Poukisa Bondye mande nou pou nou priye l?

Bondye vle vin zanmi nou.

Zanmi pale youn ak lòt pou yo ka fè amitye yo vin pi solid. Menm jan an tou, Bondye mande nou pou nou pale avè l, konsa li ban nou posiblite pou n vin bon zanmi l. Men sa l di: “Nou gen pou nou rele m, pou nou vin jwenn mwen e pou nou priye m, e mwen menm m ap koute nou.” ​(Jeremi 29:12, NW). Lè nou pale ak Bondye, n ap “pwoche bò kote [l] e l ap pwoche bò kote nou”. (Jak 4:8.) Men asirans Bib la ban nou: “Jewova toupre tout moun ki rele l.” ​(Sòm 145:18, NW). Tank nou priye Bondye, se tank n ap vin gen yon pi bèl zanmitay avè l.

Bondye vle ede nou.

Men sa Jezi te di: “Kiyès nan nou la a, si pitit li mande l yon pen, k ap lonje yon wòch ba li? Oswa si l mande l yon pwason, k ap lonje yon sèpan ba li? Kidonk, si nou menm, [...] nou konnen pou nou bay pitit nou sa k bon, nou pa bezwen mande si Papa nou ki nan syèl la ap bay moun bon bagay si yo mande l!” ​(Matye 7:9-11). Wi, Bondye mande nou pou nou priye l paske “li gen sousi pou nou” e li vle ede nou (1 Pyè 5:7). Li menm mande nou pou n pale ak li sou pwoblèm nou yo. Men sa Labib di nou: “Pa enkyete nou pou anyen, men fè Bondye konnen demann nou yo nan tout bagay, pa mwayen lapriyè ak siplikasyon toutpandan n ap di l mèsi.” — Filipyen 4:6.

Lèzòm bezwen Bondye.

Espesyalis k ap etidye lòm yo rann yo kont gen plizyè santèn milyon moun ki santi yo bezwen priye Bondye. Pami moun sa yo, menm gen moun ki ate ak moun ki agnostika. Sa montre vrèman Bondye kreye lèzòm ak yon bezwen espirityèl. Jezi te di: “Byennere moun ki pran konsyans yo bezwen Bondye.” ​(Matye 5:3). Youn nan fason nou ka konble bezwen sa a se lè nou pale souvan ak Bondye.

Si nou aksepte pou nou priye Bondye, jan l mande sa a, ki byenfè nou ka jwenn?