EXOBINTALÁB 7
I bátsʼuwal yan i alwaʼtaláb tam i ajiyal an Biblia
«¿A ejtiyal an kaw axi a ajiyal?» (HECH. 8:30).
AJATLÁB 97 Nuestra vida depende de la Palabra de Dios
JAWAʼ NEʼETS KI EXÓBNAʼa
1. ¿Jaleʼ ti ulal abal a Jesús in pidhálak yan in jalbíl an dhuchlab?
¿A TSALPAYAMAL jantʼiniʼ tu exóbchix a Jesús tam ti kʼwajiy ban tsabál? Jajáʼ etsʼey in eyendhálak an dhuchlab abal ti exóbchix ani in tʼilálak tin okʼ. Jaxtám, tam ti itekʼij ti pujan, in uluw i kaw axi kʼwajat ban dhuchlab, ani jayetsej in tʼajaʼ tam ti neʼetsakits ka tsemets (Deut. 8:3; Sal. 31:5; Luc. 4:4; 23:46).b Ban ox i támub axi a Jesús kʼwajiy ti exóbchix ban tsabál, etsʼey in eyendhaʼ an dhuchlab abal kin exóbchij an atiklábchik (Mat. 5:17, 18, 21, 22, 27, 28; Luc. 4:17-21).
A Jesús in tejwamédhaʼ abal in kulbetnálak kin exóbnaʼ an dhuchlab ani in eyendhálak tin ejatal jawaʼ in exlálak (ka tsuʼuw an párrafo 2).
2. ¿Jaleʼ ti a Jesús in exlálak lej alwaʼ an dhuchlab tam ti kʼwajatak ti yejel? (Ka tsuʼuw an dibujo axi kʼwajat ban portada).
2 A Jesús in kulbetnálak kin ajiy an dhuchlab ma tin tsakamtal ani in kulbetnálak kin atsʼaʼ tam u ajiyáb. Walám a José ani a María etsʼey in ajiyalak an dhuchlab ani Jesús in kulbetnálak kin otsʼówiy (Deut. 6:6, 7).c I lej belál abal a Jesús u kʼalelak tam sábado ban sinagoga ani in lej tʼajálak ti kwéntaj tam u ajiyábak an dhuchlab (Luc. 4:16). Talbél jayej jajáʼ in exobnálak tin kwetemtal. Jaxtám a Jesús in bajuw kin kʼanidhaʼ in káwintal a Jehová ani kin eyendhaʼ tin ejatal. Ki tsalpay kʼal jawaʼ watʼey tam ti a Jesús in kwaʼalak 12 i tamub. Jajáʼ kʼwajatak ban templo ani kʼwajatak ti tʼilom kʼal an exóbchix, jajáʼchik in lej jikʼpaʼ abal a Jesús in exbayalak yan jantʼoj (Luc. 2:46, 47, 52).
3. ¿Jantʼoj neʼets ki exóbnaʼ?
3 Max wawáʼ ki ajiy an Biblia chudhél chudhél neʼets ki ejtow ki exbay ani ki kʼanidhaʼ. ¿Jantʼoj neʼets tu ku tólmiy abal ki ejtow ki kanchij in alwáʼ tam i ajiyal an Biblia? Okʼox ki exóbnaʼ jantʼoj in uchaʼ a Jesús an escribas, an fariseos ani an saduceos. Belits abal jajáʼchik in lej ajiyalak an dhuchlab yab kʼwajatak in kánchal in alwáʼ. Ki exóbnaʼ jantʼoj játs axi in tomnálak kin tʼajaʼchik kom jayetsej in tomnál ki tʼajaʼ wawáʼ, 1) kwaʼal ki exbay jawaʼ i ajiyal, 2) ki aliy más i exobchixtaláb ti Biblia ani 3) ki tsápnanchij ki eyendhaʼ an exobchixtaláb ti ejatal.
KA TSÁPNANCHIJ KA EXBAY JAWAʼ A AJIYAL
4. Antsanáʼ jantʼiniʼ tin ulal Lucas 10:25-29, ¿jantʼoj in tomnál ki tʼajaʼ tam i ajiyal an Biblia?
4 Tam i ajiyal an Biblia i léʼ ki exbay jawaʼ i ajiyal kom expidh antsanáʼ neʼets ki kanchij in alwáʼ. Ki tʼilaʼ jantʼoj watʼey tam ti a Jesús in tʼilmay jun i inik axi in lej exlálak an dhuchlab (ka ajiy Lucas 10:25-29). An inik in konoy a Jesús jantʼoj in yéjenchalak kin tʼajaʼ abal kin batsʼuw an ejataláb abal etsʼey. Pero tam a Jesús in tʼajchij jun i konowixtaláb kom in léʼak abal ka kwetém tsalpaxin. In uchaʼ: «¿Jantʼoj tam uchbixtaláb waʼats dhuchadh? ¿Jantʼiniʼ ta exbayal?». Axéʼ xi inik in exlálak jawaʼ in ulal an dhuchlab, jaxtám in uluw abal kwaʼalak ki kʼanidhaʼ a Jehová ani an atiklábchik (Lev. 19:18; Deut. 6:5). Pero talbél axéʼ xi inik in konoy a Jesús abal jitaʼ tam atiklábchik in tomnálak kin kʼanidhaʼ. Antsanáʼ in tejwamédhaʼ abal yab in exbayalak jawaʼ in ajiyámal, jaxtám yab in exlálak jantʼiniʼ kin eyendhaʼ nixéʼ xi abatnaxtaláb.
Patal i éjtowal ki exbay más alwaʼ jawaʼ i ajiyal ban Biblia
5. ¿Jaleʼ ti lej exbadh ku oláts ani ki ajiy kʼayúm an Biblia?
5 Abal ki exbay jawaʼ in ulal an Biblia in yéjenchal ki koʼoy bíjidhits jaykʼiʼ ti neʼets ki ajiy. Waʼats yan jantʼoj axi i éjtowal ki tʼajaʼ pero jawaʼ okʼokʼol kwaʼal ki tʼajaʼ játs ki ólonchij a Jehová. I yéjenchal abal a Jehová tu ku tólmiy kʼal an espíritu santo abal ki exbay jawaʼ in ulal an Biblia. Ki konchij abal tu ku tólmiy abal i tsalápil ka kʼwajiy expidh ban ajumtaláb ani tam tikʼelej ki tujchij ki ajiy. Pero yab ki ajchikiy, ki ajiy kʼayúm abal ki exbay jawaʼ neʼets i ajiyal. Kʼeʼat jantʼoj axi i éjtowal ki tʼajaʼ játs ki ajiy kawidh o max imbáj i éjtowal ki atsʼaʼ an audios axi kʼwajat grabado, axéʼ neʼets tu ku tólmiy abal ki tsalpay kʼal jawaʼ kʼwajat i ajiyal. Antsanáʼ neʼets ki exbay jawaʼ kʼwajat i ajiyal ani neʼets ka ulits ti ichích (Jos. 1:8). Tam ku taley tu ajum ki ólonchij juníl a Jehová, ki kʼákʼnanchij kom tu pidhámal an Biblia ani ki konchij abal tu ku tólmiy abal ki eyendhaʼ ti ejatal jawaʼ i exobnámal.
¿Jaleʼ ti lej alwaʼ ki dhuchaʼ kʼal wéʼ i kaw jawaʼ i exóbnaʼ ti Biblia? (Ka tsuʼuw an párrafo 6).
6. Tam kʼwajat i ajiyal an Biblia, ¿jantʼiniʼ neʼets tu ku tólmiy max ki tʼajaʼ i konowixtaláb ani ki dhuchaʼ jawaʼ más exbadh?
6 ¿Jantʼoj más neʼets tu ku tólmiy ki exbay an ajumtaláb kʼal an Biblia? Max ki tʼajaʼ talchik i konowixtalábchik biyat u kʼwajat tu ajum. Ejtíl, ¿jitaʼ játs axi kʼwajat ti tʼilnal al axéʼ xi ajumtaláb? ¿Jitaʼ játs axi kʼwajat ti kaw? ¿Jitaʼ kʼwajat ti tʼilmayab ani jantʼoj játs axi kʼwajat ti uchnal? ¿Juʼtáj ti kʼwajat ti watʼel jawaʼ kʼwajat u ajiyal? Axéʼ xi konowixtaláb neʼets tu ku tólmiy ki kulbétnaʼ an ajumtaláb ani ki exbay jawaʼ kʼwajat i ajiyal. Kʼeʼat jantʼoj axi i éjtowal ki tʼajaʼ játs ki dhuchaʼ talchik i kaw abal ki tʼilaʼ an exobchixtaláb. Nixéʼ neʼets tu ku tólmiy abal ki exbay más alwaʼ jawaʼ kʼwajat i ajiyal ani jayej neʼets tu ku tólmiy abal etsʼey ki tʼilaʼ. Pero, ¿jantʼoj i éjtowal ki dhuchaʼ? I éjtowal ki dhuchaʼ an konowixtalábchik axi i tʼajaʼ ani an olchixtaláb axi i aliy, jayej i éjtowal ki dhuchaʼ an tsalapchik axi más exbadh ani ki dhuchaʼ jantʼiniʼ ti tsalpayal ki eyendhaʼ jawaʼ i exóbnaʼ. Jayej i éjtowal ki dhuchaʼ jawaʼ i atsʼaʼ tam tu kʼwajatak tu ajum. Max ki tʼajaʼ axéʼ tam kʼwajat i ajiyal an Biblia, neʼets ki atsʼaʼ abal ejtíl max a Jehová kʼwajat tu tʼilmayal.
7. ¿Jantʼoj i yéjenchal ki tʼajaʼ tam i ajiyal an Biblia? (Mateo 24:15).
7 A Jesús in léʼ abal ki exbay alwaʼ jawaʼ i ajiyal ti Biblia (ka ajiy Mateo 24:15). ¿Jantʼoj kwaʼal ki tʼajaʼ abal ki exbay alwaʼ an Biblia? Kwaʼal ki jumbiy jawaʼ i exlálits kʼal jawaʼ kʼwajat i ajiyal ani ki exbay jantʼiniʼ ti neʼets ki eyendhaʼ nixéʼ xi exobchixtaláb. Nixéʼ tu tólmiyal ki exbay i exobchixtalábchik axi yab jitakits in éjtowal kin exbay. Jun i tʼiplab, xowéʼ i bajuwámal ki exbay abal jawaʼ kʼwajat ti watʼel ban xeʼtsintaláb, in tejwamedhál abal kʼwajat ti putnal i kʼej kaw axi in uluw a Jesús, ani játs jawaʼ in tomnál ki tʼajaʼ kʼal patal jawaʼ i ajiyal ban Biblia.
8. ¿Jantʼoj i éjtowal ki tʼajaʼ abal ki exbay jawaʼ i ajiyal?
8 A Jehová jats axi tu tólmiyal ki exbay jawaʼ i ajiyal ti Biblia, jaxtám kwaʼal ki ólonchij ani ki konchij tu ku tólmiy (Prov. 2:6). Pero yab expidh kwaʼal ki ólonchij a Jehová, kwaʼal ki ajiy kʼayúm an Biblia, yab adhʼíl. Jayej ki jumbiy jawaʼ i exlálits kʼal jawaʼ kʼwajat i exóbnal, i kwaʼal yan i publicaciones abal ki ejtow ki exbay. Jun játs an Guía de estudio para los testigos de Jehová. Nixéʼchik xi publicaciones neʼets tu ku tólmiy ki exbay an tʼilabchik axi ti Biblia ani jantʼiniʼ ki eyendhaʼ ti ejatal jawaʼ kʼwajat i exobnál (Heb. 5:14). Neʼets ki kanchij más in alwáʼ max ki tsápnanchij ki exbay jawaʼ i ajiyal.
KI ALIY MÁS I EXOBCHIXTALÁB TI BIBLIA
9. ¿Jantʼoj tam exobchixtaláb yabchik in léʼak kin exbay an saduceos?
9 An saduceos in exlálak jawaʼ in ulal an boʼ i libros in kʼál an Biblia, pero yab in tsápnanchalak kin exbaychik i exobchixtaláb axi exbadh. Ki tsalpay jantʼoj in tʼajaʼ a Jesús tam ti exan ka jólbiyat kʼal an saduceos, jajáʼchik yab in belálak abal a Dios neʼets kin édhaʼ an tsemélom. Pero tam a Jesús in konoychik: «¿Yab a ajiyámalchik jawaʼ in dhuchaʼ a Moisés, abal tawnáj jajáʼ kʼal a Dios al i tsakam teʼ tam ti tʼaʼilits? Uchan a Moisés antséʼ: ‹Nanáʼits pel tin Diosil a Abrahán, ani tin Diosil a Isaac ani tin Diosil a Jacob›» (Mar. 12:18, 26). Walám an saduceos in ajiyámal yaníl axéʼ xi kaw, pero kʼal an konowixtaláb axi tʼajchin kʼal a Jesús tejwaméj abal yabchik in exbayámal jun i exobchixtaláb axi lej exbadh. ¿Jawaʼ jats axéʼ xi exobchixtaláb? Abal a Dios neʼets kin édhaʼ an tsemélom (Mar. 12:27; Luc. 20:38).d
10. ¿Jantʼoj in tomnál ki tʼajaʼ tam kʼwajat tu ajum?
10 ¿Jantʼoj i exóbnal kʼal jawaʼ a Jesús in uchaʼ an saduceos? Tu exóbchal abal kwaʼal ki lej tʼajaʼ ti kwéntaj jantʼoj tu exóbchal jun i versículo o jun i tʼilab axi ti Biblia. Yab expidh i ajiyal, i tsápnanchal ki tʼajaʼ ti kwéntaj jantʼoj tam exobchixtaláb i éjtowal ki kaldhaʼ ani jantʼoj tam tsalpadh kaw waʼats tanáʼ.
11. Kʼal jawaʼ in ulal 2 Timoteo 3:16, 17, ¿jantʼoj i éjtowal ki tʼajaʼ abal ki kaldhaʼ más i exobchixtaláb ti Biblia?
11 ¿Jantʼiniʼ i éjtowal ki kaldhaʼ más i exobchixtaláb ti Biblia? Ki tsuʼuw jantʼoj tu exóbchal 2 Timoteo 3:16, 17 (ka ajiy). Tanáʼ in ulal abal an Biblia u eynal abal tseʼ jantʼoj: abal tu ku exóbchij an chubaxtaláb, abal tu ku tsoʼóblinchij jawaʼ yab alwaʼ ti ichích, abal tu ku bolidhmédhanchij i ichích ani abal tu ku exóbchij jawaʼ bolidh. Ani axéʼ xi exobchixtaláb kʼwajat al patal an libros in kʼal an Biblia, ma ban libros axi yab lej exladh. An Biblia tu exóbchal an chubaxtaláb, tu exóbchal jawaʼ in tsalpayal kin tʼajaʼ a Jehová ani i elál yan i tsalpadh kaw abal ki eyendhaʼ ti ejatal. Jayej an Biblia tu tsoʼóblinchal jawaʼ yab alwaʼ ti ichích, ¿jantʼiniʼ tin tʼajál? Tam i ajiyal jun i tʼilab ti Biblia tu tólmiyal ki tʼajaʼ ti kwéntaj max tékedhits jawaʼ i tʼajál o max in yéjenchal ki jilaʼ ki tʼajaʼ jantʼoj, axéʼ neʼets tu ku tólmiy abal etsʼey ki bélkaʼ a Jehová. Ani, ¿jantʼiniʼ tu tólmiyal an Biblia abal ki koʼoy bolidh i ichích? Tu tólmiyal abal ki boliy o ki jalkʼuy jun i exobchixtaláb axi yab i exbayámal alwaʼ. Jun i tʼiplab, walám ban olnomtaláb ku uchan jun i exobchixtaláb axi yab tekedh ani tam ku ulits ti kʼimáʼ i tsab exobnál abal ki exbay más alwaʼ. Ani, ¿jantʼoj i yéjenchal ki tʼajaʼ abal an Biblia tu ku exóbchij jawaʼ bolidh? Ki tsuʼuw patal an exobchixtaláb axi kʼwajat ban Biblia abal ki ejtow ku tsalpaxin ejtíl a Jehová. Max ki tʼajaʼ ti kwéntaj axéʼ xi tseʼ i tolmixtaláb, tam an Biblia neʼets tu ku tólmiy ti ejatal.
KI TSÁPNANCHIJ KI EYENDHAʼ AN EXOBCHIXTALÁB TI EJATAL
12. ¿Jaleʼ ti a Jesús in konoy an fariseos max yabchik in ajiyámal an dhuchlab?
12 An fariseos in ajiyalak an dhuchlab, pero yab in tʼajálakchik abal kin exbay, ani játs jawaʼ in tejwamédhaʼ a Jesús tam ti in konoychik max yab in ajiyámal jawaʼ in dhuchaʼ a Moisés (Mat. 12:1-7).e An fariseos in jolbiy in aykolil a Jesús, kom in uluwchik abal in aykolil a Jesús yabchik in belkálak an abatnaxtaláb tin kwéntaj an sábado. Abal kin tókʼtsiychik, a Jesús in tʼilchij tsab i pejach axi kʼwajat ti Biblia. Jun kʼwajat ti Oseas. Antsanáʼ in tejwamédhaʼ a Jesús abal an fariseos yabchik in exbayámal jaleʼ ti a Jehová in binámal nixéʼ xi abatnaxtaláb. Jayej in tejwamédhaʼ abal yabchik in yájnanchalak nibal jitaʼ. An fariseos in lej ajiyalak an dhuchlab, pero yabchik in jilálak abal ka béldhanchat in ejatal. ¿Jaleʼ? Kom in lej kʼadhatnál tin baʼ ani expidh in eyendhálakchik abal kin boliy axi kʼeʼat. Ani kom yabchik in jalkʼuy in ey, yab jaykʼiʼ tin exbaychik jawaʼ in ajiyal (Mat. 23:23; Juan 5:39, 40).
13. ¿Jantʼoj kwaʼal ki tʼajaʼ tam i ajiyal an Biblia?
13 Jawaʼ a Jesús in uchaʼ an fariseos tu tejwamédhanchal abal i yéjenchal ki koʼoy i tsaʼataláb tam i ajiyal an Biblia. Ki jilaʼ abal a Jehová tu ku exóbchij ani yab ki tʼajaʼ ejtíl an fariseos. Ki tʼajaʼ ti kwéntaj jawaʼ in ulal Santiago 1:21, tanáʼ in ulal abal «ki koʼoy i tsaʼataláb ani […] ki jilaʼ abal a Dios tu ku tʼaychij ti ichích in káwintal». Tam i ajiyal an Biblia i yéjenchal ki koʼoy i tsaʼataláb ani yab ku kʼwajiy ki tsalpay jantʼiniʼ neʼets ki eyendhaʼ patal nixéʼ abal ki boliy axi kʼeʼat. Axéʼ neʼets tu ku tólmiy abal ki kʼanidhaʼ axi kʼeʼat ani ki yajnanchij.
¿Jantʼiniʼ neʼets ki exlaʼ max chubax kʼwajat tu tólmiyal an Biblia? (Ka tsuʼuw an párrafo 14).f
14. ¿Jantʼiniʼ i éjtowal ki exlaʼ max kʼwajat i eyendhál ti ejatal jawaʼ i exobnál ban Biblia? (Ka tsuʼuw an imágenes).
14 Abal ki tʼajaʼ ti kwéntaj max chubax kʼwajat tu tólmiyal an Biblia, i yéjenchal ki tsuʼuw jantʼiniʼ játs i ey. An fariseos expidh in eyendhálak jawaʼ in ulal an dhuchlab abal kin boliy ani kin jólbiychik axi kʼeʼat, pero yabchik in eyendhálak tin ejatal (Mat. 12:7). Jaxtám ki tsuʼuw jantʼoj i tsálpayal tin kwéntaj axi más. Ki tʼajaʼ talchik i konowixtaláb ti kwetémtal ejtíl axéʼ: ¿I ujnám ki tʼajaʼ ti kwéntaj jawaʼ in tʼajálchik alwaʼ, o expidh i metʼál jawaʼ yab in tʼajál alwaʼ? ¿I ujnám ki pakwlanchij axi kʼeʼat o i dhayál i lokotaláb? Jawaʼ ki tókʼtsiy kʼal axéʼ neʼets kin tejwamédhaʼ jantʼoj i atsʼál, jantʼoj i tsálpayal ani jantʼoj i tʼajál (1 Tim. 4:12, 15; Heb. 4:12).
NEʼETS KI ATSʼAʼ KULBÉL MAX KI AJIY AN BIBLIA
15. ¿Jantʼoj in tsálpayalak a Jesús tin kwéntaj an dhuchlab?
15 A Jesús in lej kʼanidhálak in káwintal a Jehová. Antsanáʼ in tejwamedhál jawaʼ in ulal an Biblia ti Salmo 40:8, tanáʼ in ulal axéʼ xi kaw tin kwéntaj a Jesús: «U lej kulbetnál tu tʼajchij a kulbétal. U dhayámal a káwintal tu ichích». Kom a Jesús in tʼajchalak in kulbétal a Jehová, in atsʼálak lej kulbél ani etsʼey in ejtow kin tʼojonchij. Wawáʼ jayej neʼets ki ejtow ki tʼojonchij a Jehová kʼal i kulbetaláb max ki ajiy an Biblia ani ki kʼanidhaʼ (Sal. 1:1-3).
16. ¿Jantʼoj a tsálpayal ka tʼajaʼ abal ka kanchij in alwáʼ an Biblia? (Ka tsuʼuw an recuadro «Jawaʼ a Jesús in uluw tu tólmiyal ki exbay jawaʼ i ajiyal»).
16 In tʼiplábil a Jesús tu tólmiyal abal ki léʼnaʼ ani ki ujnaʼ ki ajiy an Biblia, ani ki exóbnaʼ. Tam ki ajiy an Biblia, okʼox i yéjenchal ki ólonchij a Jehová. Jayej i yéjenchal ki ajiy kʼayúm, ki tʼajaʼ i konowixtalábchik ani ki dhuchaʼ jawaʼ más exbadh. Jayej, kom i léʼ ki exbay jawaʼ in ulal an Biblia, i ajiyal kʼayúm an tʼilab ani i aliyal más i olchixtaláb ban publicaciones. Ki aliy i exbadh exobchixtaláb al patal an libros axi kʼwajat ti Biblia, jayej ban tʼilabchik axi yab lej exladh. Ani max i léʼ abal an Biblia chubax tu ku tólmiy, i yéjenchal ki koʼoy i tsaʼataláb tam i ajiyal. Max ki tʼajaʼ axéʼ, neʼets ki kanchij yan in alwáʼ an Biblia ani neʼets ku utey más kʼal a Jehová (Sal. 119:17, 18; Sant. 4:8).
AJATLÁB 95 La luz brilla más cada día
a Wawáʼ i tsápnanchal ki ajiy an Biblia chudhél chudhél ani yan i atikláb jayetsej in tʼajál, pero yabchik in exbayal. Tin kʼichájil a Jesús jayetsej u watʼelak. Ki tsuʼuw jantʼoj in uchaʼ a Jesús axéʼchik xi atikláb ani ki tʼajaʼ ti kwéntaj jantʼoj i éjtowal ki tʼajaʼ wawáʼ abal ki kanchij in alwáʼ an ajumtaláb kʼal an Biblia.
b Walám tam ti a Jesús pujan, a Jehová in tʼajaʼ abal a Jesús kin tʼilaʼ patal jawaʼ in watʼamal ani in tsuʼúmal ti éb (Mat. 3:16).
c A María in exbayalak lej alwaʼ an dhuchlab, jaxtám yaníl in uluw i kaw axi kʼwajatak ban dhuchlab (Luc. 1:46-55). A José ani a María lej tsʼejwantálak ani jaxtám walám yab in kwaʼalak jun i dhuchlab tin kʼimáʼ. Pero tam u kʼalelak ban sinagoga in lej otsʼówiyalak jawaʼ u olnábak ani jaxtám in tʼilálak tin okʼ.
d Ka tsuʼuw an exobintaláb «Acérquese a Dios: ‹Él es el Dios [...] de los vivos›», in kʼál an revista An Ólchix Uw axi ti 1 a febrero ti 2013.
e Ti Mateo 19:4-6 a Jesús jayej in konoy an fariseos max yabchik in ajiyámal jawaʼ in ulal an dhuchlab. An fariseos in exlálak abal an dhuchlab in ulal abal a Jehová in tsʼejkaʼ patal jawaʼ waʼats, pero yabchik in léʼak kin bélkaʼ an abatnaxtaláb tin kwéntaj an tomkinél.
f JAWAʼ U TEJWAMÉL BAN IMÁGENES: Ban atáj tamkuntaláb an epchal axi in punuwal an videos ukʼpin yaníl, pero tam ti taley an tamkuntaláb an epchalchik in uchál abal in tʼajaʼ lej alwaʼ in tʼojlábil ani yab in tʼilchal abal ukʼpin.