Ezekyèl
30 Jewova pale avè m yon lòt fwa ankò, li di m: 2 “Pitit lòm, se pou w pwofetize. Se pou w di: ‘Men sa Jewova, Seyè ki Souvren an, di:
“Se pou n rele byen fò pou n di: ‘Elas, jou a rive!’
3 Jou a toupre! Wi, gen yon jou Jewova ki toupre+.
Se ap yon jou fènwa pwès+, yon tan l fikse pou l jije nasyon yo+.
4 Ènmi ap vin atake Ejip ak epe, e moun Etyopi yo ap panike lè moun Ejip yo tonbe anba kout epe.
Yo pran richès Ejip yo, yo kraze fondasyon l yo+.
5 Ni moun Etyopi yo+, ni desandan Pout yo+, ni desandan Loud yo, ni bann lòt moun yo*,
Ni moun Koub yo, ni moun ki sot nan peyi ki te fè alyans avè m nan*,
Yo tout ap tonbe anba kout epe.”’
6 Men sa Jewova di:
‘Moun k ap soutni Ejip yo ap tonbe tou.
Ejip ap pèdi pouvwa l genyen ki fè l awogan an+.’
“‘Moun nan peyi a ap tonbe anba kout epe soti Migdòl+ rive Syèn+.’ Se sa Jewova, Seyè ki Souvren an, di. 7 ‘Peyi yo a ap tounen peyi ki pi vid ki te ka genyen e vil li yo ap tounen vil ki pi devaste ki te ka genyen+. 8 Lè m met dife nan peyi Ejip e lè m kraze tout moun ki t ap ede l yo, lè sa a, y ap konnen mwen se Jewova. 9 Nan jou sa a, m ap voye moun pote mesaj nan bato pou m fè moun Etyopi yo ki twò kwè nan tèt yo tranble. Y ap panike nèt lè jou sa a rive sou Ejip, paske, jou sa a ap rive kanmenm.’
10 “Men sa Jewova, Seyè ki Souvren an, di: ‘M ap sèvi ak Nebikadneza*, wa Babilòn nan, pou m fini ak moun Ejip yo+. 11 Li menm ak sòlda l yo, yo menm ki pi mechan nan mitan nasyon yo+, ap vin nan peyi a pou yo detwi l. Y ap atake Ejip ak epe e peyi a ap chaje ak kadav moun yo touye+. 12 M ap fè kanal Rivyè Nil yo+ tounen tè sèk e m ap lage peyi a nan men yon seri moun ki mechan. M ap sèvi ak etranje pou m fini ak peyi a e ak tout sa k ladan l+. Se mwen menm, Jewova, ki di sa.’
13 “Men sa Jewova, Seyè ki Souvren an, di: ‘M ap detwi zidòl ki bay degoutans* yo tou, san wete dye san valè ki Nòf* yo+. Pap gen Ejipsyen k ap prens* ankò nan peyi Ejip. Se laperèz m ap fè gen nan peyi a+. 14 M ap fè Patwòs vin vid+, m ap limen yon dife nan Sowan e m ap pini No*+. 15 M ap vide kòlè m sou Sin, fòtrès Ejip la, e m ap detwi tout moun ki nan No. 16 M ap limen yon dife nan peyi Ejip, laperèz ap anvayi Sin, y ap kraze No e y ap atake Nòf* gwo lajounen. 17 Jèn gason ki nan vil On* e ki Pibesèt yo ap tonbe anba kout epe e rès moun ki nan vil yo pral ann egzil. 18 Lè m kase jouk Ejip la nan Tapanès, ap gen fènwa gwo lajounen kote sa a+. Ejip ap pèdi pouvwa l genyen ki fè l awogan an+, nyaj ap kouvri l e moun ki nan vil li yo pral ann egzil+. 19 M ap pini Ejip e moun yo ap konnen mwen se Jewova.’”
20 Nan 11yèm ane a, nan premye mwa a, nan setyèm jou nan mwa a, Jewova pale avè m, li di m: 21 “Pitit lòm, mwen kase yon ponyèt Farawon, wa Ejip la. Pèsonn pap mare l pou l ka geri e pèsonn pap bande l pou l ka gen ase fòs pou l kenbe yon epe.”
22 “Kidonk, men sa Jewova, Seyè ki Souvren an, di: ‘Mwen kont Farawon, wa Ejip la+. M ap kase ponyèt li, ni sa k gen fòs la ni sa k kase deja a+, e m ap fè epe a sot tonbe nan men l+. 23 Apre sa, m ap gaye Ejipsyen yo nan mitan nasyon yo, wi, m ap gaye yo nan divès peyi+. 24 M ap bay ponyèt wa Babilòn+ nan fòs* e m ap mete epe m nan men l+. M ap kase ponyèt Farawon e l ap gen pou l jemi devan l* tankou yon moun ki prèt pou l mouri. 25 M ap bay ponyèt wa Babilòn nan fòs, men ponyèt Farawon ap febli. Lè mwen mete epe m nan men wa Babilòn nan, lè l sèvi avè l pou l frape peyi Ejip, lè sa a y ap konnen mwen se Jewova+. 26 M ap gaye Ejipsyen yo nan mitan nasyon yo, wi, m ap gaye yo nan divès peyi+. Lè sa a, y ap konnen mwen se Jewova.’”