Egzanp: Ezekyas

Ezekyas te gen yon gwo chwa pou l fè. Li te gen 25 an sèlman lè l te vin wa peyi Jida. Ki kalite wa li t ap ye? Èske l t ap kite move egzanp papa l, wa Ahaz, enfliyanse l? Ahaz te yon aposta e pou jis li mouri li pa t janm repanti. Li te fè pwomosyon pou fo adorasyon e li te menm boule omwen youn nan frè Ezekyas yo bay yon fo dye (2 Kwonik 28:1-4). Men, Ezekyas pa t kite move konduit papa l fè l vire do bay vrè adorasyon an, nitou li pa t santi li te kondane pou l fè menm erè papa l te fè yo. Olye de sa, Ezekyas te kontinye rete “fidèl ak Jewova”. — 2 Wa 18:6.

Èske gen youn nan paran w yo k ap pase adorasyon w ap bay Jewova a nan jwèt? Èske li maltrete w oswa li esklav yon vye defo? Si se sa, ou pa oblije fè menm bagay avè l! Ezekyas pa t kite fanmi kote l soti detwi lavi l. Anfèt, li te tèlman yon bon wa sa fè “pa t gen pèsonn tankou l pami tout moun ki te wa nan Jida yo, ni anvan l, ni apre l”. (2 Wa 18:5.) Menm jan ak Ezekyas, ou ka reyisi lavi w malgre sitiyasyon difisil fanmi w ladan l lan. Ki jan? Lè w kontinye rete “fidèl ak Jewova”.