Tya. 2:23) Tëm noo Romaaner 4:18, hat Apraham klaape un aach hofnung. Wole mer yets in Romaaner kapitel 5 siin was te aphostel Phaul iwer hofnung kesaat hot.

3. Was hot Phaul iwer ti hofnung aus keleet?

³ Phaul leet aus warom “meyer khene wërklich traue aan te hofnung woo mer hon”. (Rom. 5:5) Tee helft uns aach ferxteen wii unser kristlich hofnung wakse khan. Soo lang wii mer Romaaner 5:1-5 noo kuke, tenk iwer wii tayn aychne hofnung fer te futuer mit te tsayt xtërker kep is. Meyer tuun aach lërne wii tayn hofnung khan xtërker wii hayt wëre. Wole mer eyerst siin een wunerlich hofnung woo te aphostel Phaul saat tas meyer al wërklich traue khene.

UNSER WUNERLICH HOFNUNG

4. Was lërne mer in Romaaner 5:1, 2?

⁴ Lees Romaaner 5:1, 2.b Phaul hot tiise wërter kexrip fer ti kemaynt in Roma. Ti priiter un xwestere tat hate iwer Yeehoowa un Yeesus kelërnt, hon klaape ëntwikelt un sin kriste kep. Soo hot Kot se “kerecht aus kexproch (…) weeche te klaape” un hot se mit hayliche kayst kesalpt. Tii khonte een wunerlich peloonung waarte un sich sicher sin tas se tas kreechte.

5. Was fer hofnung hon ti kesalpte kriste?

⁵ Phaul hot xpeeter fer ti kesalpte kriste in Ëfeso kexrip iwer ti hofnung woo Kot tëne kep hat — too tepay ti “ërpxaft fer ti hayliche”. (Ëfe. 1:18) Un Phaul hot fer ti koloser kesaat uf was fer plats teete se sayn peloonung kriin. Tee hot tas kenënt wii “ti hofnung woo fer aych im himel kehal is”. (Kol. 1:4, 5) Soo, ti hofnung fer ti kesalpte kriste is tas se uf keruuft wëre fer eewiche leepe im himel kriin un mit Yeesus rechiire. (1 The. 4:13-17; Apo. 20:6)

6. Was hot een kesalpte pruuter iwer sayn hofnung kesaat?

⁶ Ti kesalpte kriste kepe fiil weyert fer sayn hofnung. Eene fon te kesalpte, te pruuter Frederick Franz, hot iwer sayn hofnung kesaat in 1991, noo Yeehoowa troy tiine torich fiile yoore: “Unser hofnung is fest un tuut sich kenau erfiile fer yeete eene fon te 144.000 mitkliiter fon te kleene trop. Unser peloonung wërt fiil peser wii mer uns foer xtele khene. (...) Meyer kepe noch fiil weyert fer unser hofnung. (…) Woo lënger mer etwas waarte, woo kreeser is te weyert woo mer tas kepe. Es loont sich tas waarte, soo kaar wën milyoone yoore rom keengte. Ich hon noch nii soo fiil weyert fer unser hofnung kep.”

7-8. Was fer hofnung hon ti meyerste fon Yeehoowa sayn tiiner? (Romaaner 8:20, 21)

⁷ Ti meyerste woo Yeehoowa hayt aan peete hon een aner hofnung. Tas is ti selwich hofnung woo Apraham hat: fer imer uf te eyert unich Kot sayn Raych leepe. (Hep. 11:8-10, 13) Phaul hot iwer tiise wunerlich hofnung kexproch. (Lees Romaaner 8:20, 21.)c Wëns tuu aan kefang host se lërne iwer ti piiplix hofnung fer te futuer, was hast tuu te liipst? Waar ti itee tas tuu eene taach perfekt wëre teest, oone sint? Orer waar ti itee tas tuu khanst tayn keliipte woo xon kextorep sin noch mool im Paratiis siin? Weeche ti hofnung woo Kot uns kept, khanst tuu soo sorte tinge hërtslich waarte.

⁸ Ekaal ep mer hofe fer imer uf te eyert orer im himel leepe, hon mer een wunerlich hofnung woo uns uersache kept fer uns fraye. Un unser hofnung khan noch xtërker wëre. Phaul leet aus wii tas pasiirt. Wole mer noo kuke was eyer iwer unser hofnung kexrip hot. Tëm sayn wërter kepe uns noch mee sicherheet tas was mer hofe, sich erfiile tuut.

WII KHENE MER UNSER HOFNUNG FERXTËRKE?

9-10. Tëm noo Phaul sayn payxpiil, was khene ti kriste waarte? (Romaaner 5:3) (Kuk aach ti pilter.)

⁹ Lees Romaaner 5:3.d Phaul hot kesaat tas wën mer xwiirichkheete mit mache, khene mer ti hofnung ferxtërke. Tas khan uns ferwunere. Ti woerheet is tas al Yeesus sayn nookeener khene xwiirichkheete waarte. Kuk mool Phaul sayn payxpiil. Tee hot fer ti priiter in Thesaloonika kexrip: “Wën mer mit aych waare, hon mer xon foer heyer kesaat tas meyer xwiirichkheete mit mache teete, un tas is was am pasiire is.” (1 The. 3:4) Un tee hot fer ti korinter kexrip: “Meyer wole hon, priiter, tas teyer tsu wise kriit iwer ti xwiirichkheet woo mer in te prowins fon Asya mit kemacht hon. (…) Meyer waare aarich ëngstlich iwer unser leepe.” (2 Kor. 1:8; 11:23-27)

¹⁰ Ti kriste hayt khene aach unerxiitliche sorte xwiirichkheete waarte. (2 Tim. 3:12) Un tuu? Host tuu xon yachtung mit kemacht wayls tuu aan Yeesus klaapst un tëm noo keest? Fiilaycht hon tayn fraaynte orer parente tich ferxpot; im xtant waare se soo kaar krop mit tich. Host tuu xon propleeme in te aarwayt mit kemacht wayls tuu pextimt waarst imer eerlich sin? (Hep. 13:18) Host tuu xon opositsyoon fon te rechiirung mit kemacht wayls tuu iwer tayn hofnung fer ti anere kepreeticht host? Een tuun ti sort xwiirichkheet woo mer mit mache, Phaul saat tas mer uns fraye khene. Warom?

11. Warom mise mer pextimt sin wayter aus hale, een tuun ti proop?

¹¹ Meyer khene uns fraye soo kaar wën mer layte weeche te kuut resultaat woo tas pringt. Tëm noo Romaaner 5:3, “in te xwiirichkheete lërne mer aus hale”. Al ti kriste mache xwiirichkheete mit; soo meyer al mise pextimt sin aus hale, ekaal te propleem woo foer khomt. Ploos wën mer aus hale un wayter Yeehoowa tiine, tuun mer ti erfiilung fon unser hofnung siin. Meyer wole net soo wii ti layt sin woo Yeesus am tenke waar wii eyer kexproch hot iwer soome woo uf te felse fale. Tii tuun am aanfang tas wort mit frooheet aan nëme, awer “wën xwiirichkheet orer yachtung weeche tas wort foer khomt”, tuun se xtolpere. (Mat. 13:5, 6, 20, 21) Es is woer tas mer uns net kuut xpiire wën mer xwiirichkheete orer yachtung mit mache, awer meyer khene nutse kriin wën mer aus hale un wayter Yeehoowa tiine. Wii soo?

12. Was fer nutse khene mer kriin wën mer foer xwiirichkheete aus hale?

¹² Te tisipel Tyako hot kexproch iwer ti nutse woo mer kriin wën mer ti proope aus hale. Tee hot kexrip: “Lost tas ti persewerans sayn aarwayt fërtich pringt, soo tas teyer komplët un in ales oone feeler wërt, un tas niks aych feelt.” (Tya. 1:2-4) Tyako saat tas ti persewerans een aarwayt, orer een tswek, hot. Tii khan tich helfe ketulticher sin, een xtërker klaape hon un mee uf Kot traue. Awer meyer khene noch etwas kriin wën mer aus hale.

13-14. (a) Was pasiirt wën mer aus hale? (b) Was pasiirt mit unser hofnung too teweeche? (Romaaner 5:4)

¹³ Lees Romaaner 5:4.e Phaul saat tas “wën mer aus hale, kefale mer Kot”. Soo, wëns tuu aus halst, kriist tuu Yeehoowa sayn tsuxtimung. Tas wil net saan tas Kot sich fraye tuut wëns tuu xwiirichkheete mit machst. Xtats tas, tuut eyer sich fraye wayls tuu troy aus halst. Es is aarich ufmuutich se wise tas wën mer aus hale, mache mer Yeehoowa froo. (Psal. 5:12)

¹⁴ Eriner tich tas Apraham hot xwiirichkheete mit kemacht, un wayl eyer troy aus kehal hot, waar Yeehoowa froo mit tëm. Kot hot tëm wii fraaynt kesiin un tëm kerecht aus kexproch. (Xee. 15:6; Rom. 4:13, 22) Tas selwiche khan mit uns pasiire. Yeehoowa kefalt sich mit uns wayl mer troy plaype opwool ti proope — net weeche unser priwilëje orer wii fiil aarwayt mer tëm mache. Ekaal unser elter, apiliteete orer situatsyoon im leepe, meyer al khene aus hale. Pist tuu yets een proop troy am aus hale? Wën yaa, eriner tich tas tuu Kot froo lost. Wën mer ferxteen tas Yeehoowa sich mit uns frayt, wërt unser hofnung aan tëm sayn ferxpreche noch xtërker.

MEYER KHENE WËRKLICH TRAUE AAN TE HOFNUNG WOO MER HON

15. Was hot Phaul in Romaaner 5:4, 5 kesaat un was fer frooch khent yemant sich mache?

¹⁵ Soo wii mer xon kesiin hon, Yeehoowa frayt sich mit uns wën mer troy tsu tëm plaype un proope aus hale. Kuk mool was noch Phaul kexrip hot: “Wën mer Kot kefale, kriin mer hofnung un meyer khene wërklich traue aan te hofnung woo mer hon.” (Rom. 5:4, 5) Tas khan een pisye konfus aus siin. Warom? Wayl foer heyer, in Romaaner 5:2, hat Phaul kesaat tas ti kriste in Roma xon hofnung hate — “ti hofnung fer teel mache in Kot sayn hërlichkheet”. Tes weeche khent yemant sich frooe: ‘Wën tiise kriste xon hofnung hate, warom hot Phaul noch mool iwer hofnung kexproch?’

16. Wii tuut unser hofnung aan fange se wakse? (Kuk aach ti pilter.)

¹⁶ Meyer khene ferxteen was Phaul saan wolt wën mer uns erinere tas ti hofnung wakse khan. Tsum payxpiil: erinerst tuu tich tas eyerste mool woos tuu keheert host iwer ti hofnung woo in Kot sayn Wort xteet? Fiilaycht host tuu ketenkt: ‘Fer imer uf een Paratiis too uf te eyert leepe… tas weyer wunerlich!’ Noch soo, im xtant waarst tuu tich net soo sicher tas soo was pasiire khent. Awer wiis tuu mee iwer Yeehoowa un ti piiplixe ferxpreche kelërnt host, host tuu ti sicherheet ferxtërkt tas tayn hofnung sich erfiile teet.

17. Wii tuut tayn hofnung wayter wakse noo tayn tetikatsyoon un taaf?

¹⁷ Soo kaar noo tayn tetikatsyoon un taaf, is tayn hofnung wayter kewakst wiis tuu mee kelërnt host un foran kang pist. (Hep. 5:13–6:1) Fiilaycht host tuu in tayn leepe kexpiirt was Romaaner 5:2-4 saat. Tuu host fiile proope mit kemacht un aus kehal un Yeehoowa hot ketsaycht tas eyer froo mit tich waar. Wayls tuu weest tas eyer tich liipt un sich mit tich kefalt, host tuu noch mee uersache fer se waarte ti tinge woo eyer ferxproch hot. Tayn hofnung is yets xtërker wii ti hofnung woos tuu am aanfang hast. Tii is noch sicher fer tich un tuut tich tiifer petrefe — tiifer wii noch nii. Khan ma saan tas tii petreft yeete teel fon tayn leepe un ënert wiis tuu tayn familye pehantelst, wiis tuu ëntxlise machst un soo kaar wiis tuu tayn tsayt penutst.

18. Was fer karantii kept Yeehoowa?

¹⁸ Te aphostel Phaul xprecht iwer een aner wichtich phunkt iwer ti hofnung woos tuu kriist noo tas tuu Kot sayn tsuxtimung host. Tee kept ti sicherheet tas tayn hofnung sich erfiile tuut. Warom khanst tuu tich kans sicher too triwer sin? Phaul hot tiise karantii fon Kot fer ti kriste kep: “Meyer khene wërklich traue aan te hofnung woo mer hon; wayl Kot sayn liip is in unser hërts aus kexut kep torich te hayliche kayst woo mer kriit hon.” (Rom. 5:5) Tuu host fiile uersache fer tich sicher sin iwer ti hofnung woo Kot tich kept.

19. Was fer sicherheet khanst tuu iwer tayn hofnung hon?

¹⁹ Tenk triwer noo aan Yeehoowa sayn ferxpreche fer Apraham un tas, foer Kot, waar eyer een fraaynt un een kerecht persoon. Was Apraham kehoft hot, hot sich erfiilt. Ti Piipel saat: “Noo tas eyer ketult ketsaycht hot, hot [Apraham] tiise ferxpreche kriit.” (Hep. 6:15; 11:9, 18; Rom. 4:20-22) Tee hot wërklich ketraut aan te hofnung woo eyer hat! Tuu khanst tich aach sicher sin tas, wëns tuu aus halst, kriist tuu ti peloonung woos tuu hofst. Tuu host een echte hofnung un tii pringt tich fiil frooheet, wayls tuu tich sicher pist tas se sich erfiile tuut. (Rom. 12:12) Phaul hot kexrip: “Te Kot woo hofnung kept, sol aych fol mit te kans frooheet un friit lose torich ayre fertraue uf tëm, tas ayre hofnung iwerlaaft torich ti macht fom hayliche kayst.” (Rom. 15:13)