Repons kesyon w yo

◼ Ki jan nou ta dwe konsidere travay nou gen pou n fè nan kongregasyon an ?

Se grasa efò sèvitè Jewova yo fè nan tèt ansanm ki fè kongregasyon yo kontinye ap fonksyone nan lòd (1 Kor. 14:33, 40). Reflechi sou tout travay ki gen pou fèt nan okazyon yon sèl reyinyon. Anplis de pwogram nan li menm, gen yon bann lòt travay frè ak sè yo dwe fè anvan reyinyon an e apre reyinyon an. Tout travay yo enpòtan, menm sa moun pa wè lè y ap fè yo. Ki jan nou chak ka bay patisipasyon pa nou nan reyalizasyon travay sa yo ?

Rann nou disponib. Moun ki gen bòn volonte yo ap jwenn anpil bagay pou yo fè (Sòm 110:3). Gen sousi pou moun ki malad oswa moun ki aje yo. Bay koutmen nan netwayaj Sal Wayòm nan. Gen anpil travay nou ka fè san yo pa bezwen mande nou. Nou tou senpleman bezwen gen dezi pou nou ede.

Fè travay nou ak modesti. Moun ki modès byen kontan sèvi lòt moun (Lik 9:48). Si nou gen modesti, nou pap aksepte plis travay pase sa nou ka fè an reyalite. E anplis, modesti ap ede nou rete nan plas nou. — Pwo. 11:2.

Se pou nou diy de konfyans. Yo te ankouraje Moyiz pou l chwazi “ moun ki diy de konfyans ” pou yo okipe yon pòs responsablite ann Izrayèl (Egz. 18:21). Kalite sa a toujou enpòtan jodi a. Tout travay yo konfye w, se pou w toujou pran yo oserye (Lik 16:10). Si w pap anmezi pou w akonpli yon travay, asire w gen bonjan aranjman ki fèt pou yon lòt moun fè travay sa a nan plas ou.

Bay tout nou menm. Kretyen yo jwenn egzòtasyon pou yo travay ak tout nanm yo, menm nan aktivite pwofàn (Kol. 3:22-24). Nou gen pi plis rezon toujou pou nou travay ak tout nanm nou lè se yon travay ki pou soutni vrè adorasyon an. Menmsi yon travay parèt piti oswa ensiyifyan, lè nou fè l byen, sa bon pou kongregasyon an anpil.

Tout travay nou genyen ban nou okazyon pou nou demontre lanmou nou pou Jewova ak pou frè ak sè nou yo (Mat. 22:37-39). Nou swete nou va akonpli tout travay yo konfye nou ak fidelite.