Nonb
8 Jewova pale ak Moyiz, li di l: 2 “Pale ak Arawon, di l: ‘Lè w ap limen sèt lanp yo ki sou pòtlanp lan, ou dwe mete yo yon fason pou yo klere zòn ki anfas pòtlanp lan+.’” 3 Se sa Arawon te fè. Li te limen lanp yo pou yo klere zòn ki anfas pòtlanp lan+, dapre lòd Jewova te bay Moyiz la. 4 Pou yo te fè pòtlanp lan, yo te bat lò ak yon mato pou yo ba l fòm. Ni pye pòtlanp lan ni branch li yo te fèt ak lò yo te bat ak mato pou yo bay fòm nan+. Yo te fè pòtlanp lan selon modèl Jewova te montre Moyiz nan vizyon an+.
5 Jewova pale ak Moyiz ankò, li di l: 6 “Pran Levit yo pami Izrayelit yo epi pirifye yo+. 7 Men ki jan ou dwe pirifye yo: Wouze yo ak dlo ki netwaye peche a, epi yo dwe raze tout plim sou kò yo ak razwa. Yo dwe lave rad yo e yo dwe pwòpte kò yo+. 8 Apre sa, y ap pran yon jenn towo bèf+ ak ofrann manje angren ki mache avè l la+ ki fèt ak farin bon kalite ki melanje ak luil, e w ap pran yon lòt jenn towo bèf kòm sakrifis pou peche+. 9 Epi, ou dwe prezante Levit yo devan tant reyinyon an e ou dwe fè tout Izrayelit yo rasanble+. 10 Lè w ap prezante Levit yo devan Jewova, Izrayelit yo dwe mete men yo sou Levit yo+. 11 Apre sa, Arawon dwe bay Levit yo lòd pou yo balanse devan Jewova kòm yon ofrann balanse+, epi y ap fè sèvis Jewova a+.
12 “Levit yo ap mete men yo sou tèt towo bèf yo+. Apre sa, prezante youn kòm sakrifis pou peche e lòt la kòm sakrifis pou yo boule nèt pou Levit yo ka jwenn padon+ nan men Jewova. 13 W ap fè Levit yo kanpe devan Arawon ak pitit gason l yo e w dwe ba yo lòd pou yo balanse devan Jewova kòm yon ofrann balanse. 14 Ou dwe separe Levit yo ak Izrayelit yo, e se pou mwen Levit yo ap vin ye+. 15 Apre sa, Levit yo ap vin sèvi bò tant reyinyon an. Se konsa ou dwe pirifye yo e w dwe ba yo lòd pou yo balanse devan Bondye kòm yon ofrann balanse. 16 Paske se kado yo ye, kado mwen resevwa pami Izrayelit yo, e m ap pran yo pou mwen nan plas premye pitit Izrayelit yo+. 17 Paske chak premye pitit pami Izrayelit yo se pou mwen, ni moun ni bèt+. Mwen te mete yo apa pou mwen jou m te touye tout premye pitit nan peyi Ejip yo+. 18 M ap pran Levit yo nan plas tout premye pitit Izrayelit yo. 19 M ap bay Arawon ak pitit gason l yo Levit yo kòm kado pami Izrayelit yo pou yo sèvi nan plas Izrayelit yo nan tant reyinyon an+, pou Izrayelit yo ka jwenn padon pou peche yo, yon fason pou okenn malè pa frape Izrayelit yo+ poutèt pèp Izrayèl la vin toupre kote ki sakre a.”
20 Moyiz ak Arawon ansanm ak tout pèp Izrayèl la te fè sa Bondye te di yo a ak Levit yo. Izrayelit yo te fè tout sa Jewova te bay Moyiz lòd pou l fè ak Levit yo. 21 Konsa, Levit yo te pirifye tèt yo e yo te lave rad yo+. Apre sa, Arawon ba yo lòd pou yo balanse devan Jewova kòm yon ofrann balanse+. Ansuit, Arawon fè sakrifis pou yo pou yo ka jwenn padon pou peche yo pou yo vin pwòp+. 22 Annapre, Levit yo antre pou yo fè sèvis yo nan tant reyinyon an sou lòd Arawon ak pitit gason l yo. Jan Jewova te bay Moyiz lòd pou yo fè ak Levit yo, se konsa yo te fè ak yo.
23 Kounye a, Jewova pale ak Moyiz, li di l: 24 “Men sa pou Levit yo fè: Depi yon Levit gen 25 an oswa plis, li pral travay ak gwoup moun k ap fè sèvis ki gen rapò ak tant reyinyon an. 25 Men, apre l fin gen 50 an, li pa dwe nan gwoup la e li pa dwe nan sèvis la ankò. 26 Li ka ede frè l yo ki gen responsablite nan tant reyinyon an, men li pa dwe travay ladan l. Se sa ou dwe fè anrapò ak Levit yo e anrapò ak responsablite yo genyen+.”