Èske bèt yo ale nan syèl?
Repons Bib la bay
Bib la anseye pami tout kreyati ki sou tè a, se yon ti kantite moun ki prale nan syèl (Revelasyon 14:1, 3). Yo pral nan syèl pou y al dirije antanke wa e pou yo sèvi antanke prèt avèk Jezi (Lik 22:28-30; Revelasyon 5:9, 10). Bib la anseye tou, majorite moun yo pral resisite sou tè a k ap tounen yon paradi. — Sòm 37:11, 29.
Pa gen okenn kote nan Bib la yo fè konnen gen yon paradi nan syèl la pou bèt oswa pou chen nou genyen lakay nou, e gen yon bon rezon pou sa. Bèt yo pa ka fè sa ki nesesè pou yo ‘rele yo pou [y] al nan syèl la’ (Ebre 3:1). Sa ki nesesè pou yon moun jwenn privilèj sa a se chèche gen konesans sou Bondye, montre nou gen lafwa e obeyi kòmandman Bondye yo (Matye 19:17; Jan 3:16; 17:3). Se moun sèl Bondye te kreye avèk objektif pou yo viv pou toutan. — Jenèz 2:16, 17; 3:22, 23.
Pou yon moun al nan syèl la, li dwe resisite anvan (1 Korentyen 15:42). Bib la pale de plizyè moun ki te resisite (1 Wa 17:17-24; 2 Wa 4:32-37; 13:20, 21; Lik 7:11-15; 8:41, 42, 49-56; Jan 11:38-44; Travay 9:36-42; 20:7-12). Nan chak ka sa yo, se moun ki te resisite, se pa t bèt.
Èske bèt yo gen yon nanm?
Non. Bib la anseye ni bèt ni moun se nanm yo ye (Nonb 31:28). Lè Bondye te kreye Adan, li pa t ba li yon nanm men, li “vin tounen yon moun ki vivan” (Jenèz 2:7, nòt). Nanm nan gen de bagay ki konpoze l, bagay sa yo se: “Pousyè ki sot nan tè a” ak “souf lavi a.”
Èske nanm nan ka mouri?
Wi, Bib la anseye nanm nan kapab mouri (Levitik 21:11, nòt; Ezekyèl 18:20). Lè yo mouri, ni bèt yo ni moun retounen nan pousyè (Eklezyas 3:19, 20). Nou ka di ankò, yo sispann egziste.
Èske bèt yo kapab peche kont Bondye?
Non. Peche kont Bondye vle di panse, gen anvi oswa fè yon bagay ki kont prensip Bondye yo. Pou bèt yo ta peche kont Bondye, yo ta dwe deside ant sa ki byen ak sa ki mal, men yo pa gen kapasite sa a. Yo aji avèk ensten yo genyen lakay yo pandan tout vi yo (2 Pyè 2:12). Lè yo rive nan bout lavi yo, yo mouri menm lè yo pa t peche.
Èske nou gen dwa maltrete bèt yo?
Non. Bondye bay lèzòm otorite sou bèt yo men, li pa ba yo dwa pou yo maltrete bèt yo (Jenèz 1:28; Sòm 8:6-8). Bondye veye pou chak bèt jwenn sa l bezwen, menm ti zwazo yo (Jonas 4:11; Matye 10:29). Li bay sèvitè li yo lòd pou yo byen trete bèt yo. — Egzòd 23:12; Detewonòm 25:4; Pwovèb 12:10.