BIBLIOTECA TI INTERNET Watchtower
Watchtower
BIBLIOTECA TI INTERNET
tének
  • BIBLIA
  • PUBLICACIONES
  • TAMKUNTALÁBCHIK
  • es25 págs. 118-128
  • Diciembre

Pakwlanchij, axéʼ yab in kwaʼal i video.

Pakwlanchij, yab i ejtow ki tʼajaʼ abal ka tejwamej an video.

  • Diciembre
  • Ki exóbnaʼ an Biblia chudhél chudhél (2025)
  • Subtítulos
  • Lunes 1 a diciembre
  • Martes 2 a diciembre
  • Miércoles 3 a diciembre
  • Jueves 4 a diciembre
  • Viernes 5 a diciembre
  • Sábado 6 a diciembre
  • Domingo 7 a diciembre
  • Lunes 8 a diciembre
  • Martes 9 a diciembre
  • Miércoles 10 a diciembre
  • Jueves 11 a diciembre
  • Viernes 12 a diciembre
  • Sábado 13 a diciembre
  • Domingo 14 a diciembre
  • Lunes 15 a diciembre
  • Martes 16 a diciembre
  • Miércoles 17 a diciembre
  • Jueves 18 a diciembre
  • Viernes 19 a diciembre
  • Sábado 20 a diciembre
  • Domingo 21 a diciembre
  • Lunes 22 a diciembre
  • Martes 23 a diciembre
  • Miércoles 24 a diciembre
  • Jueves 25 a diciembre
  • Viernes 26 a diciembre
  • Sábado 27 a diciembre
  • Domingo 28 a diciembre
  • Lunes 29 a diciembre
  • Martes 30 a diciembre
  • Miércoles 31 a diciembre
Ki exóbnaʼ an Biblia chudhél chudhél (2025)
es25 págs. 118-128

Diciembre

Lunes 1 a diciembre

Neʼets ka edháj an tsemélomchik (Luc. 20:37).

¿Walám a Jehová in kwaʼal in tsap abal kin édhaʼ an atiklábchik axi tsémenek? Aníts, kom an Biblia in ulal abal a Jehová «in witʼal patal kin tʼajaʼ» (Apoc. 1:8). A Jehová in éjtowal kin ataʼ jitakits, ma in éjtowal kin ataʼ an tsemláj (1 Cor. 15:26). Waʼats kʼeʼat jantʼoj abal jaleʼ ti belál abal neʼets kin wíchbanchij in ejatal an atiklábchik axi tsémenek. Játs kom jajáʼ in éjtowal kin tʼilaʼ patal jawaʼ watʼenek. An Biblia in ulal abal a Jehová in tawnál tin bij patal an ót (Is. 40:26). A Jehová in tʼilál patal an atikláb axi tsémenek (Job 14:13; Luc. 20: 38). In éjtowal kin tʼilaʼ jantʼiniʼ játs in ey jun i atikláb, jantʼiniʼ játs in wal ani patal jawaʼ in watʼamal ti biyál. I lej belál abal a Jehová neʼets kin édhaʼ an atiklábchik axi tsémenek kom i exóbnaʼits abal in léʼ kin tʼajaʼ ani in kwaʼal an tsapláb abal kin tʼajaʼ, ani jayej kom ti biyál in édhaʼ i atiklábchik. Ti biyál, a Jehová in eyendhaʼ i atiklábchik ejtíl a Jesucristo abal kin wíchbanchij in ejatal i atiklábchik axi tsémenek. w23.04 9, 10 párrs. 7-9

Martes 2 a diciembre

Etsʼey ki eyendhaʼ i kaw axi alwaʼ abal ki exlaʼ jantʼiniʼ ku tokʼtsin (Col. 4:6).

Tam u tʼilom kʼal jun i atikláb tin kwéntaj an Biblia, ki tʼilmay kʼal i kʼayaʼtaláb ani ki tsalpay alwaʼ jawaʼ tam kaw neʼets ki eyendhaʼ. Nixéʼ in éjtowal kin tʼajaʼ abal an atikláb kin léʼnaʼ kin áynanchij ti tʼilom. Pero max jun i atikláb expidh in léʼ ti péjel, o expidh in léʼ tu ku telaʼ, yab in tomnál ki áynanchij tu tʼilom (Prov. 26:4). Walám tatáʼ a tʼajámal ti kwéntaj abal yab patal an atikláb antsanáʼ in éy, waʼats yan axi neʼets kin léʼnaʼ tu ku otsʼówiy. Tejéʼ i exobnámal abal neʼets ki batsʼuw yan i alwaʼtaláb max ki tsápnanchij ku kʼwajiy koyat ani ki koʼoy i kʼayaʼtaláb. Ka lej konchij a Jehová abal ti tólmiy abal kit kʼwajiy koyat, tam kʼeʼat i atiklábchik expidh in léʼ ti péjel o ti tsakudhaʼ. Max ka koʼoy i kʼayaʼtaláb, neʼets ka ejtow ka tʼilmay an atikláb, belits max lej pilits jantʼiniʼ u tsalpax. Max ki tokʼtsin kʼal i kʼayaʼtaláb, walám ma ka tʼajaʼ abal jun i atikláb kin wéʼ jalkʼuy in tsalápil kʼal jawaʼ in atsʼámal tin kwéntaj an ólchixchik kʼal a Jehová, o kʼal jantʼoj axi ti Biblia. Jaxtám, etsʼey «kit kʼwajiy tsʼejkakadh» abal ki tokʼtsin kʼal i tsaʼataláb ani kʼal i kʼakʼnaxtaláb (1 Ped. 3:15). Max kit kʼwajiy koyat ani ka koʼoy i kʼayaʼtaláb, neʼets ka tejwaméj abal it lej tsapik. w23.09 19 párrs. 18, 19

Miércoles 3 a diciembre

Ka koʼoy i kʼayaʼtaláb (Col. 3:12).

Ki tsuʼuw tseʼ jantʼoj axi in tejwamedhál abal jun i atikláb kʼayalidh. Kʼaʼál, yab u dhubat tsakúl. In tsápnanchal yab ka itʼixbéj tam u dhúbelits kin tʼajaʼ jun i tʼojláb (Éx. 34:6). Tsabchíl, jun i atikláb axi kʼayalidh in exlál ti aychix. Yab u tsakúl nibal u itʼixbél belits max oweyits jawaʼ kʼwajatak in aychal (Mat. 18:​26, 27). Oxchíl, an atikláb axi kʼayaʼlidh yab dhúbelom. Junchikíl walám neʼets ki yejenchij ki tʼajaʼ dhubat jun i tʼojláb. Pero in tsalpayal alwaʼ jawaʼ neʼets kin tʼajaʼ ani yab in tʼajchikal. In jolkʼál i kʼij abal kin tsalpay alwaʼ jantʼiniʼ ti neʼets kin tʼajaʼ an tʼojláb, ani yab in tʼajchikal expidh kom in léʼits kin talabédhaʼ. Tseʼchíl, an atikláb axi kʼayaʼlidh yab u tsakúl kʼal an kʼibataláb axi kʼwajat in watʼal. In tsápnanchal ka kʼwajiy kulbél ani kin áynanchij kin tʼojonchij a Jehová (Col. 1:11). Patal jitaʼ i tʼójonchal a Jehová i yéjenchal ki tejwamédhaʼ i kʼayaʼtaláb. w23.08 20, 21 párrs. 3-6

Jueves 4 a diciembre

A Jehová in tʼajál ti kwéntaj jantʼoj waʼats ti ichích (Prov. 17:3).

Lej exbadh ki tʼajaʼ ti kwéntaj jawaʼ i atsʼál ti ichích, kom a Jehová tu metʼanchal. Axéʼ in léʼ kin uluw abal a Jehová yab expidh tu metʼanchal eblimkʼij, Jajáʼ in exlál jawaʼ i atsʼál ti ichích. A Jehová tu lej kʼanidhál tam in tʼajál ti kwéntaj abal i dhayál ti ichích an exobchixtaláb axi tu pidhál. Max i kwaʼal ti ichích axéʼ xi exobchixtaláb, yab neʼets ki jilaʼ tu ku tsʼilkʼoy jawaʼ u tejwamél ban xeʼtsintaláb, nibal neʼets ki uluw i janamtaláb (Juan 4:14). Max ku utey más kʼal a Jehová, más neʼets ki kʼanidhaʼ ani neʼets ki kʼakʼnaʼ (1 Juan 5:​18, 19). Jayej neʼets ki tsápnanchij yab ki yajbédhanchij in ichích, nibal neʼets ki tsalpay ki tʼajaʼ jun i walabtaláb. Jun i epchal axi u kʼwajíl ti Croacia ani in bij Marta in atsʼálak abal kʼwajatak ti atáb kʼal jun i kidháb leʼnomtaláb. Jajáʼ in ulal: «U atsʼálak kʼibat ku jilaʼ ku tsalpay kʼal axéʼ xi kidháb leʼnomtaláb, kom u atsʼálak abal u léʼak ku tʼajaʼ. Pero, jawaʼ tin tólmiy játs ku tʼilaʼ abal yab u léʼak ku kʼibchij a Jehová». A Marta in ulal abal kʼwajiy in tsalpayal jantʼoj awits kin watʼaʼ max kin tʼajaʼ nixéʼ xi kidháb walabtaláb. Jayetsej in tomnál ki tʼajaʼ wawáʼ tam ki atsʼaʼ abal kʼwajat tu atál jun i kidháb leʼnomtaláb. w23.06 20, 21 párrs. 3, 4

Viernes 5 a diciembre

«Neʼets ku tʼokedhaʼ u bij tam ku talabedháj patal an atiklábchik axi yab tin kʼakʼnál, ani jajáʼchik kwaʼal kin exlaʼ abal nanáʼ pel in Jehová» (Ezeq. 36:23).

A Jesús in exlálak abal jawaʼ a Jehová in léʼak játs ka tʼokedhanchat in bij, kom uluwamej yan i janamtaláb tin kwéntaj Jajáʼ. Jaxtám a Jesús in exóbchij in aykolil kin konoy axéʼ tin olábil: «Tátaj, axi it kʼwajat ti éb, ka tʼokedhaʼ a bij» (Mat. 6:9). A Jesús in exlálak abal jawaʼ más exbadh játs ka tʼokedhanchat in bij a Jehová. Jajáʼ játs axi más tolmixnének abal ka tʼokedhanchat in bij a Jehová. Pero tam ti yakʼwan kʼal axi tu kʼwíynalak uchan abal kʼwajatak in lúklinchal in bij a Dios. A Jesús in exlálak abal max kin lúklinchij in bij a Jehová pel jun i walabtaláb lej púlik. Tam ti yabaye u yakʼwnalak jajáʼ kʼwájatakits lej tʼeʼpidh, kom in exlálak abal neʼetsak ka jólbiyat kʼal nixéʼ xi walabtaláb. Walám jaxtám tin atsʼálak «jun i yajal lej púlik tin ichích» okʼxidh ka yakʼwan (Luc. 22:​41-44). w24.02 11 párr. 11

Sábado 6 a diciembre

Max ka koʼoy i tsalpadhtaláb, a kʼimáʼ neʼets ka kʼwajiy alwaʼ kubat (Prov. 24:3).

Patal axi i tʼójonchal a Jehová i lej kʼanidhál i yanél, pero axi más in tomnál ki kʼanidhaʼ játs a Jehová ani a Jesús (Mat. 10:37). Belits antsanáʼ, yab neʼets ki walbaʼ i yanél ani ki uluw abal yab neʼets ki béletnaʼ kom i léʼ ki kʼakʼnaʼ a Jehová. Max i léʼ ki kulbedhaʼ a Jehová ani a Jesús, kwaʼal ki putuw kʼal i uchbíl axi i kwaʼal al i yanél (1 Tim. 5:​4, 8). Nixéʼ neʼets kin tʼajaʼ abal ku kʼwajiy más kulbél. A Jehová in exlál abal max an inik ani an mimláb axi tómkidh ka kʼanidháxin ani ka kʼakʼnaxin, neʼets ka kʼwajiychik más alwaʼ. Jayej in léʼ abal an tatalábchik kin kʼanidhaʼ ani kin exóbchij in tsakámil ani abal an tsákamchik kin bélkaʼ in tátajchik (Efes. 5:33; 6:​1, 4). Max tatáʼ pel i tsakam, max pel i tataláb o max i kʼwajat tómkidh, ka lej belaʼ abal an Biblia neʼets ti tólmiy. Yab ka tʼajaʼ jantʼoj expidh kom a tsalpayal abal játs jawaʼ tekedh, kom játs i olchinének o expidh kom játs a tsuʼtal abal in tʼajál axi kʼeʼat. Ka eyendhaʼ an publicaciones axi i kwaʼal. Tanáʼ waʼats yan i olchixtaláb abal jantʼiniʼ ki eyendhaʼ an tsalpadh kaw axi kʼwajat ti Biblia. w23.08 28 párrs. 6, 7

Domingo 7 a diciembre

Ka ajiy ani ka tsalpay akal ani kʼicháj kʼal jawaʼ a ajiyal. Antsanáʼ neʼets ka bélkaʼ jawaʼ dhuchadh, neʼets ki kʼalej alwaʼ ta ejatal ani neʼets ka tejwamédhaʼ i tsalpadhtaláb (Jos. 1:8).

Lej alwaʼ abal an epchalchik mimláb axi tsakamej kin exóbnaʼ kin tʼajaʼ pílchik i tʼojláb. Jawaʼ ka exóbnaʼ ka tʼajaʼ xowéʼ neʼets ka lej eyan abal más talbél. Jun i tʼiplab, a éjtowal ka exóbnaʼ tit ajum ani tit dhuchum alwaʼ. Al talchik i kwenchaláb an atiklábchik in tsalpayal abal an mimláb yab in yéjenchal kin exóbnaʼ ti ajum ani ti dhuchum. Pero patal axi in kʼakʼnál a Jehová in yéjenchal kin exlaʼ ti ajum ani ti dhuchum (1 Tim. 4:13). Jaxtám yab jitaʼ in tomnál ti kʼanchij ka exóbnaʼ. ¿Jaleʼ ti lej alwaʼ ka exóbnaʼ tit ajum ani tit dhuchum? Nixéʼ neʼets ti tólmiy abal ka elaʼ jun i tʼojláb ani ka koʼoy jawaʼ a yéjenchal. Jayej neʼets ti lej tólmiy abal ka exóbnaʼ an Biblia ani ka exóbchij axi kʼeʼat. Ani jayej neʼets ti lej tólmiy abal ka exbay an Biblia, ka tsalpay kʼal jawaʼ a ajiyal ani kit utey más kʼal a Jehová (1 Tim. 4:15). w23.12 20 párrs. 10, 11

Lunes 8 a diciembre

A Jehová in exlálits jantʼiniʼ kin kʼaniy kʼal an yajchiktaláb jitats utat kʼwajat kʼal Jajáʼ (2 Ped. 2:9).

Ki konchij a Jehová tu ku tólmiy abal yab ki tʼajaʼ jawaʼ kidháb. Patal u wálbidh ani jaxtám chudhél chudhél kwaʼal ki tsápnanchij abal ki tʼajaʼ jawaʼ tekedh. A Satanás in eyendhál yan jantʼoj abal tu ku tʼajaʼ ki kʼibchij a Jehová. Jun i tʼiplab, in exál tu ku ódhnanchij i tsalápil kʼal yan jantʼoj axi waʼats abal ku kʼijidhbéj. Yan jantʼoj axi waʼats abal ku kʼijidhbéj in tʼajál abal ki koʼoy i tsalap axi kidháb, ani max wawáʼ ki koʼoy i tsalap axi kidháb, tam a Jehová tu tsuʼtal ejtíl max u luklidh, ma i éjtowal ki tʼajaʼ jun i walabtaláb axi lej kidháb (Mar. 7:​21-23; Sant. 1:​14, 15). Wawáʼ ti kwetémtal yab neʼets ki ejtow ki ataʼ jun i takaxtaláb, jaxtám i yéjenchal abal a Jehová tu ku tólmiy. A Jesús tu exóbchij abal kwaʼal ki konchij a Jehová axéʼ: «Tu ku lótoknaʼ abal yab ku kʼalej jun ti ku wálbin» (Mat. 6:13). A Jehová in léʼ tu ku tólmiy, expidh kwaʼal ki konchij. w23.05 6, 7 párrs. 15-17

Martes 9 a diciembre

Jun i tsʼaj axi dhipadh ox tin eb yab u tʼapʼtsʼinal dhubat (Ecl. 4:12).

Max tsablom in kʼanidhálchik a Jehová, yab neʼets kin atsʼaʼ kʼibat kin putuw jawaʼ u kónchinal kʼal a Jehová. Antsanáʼ neʼets kin ejtow kin watʼenchij jawákits tam kʼibataláb ani yab neʼets ka teptsin an kʼanidhomtaláb axi in kwaʼalchik. Jayej, jitaʼchik in tsápnanchal ka utey kʼal a Jehová in tsápnanchalchik kin nitsʼbiy jantʼiniʼ in ey. Ejtíl, in bájuwal kin tʼajaʼ ti kʼayaʼlidh, ti alwaʼ inik ani kin pakwlanchij axi kʼeʼatchik (Efes. 4:​32–5:1). Max an inik ani an mimláb antsanáʼ in ey, etsʼey neʼets ka waʼtsin yan i kʼanidhomtaláb. Jun i epchal axi in bij Lena, axi in neʼdhálits watʼadh 25 i támub ti tómkidh in uluw: «Yab i atsʼál kʼibat ki kʼanidhaʼ ani ki kʼakʼnaʼ jitaʼ axi in kʼanidhál a Jehová». Ki tsuʼuw jun i tʼiplab axi ti Biblia. A Jehová in takuy a José ani a María abal kin yedhaʼ a Jesús. ¿Jaleʼ walám ti takuyat jajáʼchik? A Jehová in exlálak abal u lej kʼanidhábak kʼal a José ani a María ani abal etsʼey neʼetsak kin tsápnanchij ka kʼwajiy utat kʼal Jajáʼ. w23.05 21 párrs. 3, 4

Miércoles 10 a diciembre

Ka bélkaʼ jitaʼchik ti okʼnál (Heb. 13:17).

A Jesús játs axi tu okʼnál ani jajáʼ tʼokat, pero axi in takuyámal abal tu ku ókʼnaʼ tejéʼ tsabál imbáj, jajáʼchik wálbidh. Junchikíl neʼets ki atsʼaʼ kʼibat ku bélkaxin ani más max ku konchin ki tʼajaʼ jantʼoj axi yab i kulbetnál. An abatwálej Pedro antsanáʼ tin atsʼaʼ jun a kʼicháj. Kʼal jun i ángel uchan kin kʼapuw i koʼnél axi an abatnaxtaláb in kʼal a Moisés in ulalak abal yab kwaʼalak kin kʼapuw. Pero a Pedro in uluw oxíl i kalel abal yab neʼets kin kʼapuw (Hech. 10:​9-16). A Pedro in atsʼaʼ kʼibat kin bélkaʼ axéʼ xi ít abatnaxtaláb kom jajáʼ pil jantʼiniʼ tin ujnámak kin tʼajaʼ. Pero an abatwálej Pablo bélkaxin tam ti uchan kʼal an ókʼnomchik axi ti Jerusalén abal kwaʼalak kin tejwamédhaʼ abal kʼwajatak in belkál an abatnaxtaláb. A Pablo in exlálak abal yabáts in yéjenchalak kin bélkaʼ an abatnaxtaláb axi pidhan a Moisés, pero belits antsanáʼ bélkaxin. An Biblia in ulal: «Tin aytal kʼicháj, otsits a Pablo kʼal nixéʼ xi tseʼ i inik ani in tʼajaʼchik jantʼiniʼ tin ujnám an Israel abal ka tsuʼtat ti tʼokat kʼal a Dios» (Hech. 21:​23, 24, 26). Kom a Pablo bélkaxin nixéʼ in tʼajaʼ abal an epchalchik ka kʼwajiy más junkudh (Rom. 14:​19, 21). w23.10 10 párrs. 15, 16

Jueves 11 a diciembre

Jitaʼchik in tsʼejnál a Jehová játs axi neʼets kin ejtow kin jaʼúbnaʼ (Sal. 25:14).

Tatáʼ yab a aychal abal a jaʼúb ti tsʼejnaʼ. Pero axéʼ an texto in ulal abal kwaʼal ki tsʼejnaʼ a Jehová max i léʼ ki jaʼúbnaʼ. Belits max biyálits ti tʼójonchal a Jehová, patal wawáʼ in tomnál ki tsʼejnaʼ, pero ¿jantʼoj in léʼ kin uluw axéʼ xi kaw? Jun i atikláb axi in tsʼejnál a Dios in kʼanidhál, in kʼakʼnál ani yab in léʼ kin kʼibchij. Antsanáʼ tin tʼajaʼ a Jesús, jajáʼ kʼwajiy «lej kʼakʼnax kʼal a Dios» (Heb. 5:7). A Jesús yab in tsʼejnálak a Jehová, jawaʼ in tsʼejnálak játs kin kʼibchij (Is. 11:​2, 3). Jajáʼ in lej kʼanidhálak a Jehová ani jaxtám etsʼey in léʼak kin bélkaʼ (Juan 14:​21, 31). Wawáʼ jayej i lej kʼakʼnál a Jehová ani yab i léʼ ki kʼibchij, kom Jajáʼ pel jun i Dios axi lej kʼanidhom, lej tsalpadh, lej tsapik ani etsʼey in tʼajál jawaʼ tekedh. Jayej i exlál abal Jajáʼ tu lej kʼanidhál ani abal in tsuʼtal jawaʼ i tʼajál. Max ki bélkaʼ, tam Jajáʼ u kulbél, pero max ki jékʼomnaʼ, tam i tʼajál abal ka yajbéj in ichích (Sal. 78:41; Prov. 27:11). w23.06 14 párrs. 1, 2; 15 párr. 5

Viernes 12 a diciembre

Tam tin koʼoy más in éy, in kʼadhatnaʼ tin baʼ ani in odhnaʼ tin kwetemtal kom i kʼibchij a Jehová (2 Crón. 26:16).

Tam ti an tsʼalej Uzías in kwaʼalakits yan in éy, tujey in ukʼchiyal abal pel kʼal a Jehová ti tolmiyámej abal kin bajuw yan jantʼoj. ¿Jantʼoj i exobnál? Abal yab jaykʼiʼ in tomnál ki ukʼchiy abal patal an alwaʼtaláb ani an lablixtaláb axi i bátsʼuwal, pel a Jehová tu pidhál. Yab in tomnál ki kʼadhatnaʼ ti baʼ kʼal jawaʼ i bajuwámal ki tʼajaʼ, pel a Jehová axi in tomnál ki puwénchij (1 Cor. 4:7). Kwaʼal ki koʼoy i tsaʼataláb ani ki tʼilaʼ abal patal u wálbidh. Jun i epchal axi in kwaʼal watʼadh 60 i támub in uluw axéʼ: «U tsápnanchal yab kin tsákuy tam axi más tin ólchal abal in ukʼpinének. Junchikíl u ulal o u tʼajál jantʼoj axi yab lej tekedh, pero u tsápnanchal ku boliy u belil ani ku tʼajaʼ jawaʼ tekedh». Max etsʼey ki kʼanidhaʼ a Jehová ani ki koʼoy i tsaʼataláb, neʼets ku kʼwajiy alwaʼ (Prov. 22:4). w23.09 10 párrs. 10, 11

Sábado 13 a diciembre

Ka tʼajchij in kulbétal a Dios kʼal i kʼayaʼtaláb abal ka ejtow ka batsʼuw patal an lablixtaláb axi in ulúmal abal neʼets ti pidhaʼ (Heb. 10:36).

An epchalchik axi ti kʼaʼál siglo in yejenchij kin tejwamédhaʼ i kuxudhtaláb. An epchalchik in tametnálak yan i kʼibataláb, ejtíl axi i tametnál wawáʼ xowéʼ ta kʼicháj. Talchik u ayoknábak kʼal an eyalchik axi ti Roma ani kʼal jitaʼchik in okʼnálak jun i belomtaláb. Kʼeʼatchik u kʼánchinalak kʼal in yanél kin kʼakʼnaʼ a Jehová (Mat. 10:21). Jayej kwaʼalak kin tsápnanchij abal yab kin jilaʼ ka kʼámbiyat kʼal an apóstatas, kom kʼwájatakchik in bukʼuwal i exobchixtaláb axi yab chubax (Hech. 20:​29, 30). An epchalchik in kuxuy patal axéʼ xi kʼibataláb (Apoc. 2:3). Jajáʼchik in lej tsalpay kʼal in tʼiplábil in tʼojnálil a Jehová axi ti biyál, ejtíl a Job (Sant. 5:​10, 11). Jayej jajáʼchik in lej ólonchij a Jehová abal ka pidhan i tsapláb (Hech. 4:​29-31). Ani in lej belálakchik abal neʼets ka lábliyat kʼal a Jehová max kin kuxuy an kʼibataláb. Wawáʼ jayej neʼets ki ejtow ki kuxuy max ki tsalpay ban tʼiplab in kʼal in tʼojnálil a Jehová axi kʼwajat ti Biblia ani axi kʼwajat ban publicaciones. w23.07 3 párrs. 5, 6

Domingo 14 a diciembre

Ka punuw okʼox in Éyaltal a Dios ani Jajáʼ neʼets ti pidhaʼ patal jawaʼ ka yejenchij (Mat. 6:33).

A Jehová ani a Jesús yab jaykʼiʼ neʼets tu ku jílkakay. Talbél ti ukʼpinének ani in uluw abal yab in exlál a Jesús, a Pedro koʼoy kin takuy max neʼetsak kin walbaʼ tin baʼ o neʼetsak kin áynanchij jantʼiniʼ i aykol kʼal a Cristo. A Jesús in konchamalits a Jehová abal kin tólmiy a Pedro abal yab ka tsaʼkan in bélomtal. Talbél, a Jesús in uchaʼ a Pedro abal in konchámalits a Jehová abal ka tólmiyat ani abal in lej belálak abal jajáʼ neʼetsak kin ejtow kin kanatbédhaʼ an epchalchik (Luc. 22:​31, 32). A Pedro in atsʼaʼ lej kanat tam tin tʼilaʼ an kaw axi uchan kʼal a Jesús. Wawáʼ jayej kwaʼal ki takuy yan jantʼoj ti ejatal, pero a Jehová in éjtowal kin eyendhaʼ jun i ókʼnom abal tu ku kanatbédhaʼ abal ki áynanchij ki tʼojonchij (Efes. 4:​8, 11). I exóbnaʼits abal a Jehová in tólmiy a Pedro ani axi más an abatwálej abal kin koʼoy jawaʼ más in yéjenchal. Jayetsej neʼets kin tʼajaʼ kʼal wawáʼ max ki pidhaʼ más in exbadh an kʼakʼnaxtaláb axi i pidhál a Jehová. w23.09 24, 25 párrs. 14, 15

Lunes 15 a diciembre

Axi in tólmiyal axi más pel ejtíl max in matinchal jantʼoj a Jehová, ani a Jehová neʼets kin wíchbanchij (Prov. 19:17).

A Jehová in tʼajál ti kwéntaj patal an tolmixtaláb axi i binál, belits max yab lej yan ani Jajáʼ in atsʼál ejtíl max tokʼlidh kʼal wawáʼ. Walám tatáʼ ti biyál pelak i ókʼnom o tolmix ókʼnom. A Jehová yab jaykʼiʼ neʼets kin ukʼchiy an tʼojláb axi a tʼajámal, nibal an kʼanidhomtaláb axi a tejwamédhaʼ (1 Cor. 15:58). Ani belej in tʼajál ti kwéntaj an kʼanidhomtaláb axi a tejwamedhál xowéʼ. Jawaʼ a Jehová in léʼ játs abal ki kʼanidhaʼ Jajáʼ ani an atiklábchik. Nixéʼ xi kʼanidhomtaláb neʼets ka puwey max wawáʼ ki ujnaʼ ki ajiy an Biblia, ki tsalpay kʼal jawaʼ i ajiyal ani ki ólonchij chudhél chudhél. Ani nixéʼ xi kʼanidhomtaláb neʼets ki tejwamédhaʼ tam ki aliy jantʼiniʼ ki tólmiy an epchalchik. Max ki kʼanidhaʼ más a Jehová neʼets ki ejtow ki jaʼúbnaʼ abal etsʼey. w23.07 10 párr. 11; 11 párr. 13; 13 párr. 18

Martes 16 a diciembre

I kwaʼal i kwetém uchbíl kʼal jawaʼ u kónchinal kʼal a Dios (Gál. 6:5).

Patal an epchal kwaʼal kin tákuy tin kwetémtal jantʼiniʼ ti neʼets kin béletnaʼ in ejatal. Tam neʼets ki tákuy jun i ilál, kwaʼal ki lej tʼajaʼ ti kwéntaj abal yab ki éyendhaʼ an xitsʼ ani abal yab ki batsʼuw jantʼoj tin kwéntaj an dhimantaláb (Hech. 15:20; Gál. 5:​19, 20). Pero axi más an ilál, ti kwetémtal kwaʼal ki tákuy más neʼets ki batsʼuw. Belits max wawáʼ i kwaʼalits tsalpadh jantʼoj neʼets ki tʼajaʼ, yab neʼets ki nixoknaʼ an epchalchik abal ka tsálpaxin ejtíl wawáʼ, kom ti kwetémtal neʼets ki tákuy jantʼiniʼ ti neʼets ki béletnaʼ i ejatal. Jaxtám ti lej exbadh ki tʼilaʼ axéʼ xi tseʼ i tsalap: 1) expidh in Éyaltal a Dios játs axi neʼets kin talabédhaʼ patal an yawʼláts axi waʼats (Is. 33:24); 2) kwaʼal ki tsalpay ti kwetémtal jantʼoj játs axi más neʼets tu ku tólmiy wawáʼ (Rom. 14:5); 3) yab i jólbiyal an epchalchik kʼal jawaʼ in takuyal kin tʼajaʼ, nibal i tʼajál jantʼoj kʼal axi ka ódhnanchat in tsalápil (Rom. 14:13), ani 4) i lej kʼanidhál an epchalchik ani i éxbayal abal jawaʼ más exbadh játs ku kʼwajiy junkudh ani yab ki nixoknaʼ an epchalchik abal ka tsalpaxin ejtíl wawáʼ (Rom. 14:​15, 19, 20). w23.07 24 párr. 15

Miércoles 17 a diciembre

Biyat jajáʼ kin tʼojonchij a Jehová ti nazareo, neʼets ka kʼwajiy takudh abal a Jehová (Núm. 6:8).

I exlál abal tatáʼ a pidhál yan in jalbíl an jaʼubtaláb axi a kwaʼal kʼal a Jehová ani antsanáʼ tin tʼajámal yan in tʼojnálil a Jehová ma ti biyál (Sal. 104:​33, 34). Jun i tʼiplab játs an nazareos axi u kʼwajílak ti Israel. Jajáʼchik kʼwajatak takudh abal kin tʼojonchij a Jehová ani in tʼajálak lej pilits kʼal jawaʼ in tʼajálak axi más an israelitas. An abatnaxtaláb axi pidhan an israelitas in ulalak abal jun i inik o jun i mimláb, in éjtowalak kin tʼajchij jun i voto a Jehová ani kin uluw abal in léʼak kin tʼajaʼ ti nazareo al wéʼ i kʼij (Núm. 6:​1, 2). Tam jun i israelita kin tʼajaʼ ti nazareo, kwaʼalak kin belkaʼ más i abatnaxtaláb axi yab bijchidh abal axi más an israelitas. Pero, ¿jaleʼ tin tákuyalak jun i israelita kin tʼajaʼ ti nazareo? Játs kom in lej kʼanidhálak a Jehová ani jayej kom in lej kʼákʼnanchalak a Jehová patal jawaʼ pidhnének (Deut. 6:5; 16:17). w24.02 14 párrs. 1, 2

Jueves 18 a diciembre

A Jehová in kʼanidhál an atiklábchik kʼal axi tu kʼanidháb ani u belkáb (Dan. 9:4).

Ti Biblia, an kaw putudhtaláb u eyendháb abal tam jun i atikláb in kwaʼal jun i kʼanidhomtaláb lej tsapik ani chubax. Axéʼ xi kaw u eyendháb yaníl abal ka olnáj an kʼanidhomtaláb axi a Jehová in koʼonchal in tʼojnálil. Jayej u eyendháb abal ka olnáj an kʼanidhomtaláb axi in tejwamedhál jitaʼchik in kʼakʼnál a Jehová (2 Sam. 9:​6, 7). A Jehová jayej in léʼ abal wawáʼ ku kʼwajiy putudh kʼal Jajáʼ ani nixéʼ pel jantʼoj axi etsʼey i éjtowal ki tsápnanchij ki tʼajaʼ. Antsanáʼ tin tʼajaʼ an kawlomej Daniel. A Daniel in tejwamédhaʼ tin naktal in ejatal abal in léʼak ka kʼwajiy putudh kʼal a Jehová. Pero tam tin kwaʼalak watʼadh 90 i támub, in tamétnaʼ jun i kʼibataláb lej púlik. Waʼatsak talchik i inik axi yab in koʼonchal nibal jun i kʼakʼnaxtaláb a Jehová ani in lej pojkálak a Daniel. Jaxtám júnkunchik ani in aliy jantʼiniʼ kin odhnaʼ a Daniel. Jajáʼchik in tsʼejkaʼ jun i kaw ani in tʼajaʼ abal a Darío kin punchij in firma. An abatnaxtaláb in ulalak abal yab kwaʼalak ka ólonchat nibal jun i Dios al 30 a kʼicháj. A Daniel kʼwajiy putudh kʼal a Jehová (Dan. 6:​12-15, 20-22). w23.08 5 párrs. 10-12

Viernes 19 a diciembre

Ki áynanchij ku kʼanidháxin (1 Juan 4:7).

A Jehová in léʼ abal ki áynanchij ki kʼanidhaʼ an epchalchik. Tam jun i epchal tu ku odhnaʼ kʼal in káwintal o kʼal jawaʼ kin tʼajaʼ, ki tsápnanchij abal yab ki tsalpay kidháb tin kwéntaj jajáʼ. Ki tsalpay abal yab tʼajchíl tin tʼajaʼ nixéʼ ani abal kʼwajat in tsápnanchal kin tʼajaʼ jawaʼ tekedh (Prov. 12:18). Jayetsej in tʼajál a Jehová. Jajáʼ tu lej kʼanidhál, jaxtám yab tu walbál tam ku ukʼpin ani yab u kʼwajíl tu ku tʼilchij i wálab (Sal. 103:9). Jaxtám ti lej exbadh abal wawáʼ ki nitsʼbiy a Jehová ani ki pakwlanchij an epchalchik (Efes. 4:32–5:1). Etsʼey ki tʼilaʼ abal u kʼwajílits tin taltal axéʼ an xeʼtsintaláb, jaxtám ti lej exbadh ku kʼwajiy junkudh kʼal an epchalchik. Walám ku ayoknáj ani ku báliyat ti wikʼaxteʼ, tanáʼ ti neʼets ki yéjenchij abal an epchalchik tu ku tólmiy (Prov. 17:17). w24.03 15, 16 párrs. 6, 7

Sábado 20 a diciembre

A Jehová jats axi tu béldhanchal i ejatal (Prov. 20:24).

An Biblia jayej u kaw tin kwéntaj kʼeʼatchik i tsakam axi jayej in tʼojonchij a Jehová ani in bátsʼuwchik yan i alwaʼtaláb, ejtíl a David. A David tujey in jaʼubnál a Jehová ma tin tsakamtal ani talbél in tʼajaʼ lej alwaʼ in tʼojlábil tam tin bajuw ti tsʼalej (1 Rey. 3:6; 9:​4, 5; 14:8). Ka exóbnaʼ in tʼiplábil a David, nixéʼ neʼets ti tólmiy abal ka tʼojonchij a Jehová abal etsʼey. Kʼeʼat jantʼoj axi a éjtowal ka exóbnaʼ játs in tʼiplábil a Marcos ani a Timoteo. Jajáʼchik in takuy kin tʼojonchij a Jehová ma tin tsakamtal ani in bájuwchik kin tʼajaʼ yan i tʼojláb. Kom in tʼajaʼchik nixéʼ, jaxtám kʼwajiy lej kulbél ani in bátsʼuwchik yan i alwaʼtaláb. ¿A léʼ kit kʼwajiy kulbél tam kit púwey? Neʼets ka ejtow ka bajuw nixéʼ max ka tujchij xowéʼ ka tʼajaʼ jawaʼ tekedh. Max ka jilaʼ abal a Jehová ti béldhanchij a ejatal ani yab ka tʼajaʼ jawaʼ tatáʼ a tsalpayal, Jajáʼ neʼets ti tólmiy abal ka tʼajaʼ jawaʼ tekedh. Tatáʼ a éjtowal kit kʼwajiy kulbél ani ka batsʼuw yan i alwaʼtaláb. Etsʼey ka tʼilaʼ abal a Jehová in lej kʼakʼnál patal an tsapláb axi a tʼajál abal ka tʼojonchij. Jawaʼ más alwaʼ a éjtowal ka tʼajaʼ játs ka takuy ka tʼojonchij a Jehová. w23.09 13 párrs. 18, 19

Domingo 21 a diciembre

Ka pákwlanchij a at inik max walbinének kʼal tatáʼ (Col. 3:13).

An abatwálej Pablo jayej in exlálak abal an epchalchik u ukʼpinalak. Ejtíl tam ti jajáʼ tujey ti támkunal kʼal an epchalchik axi ti Jerusalén, in tʼajaʼ ti kwéntaj abal kʼal yan i epchal u tsʼejnábak ani yabak in belálchik max a Pablo pel i aykol (Hech. 9:26). Jayej talbél in exlaʼ abal kʼal yan i epchal kʼwajatak ti kawiliyáb (2 Cor. 10:10). A Pablo jayej in tsuʼuw abal a Pedro in tʼajaʼ jantʼoj axi yab tekedh, nixéʼ awilak kin tʼajaʼ abal an epchalchik ka yajbéj in ichích (Gál. 2:​11, 12). Jayej a Pablo in lej yajnaʼ tam ti jílkakiyat kʼal a Marcos (Hech. 15:​37, 38). Kʼal patal jawaʼ in watʼaʼ a Pablo awilak kin tsalpay abal neʼets kin jilaʼ kin junkuw an epchalchik, pero yab in tʼajaʼ antsanáʼ. Jajáʼ in tsápnanchij kin jalkʼuy in tsalápil ani in áynanchij kin tʼojonchij a Jehová. ¿Kʼal jantʼoj ti tolmiyat?An abatwálej Pablo in lej kʼanidhálak an epchalchik, jaxtám yab in lej tʼajchalak ti kwéntaj tam u ukʼpinal, jawaʼ más in tʼajchij ti kwéntaj jats jawaʼ in tʼajálakchik alwaʼ. An abatwálej Pablo in lej kʼanidhálak an epchalchik, jaxtám in ejtow kin tʼajaʼ jawaʼ in ulal an texto abal axéʼ xi kʼicháj. w24.03 15 párrs. 4, 5

Lunes 22 a diciembre

Yab in tomnál in tʼojnálilchik a Dios ti wewtsíx, tokat kin kʼanidhaʼ patal an atikláb (2 Tim. 2:24).

Ban Biblia waʼats yan i tʼiplab axi in tejwamedhál abal lej exbadh ki tʼajaʼ tu kʼayaʼlidh ani ku kʼwajiy koyat. Jun i tʼiplab, tam ti a Isaac kʼalej ti kʼwajíl ti Guerar, tujey ti paʼixnáb kʼal an filisteos, jaxtám kʼwajiychik in paxkʼiyal an mom axi in tsʼejkámal in tʼojnálil a Abrahán. A Isaac yab in léʼnaʼ ti pejéx kʼal an filisteos, jaxtám kʼalej ti kʼwajíl pil ani tanáʼ in tsajaʼ kʼeʼat i mom (Gén. 26:​12-18). Pero an filisteos junílekʼij in uluw abal nixéʼchik xi mom jajáʼchik in kʼál. Belits antsanáʼ, a Isaac yab in jilaʼ abal ka atáj kʼal an tsakultaláb ani kʼwajiy koyat (Gén. 26:​19-25). ¿Kʼal jantʼoj ti tólmiyat abal ka kʼwajiy koyat belits abal u leʼnabak ka tsakudháj? A Isaac in exóbnaʼ kin tʼajaʼ ti kʼayaʼlidh kom in tsuʼtalak abal in papá ani in mamá antsanáʼ in éy. A Abrahán ani a Sara lej kʼayaʼlidhak ani koyat (1 Ped. 3:​4-6; Gén. 21:​22-34). w23.09 15 párr. 4

Martes 23 a diciembre

U tsalpayámal ku tʼajaʼ ani neʼets ku putuw (Is. 46:11).

A Jehová tu tejwamédhanchij i kʼanidhomtaláb kom in abaʼ in tsakámil tejéʼ ban Tsabál. Tam ti xeʼtsin a Jesús tejéʼ ti tsabál, jajáʼ in ólchij an atiklábchik tin kwéntaj in Éyaltal a Dios ani in bínaʼ in ejatal abal tu ku kʼaniy. An tsalap axi más exbadh axi tu ólchal an Biblia pel axéʼ: A Jehová neʼets kin eyendhaʼ in Éyaltal abal ka putun in tsalápil tejéʼ ban tsabál, tikʼelej tam neʼets ka tʼoke in bij. Nibal jantʼoj neʼets kin tʼapchij in tsalápil a Jehová. Jajáʼ in ulúmal abal neʼets kin putuw patal jawaʼ in tsalpayámal kin tʼajaʼ (Is. 46:10; Heb. 6:​17, 18). Kʼayúm kʼayúm an Tsabál neʼets ka wenkʼon ti jun i paraíso, neʼets ka tixkʼan an walabtaláb ani tam an atiklábchik neʼets kin éjtowits ka kʼwajiy abal etsʼey (Sal. 22:26). Pero a Jehová jayej neʼets kin tʼajaʼ abal ka putun kʼeʼat jantʼoj. Jajáʼ neʼets kin tʼajaʼ abal patal an atikláb ani an ángeles kin bajuw ejtíl junkats i yaneláb, ani abal patal kin bátsʼuwchik ka abatnáj kʼal Jajáʼ (Efes. 1:​8-11). Neʼets ki atsʼaʼ lej kulbél tam ki tsuʼuw jantʼiniʼ a Jehová in putuwal in tsalápil. w23.10 20 párrs. 7, 8

Miércoles 24 a diciembre

Axéʼ játs jawaʼ in ulal an Dios axi in okʼnál an ángeles, yab kit jikʼeychik kom nanáʼ etsʼey neʼets kin kʼwajiy kʼal tatáʼchik (Ageo 2:4).

Wéʼ talbél ti ulnek an judíos ti Jerusalén in koʼoychik i kʼibataláb kʼal an tumín ani kʼal an eyalchik. Jayej tujey ti tomolnáb kʼal an atiklábchik kʼal axi tu kʼwiynalak. Patal nixéʼ xi kʼibataláb in tʼajaʼ abal an judíos kin atsʼaʼ kʼibat ka tolmixin abal ka tsab tsʼejkáj an templo in kʼál a Jehová. Jaxtám a Jehová in abaʼ an kawlomej Ageo ani a Zacarías abal kin kanatbédhaʼ an judíos (Ageo 1:1; Zac. 1:1). Axéʼchik xi kawlomej in tʼajaʼchik lej alwaʼ in tʼojlábil. Pero 50 i támub talbél, an judíos in yéjenchij junílekʼij ka kanatbedháj. Jaxtám a Esdras wichiy ti Jerusalén abal kin kanatbédhaʼ an judíos ani kin tólmiy abal kin kʼakʼnaʼchik juníl a Jehová (Esd. 7:​1, 6). An judíos lej tólmiyat kʼal an kʼej kaw in kʼál a Ageo ani a Zacarías ani jayej neʼets tu ku tólmiy wawáʼ abal ki belaʼ kʼal a Jehová tam ki tamétnaʼ i kʼibataláb (Prov. 22:19). w23.11 14, 15 párrs. 2, 3

Jueves 25 a diciembre

Jawaʼ lej kʼadhpidh exbadh játs kit kʼanidháxin jun kʼal axi jun (Col. 3:14).

¿Jantʼiniʼ i éjtowal ki tejwamédhanchij an epchalchik abal i kʼanidhál? Neʼets ki tejwamédhaʼ tam i kanatbedhálchik ani tam i áynanchal ki tsáplinchij in ichích. Ani abal ki áynanchij ki tʼajaʼ nixéʼ, in yéjenchal ki yajnanchij ani ki exbay jawaʼ in atsʼálchik (1 Tes. 4:18). ¿Jantʼoj i éjtowal ki tʼajaʼ abal ki áynanchij ki kʼanidhaʼ an epchalchik? Kwaʼal ki tsápnanchij abal etsʼey ki pakwlanchij. ¿Jaleʼ ti lej exbadh ku kʼanidháxin xowéʼ ta kʼicháj? Ki tsuʼuw jantʼoj in uluw a Pedro: «Kom weʼits ka taley patal jawaʼ i tsuʼtal ban xeʼtsintaláb, jaxtám […] ka lubaʼ kit lej kʼanidháxin jun kʼal xi jun» (1 Ped. 4:​7, 8). ¿Jantʼoj neʼets ka watʼey biyat más u utel in kʼichájil a Jehová? A Jesús in uchaʼ in aykolil: «Patal an atiklábchik neʼets ti atʼaʼ kʼal tin ebál nanáʼ u bij» (Mat. 24:9). Lej exbadh ku kʼwajiy junkudh abal ki ejtow ki áynanchij ki kʼakʼnaʼ a Jehová, belits max u pojkáb. Max i kʼanidhál an epchalchik, a Satanás yab neʼets kin ejtow tu ku pilmedhaʼ kom an kʼanidhomtaláb neʼets tu ku tólmiy abal ku kʼwajiy junkudh (Filip. 2:​1, 2). w23.11 13 párrs. 18, 19

Viernes 26 a diciembre

Pél u at tʼojnal kʼal a Dios (1 Cor. 3:9).

An exobchixtaláb axi kʼwajat ti Biblia in éjtowal kin jálkʼunchij in ejatal an atiklábchik, ejtíl tam ki exóbchij an atiklábchik jitaʼ játs a Jehová ani jantʼiniʼ játs in ey. Tam an atiklábchik kin exlaʼ más tin kwéntaj an Biblia, yabáts u kʼambiyáb kʼal an janamtaláb axi in bukʼuwal a Satanás ani u tujél kin exlaʼ jantʼiniʼ játs chubax in ey a Jehová. Jajáʼchik in lej jikʼpál kin exlaʼ abal a Jehová in kwaʼal yan i tsapláb (Is. 40:26). Jayej in atsʼálchik béletnadh tam kin exlaʼ abal a Jehová etsʼey in tʼajál jawaʼ tekedh (Deut. 32:4). Jajáʼchik in bájuwal kin exbay yan jantʼoj tam kin tsuʼuw abal a Jehová lej tsalpadh (Is. 55:9; Rom. 11:33). Ani in atsʼálchik lej kanat tam kin exlaʼ abal a Jehová u lej kʼanidhom (1 Juan 4:8). Biyat más ka utey kʼal a Jehová, u tujélchik kin belaʼ abal in éjtowalchik ka kʼwajiy abal etsʼey ani abal in éjtowal kin bajuw tin tsakámil a Dios. Pel jun i alabél tʼojláb ki tólmiy an atiklábchik kin exlaʼ a Jehová ani ka utey kʼal Jajáʼ. Jayej, tam i tʼajál axéʼ xi tʼojláb i bájuwal «tu at tʼojnal» kʼal a Jehová (1 Cor. 3:5). w24.02 12 párr. 15

Sábado 27 a diciembre

Yab ka uluw abal neʼets ka tʼajaʼ jantʼoj, max yab a tsalpayal ka putuw jawaʼ a uluw (Ecl. 5:5).

Walám kʼwajat ta pidhnal jun i exobintaláb kʼal an Biblia, o walám tatáʼ it tsakamej ani a tátachik jats axi ti exobchámal tin kwéntaj a Jehová. ¿A tsalpayámal kit pujan? Walám jats an tsalap axi a kwaʼal, pero okʼox kwaʼal ka pidhaʼ a ejatal a Jehová. ¿Jantʼiniʼ i pidhál i ejatal a Jehová? Tam i tʼajchal jun i oláb. Al nixéʼ an oláb i ólchal abal expidh neʼets ki kʼakʼnaʼ Jajáʼ, ani abal neʼets ki eyendhaʼ i ejatal abal ki tʼajchij in kulbétal. Jayej i uchál abal etsʼey neʼets ki kʼanidhaʼ, ani abal neʼets ki tʼojonchij kʼal patal i ichích, kʼal patal i tsap ani kʼal patal i ejatal (Mar. 12:30). Nixéʼ xi oláb i tʼajchal ti kwetémtal, pero an pujantaláb neʼets ki tʼajaʼ tin tamét kʼeʼat i atiklábchik, kom antsanáʼ neʼets kin tʼajaʼchik ti kwéntaj abal i pidhaʼits i ejatal a Jehová. Jawaʼ i uchál a Jehová al nixéʼ xi oláb yab pel i alkʼidh kaw, wawáʼ i léʼ ki putuw kʼal jawaʼ i uchamal a Jehová, ani a Jehová jayetsej in léʼ (Ecl. 5:4). w24.03 2 párr. 2; 3 párr. 5

Domingo 28 a diciembre

Max it tómkidh inik, ka kʼanidhaʼ a kʼimádhil ani max it tómkidh uxum, a kwaʼal a uchbíl ka kʼakʼnaʼ a tomkíl (Efes. 5:33).

An Biblia tu tejwamédhanchal abal patal jitaʼ ka tomkin neʼets kin koʼoy i kʼibataláb al in yanél (1 Cor. 7:28). Axéʼ u watʼel kom tsablom wálbidhchik, jayej kom lej júnits jantʼiniʼ in ey. Walám u kʼwajílak al pílchik i bichow ani lej júnits jantʼiniʼ ti yedháj. Walám waʼats yan jantʼoj axi yab in tʼajaʼchik ti kwéntaj tam ti kʼwajatak ti exláx. Jaxtám junchikíl neʼets kin atsʼaʼchik kʼibat ka neʼdháxin alwaʼ. Jawaʼ in tomnál kin tʼajaʼchik jats kin exbay abal tin tsablóm u ukʼpinal ani abal kwaʼal ka tolmixin abal kin tsʼejkaʼchik an kʼibataláb, pero jawaʼ junchikíl in tʼajál jats kin jolchij in wálab axi jun. Ma in tsálpayal ka kʼalej ti kʼwajíl pil, o ka jilaxin. Pero, ¿walám jats in tomnál kin tʼajaʼchik? Imbáj. A Jehová in léʼ abal axi tómkidh kin pidhaʼ in jalbíl an tomkintaláb, belits max in tomkíl lej júnits jantʼiniʼ in ey. w24.03 16 párr. 8; 17 párr. 11

Lunes 29 a diciembre

An aychixtaláb neʼets ka putun kom a Dios yab u kʼambix (Rom. 5:5).

Talbél ta pujnének, an aychixtaláb axi a kwaʼal in aynanchámal ka púwey kom a exobnámal más tin kwéntaj a Jehová ani i utenek más kʼal Jajáʼ (Heb. 5:​13–6:1). Tatáʼ a tʼajámal ti kwéntaj abal chubax u putnal jawaʼ in ulal Romanos 5:​2-4, a tametnámal yan i kʼibataláb, pero a tsuʼúmal jantʼiniʼ ti tólmiyal a Jehová. Nixéʼ ti tólmiyal abal ka belaʼ más abal neʼets kin putuw jawaʼ in ulúmal. An aychixtaláb axi a kwaʼal xowéʼ kʼwajat más tsapik, kom a exlál abal neʼets ka putun jawaʼ kʼwajinek a aychal. Nixéʼ xi aychixtaláb ti tolmiyámal abal ka jalkʼuy jantʼiniʼ a ey, ejtíl, ka kʼanidhaʼ más a yanél, ka exlaʼ jantʼoj ka tʼajaʼ kʼal a ejatal ani ka eyendhaʼ alwaʼ an kʼij. An abatwálej Pablo in uluw abal max a Jehová kin batsʼuw an kʼakʼnaxtaláb axi i pidhál, neʼets ki ejtow ki koʼoy jun i aychixtaláb. Pero talbél in uluw kʼeʼat jantʼoj axi lej exbadh: in uluw abal in tomnál ki belaʼ abal nixéʼ xi aychixtaláb chubax neʼets ka putun (Rom. 15:13). w23.12 12, 13 párrs. 16-19

Martes 30 a diciembre

A Jehová neʼets tu ku tólmiy abal ku kʼwajiy alwaʼ kubat (Is. 33:6).

Max kʼwajat i tametnál jun i kʼibataláb, walám ki atsʼaʼ lej tʼeʼpidh ti ichích ani yab ki exlaʼ jantʼoj ki tʼajaʼ. Antsanáʼ jantʼiniʼ jun i barco u kwadhnal kʼal an jáʼ, jayej ti tsalápil awil ka ulits yan i tsalap axi kin tʼajaʼ ku tʼeʼpin. ¿Jantʼiniʼ tu tólmiyal a Jehová tam an tʼeʼpintaláb kʼwajat tu lej odhnál? A Jehová in ulúmal abal neʼets tu ku tólmiy abal ku kʼwajiy alwaʼ kubat, abal yab tu ku ijkaʼ an tʼeʼpintaláb (1 Ped. 5:10). Tam an barco xeʼets ban mar ani lej wipidh an ikʼ, in tujchal ka emkʼaláts. Jaxtám talchik i barcos u punchinal in okób abal yab ka tsʼeplon. In okób an barco u eynal abal yab ka lej emkʼaláts ani yab ka jikʼey jitaʼchik neʼets ban barco. Waʼats kʼeʼatchik i barcos axi más in eyendhál in okób tam neʼets ti belál. Jayétsekʼij, a Jehová neʼets tu ku tólmiy abal an kʼibataláb yab tu ku kwajlaʼ, max wawáʼ ki áynanchij ki tʼojonchij kʼal i putudhtaláb. w24.01 22 párrs. 7, 8

Miércoles 31 a diciembre

Yab in jikʼél kom u lej belál kʼal a Jehová (Sal. 56:4).

Tam ka atsʼaʼ i jikʼél ka konowiy ta báʼ: «¿Jantʼoj in tʼajámal a Jehová ma ti biyál?». Ka tsalpay kʼal jawaʼ a Jehová in tsʼejkámal. Jun i tʼiplab, belits abal an tsʼitsin ani an wits yab in éjtowal kin nitsʼbiy jantʼiniʼ játs in ey a Jehová, Jajáʼ in beletnál. Nixéʼ tu tólmiyal abal ki lej belaʼ abal a Jehová neʼets tu ku béletnaʼ wawáʼ (Mat. 6:​25-32). Kʼeʼat jantʼoj axi a éjtowal ka tʼajaʼ játs ka tsalpay jantʼiniʼ a Jehová in tolmiyámal kʼeʼat in tʼojnálil. Walám a éjtowal ka exóbnaʼ in tʼiplábil jun in tʼojnálil a Jehová axi ti biyál o kʼal jun in tʼojnálil axi xowéʼ ta kʼicháj. Kʼeʼat jantʼoj axi a éjtowal ka tʼajaʼ pel ka tsalpay jantʼiniʼ ti beletnámal a Jehová ma xowéʼ ta kʼicháj. ¿Jantʼoj in tʼajaʼ a Jehová abal ti tólmiy ka exlaʼ an chubaxtaláb? (Juan 6:44). ¿Jantʼiniʼ ti tokʼtsinchámal a olábil? (1 Juan 5:14). ¿Jantʼoj tam alwaʼtaláb a batsʼúmal chudhél chudhél kom a Jehová in binámal in tsakámil? (Efes. 1:7; Heb. 4:​14-16). w24.01 4 párr. 6; 7 párr. 17

    Publicaciones ti tének de San Luis Potosí (2010-2025)
    Ka mapuy
    Ka tujchij
    • tének
    • Ka abaʼ
    • Jawaʼ a léʼ
    • Copyright © 2025 Watch Tower Bible and Tract Society of Pennsylvania
    • Jawaʼ it konchinal ka tʼajaʼ
    • Política de Privacidad
    • Configuración de privacidad
    • JW.ORG
    • Ka tujchij
    Ka abaʼ