LESON 37
Ki sa Bib la di sou travay ak lajan?
Èske sa rive w deja ou gen pwoblèm pou w jwenn travay oswa pwoblèm lajan? Li kapab difisil pou n pran swen tèt nou e anmenmtan pou n bay Jewova adorasyon li merite a. Men, Bib la bay bonjan konsèy ki kapab ede nou.
1. Ki sa Bib la di sou travay?
Bondye vle nou pran plezi nan travay n ap fè. Bib la di: “Pa gen anyen ki pi bon pase sa, pou yon moun [...] jwenn kè kontan nan travay di li fè.” (Eklezyas 2:24). Jewova travay di. Lè n imite l nan sans sa a, nou fè kè l kontan e nou santi nou byen.
Travay enpòtan, men nou pa dwe janm ba l plis enpòtans pase adorasyon n ap bay Jewova a (Jan 6:27). Jewova pwomèt nou l ap fè nou jwenn sa nou bezwen pou n viv, depi nou bay adorasyon l lan premye plas nan lavi nou.
2. Ki bon fason nou dwe konsidere lajan?
Byenke Bib la fè konnen lajan se yon pwoteksyon, li fè konnen lajan pa bay kè kontan (Eklezyas 7:12). Se sa k fè, li ankouraje nou pou n pa renmen lajan, men pou n “kontante nou ak sa nou genyen”. (Li Ebre 13:5.) Lè n kontante nou ak sa nou genyen, sa anpeche nou bay tèt nou pwoblèm pou n ap chèche plis. Sa anpeche nou fè dèt ki pa nesesè (Pwovèb 22:7). Mete sou sa, sa anpeche nou pran nan pyèj pou n ap jwe aza oubyen pou n ap chèche mwayen pou nou fè lajan vit.
3. Ki jan nou ka byen sèvi ak lajan nou?
Jewova se yon Bondye ki donan, e nou imite l lè nou donan e nou “dispoze pataje ak lòt moun”. (1 Timote 6:18.) Nou ka byen sèvi ak lajan nou lè n fè ofrann nan kongregasyon an e lè n ede lòt moun ki nan bezwen, sitou moun k ap adore Jewova menm jan avè n yo. Se pa kantite nou bay la ki plis enterese Jewova, men se rezon ki pouse nou bay la. Lè n bay ak tout kè nou, n ap kontan e n ap fè kè Jewova kontan tou. — Li Travay 20:35.
FOUYE PLIS
Gade ki byenfè n ap jwenn lè n kenbe travay nan plas li e lè n kontante nou ak sa nou genyen.
4. Onore Jewova nan fason w travay
Amitye nou gen ak Jewova a ta dwe gen efè sou fason nou konsidere travay. Gade VIDEYO a, epi reponn kesyon ki vin apre yo:
Ki sa k te touche w nan videyo a lè w te wè fason Pyewo te konsidere travay li ak konpòtman li te genyen lè l te nan travay li?
Ki sa l te fè pou l kite travay nan plas li?
Li Kolosyen 3:23, 24, epi reponn kesyon sa a:
Poukisa fason nou konsidere travay nou enpòtan?
Travay enpòtan, men nou pa dwe janm ba l plis enpòtans pase adorasyon n ap bay Jewova a.
5. Lè n kontante nou ak sa nou genyen, sa ap bon pou nou
Anpil moun toujou ap chèche gen plis lajan, men se pa sa Bib la ankouraje n fè. Li 1 Timote 6:6-8, epi reponn kesyon sa a:
Ki sa Bib la ankouraje nou fè?
Menm lè nou pa gen anpil lajan, nou ka gen kè kontan. Gade VIDEYO a, epi reponn kesyon ki vin apre a:
Ki sa k fè fanmi sa yo gen kè kontan menm lè yo pa gen anpil lajan?
Men, gen moun ki gen anpil lajan epi ki toujou vle gen plis. Jezi te bay yon egzanp ki montre danje ki gen nan sa. Li Lik 12:15-21, epi reponn kesyon sa a:
Ki sa w te aprann nan egzanp Jezi te bay la? (Gade vèsè 15)
Li Pwovèb 10:22 ak 1 Timote 6:10 epi konpare yo. Apre sa, reponn kesyon sa yo:
Ki sa w panse ki pi enpòtan, èske se vin zanmi Jewova oubyen gen yon pakèt lajan? Poukisa?
Ki pwoblèm moun konn jwenn lè y ap kouri dèyè lajan?
6. Jewova ap pran swen nou
Lè n gen pwoblèm travay ak pwoblèm lajan, sa kapab ede nou wè si n fè Jewova konfyans. Gade VIDEYO a pou w wè sa n kapab fè lè nou gen pwoblèm sa yo, epi reponn kesyon ki vin apre yo:
Ki pwoblèm konsa ou wè frè sa a te genyen nan videyo a?
Ki sa l te fè pou l fè fas ak pwoblèm sa yo?
Li Matye 6:25-34, epi reponn kesyon sa a:
Ki sa Jewova pwomèt l ap fè pou moun ki bay adorasyon y ap ba li a premye plas nan lavi yo?
GEN MOUN KI DI: “Fòk mwen travay di pou m pran swen fanmi m, m pa ka al nan reyinyon chak semèn.”
Ki vèsè ki fè w sèten li pi bon pou w bay adorasyon w ap bay Jewova a premye plas nan lavi w?
SA W TE APRANN
Travay ak lajan enpòtan, men nou pa dwe janm kite yo anpeche nou sèvi Jewova jan nou dwe sèvi l la.
Revizyon
Ki sa k ka ede w gen yon bon pwennvi sou travay?
Sa k fè lè nou kontante nou ak sa n genyen, sa bon pou nou?
Ki jan w ka montre w kwè nan pwomès Jewova fè pou l pran swen moun k ap sèvi l yo?
APRANN PLIS
Gade pou w wè si Bib la di lajan pa bon ditou.
Gade ki jan nou ka sèvi ak lajan nou pou n fè Bondye plezi.
Èske se yon bagay ki mal pou moun jwe aza?
Gade ki sa k te ede yon mesye ki te renmen jwe aza e ki te konn vòlè chanje fason l t ap viv.
“Mwen te renmen kous cheval anpil” (Toudegad 1ye novanm 2011)