Chèche vin pi maton nan travay predikasyon an: Se pou w yon bon patnè

Rezon ki fè sa enpòtan: Jezi te konnen enpòtans sa genyen pou yon moun gen yon patnè lè l ap preche. Se sa k fè, lè l te fè 70 disip li yo pran devan l pou y al preche a, li te voye yo de pa de (Lik 10:1). Yon patnè kapab ede moun l ap preche avè l la si moun sa a ta rankontre yon sitiyasyon difisil nan tèritwa a oswa si l pa ta konn ki sa pou l reponn moun l ap preche a (Ekl. 4:9, 10). Yon patnè ka pataje eksperyans li fè nan ministè a ak moun l ap preche avè l la, e pafwa, li ka bay yon sijesyon ki ka ede moun l ap preche avè l la vin pi maton nan travay predikasyon an (Pwo. 27:17). Li ka ankouraje l tou grasa bonjan konvèsasyon yo genyen lè y ap sot nan yon pòt pou y al nan yon lòt pòt. — Fil. 4:8.

Fason pou nou fè l:

Ou bezwen koute patnè w lan lè l ap preche (Jak 1:19). Lè l ap li yon vèsè, ou bezwen suiv nan bib ou. Sa ka fè l pi fasil pou w ede l si l ta bezwen sa.
Ou bezwen gen bon jijman pou w konnen si w dwe antre nan konvèsasyon an ak lè w dwe fè sa (Pwo. 25:11). Si w al fè etid ak yon pwoklamatè, pafwa, l ap bon pou w fè kòmantè. Sepandan, lè w ap preche kay an kay, patnè w la gendwa pi byen kontan pou w kite pou se li menm ki pale lè se tou pa l. Nòmalman, si moun nan se yon nouvo pwoklamatè oswa si l pa fin byen konnen kòman pou l reponn yon kesyon oswa yon objeksyon, l ap kontan si w ta ede l. Kidonk, kit se lè w akonpaye yon moun nan travay predikasyon kay an kay la, kit se lè w al fè vizit oswa etid avè l, pa janm koupe pawòl nan bouch li pou w pran konvèsasyon an nan men l oswa pou w pale sou yon lòt sijè.
Pataje eksperyans ou avè l. Pafwa, ou ka wè li bon pou w bay moun w ap preche avè l la yon sijesyon pou w ede l vin pi maton nan travay predikasyon an. Lè sa rive, pa ezite fè sa (Pwo. 3:27). Lè w jwenn yon bon moman, ou ka di l: “Sa w panse de prezantasyon ou sot fè a?” oswa “Èske m ka ba w yon sijesyon?” oswa “Men ki jan m eseye fè”. Pa bliye, se vre pwoklamatè yo renmen jwenn sijesyon yon lè konsa, men, si chak erè yo fè nou di yo sa, sa ka dekouraje yo.

Eseye sa a pandan mwa a:

Apre w fin patisipe nan travay predikasyon an ak yon pwoklamatè, di l ki sa l te di oswa l te fè ki te fè w santi li se yon bon patnè pou ou.