Fason Lekòl Galaad ap ede travay predikasyon an toupatou sou tè a

Chak ane, yo envite plizyè moun ki soti toupatou sou tè a ki nan sèvis aplentan espesyal pou yo asiste Lekòl Galaad nan Sant ansèyman Temwen Jewova yo ki nan Patèsonn, Nouyòk.a Lekòl sa a prepare elèv yo pou yo ka pi byen fè travay yo nan òganizasyon Jewova a. Fòmasyon sa a pèmèt yo pi byen òganize filyal yo epi bay travay predikasyon an jarèt toupatou sou tè a.

Lekòl Galaad se vrèman yon lekòl entènasyonal. Pa egzanp, an 2019, 147^yèm klas la te gen 56 elèv ki soti nan 29 peyi. Elèv ki asiste Lekòl Galaad la deja nan yon fòm sèvis aplentan espesyal, swa antanke Betelit, siveyan sikonskripsyon, misyonè oswa pyonye espesyal.

Syèj mondyal la kòmanse fè preparasyon pou resevwa elèv yo byen anvan kou yo kòmanse. Pa egzanp, depatman ki fè aranjman vwayaj nan syèj mondyal la achte tikè avyon pou elèv yo. Chak tikè pou elèv ki te sot nan lòt peyi pou asiste 147^yèm klas Lekòl Galaad la te koute anviwon 1 075 dola ameriken. Gen kèk elèv ki te soti nan zile Solomon, yo te oblije pran kat vòl pou yo rive Patèsonn epi twa vòl pou yo retounen lakay yo, antou yon vwayaj ki plis pase 35 400 kilomèt! Vòl sa yo te koute 2 300 dola ameriken pou chak elèv. Pou redui depans yo, Depatman ki responsab vwayaj la itilize yon lojisyèl ki ede yo jwenn tikè bon pri. Menm lè yo fin jwenn yon tikè, lojisyèl la kontinye chèche pandan plizyè semèn oswa plizyè mwa pou verifye si pri tikè a pa desann. Epitou, depatman an sèvi ak kredi oswa pwen yo genyen pou yo achte tikè yo.

Anpil elèv bezwen viza pou yo ale Ozetazini. Donk, Depatman legal Syèj mondyal la ede yo jwenn viza sa yo. Li koute anviwon 510 dola ameriken pou yo rive jwenn viza pou chak elèv.

Ki jan n benefisye fòmasyon elèv sa yo resevwa a? Hendra Gunawan se yon frè k ap sèvi kòm ansyen nan sidès Azi. Li nan menm kongregasyon ak yon mari ak madanm ki te gradye nan Lekòl Galaad. Men sa l di: “Anvan, kongregasyon nou an pa t gen okenn pyonye pèmanan. Men annapre, mari ak madanm ki te resevwa fòmasyon Galaad la te vini. Lefètke yo zele anpil, sa te ankouraje lòt moun nan kongregasyon an pran sèvis pyonye. Pi devan, youn nan sè nan kongregasyon nou an te menm asiste Lekòl pou evanjelizatè Wayòm nan!”

Sergio Panjaitan se yon frè k ap travay nan Betèl nan sidès Azi avèk kèk frè ak sè ki te jwenn fòmasyon Galaad. Men sa l di: “Fòmasyon yo te resevwa a se nonsèlman yon benediksyon pou yo, men li se yon benediksyon pou nou tou. Yo te aprann anpil bagay! Men, olye yo eseye fè tèt yo pase pou pi enpòtan, yo pataje sa yo te aprann nan. Sa ankouraje nou, konsa nou ka ankouraje lòt moun tou.”

Ki jan òganizasyon an rive kouvri depans lekòl sa a? Se pa mwayen ofrann moun fè pou soutni travay mondyal la e anpil moun fè ofrann sa yo sou donate.jw.org. Nou di nou mèsi anpil pou ofrann nou yo ki ede soutni lekòl sa a ki gen elèv ki soti toupatou sou tè a.