Ki objektif Bondye gen pou nou?
LÈ W AP li jounal, lè w ap gade televizyon, oswa lè w ap koute radyo ou jwenn anpil nouvèl sou krim, lagè, ak zak teworis! Petèt w ap soufri akoz yon maladi oswa akoz yon moun pa w ki mouri.
Mande tèt ou:
Èske se sa Bondye te vle pou mwen ak fanmi m?
Ki kote m ka jwenn èd pou m fè fas ak pwoblèm mwen yo?
Èske ap janm gen lapè toutbonvre?
Labib bay bonjan repons pou kesyon sa yo.
LABIB FÈ KONNEN BONDYE PRAL FÈ ANPIL BAGAY ESTRAWÒDINÈ SOU TÈ A.
Moun pap soufri ankò, yo pap ni vyeyi, ni mouri. — Revelasyon 21:4.
“Moun ki enfim nan pye yo ap vòltije tankou jenn ti kabrit.” — Ezayi 35:6.
“Je moun ki avèg yo ap ouvri.” — Ezayi 35:5.
Moun ki mouri yo pral viv ankò. — Jan 5:28, 29.
Pa gen moun k ap malad. — Ezayi 33:24.
Tout moun sou tè a pral jwenn anpil manje. — Sòm 72:16.
BYEN PWOFITE SA LABIB ANSEYE
Li fasil pou w panse sa w li nan premye paj yo nan liv sa a se jis yon rèv yo ye. Men, Bondye pwomèt li pral fè chanjman sa yo sou tè a talè konsa, e Labib esplike ki jan l pral fè sa.
Labib fè plis pase sa. Li fè nou konnen ki sa nou bezwen fè pou nou ka gen vrè kè kontan an e li ede nou konnen fason nou kapab byen viv lavi nou. Fè yon ti reflechi pandan yon moman sou sa ki ba w enkyetid. Sa kapab gen ladan l pwoblèm lajan oswa pwoblèm fanmi, pwoblèm sante, oswa ou gen yon moun pa w ki mouri. Labib ka ede w fè fas ak pwoblèm sa yo, e li ka pote rekonfò pou ou nan repons li bay pou kesyon ki vin apre yo:
Poukisa n ap soufri?
Ki jan nou ka fè fas ak pwoblèm nou yo?
Èske fanmi nou ka gen kè kontan?
Ki sa k rive nou lè nou mouri?
Èske n ap janm rewè moun pa nou yo ki mouri?
Poukisa nou kapab sèten Bondye ap reyalize tout pwomès li fè yo?
Lefètke w ap li liv sa a, sa montre w vle konnen sa Labib anseye. Liv sa a a ap ede w. Gen kèk kesyon pou paragraf yo ki kapab ede w konprann Bib la pi byen. Plizyè milyon moun pran plezi pale de Labib ak Temwen Jewova yo. Nou espere menm bagay la pou ou tou. Nou swete Bondye beni w nan efò w ap fè pou w aprann sa Labib anseye!