Ezekyèl

14 Kèk nan ansyen ki nan pèp Izrayèl la te vini e yo te chita devan m+. 2 Lè sa a, Jewova pale avè m, li di m: 3 “Pitit lòm, mesye sa yo deside pou yo kontinye sèvi zidòl yo genyen yo ki bay degoutans*, e yo mete yon obstak devan moun yo ki fè yo peche. Poukisa pou m ta reponn yo lè yo poze m kesyon+? 4 Kounye a, se pou w pale avèk yo e se pou w di yo: ‘Men sa Jewova, Seyè ki Souvren an, di: “Si yon Izrayelit byen deside pou l sèvi zidòl li genyen yo ki bay degoutans e li mete yon obstak devan moun yo ki fè yo peche, epi apre sa, li vin kot yon pwofèt pou l poze l kesyon, mwen menm, Jewova, m ap reponn li kòmsadwa, selon sa l merite pou kantite zidòl li genyen ki bay degoutans yo. 5 Paske, m ap fè moun Izrayèl yo vin pè* poutèt yo tout vire do ban mwen e y al sèvi zidòl yo genyen yo ki bay degoutans+.”’

6 “Kidonk, se pou w di pèp Izrayèl la: ‘Men sa Jewova, Seyè ki Souvren an, di: “Tounen vin jwenn mwen, vire do bay zidòl nou genyen yo ki bay degoutans epi sispann pratike move bagay n ap pratike yo+. 7 Paske, kèlkeswa Izrayelit oswa etranje k ap viv ann Izrayèl ki vire do ban mwen, ki byen deside pou l sèvi zidòl li genyen yo ki bay degoutans, ki mete yon obstak devan moun yo ki fè yo peche epi ki vin kot pwofèt mwen an pou l poze l kesyon+, mwen menm, Jewova, m ap reponn li pèsonèlman. 8 M ap regle avèk moun sa a, m ap fè l tounen yon egzanp ki sèvi avètisman, m ap fè moun pase l nan rizib, m ap retire moun sa a nan mitan pèp mwen an+, e n ap konnen mwen se Jewova.”’

9 “‘Men, si yo pran tèt pwofèt la e li bay yon repons, se mwen menm, Jewova, k ap pran tèt li+. M ap lonje men m pou m frape pwofèt sa a e m ap elimine l nan mitan Izrayèl, pèp mwen an. 10 Y ap gen pou yo sibi konsekans peche yo. Ni moun ki vin poze kesyon an, ni pwofèt la ap koupab, 11 yon fason pou moun Izrayèl yo ka sispann vire do ban mwen, pou yo ka sispann sal tèt yo ak peche y ap fè yo. Y ap vin pèp mwen e m ap vin Bondye yo+.’ Se sa Jewova, Seyè ki Souvren an, di.”

12 Jewova pale avè m yon lòt fwa ankò, li di m: 13 “Pitit lòm, si yon peyi ta peche kont mwen lè l aji yon fason ki montre li pa fidèl, m ap lonje men m pou m frape peyi sa a e m ap detwi rezèv manje l yo*+. Epi, m ap voye yon gwo grangou nan peyi a+ pou m elimine ni moun ni bèt k ap viv ladan l yo+.” 14 “‘Menmsi Noye+, Dànyèl+ ak Jòb+ ta nan peyi sa a, wi, menmsi twa mesye sa yo ta la, se tèt* yo sèlman yo t ap sove poutèt yo jis+.’ Se sa Jewova, Seyè ki Souvren an, di.”

15 “‘Oubyen, si m ta fè bèt fewòs pase nan peyi a e yo ta touye tout moun nan peyi a* e m ta fè l vin tankou yon dezè ki pa gen moun ki pase ladan l akoz bèt sovaj yo+, 16 menm jan li klè mwen vivan, mwen fè sèman, menmsi twa mesye sa yo ta nan peyi a, yo pa t ap ka sove ni pitit gason yo ni pitit fi yo, se tèt yo sèlman yo t ap sove e peyi a t ap vin vid.’ Se sa Jewova, Seyè ki Souvren an, di.”

17 “‘Oubyen, si m ta di: “Se pou yon epe pase nan peyi sa a+”, e m ta fè moun vin atake peyi sa a ak epe e mwen elimine ni moun ni bèt+, 18 menmsi twa mesye sa yo ta nan peyi a, menm jan li klè mwen vivan, mwen fè sèman, yo pa t ap ka sove ni pitit gason yo ni pitit fi yo, se tèt yo sèlman yo t ap sove.’ Se sa Jewova, Seyè ki Souvren an, di.”

19 “‘Oubyen si m ta voye yon maladi nan peyi sa a+ e m ta vide kòlè m sou li pou m fè san koule ladan l, pou m elimine ni moun ni bèt, 20 menmsi Noye+, Dànyèl+ ak Jòb+ ta ladan l, menm jan li klè mwen vivan, mwen fè sèman, yo pa t ap ka sove ni pitit gason yo ni pitit fi yo, se tèt* yo sèlman yo t ap sove poutèt yo jis.’ Se sa Jewova, Seyè ki Souvren an, di+.”

21 “Paske, men sa Jewova, Seyè ki Souvren an, di: ‘Se konsa sa ap ye lè m voye kat bagay m ap voye kont Jerizalèm pou m pini l yo+, anpalan de epe, gwo grangou, bèt fewòs ak maladi+, pou m elimine ni moun ni bèt k ap viv ladan l+. 22 Men, gen kèk gason ak kèk fi pami yo k ap chape e y ap mennen yo ann egzil+. Y ap vin jwenn nou. Lè nou wè fason y aji, lè nou wè aksyon yo, se sèten n ap konprann poukisa mwen te lage malè sa a sou Jerizalèm e poukisa mwen te fè l tout sa mwen te fè l yo.’”

23 “‘Lè nou wè fason y aji, lè nou wè aksyon yo, y ap ede nou konprann. N ap wè mwen te gen rezon fè l sa m te fè l yo+.’ Se sa Jewova, Seyè ki Souvren an, di.”