AJUMTALÁB 10
¿Jantʼiniʼ ti ejtowal ki exlaʼ jawaʼ játs an kʼakʼnaxtaláb axi tekedh?
1. ¿Waʼats expidh junkats i kʼakʼnaxtaláb axi tekedh?
«Kwéntaj kʼal an kawlómejchik axi u kʼambix» (MATEO 7:15, NM)
A Jesús in exóbchij in aykólilchik junkats i kʼakʼnaxtaláb axi tekedh. Axéʼ pél jantʼiniʼ jún i bél axi tu neʼdhál ti ejataláb abal etsʼey, pero yab yán axi in elál (Mateo 7:14). A Dios in léʼ ka kʼakʼnáj jantʼiniʼ tin ulal in Káwintal. Jitaʼchik in kʼakʼnál a Dios jantʼiniʼ tin ulal an Biblia, kʼwajatchik júnkudh kʼal junkats in belomtaláb. Ka ajiy Juan 4:23, 24; 14:6, NM, ani Efesios 4:4, 5.
2. ¿Jantʼoj in uluw a Jesús tin kwéntaj an kawlómejchik axi u kʼambix?
«In ulalkʼichik abal exlom kʼal a Dios, ani yab chubax kom yab in tʼajál jawaʼ a Dios in léʼ.» (TITO 1:16)
A Jesús in okʼxidh uluw abal neʼetsak ka waʼtsin i kawlómejchik axi u kʼambix ani axéʼchik neʼetsak kin atʼaxbédhaʼ an kʼakʼnaxtaláb axi tekedh. Xóʼ, yán i kʼakʼnaxtaláb in ulal abal in ólnál an chubaxtaláb, pero expidh in kʼambiyal an atiklábchik. Tám, ¿jantʼiniʼ ti ejtowal ki exlaʼ jawaʼ játs an kʼakʼnaxtaláb axi tekedh? Max ki tʼajaʼ ti kwéntaj in xeʼtsintal nixéʼ xi atiklábchik. Ka ajiy Mateo 7:13-23, NM.
3. ¿Jantʼiniʼ ti a ejtowal ka exlaʼ an belomchik axi chubax?
Ka tʼajaʼ ti kwéntaj axéʼ xi bóʼ i tʼajbiláb:
In kʼakʼnálchik an Biblia jantʼiniʼ in Káwintal a Dios. In tsápnanchal kin belkaʼ jawaʼ in ulal an Biblia ani yab in aynál in exóbchixtal i inik (Mateo 15:7-9). Jayej, in tsápnanchal kin tʼajaʼ jawaʼ in ólnál kʼimádh ti kʼimádh. Ka ajiy Juan 17:17, NM, ani 2 Timoteo 3:16, 17.
In kʼakʼnálchik in bij a Dios, Jehová. ¿Jantʼiniʼ? Jantʼiniʼ tin tʼajaʼ a Jesús. Jajáʼ in ólchij axéʼ xi bijláb an atiklábchik ani in exóbchij kin konoy ti oláb abal ka tʼokedhanchat in bij a Dios (Mateo 6:9). Tejéʼ ta kwenchál, ¿jawaʼ tam kʼakʼnaxtaláb in ólnál in bij a Dios? Ka ajiy Juan 17:26 ani Romanos 10:13, 14, NM.
In olnálchik in Eyaltal a Dios. A Jesús chích tejéʼ ti Tsabál abal kin olnaʼ an alwaʼ káw tin kwéntaj in Eyaltal a Dios. Ani in aynanchij kin tʼajaʼ ma tam ti kʼwajatakits abal ka tsemets. In Eyaltal a Dios játs expidh axi neʼets kin ejtow kin tólmiy an kʼwajílomchik (Lucas 4:43; 8:1; 23:42, 43). Jayej, a Jesús in uluw abal in aykólilchik neʼetsak kin olnaʼ in Eyaltal a Dios. ¿A tʼajámal ti kwéntaj jitaʼ játs axi u kʼalel kin olnaʼ kʼimádh ti kʼimádh in Eyaltal a Dios? Ka ajiy Mateo 24:14.
Yabchik u otsel kʼal jawaʼ in tʼajál axéʼ xi xeʼtsintaláb. Exlantál kom yabchik u otsel kʼal i política ni kʼal i pextaláb axi in dhaykʼál an atiklábchik (Juan 17:16; 18:36). Jayej yab in nitsʼbiyal in xeʼtsintal an atiklábchik axi yab in kʼakʼnál a Dios. Ka ajiy Santiago 4:4, NM.
U kʼanidháxchik. Exobchámej kʼal in Káwintal a Dios kin kʼakʼnaʼ patal an atiklábchik, bélakits max píl in káwintal o píl in wal. An kʼakʼnaxtaláb axi yab tekedh etsʼey in tolmiyámal an pextaláb, pero an belomchik axi chubax, yab in tʼajál antsanáʼ (Miqueas 4:1-3). An belomchik axi chubax in eyendhál an kʼij ani in tumínal abal kin tólmiy axi más an atiklábchik kin exlaʼ a Dios. Ka ajiy Juan 13:34, 35 ani 1 Juan 4:20.
4. ¿Chubax a ejtowal ka exlaʼ jawaʼ játs an kʼakʼnaxtaláb axi tekedh?
Aníts. Ka konówiy ta kwetémtal: ¿Jawaʼ tam kʼakʼnaxtaláb in belál, in tʼajál jawaʼ in ulal an Biblia ani in kʼakʼnál in bij a Dios? ¿Jitaʼ játschik axi in ólnál abal in Eyaltal a Dios játs expidh axi neʼets kin chiʼdhaʼ i lablixtaláb abal an kʼwajílomchik? ¿Jawaʼ tam kʼakʼnaxtaláb in tejwamedhál abal chubax u kʼanidháxchik ani yab jaykʼij u kʼalel kʼal i pextaláb? ¿A exlál tatáʼ jawaʼ játs? Ka ajiy 1 Juan 3:10-12.