Dànyèl

1 Nan twazyèm ane rèy Jewoyakim+, wa peyi Jida a, Nebikadneza, wa Babilòn nan, te vin Jerizalèm e li te ansèkle l+. 2 Epi, Jewova te lage Jewoyakim, wa Jida a, nan men wa Babilòn nan+ ansanm ak kèk nan veso ki te nan kay* vrè Dye a. Wa a te pote yo ale nan peyi Babilòn*+, nan kay* dye pa l la. Li te mete veso yo nan trezò dye l la+.

3 Annapre, wa a te bay Achpenaz, ki te alatèt moun ki te nan gwo pozisyon nan palè a, lòd pou l mennen kèk nan Izrayelit yo* ba li. Pami yo, li t ap mennen Izrayelit ki sot nan fanmi wa ak nan gran fanmi+. 4 Se te dwe jèn* ki pa gen okenn domaj, ki gen bèl aparans, ki gen sajès, konesans ak bon jijman+ e ki kapab sèvi nan palè wa a. Achpenaz te gen pou l montre yo jan pou yo ekri ak jan pou yo li lang moun peyi Kalde yo. 5 Mete sou sa, wa a te di ki manje pou yo ba yo chak jou nan bon manje li konn manje ak nan diven li konn bwè. Yo te dwe ba yo fòmasyon* pandan twazan. Epi, apre twazan an, yo t ap gen pou yo kòmanse travay pou wa a.

6 Twouve, te gen kèk nan jèn sa yo ki te soti nan tribi* Jida. Te gen Dànyèl*+, Anànya*, Michayèl* ak Azarya*+. 7 Mesye ki te alatèt moun ki te nan gwo pozisyon nan palè a te ba yo lòt non*. Li te rele Dànyèl Bèltechaza+, li te rele Anànya Chadrak, li te rele Michayèl Mechak e li te rele Azarya Abèdnego+.

8 Men, Dànyèl te byen deside nan kè l pou l pa kontamine tèt li ak bon manje wa a te konn manje ansanm ak diven li te konn bwè. Se sa k fè li te mande mesye ki te alatèt moun ki nan gwo pozisyon nan palè a pèmisyon pou l pa kontamine tèt li ak bagay sa yo. 9 Epi, vrè Dye a te fè mesye ki te alatèt moun ki nan gwo pozisyon nan palè a fè Dànyèl favè* e li te fè l gen pitye pou li+. 10 Men, mesye ki te alatèt moun ki nan gwo pozisyon nan palè a te di Dànyèl: “Mwen pè wa a, mèt mwen an, ki di ki manje ak ki bwason pou nou ban nou. Bon, e si l ta wè nou parèt pi mal pase lòt jèn* ki gen menm laj avè n yo? Nou t ap fè wa a lage chay la sou mwen*.” 11 Men, mesye ki te alatèt moun ki nan gwo pozisyon nan palè a te met yon moun veye sou Dànyèl, Anànya, Michayèl ak Azarya, e Dànyèl te di moun ki t ap veye sou yo a: 12 “Tanpri, fè yon tès sou nou menm, sèvitè w yo, pandan dis jou. Fè yo ban nou legim* pou nou manje ak dlo pou nou bwè. 13 Apre sa, konpare nou ak lòt jèn* k ap manje nan bon manje wa a, epi w a aji ak sèvitè w yo selon sa w wè.”

14 Vrèmanvre, li te aksepte sa yo di l la e li te fè yon tès sou yo pandan dis jou. 15 Lè dis jou yo fini, yo te parèt pi anfòm e yo te pi an sante* pase tout lòt jèn* ki t ap manje nan bon manje wa a. 16 Se sa k fè mesye ki t ap veye sou yo a te kontinye ba yo legim olye l ba yo bon manje wa a te konn manje ak diven l te konn bwè. 17 Epi, vrè Dye a te bay kat jèn* sa yo konesans ak kapasite pou yo konprann tout kalite liv e li te ba yo sajès tou. Anplis, li te bay Dànyèl entèlijans pou l konprann tout kalite vizyon ak rèv+.

18 Lè moman wa Nebikadneza te mande pou yo mennen jèn yo ba li a te rive+, mesye ki te alatèt moun ki nan gwo pozisyon nan palè a te mennen yo devan wa a. 19 Lè wa a pale avèk yo, li pa t wè pèsonn nan tout gwoup la ki te tankou Dànyèl, Anànya, Michayèl ak Azarya+. Se konsa, yo te kontinye ret ap travay pou wa a. 20 Tout bagay wa a te mande yo, bagay ki te mande pou moun gen sajès ak entèlijans, wa a te wè jèn sa yo dis fwa pi fò pase tout prèt ki konn fè maji yo ansanm ak divinò+ ki te nan tout wayòm li an. 21 E Dànyèl te ret nan peyi a jis nan premye ane rèy wa Siris* la+.