¿Jaléʼ ti kwaʼal ki exlaʼ a Dios?

Abal ki tʼajaʼ ti jaʼúb a Dios, i yéjenchal ki exlaʼ. I jaʼubchik tu exlanchal i bij ani in eyendhál, ¿yab aníts? Jayetsekʼij kʼal a Dios; in léʼ ki exlanchij in bij ani ki eyendhaʼ. In bij a Dios pél Jehová (Salmo 83:18; Mateo 6:9). Jayej kwaʼal ki exlaʼ jantʼonéy in kulbetnál ani jantʼoj imbáj, jitaʼ játs in jaʼubchik ani jitaʼ imbáj. Abal ki exlaʼ alwaʼ jún i atikláb in yéjenchal i kʼij. An Biblia tu uchál abal jayetsekʼij u watʼel kʼal a Jehová, alwaʼ ki pilmedhaʼ i kʼij abal ki exlaʼ (Efesios 5:15, 16).

In jaʼubchik a Dios in tʼajál jawaʼ jajáʼ in kulbetnál. Ka tsalpay tin kwéntaj a jaʼubchik. Max tatáʼ ka odhnaʼ ani ka tʼajaʼ jawaʼ yab in kulbetnál, ¿walám kin léʼnayej kin tʼajaʼ ta jaʼúb? Imbáj ¿yab aníts? Antsanáʼ u watʼel kʼal a Dios, max i léʼ ki tʼajaʼ ti jaʼúb, kwaʼal ki tʼajaʼ jawaʼ jajáʼ in kulbetnál (Juan 4:24).

Yab patal an kʼakʼnaxtaláb tu tólmiyal ki tʼajaʼ ti jaʼúb a Dios. A Dios in kwaʼal jún in jaʼúb axi más in kʼanidhál, pél a Jesús. Jajáʼ káwin tin kwéntaj tsáb i bél. Jún pél tsʼikodh ani tanáʼ neʼets yán i atiklábchik; pero axéʼ xi bél neʼets ti kʼibeltaláb. Axi jún pél xuyat, ani tanáʼ neʼets lej wéʼ i atiklábchik; nixéʼ xi bél neʼets ti ejataláb abal etsʼey. Tám, max i léʼ ki tʼajaʼ ti jaʼúb a Dios, kwaʼal ki exlaʼ jantʼiniʼ tin léʼ ki kʼakʼnaʼ (Mateo 7:13, 14).