Nou tout kapab kontribye pou fè yon nouvo disip
1 Yon nouvo disip se pa rezilta efò yon sèl moun. Jewova kapab itilize tout “ konpayon travay ” li yo pou l ede yon etidyan pwogrese nan domèn espirityèl (1 Kor. 3:6-9). Nou chak nou kapab ede nouvo yo non sèlman lè nou fè kòmantè ki sot nan kè nou lè nou nan reyinyon yo, men tou pa mwayen konduit nou ki bay prèv lespri Bondye ap aji nan lavi nou (Jan 13:35 ; Gal. 5:22, 23 ; Efe. 4:22, 23). Ki lòt bagay nou kapab fè pou nou ede nouvo yo ?
2 Antanke kongregasyon : Nou tout nou kapab montre nou enterese ak moun ki kòmanse asiste reyinyon yo, lè nou pran inisyativ pou nou salye yo avèk antouzyas e pou nou pale avèk yo anvan e apre reyinyon yo. Men sa yon mesye te di lè li t ap reflechi sou premye fwa li te vizite yon kongregasyon : “ Nan yon sèl jou, mwen te rankontre plis moun ki manifeste vrè lanmou pou mwen, byenke yo pa t konnen m, pase tout tan mwen te pase nan legliz mwen te leve ladan l lan. Sa te klè, mwen te jwenn laverite. ” Li te batize sèt mwa apre li te asiste premye reyinyon l.
3 Felisite etidyan an ak tout kè nou pou pwogrè espirityèl l ap fè. Èske gen yon etidyan k ap fè fas ak opozisyon ? Èske li asiste reyinyon yo regilyèman ? Èske li ranmase kouraj li pou l fè kòmantè ? Èske li enskri nan Lekòl ministè teyokratik oswa li kòmanse preche ? Felisite l pou pwogrè li fè. Sa ap fòtifye l e sa ap ankouraje l. — Pwo. 25:11.
4 Antanke kondiktè etid la : Gen kèk pwoklamatè ki konn mande lòt pwoklamatè ki egzanplè pou yo akonpaye yo lè yo pral fè etid. Konsa, yo ede etidyan an konnen frè ak sè nan kongregasyon an. Pa pran tan pou w envite etidyan an asiste reyinyon yo. Lè li kòmanse asiste reyinyon yo, fè l fè konesans ak frè ak sè yo. Èske l ap lite pou l venk yon move abitid tankou fimen ? Èske gen yon moun lakay li ki pa vle l kontinye etid la ? Petèt yon konvèsasyon ak yon lòt pwoklamatè ki te rankontre menm pwoblèm avè l e ki te rive venk yo kapab ede l. — 1 Pyè 5:9.
5 Nouvo yo bezwen pou kongregasyon an soutni yo nan domèn espirityèl. Nou tout nou kapab ede yo pwogrese si pèsonèlman nou montre yon enterè sensè pou yo.